الأحد، يوليو 20، 2008

الحركرك

عندما سمعت ابنتي هذه الكلمة سألتني عن معناها وهي كلمة من زمن ما قبل المحمول كنا نستخدمها كثيرا للدلالة على إدراك الأشياء في آخر فرصتها أو بالكاد ولغرض الإيضاح لها تأملت في أحوالنا فوجدت أن حياتنا في هذا العصر كلها تقريبا "ع الحركرك"

فالطلاب يذاكرون ع الحركرك بل ربما يدركون الاختبار ع الحركرك.
والأعمال لا تنجز أو تنجز ع الحركرك.
والسيارات تحتك بك وأنت سائر أو تمر ع الحركرك.
ونحن ندرك صلاة الجماعة ع الحركرك.
بل ربما ندرك أننا في الصلاة ع الحركرك.
وجيران المسجد لا يحضرون الخطبة ويدركون الصلاة ع الحركرك.
والمرتب لا يكفي أو يكفي ع الحركرك.
والشباب والفتيات يفوتهم الزواج أو يفوتونه أو يتزوجون ع الحركرك.
والمواعيد لا نوفي بها أو نصل ع الحركرك.
حتى الطائرات ندركها ع الحركرك.

وننسى التوبة إلى الله وإذا تبنا فإننا نتوب ع الحركرك.

إن صداقتنا المزمنة للحركرك هي ناتجة عن التفاؤل الزائد وطول الأمل وسوء تقدير الأوقات وإهمال العوارض والتسويف وعدم الاستفادة من دروس الماضي والإصرار على تكرار نفس الأخطاء مرات ومرات بل وأحيانا المبالغة في تقدير القدرات والمهارات حتى يتصور الإنسان أنه قادر على التواجد في عدة أماكن في نفس الوقت أو فعل أشياء متعددة في نفس الوقت.


على الهامش : أظهر استطلاع للرأي أن 37% لا يحضرون خطبة الجمعة ورأيي أن هذا يعتمد على العينة المنتقاة !!

هناك 50 تعليقًا:

عصفور المدينة يقول...

لا أجد بدا من الاعتذار عن تغيبي حيث أنني أذاكر وأخشى الحركرك

وأيضا في معركة بين شركات الانترنت قامت إحدى الشركات بتقطيع كابلات الشركة الأخرى من داخل السنترال

وكتبت هذه من خلال الهاتف

فأعتذر ونسألكم الدعاء

Habib يقول...

أخي الحبيب عصفور المدينة .. لي الشرف أن يكون أول من يعلق على هذا الموضوع .. بعدك طبعا .. ويارب التعليق ما يكونش عالحركرك : )

ثقافة الحركرك هي ثقافة منتشرة .. أتذكر بالخصوص والدتي الكريمة أطال الله عمرها .. لما كنت انشغل بشئ والأذان يؤذن .. تقول لي : هو انت لازم تروح الصلاة عالحركرك .. ربنا يارب يحفظ أمي وأمهات المسلمين

أغلب الحاجات اللي بنعملها عالحركرك للأسف بتكون مش متقنة .. لأنها عالحركرك .. يعني مشي حالك .. اعملها أحسن لو مرت ثانية كمان مش هاتعملها.. فالنتيجة إن اغلب الحاجات اللي بتتعمل عالحركرك بتطلع مش مظبوطة

ياريت نعمل حملة ضد الحركرك ده : )

وربنا يصلحلك الكابلات العطلانة وتنتهي المعركة بين شركات الانترنت على خير .. أقصد عالحركرك

أنسانة-شوية وشوية يقول...

اخى عصفور المدينة
عندك حق كل حياتنا بقت انقاذ ما يمكن انقاذه او ع الحروكروك انا كمان كنت بذاكر علي الحركروك وبلحق مواعيدى ع الحروكروك بس اعتقد ان كل ده نابع من ضيق الوقت وكثرة الانشغال ويدوب نعيش علي الحروكروك

عاشقه الفردوس يقول...
أزال المؤلف هذا التعليق.
عاشقه الفردوس يقول...

:))

قعدت 10 ثواني تقريبا اقول ايه الحركرك ده _كل الكلمه فتحتها

بعد سطرين قولت اااااااااه
دي مضمومه

الله المستعان

هي دي مشكلتنا كلنا
الحركرك دي

اللهم اختم بالصالحات اعمالنا

الاحصائيه والارقام دي مخيفه
انا لا اتخيل ان لايذهب مسلم لصلاه الجماعه والجمعه تحديدا

انا لله وانا اليه راجعون

وطني يقول...

وانا يا دوب لحقت التعليق عالحركرك قبل ما انام
دمت مبدعاو حمدا لله عالسلامة

محمد الجرايحى يقول...

أخى الكريم : أبو يحيى
السلام عليكم ورحمة الله وبركاته
أسأل الله تعالى أن يفرج عنك وتعود لمدونتك وقرائك لنشاطك وتميزك الذى عاهدناه منك
ولايكن تواجدك بيننا على الحركرك

تقديرى واحترامى
أخوك
محمد الجرايحى

خمسة فضفضة يقول...

السلام عليكم ورحمة الله وبركاته


ازيك يا باشمهندس ، ربنا يوفقك في المذاكره (ولاوني مش عارفه مذاكرة ايه بس ربنا يوفقك ) ويارب يهدي النفوس بين الشركتين اياهم

اشمعني يعني قبل زمن المحمول ماهي لسه موجوده وهاتفضل موجوده قبل المحمول وبعد المحمول
طول ما في ناس بتسوف وتاجل عمل اليوم الي الغد

"علي فكره انا من كبار مدمني الحركرك ، ادعيلي ان ربنا يعافيني من الداء ده "


سلام

حطم القيود يقول...

هى ثقافه سادت مع موجة الاستسهال والتبرير اللى بقت مسيطره....

ولما اعتدناها ألفناها

ابن حـجـر الـعـسـقـلانـى يقول...

معلش أنا هاعلق فى حتى بعيدة شوية عن هدف التدوينة لكن ليه علاقة بالحركرك

طبعا أنا تاريخى أيام الكلية كان كله حركرك .. و لما درسنا فى مادة التحكم إن الـ poles بتاعة الـ system لازم تبقى على شمال الـ jw axis عشان يبقى السيستم مستقر .. استبدلنا عبارة"ناجح" بـعبارة "البولز على شمال الجى أوميجا أكسيز" .. و أى حد فينا كان بيبقى على الحركرك كان طبعا بيبقى البولز بتاعته بتنطبق تماما على الجى أوميجا أكسيز يعنى مستقر استقرار حرج و فاضل له هرشة و يبقى unstable

و إيييييييييه ... الله لا يرجعها أيام .. كنت دايما على الجى أوميجا أكسيز لغاية ما حضرت دكتوراه فى الجى أوميجا أكسيز .. و ياما أخدت السريع و طلعت unstable

kochia يقول...

موضوع جميل جدا من حيث اهميته وتكراره عند كثير من الناس
اخشي ان فعلا يكون عندنا ثقافة الحركرك

انا شخصيا كتير بعمل حاجات مهمة علي الحرحرك

والاسباب اللي قلتها اسباب حقيقية 100% وبشوف كتير من الناس دي ردودهم

خايفة نفضل كدة لحد ما يوفت الحركرك كمان
ساعتها هنعمل ايه
ربنا يستر

تحياتي

دعوة الفردوس يقول...

حياتنا أصبحت على الحركرك لأن في حاجه تانيه اسمها بالعبيط

نعيش على الحركرك لأننا نصرف أموالا في رفاهيات وأشياء في غير موضعها زي مكالمات المحمول والكهرباء الزياده وغيره نصرف بالعبيط

بنلحق أوقاتنا بالعافيه لأننا بنضيع وقت بالعبيط

و قس على ذلك كل شيء على الحركرك

المصيبه ان التوبة متنفعش على الحركرك
ومينفعش تستنى لغاية ماتبقى على الحركرك
لأننا منعرفش الحركرك بتاع عمرنا فين

التدوينة دي بسيطه وجميله جدا
ربنا ينفع بيها

نـــــــور يقول...

استاذي الفاضل عصفور المدينة

بعتذر عن تأخري في زيارة المدونة الرائعة .. والله بفتقد كلام حضرتك .. بس هيا كدا الحياة!

وآه من الحركرك!!
مافيش حل؟

بس الواحد بيجاهد نفسه وسهل انه ينجح في تغيير ثقافة "الحركرك" دي ، لأنه لما بيتقن الحاجة ويحس بطعم الحاجة بجد .. كأن يتقن المذاكرة ويحس بطعم النجاح فعلا .. بتختلف نظرته للامور برده ..

دا غير انه في الاول والاخر لو تذكر انه بيتعبد لربنا بكل حياته وتصرفاته .. وان ربنا رقيبه .. مش هيحب يعمل الحاجة الا على اصولها .. وهينسى الحركرك دا :)

وجزاك الله خيرا يا استاذي الفاضل.

جنّي يقول...

إخواني أخواتي الأعزاء

السلام عليكم ورحمة الله وبركاته

استودعكم الله الذي لا تضيع ودائعه

إجازة من التدوين ...

ولكني سأكون على تواصل معكم بزيارة مدوناتكم ...

أرجو أن تسامحوني على تقصيري في حقكم ...

وتفضلوا بقراءة البوست الأخير ...

إلى اللقاء والسلام عليكم ورحمة الله وبركاته

أخوكم

said

بطوط حبوب يقول...

حلو اوى البوست وبيوضح حاجات كتير بكلام بسيط وسهل


بالمناسبه انا رايي انك تحذف نتيجه الاستطلاع لان الواحد لما بيلاقى حد بيشاركه فى الغلط بيهون عليه فعله للغلط

واحد مش فاهم حاجة يقول...

الحركرك عارف يا استاذ عصفور

تقريبا هو دة مرض العصر

مش قصدى اكبر فى الكلمة

لا لو بصيتلها كدة هاتلاقى كل حاجة بقت بتتعمل عالحركرك

دة حتى الاكل بقينا بناخدة خطف

ورزغم ان كل حاجة بتتاخد خطف

بنعمل اللى الحاجة اللى بعدها واحنا عالحركرك

محمد عبد الغفار يقول...

بكل الم بدأت عرى الصدقاة بيننا وبين الحركرك فى الأنفصام ويتم توثيقها الأن بين ما هو ادنى فى العديد من المواضع

الطائر الحزين يقول...

الحركرك فى بلاد أخرى يقولون عليها الطرفرف

الحمد لله على نعمة الامهال

مـحـمـد مـفـيـد يقول...

كله علي الحركرك

جمعاوى روش طحن يقول...

و برده بنعلق ع الحركرك

(::

دمتم بكل خير


و رزقنا الله و إياكم حسن الخاتمة

امام الجيل يقول...

جميل

بالفعل اصبحنا ملازمين ليه ومصاحبين
نعيش فى تخبط
وزى ما تيجى تيجى

ونتذكر الاعمال فى اخر وقت لكى ننجزها ونتمها

قد تكون هناك ظروف وملابسات
ولكن تنظيم وترتيب الوقت شئ اخر

اعانك الله

صانعة الحرية يقول...

عودا حميدا يا استاذنا
وفعلا والله الحركرك
ربنا ييسر والحق اختم ولو حتى عالحركرك بس الحق
جزاكم الله خيرا
--------
لا أجد بدا من الاعتذار عن تغيبي حيث أنني أذاكر وأخشى الحركرك
ربنا يوفق حضرتك يارب

المهـ إلي الله ـاجر يقول...

فعلا يا بشمهندس .. الحركرك هو المرادف لغالبية مشاكلنا الواقعيه مع كافة الأمور

والمشكلةلدي الغالبيية هي إلف الحركرك حتي يصبح هو السلوك الدائم والطبيعي في التعامل مع كافة الامور فتجدهم لا يلحظن أن ما يفعلونه من حركرك يسمي حركرك (:

جزاك الله خيرا يا بشمهندس

كاشف الاوهام يقول...
أزال أحد مشرفي المدونة هذا التعليق.
appy يقول...

هى دى حياتنا كلها حتى حكومتنا

Jana يقول...

أكثر الحركرك ما يغضبنى
هو علاقتى بعالم التدوين ... يعتبرها البعض علاقة على الحركرك ..أناس افتراضيين لا نعرفهم ولا يعرفونا ..
فى حين اعتبر أنا معظم علاقاتى من خلاله علاقات وثيقة قوية ... بعضها أكثر قوة وجدية واخاء مما اتخيله انا ..وبعضها ..أخشى صدمة اكتشافى لحروكركرها
:)

أعانك الله يا باشمهندس على المذاكرة
ويسر لك كل صعب ان شاء الله

خواطر رئيس شاب يقول...

هى دى مصر كل المصريين الا من رحم ربى عايشين بالاسلوب ده

تحياتى

ام البنات يقول...

استاذ عصفور
انا الحركرك ده هو اسلوبى
بعمل كل حاجه على الحركرك
نفس اعمل كل شئ براحتى
بس بصراحه بيخلى الحياة فيها تشويق
القطار هيفوتك
الفيلم هيبدى..ابتدا
المدرسة قفلت الباب
اتوبس المدرسه هيففوت خلاص
يعنى الحركرك ده اسلوب حياة


نفس اتخلص منه
معندكمش علاج
استاذ عصفور
بتجيب الافكار الرهيبه ..اللى متغلغله فى حياتنا منين؟؟
معكم
اسيرة الحركرك

أحمد كمال يقول...

متهيألي لو علماء الآثار و التاريخ شدوا حيلهم شوية حايكتشفوا إن الحركرك ده كان إله الصهينة عند الفراعنة ، و إنه ظهر و بنيت له المعابد في عصور الاضمحلال ، ثم توارثه المصريون ، و لا يظهر إلا في كل عصر اضمحلال ، و ربنا يعدي الأسرة دي على خير .

ftataljanna يقول...

عندك حق يا باشمهندس والله
فعلا حياتنا كلها ع الحركرك ده لو لحقناه اصلا

ساعات بيفوت حركرك وحركركين وتلات حركركات ونعيييييش ولاااااااااااا فى الدنيا

للاسف

وساعات الناس بتبقى شايفه الحركرك وهو بيعدي من قدام عنيهم ولا عظة ولا رجعة ولا تقوى

غفلة تحس انهم فى غيبوبة

............

اما عن موضوع الانونيميين وكوكب انونيموس

فكل انونيموس اعلم بحقيقة نفسه ويكفيه انه فى قرارة نفسه يعلم ما هو

واما عن الرد عليهم
فالنار تاكل نفسها ان لم تجد ما تاكله

مؤمنه يقول...

السلام عليكم ورحمة الله وبركاته
كالعاده حضرتك بتثير مواضيع مهمه جدا
الحركرك
ناتج من وجهة نظرى من عدم حب ما نقوم به من اعمال
وقد ايه تقيله على قلبنا
ولد احساس بالامبالاه
يكون رد فعل طبيعى بيستخدمه الشخص على اعتبار ان ما يقوم به من عمل مكره عليه عقاب
فيرد الى ذاته هذا الاحساس بالامبالاه بعمله فيقوم بانجازه على الحركرك
اما الانسان المحب لعمله يبدع فيه
ايظا اتساع مساحة الامل عن الحد الطمطلوب والنظره البلهاء للعالم الخارجى خاصة اصحاب الاموال الكثيره
يظنون ان باموالهم يشترون كل شئ
لذلك لا داعى للتعب ونقضيها يا دوب على مقدار الغرض
على الحركرك
دومت بخير استاذنا الفاضل
والسلام عليكم ورحمة الله وبركاته

النجمة الصامدة يقول...

للأسف حقا

أصبحت حياتنا كلها عالحركرك

!!!!!!!


شكر الله لك

صاحب المضيفة يقول...

امتى هانسيب الحركرك ده بقى ونشوف مصالحنا بشكل عملي


ربنا يسهل ويكون قريب


ربنا يكرمك يا مولانا على مواضيعك المميزة دي

الفجر قادم يقول...

السلام عليكم
و الله سياسة ع الحركرك دى أصبحة سياسة عامة وسائدة حتى بين أوساط من يفترض أنهم يحملون عبأ هذة الأمة الا من رحم ربى........وعشان كدا اصبح وضعنا فى العالم كله ع الحركرك ....ربنا يستر وميكونش جزاء وفقا ونقف على دخول الجنة ع الحركرك.....جعلنا الله من اهل الفردوس السابقين

الفاتح الجعفري يقول...

السلام عليكم ورحمة الله وبركاته استاذي الحبيب
ومازال قوما يتخلفون حتي يؤخرهم الله ,,نسأل الله العفو والعافيه
مشكلة الحركرك انك اذا لم تلحق مؤخرة القطار ضاع منك القطار كله واذا لحقته كنت في الذيل
رائعه كالعادة استاذنا
وجزاكم الله كل خير

صيد الخاطر يقول...

بسم الله الرحمن الرحيم
كيفك يابشمهندس وحشني جامد جدا والله

انا ممكنتش ناوي اكتب تعليق على الموضوع
لولا اني مبتعلمش وحصل معايا النهاردة موقف

بسبب الحركرك

لم باسافر للقاهرة باخد معايا مبلغ معين
بيكفيني وبيفيض منه حوالي خمستاشر جنيه تقريبا

تقوم الفلوس كلها تخلص النهاردة واتورط نوريكة محترمة مش عارف ارح
الفلوس متكفيش حتى لحد بنها

حتى يسر الله لي ابن عمي كان في القاهرة

وروحت معاه

بسبب الحركرك اتاخرت 6 ساعات في العودة

تقبل تحياتي واتمنى ان اراك قريبا

ماتيسر

و القادم....أجمل يقول...

طبائع بشر

زميلتي و صديقتي لازم كانت تطلع اللجنة
مش على الحركرك
دا الحركرك الحركرك يعني

بالنسبالي
أروح قبل الميعاد بنص ساعه
بخاف الصراحه أتأخر

طبااااائع بشر

بس دا بالنسبة للمواعيد بس
لكن أكيد فيه حاجات تانية
طبيعتي فيها على الحركرك

:(


تقديري الشديد

:)

عدى النهار يقول...

آه من الحركرك ده لما بيمسك فى الواحد ، ما بيبقاش سهل التخلص منه

ربنا يوفقك ويعينك على ما أنت فيه

عاشقه الاقصى يقول...

فعلا حياتنا بقت على الحركرك

موضوع متميز للغايه

بوركت وأعزك الله

لماضة يقول...

طيب انا جايه اسيب تعليق على الحركرك كده
للاسف احنا اللى بيجري في عروقنا استبدلناه بالحركرك

bastokka طهقانة يقول...

بوست طريف جدا لانه يتناول كلمة كادت تندثر

اوروفوار

سومه...مجنونه فى بلد عاقل يقول...

لا حول ولا قوه الا بالله
والله يا استاذ عصفور فعلا حياتنا بقيت كلها ع الحركرك
تحياتى ليك سومه_87

.:.-=- ELGaZaLy-=-.:. يقول...

السلام عليكم ورحمة الله وبركاته

كيف حالك اخى محمد لعلك بخير ان شاء الله

سيدى الاجابة ..اننا بانفسنا نحيا فى عصرنا هذا على الحركرك

منى يقول...

ربنا يوفقك استاذى
لما تحب ويحبه الله ويرضاه
الحركرك
عند ناس منتهى الامل
وعند ناس ملخص الفشل
فكرنى باهل الاعراف
ربنا يستر علينا جميعا
ويجعلنا فى الفردوس الاعلى

Ahmed Essawy يقول...

و انا مبقتش فاضي او عندي كان دقيقه اقراه فيها تدوينات علي الحركرك

aya يقول...

الحركرك؟؟؟؟

انا حياتى وحياة اللى حواليا كلها على الحركرك

جايز ده بقى طبع جديد عندنا

ليها مفردة تانية استاذى وهى (الا خمسة )

طريقة الا خمسة فى الحياة ديه برضه اصبحت شائعة جدا

حاولت اعلم نفسى كتير انى ابعد عن الا خمسة ديه
بس معرفتش

فعلا هو نمط ونظام حياة سيئ وسلبى

Mohamed Shedou محمد شدو يقول...

على الهامش: عدم حضور خطبة الجمعة قد يرجع في كثير من الأحيان لتدني مستوى هذه الخطب في مساجدنا اساسا. المفروض ان الخطبة هي درس علم يستفيد منه المستمع في حياته وفكره، لكن حين يكون هذا الدرس مغرقاً في الانفصال عن الواقع وفي مجافاة العقل فالنتيجة الطبيعية ان يزهد الناس في الحضور.

أحمد سعيد بسيوني يقول...

بسم الله

شكلي جيت متاخر قوي على الحركرك بعد الناس كلها ما علقت
ههههه
صحيح حياتنا كلها بنقضيها ع الحركرك

تحياتي

عصفور المدينة يقول...

إخواني وأخواتي الكرام جزاكم الله خيرا كثيرا
أرى أن كثيرا من تعليقاتكم قد احتوت إضافات وتشخيصات حول الموضوع سوف أكتفي بنقلها وتلخيصها

Habib

حفظ الله والدتك ووالدتي ووالدينا أجمعين
لولا أنني مشترك بحملة ضد الحملات كنت قمت بحملة ضد الحركرك
========
أغلب الحاجات اللي بنعملها عالحركرك للأسف بتكون مش متقنة
=======

أنسانة-شوية وشوية

كل ده نابع من ضيق الوقت وكثرة الانشغال ويدوب نعيش علي الحروكروك

عاشقه الفردوس

انا لا اتخيل ان لايذهب مسلم لصلاه الجماعه والجمعه تحديدا

وطني

جزاك الله خيرا

محمد الجرايحى

جزاك الله خيرا أخي محمد ادع لي ربنا يوفقني وسوف أعود إن شاء الله كما كنت مع فصل الشتاء :)

خمسة فضفضة

يا دكتورة ربنا يبارك فيك ويتقبل دعائك لي بظهر الغيب
عندما قلت قبل زمن المحمول كنت أسخر من إعلانات سمعت عنها لإحدى شبكات المحمول
عافانا الله وإياك من الحركرك

حطم القيود

هى ثقافه سادت مع موجة الاستسهال والتبرير اللى بقت مسيطره.... ولما اعتدناها ألفناها
مرض التبرير يجعل الإنسان يتساهل فعلا طالما أنه يمكنه التبرير

ابن حـجـر الـعـسـقـلانـى

دكتور جى أوميجا اسم كويس برضه :)
ماهو اللي بيشاغل على الحركرك لما بتهيف بتهيف ناحية ال Unstable مش عارف ليه مش تهيف الناحية التانية

kochia

ربنا يستر علينا جميعا يا أختاه

دعوة الفردوس

بالعبيط أثناء السعة = على الحركرك أثناء الضيق
=======
نعيش على الحركرك لأننا نصرف أموالا في رفاهيات وأشياء في غير موضعها زي مكالمات المحمول والكهرباء الزياده وغيره نصرف بالعبيط
بنلحق أوقاتنا بالعافيه لأننا بنضيع وقت بالعبيط
المصيبه ان التوبة متنفعش على الحركرك ومينفعش تستنى لغاية ماتبقى على الحركرك
======

نـــــــور

جزاك الله خيرا
========
بس الواحد بيجاهد نفسه وسهل انه ينجح في تغيير ثقافة "الحركرك" دي ، لأنه لما بيتقن الحاجة ويحس بطعم الحاجة بجد .. . بتختلف نظرته للامور
دا غير انه في الاول والاخر لو تذكر انه بيتعبد لربنا بكل حياته وتصرفاته .. وان ربنا رقيبه .. مش هيحب يعمل الحاجة الا على اصولها .. وهينسى الحركرك دا :)
===========

جنّي

أخي سيد أعانك الله وأتوقع عودتك قريبا


بطوط حبوب

دجزاك الله خيرا يا دكتور فعلا بعض الناس لما بشوف المخطئين بيتساهل بس البعض الآخر ربما ينتبه لسوء حاله

واحد مش فاهم حاجة

نعم إنه مرض العصر
لا لو بصيتلها كدة هاتلاقى كل حاجة بقت بتتعمل عالحركرك
دة حتى الاكل بقينا بناخدة خطف

محمد عبد الغفار

أدنى يعني أقل من الحركرك كمان ؟؟؟؟ زي الفيمتو ثانية
:)

الطائر الحزين

حلوة يا حاج الطرفرف دي

مـحـمـد مـفـيـد

نعم كلنا كذلك

جمعاوى روش طحن

جزاك الله خيرا


امام الجيل

نعيش فى تخبط
وزى ما تيجى تيجى ونتذكر الاعمال فى اخر وقت لكى ننجزها ونتمها
قد تكون هناك ظروف وملابسات
ولكن تنظيم وترتيب الوقت شئ اخر

جزاك الله خيرا قد يكون هناك ظروف فعلا ولكن التساهل في التبرير أمر آخر

صانعة الحرية

شوفي بقى اتصرفي مافيش حجج

المهـ إلي الله ـاجر

:)
والمشكلةلدي الغالبيية هي إلف الحركرك حتي يصبح هو السلوك الدائم والطبيعي في التعامل مع كافة الامور فتجدهم لا يلحظن أن ما يفعلونه من حركرك يسمي حركرك (:

appy

هى دى حياتنا كلها حتى حكومتنا

Jana

لقد أضفت نوعا جديدا من الحركرك وهو الحركرك في العلاقات

خواطر رئيس شاب

هى دى مصر كل المصريين الا من رحم ربى عايشين بالاسلوب ده

ام البنات

أسيرة الحركرك
اتضح إن فيه ناس مدمنين ومستمتعين بالحركرك كمان

أحمد كمال

الأسرة دي متأصلة عايزة إبادة
:)

ftataljanna

جزاك الله خيرا يا أستاذة

فعلا حياتنا كلها ع الحركرك ده لو لحقناه اصلا
ساعات بيفوت حركرك وحركركين وتلات حركركات ونعيييييش ولاااااااااااا فى الدنيا
وساعات الناس بتبقى شايفه الحركرك وهو بيعدي من قدام عنيهم ولا عظة ولا رجعة ولا تقوى غفلة تحس انهم فى غيبوبة

مؤمنه

تحليل قيم جدا
=========
الحركرك ناتج من عدم حب ما نقوم به من اعمال وقد ايه تقيله على قلبنا ولد احساس بالامبالاه
يكون رد فعل طبيعى بيستخدمه الشخص على اعتبار ان ما يقوم به من عمل مكره عليه عقاب
فيرد الى ذاته هذا الاحساس بالامبالاه بعمله فيقوم بانجازه على الحركرك
اما الانسان المحب لعمله يبدع فيه
ايضا اتساع مساحة الامل عن الحد المطلوب والنظره البلهاء للعالم الخارجى
======

النجمة الصامدة

جزاك الله خيرا

صاحب المضيفة

ياريت إن شاء الله الحركرك هو اللي يسيبنا حتى المهم نفوق
:)

الفجر قادم

و الله سياسة ع الحركرك دى أصبحة سياسة عامة وسائدة حتى بين أوساط من يفترض أنهم يحملون عبأ هذة الأمة الا من رحم ربى........وعشان كدا اصبح وضعنا فى العالم كله ع الحركرك ....ربنا يستر وميكونش جزاء وفقا

ونقف على دخول الجنة ع الحركرك.....جعلنا الله من اهل الفردوس السابقين

الفاتح الجعفري

ومازال قوما يتخلفون حتي يؤخرهم الله ,,نسأل الله العفو والعافيه
مشكلة الحركرك انك اذا لم تلحق مؤخرة القطار ضاع منك القطار كله واذا لحقته كنت في الذيل

صيد الخاطر


يااه يا محمد انت بتاكر التدوينة عملي :)
و القادم....أجمل

يعني فيه ناس بيشتغلوا ع الحركرك في حاجات وحاجات لأ


عدى النهار

أعاننا الله وإياك أخي مدحت بارك الله لنا في دعائك وأخوتك

عاشقه الاقصى

جزاك الله خيرا

لماضة

تعليقك طبي برضه يا دكتورة :)

bastokka طهقانة

لحقناها قبل ما تندثر:)

سومه...مجنونه فى بلد عاقل

الله المستعان

.:.-=- ELGaZaLy-=-.:.

وعليكم السلام ورحمة الله وبركاته
يعني يا محمد حياتنا نفسها بين الحياة والموت :)

منى

جزاك الله خيرا
=======
الحركرك
عند ناس منتهى الامل
وعند ناس ملخص الفشل
فكرنى باهل الاعراف
=======

Ahmed Essawy

أعانك الله يا أحمد ووفقك في عملك

aya

المرادف العصري للحركرك = إلا خمسة
أعاننا الله وإياك في البعد عنه

Mohamed Shedou محمد شدو

معك يا أخي وأوافقك تماما ولكن من ناحية الحكم الشرعي هذا ربما يكون سببا لعدم الحضور ولكنه لا يسوغ عدم الحضور ولا يجيزه بل يجتهد المسلم في حضور الخطبة
وقد تكلمت في هذا الأمر في تدوينة منفصلة
http://ctybrd.blogspot.com/2007/10/1.html
وبعدين هي المسألة عاملة زي البيضة والفرخة
الخطيب بيطرح طرح باهت ميت يقوم الناس ما يحضروش يقوم يطرح طروحات أبهت وأشد موتا يقوم الناس الباقيين يهربوا وهكذا يقوم الأوقاف تغير الخطيب وتجيب أسوأ عشان المسجد فاضي يقوم ناس تانية تمشي :)

أحمد سعيد بسيوني

أعانك الله يا دكتور ووفقك

ابو اعصار يقول...

الشعوب العربيه بوجه عام شغلها كله على الحركرك انا اعتقد ان ده من احد انواع الفساد الاداري
سلمت يا مهندس على الفكره