الاثنين، سبتمبر 03، 2007

تاج 004

فكرة تاج ظريفة جدا من عند مبرمج حر
ومررته لي أستاذة مها صاحبة مدونة فتات من كلام واللي هي كانت كلمة وواقفة في الزور قبل كدة

لما أحب أتابع أخبار التكنولوجيا وأخبار العالم بفتح
BBC arabic ,AlJazeera
ومفكرة الإسلام غير جوجل بقى لما اكون بابحث وويكيبديا

لما أحب
ألعب على الكومبيوتر
حافتكر ازاي وانا مالعبتش من سنة 2000 وكنت باحب الألعاب البسيطة اللي فيها تفكير. ممكن أجرب حاجة بس أشوفها وخلاص عشان الأولاد


لما أحب أقرأ مقالات إسلامية حلوة واسلوبها ممتع
بفتح الإسلام اليوم
لما أحب
أكتب ..
بحب أكتب عن الاتقان

لما أحب أطبخ ..
باحب ابتكر مش باقلد ولي مبدأ رائع بيقول امسك كل حاجة في المطبخ وتخيلها مناسبة للطبخة ولا لأ لو حسيت انها مناسبة حطها وفيه مبدأ تاني أروع بيقول خليك شجاع وانت بتحط الإضافات (بصل ثوم توابل الخ) وأحب أطمنكم اسألوا حتى من ورايا فيه ناس كثير كلوا من إيدي وعايشين


لما أحب أقرأ أدب عالمي
من زمان أوي من سنة 1988 بطلت بس فاكر الأسماء بس مش فاكر المحتويات ومن ضمنها شكسبير وشارلز دكنز وبلاوي سوداء أخرى ده غير ماركيز اللي كان حيلسع دماغي (مش عايز حد يعارضني أنا باقول أهوه مش ده تاج أقول رايي بصراحة احسن اليومين دول الرأي والراي الآخر صدعني ...شوية دكتاتورية بقى


لما أحب اختار قلم :
دي مش دعاية ولاحاجة أساسا خطي وحش جدا يعني يسيء لأي شركة إني أختار قلمهم بس باحب باركر ويونيبول وبطلت أكتب بالرصاص لأنه مالوش مصداقية في الشغل


لما أحب أعمل أي حاجة ..
بحب أعملها بإتقان وتميز وإدمان

لما أحب أطلع من حالة غضب أو ضيق أو حزن
آخذ مصحفي وأمشي شوية كيلومترات محترمة


لما أحب أدور على أي تسجيل اسلامي : أناشيد / شرائط ... الخ ..
بتوجه إلى الشبكة الإسلامية أوطريق الإسلام.. وأنا على شبة يقين إني إن شاء الله حلاقي التسجيل اللى بدور عليه


لما أحب أتكلم ..
باحب أتكلم مع ناس بتتكلم بمنطق باتضايق جدا لما ألاقي الكلام ماشي في طريق حوار الطرشان وبرضه باحب اتكلم من غير عواطف (للأسف) باحب اتأكد إن اللي بيكلمني سامعني كويس زي مانا سامعه ومنتبه له بيقولوا علي صوتي عالي شوية بس ده ساعات بيكون من وسائل التأثير إنتم عارفين سياسة الصوت العالي يكسب
وساعات كثير باحب أسمع أكثر ما اتكلم بس ساعة أما باتكلم..طريخ طراخ

لما أحب أتعامل مع الناس
بيبقى نفسي أوصل لهم أد إيه أنا باتعامل معاهم بنزاهة ومثالية وباحس بمشكلة انهم مش مقدرين كدة من كثر ما تعودوا على افتقاد هذه القيم

الماتش أمس

لما أحب أخرج ..
باحب الأوقات اللي احس المكان فيها بتاعي لوحدي ما احبش الزحام أحب أخرج وقت المطر أحب أخرج وقت المباريات ياسلام لو أهلي وزمالك بس عيبها حكاية هيييه اللي بترج الشارع وإن شاء الله حتى في وقت الحر أحب أخرج لما أحس بالخصوصية...أحيانا أحب أزور المقابر



لما أحب اقرأ مجلات ..
باحب مجلة الوعي الإسلامي والعربي باحب
مجلة المجتمع بس مش بتيجي مصر وكنت متابع مجلة البيان وباحب مجلة الأزهر وخاصة باحب اختيارهم للآيات اللي على الغلاف وحرصهم على متابعة الغزوات الفكرية على الإسلام

وباكره المصور وروز اليوسف وآخهاعة (مش اسمها كدة برضة) مع إن مش ده السؤال

موضوع مرتبط أحب وأكره

لما أحب أمرر التاج أحب أمرره لكل المجموعة هما عارفين نفسهم من سكات الجماعة اللي متعودين يعلقوا عندي وأنا باعلق عندهم ولو ما علقوش المرة دي وهربوا حاتابعهم فين التاج

هناك 51 تعليقًا:

اصرار أمل يقول...

أول مرة ألحق التعليق الأول .... من الفرحة بحجز مكان بس ....

اصرار أمل يقول...

فكرة التاج دى متميزة أووى ؛؛
وعندى تعليق غالبا على كل الاجابات
بس لفت بالى جدااا
(لما أحب أقرأ أدب عالمي من زمان أوي من سنة 1988 بطلت بس فاكر الأسماء بس مش فاكر المحتويات ومن ضمنها شكسبير وشارلز دكنز وبلاوي سوداء أخرى ده غير ماركيز اللي كان حيلسع دماغي)
ليه بس كان هيلسع دماغك ؟
يمكن دى نقطة مهمة جدا فى التلقى ؛
انى أعرف الصح ؛ ويكون لى اطلاع على الخطأ ...
لكن ابتداء ندخل على الخطأ هو ده اللى بيخلى الدماغ تلسع ....
؛؛؛
ومجلة المجتمع ..... ليه مابتنزلش مصر بجد ؟ افتقدناها بشدة ....
وقلم باركر ويونيبول ...
ماشاء الله ياباشمهندس ؛ اجابات واسعة ...

malak يقول...

بجد حلو جدا اسلوب اجابتك على التاج ده

تحياتى

مصراوي أوي يقول...

البي بي سي ارابيك والجزيرة مية مية يا باشمهندس انا زيك بالظبط

:)

وانا كمان بكره جدا روز اليوسف والمصور واخر ساعة

بس لو الاهلي والزمالك بقي

ممممم هتفرج الصراحة لو انا فاضي
:)

Future_Preacher يقول...

بصراحة كنت بقدم كليك و أخر كليك قبل ما أعلق علشان محسش اني فرضت نفسي علي التاج
لكن بصراحة مقدرتش منولش شرف استقبال تاج من حضرتك فكان لازم اعلق
:)
احسن شيء ان الاجابات دي عرفتنا علي جوانب كتير لحضرتك مكناش حنعرفها الا من خلال اجابات حضرتك المتزنة
و ان كنت مش حقدر اجاوب علي التاج في وقتها لكن اعد بذلك قريبا ان شاء الله
عجبني قوي موضوع ان حضرتك بتحب تمشي في الشوارع و هي فاضية
أنا كمان مثلا بحب أسكندرية في الشتا عشان مش بتبقي زحمة زي الصيف و بحس فعلا انها بتاعتي

صانعة الحرية يقول...

السلام عليكم
ماشاء الله انا ببقى فى غاية السعاده لما بلاقى فى افكار جديده
ما شاء الله ربنا يجعلها فى ميزان حسنات حضرتك ويتقبلها منك يا رب العالمين
انا بقى بقرا شكسبير وشارلز دكنز غصب عنى
مناهج ما يعلم بها الا ربنا

طال الليل يقول...

إنشاء الله هجاوب يا أستاذى ده لسببين
لأنك اللى مررته وإنت عارف مقدرش أرد لك طلب
والسبب التانى فكرته جميلة ومبتكرة وجديدة مش على طريقة إنت مين اللى هتشككنى فى نفسى

بس أستأذن أنتظر شوية أفوق من تاج أ.أروى أحسن بتعب جدا فى نقل الأسئلة بسبب جهلى التقنى

بارك الله فيك ما شاء الله دوما عندك ما هو جديد اللهم لا حسد

آلام وآمال يقول...

تحية لك من كل قلبي
اتمنى ان يجمعني الله بك في الجنة

عازف الناى يقول...

قديما وفى الثانويه العامه
على ما اذكر بعد عصر الديناصورات
كان المدرسين وبعض الاقرباء المثقفين الاكبر سنا يحذروننا من قرأه اى فكر شيوعى او يهودى او ملحد او غير اسلامى
وكنت اتبع النصيحه بدون مناقشه
وذات يوم وقع فى يدى كتاب علمانى وجدته فى سور الازبكيه القديم
وكان ثمنه 50 قرش
فاشتريته ضمن مجموعه اخرى من الكتب
وبعد ان قرأته
احسست بعظمه الاسلام اكثر واكثر
فهدمت جدار الخوف هذا
وقرأت افكار الاخرين
فى اكثر من مجال
على حسب ما تيسر لى
فلعبت بعض الافكار براسى قليلا
ورسخت بعض الافكار بعدم مصداقيتها بعض الافكار عندى
الا العقيده فقد كانت تقوى كلما اقراء فكر او عقيده مختلفه
فلا يعيب ان نقراء لماركيز او غيره

تاج جديد وجميل
قبل ما انسى
انت متأكد ان فى حد كل من طبيخك ولسه حى يرزق ؟؟؟؟؟؟

Mohamed A. Ghaffar يقول...

الحمد لله نفدنا

أمــانــى يقول...

اســتاذنا
على فكرة ما تخافش حضرتك لما بأدخل باسـمع مش بأتكلم ما حد خااااااااالص علشان بأكون اسمع يعنى مش حوار الطرشان
:D
والحمــدلله حضــرتك بطلت قرأت ماركس والجماعة العك دول
اصل انا قرايت بس بصراحة حسيت بغثيان كفاية المصطلاحات اللى فى الكتب دى ولا شوفت ولا هاشوف
وعلى فكرة انا ضـد اى حــد معندهوش ايمان كافى ولا قرأ كتب اسلامية ولا استعاذ من الشيطان هو بيقرأ الحاجات ويقول علشان اعرف الفكر ده ايه لالالالالالا طبـعآ
أكــيد هيوقعوا فى الخـطأ خصـوصــآ لو الجــو ده معاه صحبه
الحمدلله ان حضـرتك بطلت تقراهم
ربــنا يرحمـــــــنا من عنده يااااااااااااااااارب آمـــــــــــــــين

بيدو يقول...

سلام عليكم
اخي الفاضل
بجد اجابات متميزة بس بجد زعلت من موضوع الاهلى والزمالك عشان انا اهلاوي اوي بس عجبني اوي المشى وقت المطر عشان دي متعتي الخاصة خاضة وقت الغروب

mraghy يقول...

احيي حضرتك علي اسلبوك الاكثر من رائع
كما احييك علي دكتاتوريتك
وكمان علي شجعاتك في الاجابة

تقبل مروري

چـِنين .... عيلة و عايزة افهم يقول...

لما احب اقرا كلام يحترم عقلي و يعلمني
باجي هنا عند الباشمهندس عصفور المدينة

اخيراً لقيت حد يعرف مجلة البيااان

مدونة الدفاع يقول...

السلام عليكم يا باشمهندس كل عام وانتم بخير
تاج جميل وجديد

محمد الجرايحى يقول...

أخى الفاضل الكريم : عصفور المدينة
السلام عليكم ورحمة الله وبركاته
بأحب دائماً أقرأ إجاباتك على التاج
لما فيها من جدية ومصدقية وكشف عن بعض جواتب شخصيتك

تقديرى واحترامى
اخوك
محمد

بهلول يقول...

انا اول تعليق الحمد لله
تاج جديد وجميل يا باشمهندس
مش عيب تقراء لماركيز
انا اشتغلت سنه فى دوله افريقيه
قريت ثقافات اعوذ بالله
ولكن القراءه دى رسخت عندى الفكر الاسلامى والثقافه العربيه اكثر واكثر

mohand يقول...

السلام عليكم

بما اني اول مره اعلق هنا
احب اقول ان مدونتك جميله قوي
واتشرفت اني زورتها وان شاء الله هحاول اداوم في الزياره

واشكر الظروف اللي خلتني اعدي هنا

تحياتي ليك
;)
خرجت من المطب
:P:P:P:P:P

عبدالرحمن عياش يقول...

التاج جميل جدا و ردودك روعه اوي و الله يا عم عصفور المهندس :)
ربنا يكرمك يارب
فعلا جميل اوي
بس لازم ترجع تقرا للعالميين تاني :)
ده رأيي يعني
و القلم الرصاص بصراحة انا بحب استخدمه اوي اوي اوي
عموما تحياتي يا فندم
و و الله بفرح لما بشوف تعليقك عندي
سلام

other_things يقول...

أنا برضك من رأي عبدالرحمن ...بس أكيد مانتاش فاضي زي زمان فالم نفسي أحسن
...
بختلف جدا في حكاية المطبخ..أخليني شجاع ازاي


أقضيها من غير أكل يعني
...

مؤمنه يقول...

السلام عليكم ورحمة الله وبركاته
لا تعليق على اجابات حضرتك
اجابات حضرتك انا شايفه انها أكبر بكتير من التعليق عليها
وفقك الله وأزادك من فضله
والسلام عليكم ورحمة الله وبركاته

Just a Reader يقول...

"لما أحب أتعامل مع الناس
بيبقى نفسي أوصل لهم أد إيه أنا باتعامل معاهم بنزاهة ومثالية"
أنا فعلا بحس كده من خلال كتاباتك وتعليقاتك ....ربنا يبارك فيك ويكرمك :)

ما علينا يقول...

السلام عليكم ورحمة الله وبركاته

فعلا تاج متميز وجميل

واجابات حضرتك
كل اجابة فيهم
محتاجة تعليق لوحدها
لان كل اجابة يمكن ان تطرح موضوع للنقاش

بدون مبالغة
مكسب لي ان دخلت مدونة حضرتك
واعتقد اني ساستفيد الكثير من
فكر حضرتك ان شاء الله

sa7arkash يقول...

ياااااااه
ده تاج من العيار التقيل جدااااا
ومش اى حد يعرف يجاوب على اسئلتة
اية القوة والاجابات الشديدة دى يا سيدى
وعامة احنا كده فهمنا كتير عن شخصيتك المنعزلة نوعا ما المحبة للعلوم الدينية ....واللى على رايك مش عاطفى
..
لك كل الاحترام يا سيدى الفاضل

محمود الدوح يقول...

فكرة تاج ولا اروع
ودا طريق لنوع جديد من التاجات بدل اللى اتعودنا عليها
والاسئلة البايخة اللى فى تاجات كتير من نوعية نوع البروسيسور بتاعك اية

maro يقول...

الف مبروك ع التاج
بس مش قلت لما تحب تفش غليلك تروح فين

fahd يقول...

السلام عليكم ورحمة الله وبركاته

يمكن انا قليل لما بعلق عندك مع انك مغرقني بجمايلك وواقف جنبي
بس انا لما اجي اعلق عندك الاقي ناس كتير علقوا فأقول هو انا هبان وسطهم ويصدني ذلك عن التعليق مع رغبتي في ان اعلق علي هذه التدوينات الجميلة
كلما قرأت لك كلما تمنيت ان اراك اشعر ان بداخلك خير كثير وطاقات حب نفسك توصلها للناس
تعبيراتك وردورد عفوية وتدل علي نفس بسيطه سمحه ولكني لا اتخيلك الا وانت لم تتجاوز الخمسه والعشرين
وخايف لما اقبلك تحصلي صدمه شعوريه
او ساعتها مش هعرف اكلمك
كتاباتك تفوح شبابا وحيويه وليست لرجل في الاربيعين ان كانت معلوماتي صحيحه
اكرمك الله ووفقك واعانك واني لاحبك في الله يا سيد عصفور

امام الجيل يقول...

ايه ده يا استاذى
اعتقد التاج ده بين فى حضرتك حاجات كتير مكنتش باينة مش عارف اول مرة اشوفك بتتكلم عن نفسك اوى كده اوى اوى يعنى
ايوه كده يا راجل انا مبحبش الرسميات الزايدة عن الحد جميل ان الواحد يتكلم عن نفسه بحرية ويقول اللى جواه
اعلق على ايه امممممم
جميل حتة خصوصية المكان وانك تحب ان المكان اللى تروحه يكون بتاعك ولفت نظرى حكاية اما تكلم حد عايز تبينله اد ايه النزاهة فى الكلام اللى كتير مفتقدينهم والادب العالمى انا برضه مليش فيه خالص
بس جميل اوى علاقتك بالمطبخ متميزة جدا
كده العرايس هتكتر يا بشمهندس خلى بالك بقى خصوصا الصغننين اللى مبيعرفوش يطبخوا :)
ادعوك دايما انك تتكلم عن نفسك بملأ فيك شكلك بيبقى احسن انا حاسس انك كنت بتعبر عن اللى جواك بشكل جميل اوى اعتقد التاج ده بيمثلك كتير عن اى تاج ولا ايه رايك
اوعى تكون مبتدعليش :)

أحمد المصري يقول...

جميييلة جدا اقلام باركر..بحبها فعلا جدا
كويس أوي انك بتعلق من غير عاطفة..نفسي اتعلم دي واديني في طور التدريب00سلام0

مناجاة يقول...

لا والله تاج ظريف فعلا
بس على فكرة انت آخر مرة علقت عندى كانت 14 يوليو يبقى انا مش اللى انت متابعهم ابقى براءة

خرجت من المطب زى مهند بالظبط
:)

وضـّاح يقول...

السلام عليكم

ما شاء الله

جميل إجاباتك .. ربنا يرمك بتاجات كثيرة لنعرفك منها

أعانك الله وأكرمك

عمرو المصري يقول...

السلام عليكم

كالعادة
حكيم المدونين
كما القبه دائما وابدا
عايزينه يقول ايه
لازم تبقي دي اجاباته

منتظرك ياكبير هناك
موضوع كئيب جديد كتبته
وبما انك الوحيد اللي متابع الي بكتبه
والوحيد اللي بيعلق عندي
انا هاعتبر نفسي مت الجماعو واجاوب ع التاج
تطفل

يلا سلام


سلام
من
ارض الحرب

nabila يقول...

شاركونا لتفعيل اتحاد المدونين المصريين وذلك لرفعة شأن التدوين في مصر
عضوة الاتحاد المصرى للمدونين
نبيله غنيم
www.ebu2day.jeeran.com

رينـــــــــــا يقول...

السلام عليكم
اخبار حضرتك ايه
ماشاء الله فكرته جديدة وحلوة اوى
وكالعادة لا تعقيب على كلام حضرتك المميز جدا
بارك الله فيك وبك

اليعقوبي يقول...

استاذنا الكبير
اجابات بتدل علي شخص جميل زي حضرتك ولا ازكي علي احد
ربنا يرزقك حبه وحب من يحبه وحب اي عمل يقربك لحبه
والله يااخي اني احبك في الله رغم اني لم اراك ولكنها امور قلبية
والسلام اخي الفاضل

omar مشروع بطل يقول...

اسمحلى أشكرك على المعلومات اللى فى اجاباتك وجزاك الله خيرا

واسمحلى كمان اهرب من التاج ده

رفقة عمر يقول...

عجبنى موضوع الطبخ فاكرنى بعادل امام فى مسلسل ابراهيم الطاير
حط كل حاجه على بعض وعمل يخنى عجب
يالله بالهنا والشفا للى بياكلوا

Dr_Moslim يقول...

هههه
ربنا يعزك ويكرمك
حلو موضوع الطبخ برده
وكويس ان الناس اللي كلوا لسه عايشين الحمد لله
وإجاباتك كويسة
بتفكرني بحاجت كده

وكويس انك بتحب تمشي في الأوقات اللي مش بيكون حد موجود فيها
الواحد بيحس براحة شوية
وربنا يكرمك

جنـه يقول...

ارد ولا ما اردش
ارد ولا ما اردش
خلاص رديت اعمل ايه
الغريبه اني اول مره ارد علي مدونه حضرتك
رغم اني متابعاها جدا من خلال القرايه
بس كنت بكتفي بالقرايه
يمكن لاني بحس اني مش هضيف كتير لو علقت فمابعلقش
عجبني التاج قوي
وبحس ان اي حد هيجاوب عليه بصراحه
هيبين اجزاء كتير من شخصيته

ولاني بحب الحاجات الجديده المختلفه
فباذن الله هرد عليه
مع كام تاج تانيين
وكل تاج وحضرتك بخير

kafrawy يقول...

ماركيز



يا بتاع ماركيز



تحياتى

المهـ إلي الله ـاجر يقول...

كلام جميل يا بشمهندس

كالعادة

bedo يقول...

الأول بعتذر عن التأخير

ثانيا تاج مختلف شكلا وموضوعا

وأكثر رد عجبني

لما أحب أطلع من حالة غضب أو ضيق أو حزن
آخذ مصحفي وأمشي شوية كيلومترات محترمة

وإجابات كثير غيرها بس ده أكثر واحد عجبني

وبصراحة تاج جديد بس حلو في طريقته
وإجاباتك بتعكس حاجات كثير أوي

يلا سلام

راجع تاني
إن شاء الله

Islamist Bloke يقول...

حلوة

على فكرة يا عم عصفور انا كمان مش بحب حوار الطرشان وبتجنن اوى اوى لما اكون بتكلم مع حد ويظهر انه مش متابعني او كدة..............طباعنا متوافقة على فكرة

فعلا الموضوع ده يخنق وانا حسيته اوى من كلامك............وربنا يهدي الطرشان .........اصل اسخف حاجة لما الواحد يكلم واحد والتاني في نص الكلام يفتح معاه حوار تانى خالص

زي اية برضة

زي لما الواحد فى مدونة وبيتكلم فى موضوع معين ولاقى واحد دخل كتب تعليق بعيد تماما عن مجرى الحوار

حاجة تفرسسسسسسسسسسسس


ربنا يهدي

والسلام

Islamist Bloke يقول...

على فكرة احب اضيف انى مع تعليق جنة...........انا كمان بحس بكدة..........بحس انى مش عارف اضيف جديد ف باسكت

ربنا يزيدك

والسلام

خبيب يقول...

احترمت جدا فيك :
"لما أحب أعمل حاجة أعملها بإتقان وتميز وإدمان"
--
هو ده الكلام اللي يرفع الروح المعدنية
المسلم كده
يا يعمل الحاجة بالشكل ده ، يا ميضيعش وقته فيها أحسن
--
بارك الله فيك

yasmina يقول...

فكرة التاج جميلة
اول مرة ادخل المدونة بس عجبتني
محترمة وجيدة
تحياتي

حائر في دنيا الله يقول...

تصدق محتاجين حاجة زي كدها، بديل عن الهم والغم والكره اللي عايشين فيه
أنا احب إذن أنا عايش
والله حكمة حلوة أحلى من بتاع ديكارت

لك تحياتي
السلام عليكم

أميرة محمد محمد محمد يقول...

استاذي العصفور اتفق معاك في كراهية الزحمه وحب الاماكن الخاليه
اول حد الاقيه بيقول بحب ازور المقابر ربنا يكرمك ويزيدك من حياة القلب

انما اختلف معك في موضوع الادب العلمي لاني اعشقه واعتقد انه لايوجد مانع شرعي له مادام في اطار الثقافه ومادام لن اتاثر باي سلبيات فيه

ربنا يزيدك علما

مهندس مصري يقول...

يا بشمهندس انت كده دبستني في أول تاج في حياتي التدوينية القصيرة
ربنا يستر و نعرف نجاوب
بس إجاباتك تنم عن شخص نقي و صافي
ربنا يكرمك

عصفور المدينة يقول...


اصرار أمل

بارك الله فيك شرفت أول تعليق

وانا كمان عندي تعليق على معظم الإجابات فعلا معاك حق
ان الواحد يعرف الصح ويثبت عليه ويبقى عنده مناعة


malak

بارك الله فيك وشكرا لك


مصراوي أوي

طب مانا عارف ان احنا زي بعض في حاجات كتير امال باحبك ليه
:)
يلا حافوت لك الكورة

Future_Preacher

يعني وصلك التاج بكامل إرادتك
والله احب اسكندرية في الشتاء بشكل غير طبيعي

صانعة الحرية

وعليكم السلام يا استاذة الكراكس
جزاك الله خيرا
اقري حولي قراءتك غصب عنك لمتعة

طال الليل

في انتظار اجاباتك يا حبيبي

آلام وآمال

جمعنا الله وإياك في الجنة

عازف الناى

ههه
عصر الديناصورات انت بتجني علي وعلى نفسك
انا بقى كنت في الثانوية العامة في عصر بسمارك
فعلا بس باكد إن نعمة النفور من الباطل لا يمن الله بها على كل أحد
متأكد ان فى حد كل من طبيخي ولسه حى يرزق وعندي شهود يفضلون أكلي على أكل مامتهم

Mohamed A. Ghaffar

نفدت بأمارة إيه التاج لازمك يا أستاذ بلاش أستاذ يا محمد

أمــانــى

انت ممن وهبهم الله القلب ومن كان كذلك فإنه يسمع وينتفع بما يسمع إن شاء الله

بيدو

أيوة يا أخي مانا عارف ان الإخوان معظمهم أهلاوية
:) اسأل حتى مجدي سعد
وواظب على المشي في المطر يمكن نتقابل في يوم
ربنا يبارك فيك

mraghy

ماهو كل الديكتاتوريين شجعان زي حالاتي كدة

چـِنين .... عيلة و عايزة افهم

ليكي جايزة أحسن تعليق
دكتاتورية مني بقى


مدونة الدفاع

وعليكم السلام يا اسامة فينك يا حاج

محمد الجرايحى

أخي وحبيبي بارك الله فيك
ويسعدني تشريفك


بهلول

أول تعليق غيه ياحاج أنظ حولك ولا بلاش انظر حولك
فعلا قراءتك الأفكار الأخرى بيثبت الحق ولكن مش دايما
حمدا لله على السلامة من الأدغال

mohand

مطب إيه ياحاج التاج لابسك لابسك

عبدالرحمن عياش

منور يا عياش وجزاك الله خيرا
والله ياعبده حاولت بس مفيش وقت ولم أعد أجد متعتي عندهم
بعد أن من الله علي بقراءة كلام الأفاضل
اقرأ مثلا حادي الأرواح إلى بلاد الأفراح
وقارنها مع
Madame Bovary
وانا اللي يشرفني اني اعلق على كلامكم

other_things


بلال المبدع فعلا الوقت وشوف تعليقي فوق

مؤمنه

يا بنتي بلاش المدح المبالغ ده
كلكم أفاضل

Just a Reader

أختي الفاضلة أين أنت نسأل الله ان تكوني بخير وصحة وتوفيق
وانا باحس منك نفس اللإحساس بالمثالية وافتقد كتاباتك

ما علينا

حاعمل بوست تاني عن التاج ده إن شاء الله
كلنا نتبادل الأفكار يا أختاه

sa7arkash

أستاذة شكرا على مدحك
أنا والله مش منعزل وعشان كلمتك دي أنا حاعمل بوست تاني عن التاج ده

محمود الدوح

أيوة يا محمود ولا لون الشراب والبطانية

maro

هناك جنب الحيطة تحت الشباك ومعي الكمبيوتر

fahd

وعليكم السلام ورحمة الله وبركاته

يا أخي لا تستقل نفسك وأنت منا بمكان
جزاك الله خيرا عندكش عروسة لي بقى
:)
ششششششش البوست اللي بعد العيد عن تعدد الزوجات

امام الجيل

ربنا يبارك فيك ويعزك يا محمد أنا كنت فاكرك أكثر واحد فاهمني
ياراجل ده انا حكيت قصة حياتي في مدونتك

أحمد المصري

بارك الله فيك يا بطل
أنا مش باعلق بدون عاطفة ولا باتكلم بدون عاطفة بس باحب ان العطفة مش توجهني
وده فرق كبير حاتكلم عنه إن شاء الله

مناجاة

في انتظار إجاباتك يا دكتورة عشان انا علقت عندك أمس


وضـّاح

بارك الله فيك يا وضاح واعانك الله

عمرو المصري

أنا مهندس ياعمرو مش دكتور عشان تقول علي حكيم
:D


nabila

استاذة نبيلة منورة مدونتنا ومن غير تعليق
:)

رينـــــــــــا

منورة يا بنتي ربنا يكرمك

اليعقوبي

أحبك الله يا زعيم

omar مشروع بطل

هربت؟ حاسمحلك عشان انت مشغول

رفقة عمر

يا بنتي انتي ماقريتيش كتابي في الطبخ ولا إيه باقول تشوفي الحاجة مناسبة ولا لأ

Dr_Moslim

ربنا يعزك ويكرمك يا دكترة يارب أكون بافكرك بحاجات حلوة مش مغص ولا تلبك

جنـه


منورة وشكرا على قبولك التاج
بس عايزين التاج ده لوحده

kafrawy

يا عم أنا بتاع ربنا ماركيز ودعته من زمان

المهـ إلي الله ـاجر

بارك الله فيك يا احمد

bedo

شكرا يابيدو ومنورني تاني وتالت
وعايزينك ترد على التاج

Islamist Bloke


يا احمد انا عارف ان احنا متشابهين جدا
اوعى تسكت سمعنا صوتك

خبيب

فرحتني أن هناك أرواح معدنية مش كله معنوي كدة
الإتقان والتميز روح العمل

yasmina

منورة أستاذة 48
وفي انتظار إجاباتك


حائر في دنيا الله

فرج الله كربنا وكربنا وكرب جميع المسلمين وأهو شوية وشوية

أميرة محمد محمد محمد

أنا جاوبت على نقطة الأدب العالمي وسوف أكتب مزيدا عن النقاط التي في هذا التاج

مهندس مصري

انت بدات حياتك التدوينية بتاج لذيذ وخفيف امال لو شفت التاجات التانية

Maha يقول...

بسم الله

السلام عليكم ورحمة الله

ما شاء الله إجابات متميزة .. خاصة إجابة الطبخ لأني أطبقها بحذافيرها

أما في التعامل مع الناس .. فاكثر الله من أمثالك