عمرة في رمضان 2

الأتراك مسلمون

من أسعد الحاجات اللي شفتها في الحرم مجموعة من الأتراك ييجوا كل يوم بعد الفجر لحد الشروق يقعدوا يقرؤوا قرآن

أول مرة شفتهم من بعيد طبعا تبادر لذهني انهم بيعملوا بدعة معينة على طول أصل الواحد من كتر ما شاف أصبحت شيء عادي

لكن لما قربت منهم لقيتهم إيه واحد حافظ القرآن وبيقرا بيسمع وكلهم ماسكين مصاحف وفيه واحد قاعد بيصحح لو أخطأ
وبيقروا بالترتيب يعني بيكملوا كل يوم على الورد حاجة تفرح وكل شوية أتراك تانيين بييجوا من بعيد يقعدوا معاهم

طبعا ما تفوتنيش الفرصة الذهبية دي رحت وقعدت في وسطهم عشان آخد بركة مجلس الذكر وأكون زي الراجل الذي قال الله عز وجل فيه
"هم القوم لا يشقى بهم جليسهم"
وكنت يوميا أحاول أجلس وسطهم ولو عشر دقائق
يوم ورا يوم اتضح ان اللي بيقرا مش نفس الواحد وإن فيهم عدد من الحفاظ طبعا معظمهم بيقولوا الواو "ف" اللي هي أم ثلاث نقط

وكان فيهم شاب صوته جميل وقراءته رائعة ولابس لبس يشبه لبس الأزهريين
كان يقرأ ويقوم بعد قراءته يقف ينظر للكعبة فذهبت وتعرفت عليه واتضح أنه يعرف عربي بسيط جدا وأنهم يدرسون (كثير منهم كبار السن) فيما يشبه المدرسة الشرعية يدرسون الحديث والتفسير والقرآن وعدد منهم يحفظ القرآن كاملا

بخصوص سوء ظني في الأول انهم بيعملوا بدعة لاحظت كثيرين في أعينهم نظرة ارتياب أو استغراب لما يفعلونه وتراهم فيما بعد أيضا يحاولون الجلوس معهم ومن كل الجنسيات

وهم كانوا يجلسون إلى مابعد الشروق ثم يصلون الضحى......افتقدتهم كثيرا

أيضا أول يوم أفطر بجوارنا شاب بلجيكي ووالده ..حاول أحد السعوديين الكلام معه بالانجليزية فرفض وقال إما عربي أو بلجيكي وكان يتكلم بالعربية الفصحى الجميلة
وكنت أياما كثيرة أقابله وأسعد بالسلام عليه والسؤال عن أحواله

فسبحان من أنعم علينا بنعمة فهم كتابه وسنة نبيه وهذا اللسان العربي ونسأله سبحانه أن يعيننا على العمل بمقتضى هذا الفهم وهذا العلم

باب الحريم
موقف بقى ينرفز : ليلة قلقت وما جاليش نوم قلت انزل الحرم اتهجد ونازل بقى في قمة الروقان الساعة 2 ومع نفسي خالص
وكان أحد أصدقاءنا الله يسامحه نصحنا ان احنا نصلي في المنطقة المكيفة أفضل وأتاريهم حولوا مناطق كثير من المكيفة للحريم

أصلا الحريم بيدخلوا من نفس أبواب الرجال ما عدا المنطقة دي وفيه بعض الأبواب عليها رمز "حرمة" المهم انا فضلت اعدي على الأبواب اللي عليها رمز نساء وبعدين لما خلصوا رحت داخل لقيت الراجل راح مسكني

تعال هنا ..انت كل يوم تيجي وتعمل الحركة دي عيب عليك ياراجل انت مطوع وسيب الكلام ده لواحد زيي واتق الله أنا حاجيب لك الهيئة انت ملتزم مش عيب عليك ؟ واحد حليق زيي ممكن يعمل كدة لكن انت عيب عليك وووووووو

انا طبعا اتاخدت ...ماله ده انت بتقول ايه ياراجل انت؟ الباب مش عليه علامة..
قال لي ازاي ؟ الباب عليه علامة ربانية مش شايف الحريم جوة
قلت لا حول ولا قوة إلا بالله وقعدت اقول له اتق الله انت فاضي انت ولا مالك؟
المهم أفلت منه بأعجوبة وهو لازال يلغط بمثل هذه الاتهامات
والمهم أنا أساسا بافضل ألبس قميص وبنطلون في العمرة عشان حرية الحركة وكنت لابس تي شرت أحمر بس غامق شوية:) ..شوف بقى
ويبدو انهم قالوا له خلي بالك من الباب ده عشان فيه رجالة متربصين بالحريم اللي جوه مع إن كافة الأبواب بيدخل منها حريم ورجال بطريقة أساسا مستفزة يعني المفروض يوقفوا واحد يمنع الحريم من دخول باب الرجال

دخلت الصلاة طبعا وانا متنرفز جدا وفضل باين علي لحد بعد الشروق لحد رفيقي ما قال لي شكلك متغير فحكيت له وكنت متنرفز جدا

وكنت وانا في الصلاة أفكر في عائشة رضي الله عنها وكيف أنني أغضبني جدا هذا الاتهام الذي أنا لست منزها عنه وهو اتهام بسيط نسبة لما رميت به وهي منزهة عنه وفتحت الموبايل أقرأ حادثة الإفك وكيف أغشي عليها رضي الله عنها حين سمعت الحديث
رضي الله عنك ورحمك يا أمنا
قال ابن عبد القوي : ( وكان الإمام أحمد يكفر من تبرأ منهم ( أي الصحابة ) ومن سب عائشة أم المؤمنين ورماها مما برأها الله منه وكان يقرأ ( يعظكم الله أن تعودوا لمثله أبدا إن كنتم مؤمنين

رسالة من أمي
بينما أنا أقرأ بعد الفجر قول الله عز وجل في سورة مريم : وبرا بوالدتي ولم يجعلني جبارا شقيا
وعند انتهائي من كلمة : وبرا بوالدتي وصلتني رسالة على الموبايل فيها دعوات جميلة من أمي رعاها الله
وتلك الموافقة أعجبتني جدا وسررت بها كثيرا والله المستعان

عمرة في رمضان 1

السلام عليكم ورحمة الله وكل عام وأنتم بخير
أسأل الله أن يتقبل منا جميعا صالح الأعمال أحببت أن أسجل يوميات العمرة قبل أن أنساها

سأبدأ من النهاية بعد مارجعنا قابل رفيقي والذي عاد قبلي قال لي مفيش رمضان هنا الناس مش واخدة بالها ومفيش أي حاجة تدل على إن فيه رمضان .
طبعا هو فيه وكل حاجة بس هو معذور بعد ما كان اليوم كله رمضان وجو إيماني مشحون وطول اليوم نحن في استعداد من عبادة لعبادة وتمد إيدك كدة تشرب من ماء زمزم وتتمنى على الله الكريم الأماني
والناس كلها عايشة رمضان وما تشوفش واحدة ماشية قدامك ببنطلون وشعرها سايب في تحد لمشاعر الصائمين أو إن كانت مسلمة فهي تتحدى رب العالمين لا نطيقه ولا نستطيعه
وإيه يابني ماشية تشرب كانز أصلا أنا علبة الكانز دي ممكن أشربها في نفس واحد بس مفيش نفس وهي واخداها شارع طويل تشربها ولكنها روح التحدي والمغامرة واللعب بالنار وسيعلم الذين ظلموا أي منقلب ينقلبون (طبعا أنا أتكلم عن مشهد شفته بنفسي مش خيالي)

وبعد منظر الناس وهي خارجة من صلاة التراويح أمم وأفواج يشبه يوم الحشر ولسة العشر الأواخر الله أعلم تكون عاملة ازاي هذا العام



معذور رفيقي رجعت لقيت وضع تاني أول يوم رمضان كنت باصلي العشاء وانا سامع كلام الناس اللي واقفين على الباب مش لاقيين مكان يصلوا العشاء وبعد مارجعنا لقينا المسجد أصبح فيه أماكن ممكن تتنقل بينها ومش بس كدة دي فيه ناس بتنصرف في وسط الصلاة

نرجع بقى من البداية

مطار القاهرة
زي الفل ماحدش يقدر يقول حاجة غير بس انه تم تطوير المطار وكل مدة يتم تحسينه جدا ولكن للأسف دايما هذا التحسين يطول الكراسي يعني مافيش كراسي للانتظار والحمد لله أبناء شعبنا البسطاء افترشوا الأرض للسحور ووجدت نفسي ورفيقي المحترم عادي قاعدين على بلاط المطار الجميل نتناول الكبيبة والفراخ البانيه وفيه صور بتثبت الكلام ده
طبعا بنحمد ربنا أيضا أننا أفلتنا من الزيادة المفاجئة في أسعار التذاكر
ألف وخمسمائة جنيه زيادة مفاجئة في أسعار تذكرة العُمرة
غير كدة كل حاجة كانت سلسة جدا ولله الحمد

مطار المدينة
الحمد لله أنعم الله علينا بنعمة
السفر إلى مطار مدينة النبي صلى الله عليه وسلم حيث الهدوء والسكينة ويااااه على الراحة القلبية من أول ما تنزل المطار والتي لا يعكرها إلا واحد مصري قفز أمامنا في طابور الجوازات ومعه حزمة لا بأس بها من الجوازات لفوج مثلا فقلت لرفيقي قل له يرجع في الدور فرد عليه الرجل بمنتهى السرعة والتلقائية :ياسيدي عفا الله عما سلف

طبعا تعلمون أن سياسة الأمر الواقع دي هي اللي ماشية اليومين دول وعفا الله عما سلف

فالمهم الراجل مش يكون جاهز بقى؟ لا ده ماكانش ملأ الكروت
رحت انا بحركة خاطفة وقدمت جوازي للموظف قائلا : عفا الله عما سلف

وفي هذه اللحظة فقط تذكر الرجل كل القيم والأخلاق التي في الدنيا
لا شاطر يا شيخ.اتق الله ياشيخ. احنا صايمين.وبعدين انت لو معاك زوجتك انا ادخلك قبلي وده فوج حريم وووووومحاضرة طويلة لم أرد عليها بكلمة زيادة
وكما قال الله عز وجل: وإن يكن لهم الحق يأتوا إليه مذعنين
هي دي حياتنا يا إخواننا نتذكر القيم والأخلاق عندما تكون لصالحنا فقط
طبعا رفيقي اتكعبل بعد الراجل وظللت أنا أنتظره بالخارج مدة


مسجد الرسول صلى الله عليه وسلم
وقرة عيني وعين والموحدين صلى الله عليه وسلم نريد أن ننصر النبي صلى الله عليه وسلم باتباع سنته ومحبته والإخلاص في الاتباع له صلى الله عليه وسلم قبل أن نسعى لتحسين صورته أمام الغرب وبكل اللغات نريد لغة القلب أولا لغة القلوب لغة سمعنا وأطعنا
والحمد لله صلينا في الروضة صلاة الضحى وباقي صلوات اليوم صليناها في المسجد النبوي ولله الحمد

في الصحيحين عن عبد الله بن زيد المازني أن رسول الله صلى الله عليه وسلم قال : (ما بين بيتي ومنبري روضة من رياض الجنة) زاد البخاري من حديث أبي هريرة (ومنبري على حوضي) وفيهما من حديث ابن عمر رضي الله عنهما أن رسول الله صلى الله عليه وسلم قال: (ما بين قبري ومنبري روضة من رياض الجنة)

وفي صحيح مسلم عنه أن رسول الله صلى الله عليه وسلم قال: (صلاة في مسجدي هذا خير من ألف صلاة في غيره من المساجد إلا المسجد الحرام).

وأشرت لرفيقي إلى أحد علماء الشيعة والذي صلى معنا ثم قام يصلي بعد الصلاة مباشرة وقلت له أنهم يعيدون الصلاة بعد صلاتهم معنا وكانت صلاة المغرب ...... يعني مالهاش حل وبالفعل الراجل قام صلى ثلاث ركعات

وأنا أذكر هذه النقطة لأفتح ملفا هاما للتفكر وهو ماذا يفعل الشيعة بعيدا عنا وبعيدا عن موضوع التقريب والكلام الاستهلاكي ده
أكرر كيف يتعبد الشيعة وماهي آراؤهم فينا وفي صحابة النبي صلى الله عليه وسلم وأمهات المؤمنين(يعني أمهاتنا)
باختصار ماهو دينهم لا أسأل هذا السؤال للردود ولكن لفتح الموضوع للتفكر والبحث وإذا وصلت بعد تفكير وبحث انه عادي يعني يبقى على مسئوليتك الخاصة ورمضان كريم
اقرأ أيضا عصفور في مدينة الرسول

نكمل فيما بعد إن شاء الله