الجمعة، سبتمبر 28، 2007

عمرة في رمضان 1



السلام عليكم ورحمة الله وكل عام وأنتم بخير
أسأل الله أن يتقبل منا جميعا صالح الأعمال أحببت أن أسجل يوميات العمرة قبل أن أنساها

سأبدأ من النهاية بعد مارجعنا قابل رفيقي والذي عاد قبلي قال لي مفيش رمضان هنا الناس مش واخدة بالها ومفيش أي حاجة تدل على إن فيه رمضان .
طبعا هو فيه وكل حاجة بس هو معذور بعد ما كان اليوم كله رمضان وجو إيماني مشحون وطول اليوم نحن في استعداد من عبادة لعبادة وتمد إيدك كدة تشرب من ماء زمزم وتتمنى على الله الكريم الأماني
والناس كلها عايشة رمضان وما تشوفش واحدة ماشية قدامك ببنطلون وشعرها سايب في تحد لمشاعر الصائمين أو إن كانت مسلمة فهي تتحدى رب العالمين لا نطيقه ولا نستطيعه
وإيه يابني ماشية تشرب كانز أصلا أنا علبة الكانز دي ممكن أشربها في نفس واحد بس مفيش نفس وهي واخداها شارع طويل تشربها ولكنها روح التحدي والمغامرة واللعب بالنار وسيعلم الذين ظلموا أي منقلب ينقلبون (طبعا أنا أتكلم عن مشهد شفته بنفسي مش خيالي)

وبعد منظر الناس وهي خارجة من صلاة التراويح أمم وأفواج يشبه يوم الحشر ولسة العشر الأواخر الله أعلم تكون عاملة ازاي هذا العام



معذور رفيقي رجعت لقيت وضع تاني أول يوم رمضان كنت باصلي العشاء وانا سامع كلام الناس اللي واقفين على الباب مش لاقيين مكان يصلوا العشاء وبعد مارجعنا لقينا المسجد أصبح فيه أماكن ممكن تتنقل بينها ومش بس كدة دي فيه ناس بتنصرف في وسط الصلاة


نرجع بقى من البداية

مطار القاهرة
زي الفل ماحدش يقدر يقول حاجة غير بس انه تم تطوير المطار وكل مدة يتم تحسينه جدا ولكن للأسف دايما هذا التحسين يطول الكراسي يعني مافيش كراسي للانتظار والحمد لله أبناء شعبنا البسطاء افترشوا الأرض للسحور ووجدت نفسي ورفيقي المحترم عادي قاعدين على بلاط المطار الجميل نتناول الكبيبة والفراخ البانيه وفيه صور بتثبت الكلام ده
طبعا بنحمد ربنا أيضا أننا أفلتنا من الزيادة المفاجئة في أسعار التذاكر
ألف وخمسمائة جنيه زيادة مفاجئة في أسعار تذكرة العُمرة
غير كدة كل حاجة كانت سلسة جدا ولله الحمد

مطار المدينة

الحمد لله أنعم الله علينا بنعمة
السفر إلى مطار مدينة النبي صلى الله عليه وسلم حيث الهدوء والسكينة ويااااه على الراحة القلبية من أول ما تنزل المطار والتي لا يعكرها إلا واحد مصري قفز أمامنا في طابور الجوازات ومعه حزمة لا بأس بها من الجوازات لفوج مثلا فقلت لرفيقي قل له يرجع في الدور فرد عليه الرجل بمنتهى السرعة والتلقائية :ياسيدي عفا الله عما سلف

طبعا تعلمون أن سياسة الأمر الواقع دي هي اللي ماشية اليومين دول وعفا الله عما سلف

فالمهم الراجل مش يكون جاهز بقى؟ لا ده ماكانش ملأ الكروت
رحت انا بحركة خاطفة وقدمت جوازي للموظف قائلا : عفا الله عما سلف

وفي هذه اللحظة فقط تذكر الرجل كل القيم والأخلاق التي في الدنيا
لا شاطر يا شيخ.اتق الله ياشيخ. احنا صايمين.وبعدين انت لو معاك زوجتك انا ادخلك قبلي وده فوج حريم وووووومحاضرة طويلة لم أرد عليها بكلمة زيادة
وكما قال الله عز وجل: وإن يكن لهم الحق يأتوا إليه مذعنين
هي دي حياتنا يا إخواننا نتذكر القيم والأخلاق عندما تكون لصالحنا فقط
طبعا رفيقي اتكعبل بعد الراجل وظللت أنا أنتظره بالخارج مدة


مسجد الرسول صلى الله عليه وسلم
وقرة عيني وعين والموحدين صلى الله عليه وسلم نريد أن ننصر النبي صلى الله عليه وسلم باتباع سنته ومحبته والإخلاص في الاتباع له صلى الله عليه وسلم قبل أن نسعى لتحسين صورته أمام الغرب وبكل اللغات نريد لغة القلب أولا لغة القلوب لغة سمعنا وأطعنا
والحمد لله صلينا في الروضة صلاة الضحى وباقي صلوات اليوم صليناها في المسجد النبوي ولله الحمد

في الصحيحين عن عبد الله بن زيد المازني أن رسول الله صلى الله عليه وسلم قال : (ما بين بيتي ومنبري روضة من رياض الجنة) زاد البخاري من حديث أبي هريرة (ومنبري على حوضي) وفيهما من حديث ابن عمر رضي الله عنهما أن رسول الله صلى الله عليه وسلم قال: (ما بين قبري ومنبري روضة من رياض الجنة)

وفي صحيح مسلم عنه أن رسول الله صلى الله عليه وسلم قال: (صلاة في مسجدي هذا خير من ألف صلاة في غيره من المساجد إلا المسجد الحرام).

وأشرت لرفيقي إلى أحد علماء الشيعة والذي صلى معنا ثم قام يصلي بعد الصلاة مباشرة وقلت له أنهم يعيدون الصلاة بعد صلاتهم معنا وكانت صلاة المغرب ...... يعني مالهاش حل وبالفعل الراجل قام صلى ثلاث ركعات

وأنا أذكر هذه النقطة لأفتح ملفا هاما للتفكر وهو ماذا يفعل الشيعة بعيدا عنا وبعيدا عن موضوع التقريب والكلام الاستهلاكي ده
أكرر كيف يتعبد الشيعة وماهي آراؤهم فينا وفي صحابة النبي صلى الله عليه وسلم وأمهات المؤمنين(يعني أمهاتنا)
باختصار ماهو دينهم لا أسأل هذا السؤال للردود ولكن لفتح الموضوع للتفكر والبحث وإذا وصلت بعد تفكير وبحث انه عادي يعني يبقى على مسئوليتك الخاصة ورمضان كريم
اقرأ أيضا عصفور في مدينة الرسول

نكمل فيما بعد إن شاء الله

هناك 16 تعليقًا:

آلام وآمال يقول...

الحمد لله على سلامتك يا باشمهندس
والله بجد وحشتنا جداا الفترة اللي فاتت
لكن عزاءنا ان حضرتك كنت في اجمل مشاوير العمر

انا حبيت اسلم عليك اول واحد واقولك ربنا يتقبل منك ويرزقنا زيارة بيته الحرام

اما اروح اقرا البوست بقى

:) :)

ma_3alina يقول...

الحمد لله على سلامتك يا باشمهندس .. وتقبل الله ..
أرجو إن حضرتك ما تكونش نسيتنا في الدعاء هناك

چـِنين .... عيلة و عايزة افهم يقول...

فكرت أن أدخل و أمر فوجدت هذه التدوينة

حمداً لله على سلامتك


و أغبطك على هذه الرحلة

أسأل الله أن يعيننا على الإحسان فيما بقي من رمضان و فيما بقي من عمرنا

طال الليل يقول...

السلام عليكم
أخى الفاضل الكريم
عدت إلى التدوين بعد إنقطاع بسبب إنشغالى فوجدتك عدت فى نفس اليوم
تقبل الله منك عمرتك
التدوينة ذات شجون لكنى أود أن أتضامن معك فى موضوع النصرة بالإتباع والسمع والطاعة فى النشط والمكره وليس حين يكون الشرع فى مصلحتنا فقط كما فى صورة صاحب الجوازات الذى دللت به على توظيف القيم والأخلاق فى نيل المطلوب من سفاسف الدنيا وإتخاذ الدين مطية لبلوغ متاع الدنيا الزائل

أما فتاة الكانز فليس بيدى لها ومثيلاتها إلا الدعاء بأن يخلصنا الله وإياها من الإغترار بالدنيا وهدانا الله


وعن الشيعة لا أجد إلا لا حول ولا قوة إلا بالله

بارك الله فيك

david santos يقول...

Today nobody if can forget:

جمال عبد الناصر,

15/1/1918/ - 28/9/1970

The Great, Gamal Abdel Nasser

مهندس مصري يقول...

تقبل الله يا بشمهندس و عسى ألا تكون نسيتنا من صالح الدعاء
أما الشيعة فأنا كنت كتبت بحث عن عقيدتهم و عن فرقهم المختلفة و نتمنى من الله أن يصحح عقيدتهم و يهديهم

امام الجيل يقول...

ازيك يا فندم
حمد الله على سلامتك وتقبل الله من صالح الاعمال وجعلها فى ميزان حسناتك
وجزاك الله خيرا على تذكرى
اكرمك الله
ورزقنا مثل هذه الرحلة النورانية
التى تطهر الافئدة
وتجلى عنها مل لحق بها
وتنير القلوب
رزقنا الله حبه وحب من يحبه

عدى النهار يقول...

حمدالله على السلامة

ربنا يتقبل منك ومن الجميع

قرأت بوست عصفور فى مدينة الرسول.. حقيقى رائع. أعرف أحد العراقيين هنا وقال لى إن وجود الشيعة العراقيين فى مصر سوف يقلب مصر شيعية بعد فترة لأنهم سوف يستغلون عاطفة المصريين تجاه أهل البيت وأكد لي أن خبرتهم فى تشييع المسلمين لايستهان بها.. ربنا يستر خاصة أن موقع "المصريون" نشر منذ فترة ما أسماه خطط لنشر الشادور من خلال شراء محلات فى محافظات وأحياء معينة وعرضه فيها وطبعاً بسعر مخفض وأيضاً مساعدة طلبة المدارس من خلال مراكز دروس خصوصية مجانية أو قليلة التكلفة جداً وتنظيم رحلات للطلبة للأضرحة و.... كل ذلك تحت بند نشر التشيع

abdo يقول...

حمدالله على السلامة
ربنا يتقبل ان شاء الله
ويارب متكونش نسيتنا بالدعاء
وبعدين أنا مأكد عليك وانت فى الطائرةولا نسيت برده

sinbadadvac يقول...

السلام عليكم
و شكرا على التصيييح
انا فى انتظار التكملة علشان أعرف عملت إيه من غيرى
رفيق الرحلة
SinBad

صيد الخاطر يقول...

أستاذنا الكريم
حمدا لله على سلامتك
وربنا يتقبل منا ومنكم الصالحات
بالحق صحيح هما عملوا ايه في توسعة الحرم اللي من ناحية المسعى

Ahmed Essawy يقول...

حمدا لله على سلامتك
يا رب تقبل منك و من جميع المسلمين اعمالهم في رمضان .

رفقة عمر يقول...

حمدا لله على سلامتك
عمرة مقبوله اللهم امين
لو لم تذكرنا هناك بالدعاء
اسالك الدعاء من فضلك
جزاك الله خيرا مقدما

ابن حـجـر الـعـسـقـلانـى يقول...

حمد الله على السلامة.. و تقبل الله منك هذه "الحجة" بإذن الله

عصفور المدينة يقول...

إخواني جميا لقد تذكرت كثيرا منكم بالدعاء بأسمائهم والآخرين دعوت بعامة لأغخواني المدونين والمدونات وأوصيكم أنتم أيضا بالمثل

آلام وآمال

الله يسلمك وبارك الله فيك

ma_3alina

الله يسلمك تقبل الله منا ومنكم

چـِنين .... عيلة و عايزة افهم

أهلا بيك يا استاذة ونورتينا
الله يسلمك
ربنا يكتبها لنا جميعا

طال الليل

أخي طال الليل جزاك الله خيرا على تعليقك المتفاعل
بارك الله فيك

david santos

Welcome

مهندس مصري

جزاك الله خيرا واقرا اول التعليق
موضوع الشيعة موضوع يستحق الدراسة والانتباه كما نوه أخونا عدى النهار
وإن شاء الله أقرا بحثك


امام الجيل

إزيك يا بو حميد
جزاك الله خيرا وربنا ييسر لك

عدى النهار

الله يسلمك ياأستاذي الفاضل
وحشتنا
وجزاك الله خيرا ونرجو دوام الاهتمام بهذا الموضوع الخطير

abdo

عيب يا عبده ده كلام أنسى ازاي

sinbadadvac

وعليكم السلام يا سندباد الرحالة
فيه رحالة يشرب 2 كانز في نفس واحد يلا ربنا أمر بالستر

صيد الخاطر

الله يسلمك يا شيخنا
وتقبل الله منا ومنكم
التوسعة اللي من ناحية المسعى هي توسعة للمسعى مش للحرم وحتكون دورين ضعف المساحة
ويبدو غنهم حيشغلوها مع الحج نسبة كبيرة خلصت

Ahmed Essawy

أستاذ أحمد منورنا أول مرة تعلق وبارك الله فيك وتقبل الله منا ومنكم

رفقة عمر

الله يسلمك يا أستاذة والله يا بنتي دعيت لك
تقبل الله منا ومنكم

ابن حـجـر الـعـسـقـلانـى

الإمام بحاله عندنا يا مرحبا بارك الله فيك أول مرة تعلق عندي صح؟
لسة عليك تعليقات كثييييير
:)
ربنا يبارك فيك وربنا يتقبل ويجعلها بثواب حجة زي مانت قلت وزي نص الحديث

ro7 يقول...

عارف يا استازنا بحس احساس غريب
ان مكة دخولها اسهل بكتير وامرها يسير جدا عن دخول المدينة بحس ان دخول الشخص للمدينة وعدد ساعاتة فيها بحسب قدره عند الله سبحانه وتعالي مش عارفة بس بجد بحس كدة هدؤ وسكينة وروحانيات رهيبة لو وجدتها في مكة اجدها في الحرم فقططط لكن المدينة كلها علي بعضها لها سر رهيب انا فرحانة قوي انك زورت تاني يارب تزور دايما ولا يحرمك ابدااااا من مكة والمدينة ولا يحرمني بس يا استازنا ماتفتكرش كدة اني مريت علي بالك ولو لثانية في الرحلة دي كلها حتي ولو اسم روح انا كفاية عليا ان اجي في بالك وانت في اي مكان هناك ياسلالالالالالالالالام كونك انك تتذكر انسان وتدعي لة في الاماكن دي دة كرم من ربنا عظيم انا بقي مش هقولك دعيتلي هقولك ما جيتش علي بالك او حتي اي حد من المدونين ما جاش علي بالك ومش مهم كفاية عليا اني اكون في معيتهم بجد حمد الله علي سلامتك ومعلش طولت عليك والله ماسكة نفسي بالعافية لان لو سبت نفسي هنزل بوست هنا اكبر من اللي بعلق علية بوركت ادعيلي