الأربعاء، أكتوبر 15، 2008

جوجل والمسامير

فيه خواص في الجيميل جوجل بتنزلها تحت التجربة بيتم تشغيلها حسب رغبتك
لورحت Settings->Labs

الخاصية اللي ضحكتني كثير هي جديدة لسة هي اسمها Goggles وتكرار حرف الجي فيها عشان التأخير يعني إنها بتأخرك لما تيجي تبعت رسالة وتخليك تتريث عن طريق إنها بتطلع لك مجموعة عمليات حسابية تحسبها قبل ما تبعت الرسالة
وهي بتشتغل بالليل في أيام الأجازات بشكل افتراضي.



وانت ممكن تتحكم في المواعيد اللي بتشتغل فيها الخاصية دي عشان ما تبعتش إيميل وترجع تندم إنك بعته


بيطلع شوية عمليات حسابية تملاهم وتشاور نفسك قبل ما تبعت إيميل تقطع علاقتك بحد أو تسيء إلى أحد أو أو.......



موضوع الخاصية ده ذكرني بالمثل اللي بينضرب بالأب اللي أمر ابنه إنه يدق مسامير في السور وبعدين يخلعهم لما ينجح إنه يتحكم في نفسه وبعدين نبهه إلى إن المسامير حتى بعد خلعها بتسيب آثار مكانها

وذكرني كمان إن أسهل شيء إن الإنسان يفقد الأصدقاء وقد قال الله عزوجل
وقل لعبادي يقولوا التي هي أحسن

حقيقة كثير بافكر إن فيه تصرفات وكلمات يمكن تجاوزها بين الأصدقاء وبين الإخوان والأحبة لكن فيه تصرفات وكلمات بيكون وراها مدلول يناقض أصل المحبة والصداقة ففعلا أنا من النوع الذي تترك فيه هذه المسامير آثارا لا يمكن محوها أبدا

يعني لما أكون باحب زوجتي مثلا وأقعد مع أصحابي أهزأ منها وأسخر من اليوم اللي شفتها فيه وأجلس أعدد مساوئها أعتقد إن ده يتناقض مع أصل الحب.

ولما أكون باحترم إنسان وأكن له العرفان بالجميل وبعدين أسيء إليه أو مثلا لا أتحمل منه النصيحة وأردها عليه بعنف وقسوة أكيد ده بيتناقض مع أصل الاحترام اللي هو في القلب أصلا مش تصرفات.

ولما أكون أنا باحبك مثلا وليل ونهار أتغنى بهذا الحب وبعدين أكون في موقف شايف فيه مصلحة ليك أو شايفك مقدم على خطر وأتصرف بلا مبالاة أو أظهر الشماتة فيك ما ينفعش نقول ده موقف وعدى مهما حصل من أسف ومهما حصل قبليه وبعديه من حاجات كويسة لأن من وجهة نظري ده بيدل على إن أصل المحبة ده ظاهري مش قلبي.

عشان كدة التشبيه بتاع المسامير ده بليغ جدا
وعشان كدة جوجل عملوا الخاصية بتاعة جوججل اللي بتخليك تتريث قبل ما تبعت إيميل وعشان كدة لازم الواحد يفكر كويس في تصرفاته قبل ما يعملها ويشوف الرصاصة اللي طالعة دي هو قاصد يقتل بيها حد ولا بيهوش بيها في الهوا
عشان الاعتذار للمقتول مش بيوصله.


هناك 73 تعليقًا:

مهندس مصري يقول...

و يا ترى دي نصيحة عامة و لا الكلام متوجه لحد معين
:)
عموماً هو في التأني السلامة
و قديماً قالوا الحكيم لسانه خلف عقله و الأحمق عقله خلف لسانه
و معاك حق أثر المسمار مش ممكن يتمحى و غن كان ممكن يستخبى بشوية بوية
:)

آلام وآمال يقول...

والله ربط جميل وملاحظة في محلها
:)

احمد الجميل يقول...

تدوينة رائعة و الله ما شاء الله
ذكرتنى بمقولة الكلمة لك فاذا ما خرجت منك ملكتك

Ahmed Al-Sabbagh يقول...

الله
رائع انا بحب التدوينات دى اوى
وخاصة انك بتربط بطريقة سحرية عجيبة بين خاصة انترنتية حديثة جدا وبين خصال واخلاقيات انسانية بنطلع منها بحاجات جميلة اوى
انا مش هشغل الخاصية دى لانى عامل عندى خاصية بيولوجية مشابهة وكل ما تحصل حاجة تضايقنى واجى ارد رد عنيف قررت قبل ما ارد انى اتصل واحد صاحبى صديق عزيز هو اتعود منى اتصل به فجاءة واقولة فولان عمل كذا او كتب كذا وانا غاضب بشدة وبعد دقيقتين اقفل معاه وانا هادى واكتب بمنتهى العقلانية
والطريقة دى نجحت اكتر من مرة وجابت نتايج رائعة
محتاجين فعلا للتريث قبل ردود الفعل العنيفة تجاه اصدقاء فى مواقف سيئة بنمر بيها كلها احيانا
البناء بياخذ ايام وشهور وسنين لكن الهدم بيتم فى لحظات
وممكن الصداقة اللى اتبنت فى وقت طويل
تضيع او تتشوه فى لحظة غضب واساءة
وان كان ربنا انعم علينا بنعمة التسامح والصديق المخلص هو اللى بيغفر
يعنى انا فى زميل اساءت له منذ شهور اساءة واضحة وكلمته بتعالى وقولت كلام ما يصحش وطوال ايام طويلة كان ضميرى بيأنبنى وزعلان من نفسى اوى وبمجرد ما اعتذرت له قاللى ياراجل اعتذار ايه واقترب منى فى الحديث ونسى الاساءة
الحمد لله
ربنا ما يحرمنا من كتاباتك ابداااااا

احمد

A.SAMIR يقول...

جوجل دي عجيبة جدا
عليهم شوية حاجات
بس بجد قصة المسامير دي ماكنتش سمعت عنها قبل كدة.....حقيقي نصيحة جميلة
تحياتي واحتراماتي

دعوة الفردوس يقول...

حوار جوجل ده ضحكني والله



بس هي المواقف اللي بيعتذر بيها الشخص بعد كده مش بتضيع أثر المسمار؟



انا بالنسبالي بتضيع


المهم اني من العشرة الأوائل
عايزه جايزه:))

Maha يقول...

السلام عليكم ورحمة الله

تدوينة ظريفة جدا أ/عصفور :)

بس يعني كان لازم يعملوها عمليات حسابية .. أنا بكره الرياضيات وسنينها .. ههههه ده حيخليني بعد إجباري على حل كام مسألة إني أبعت أتخانق معاهم هم مش مع اللى كنت بعتاله أتخانق معاه :D

وهل فيه تلميح من جوجل عبر اختيار وقت تفعيل الخاصية إنه الإنسان أيام الأجازات بالليل بيكون أكثر استعدادا للشجار مثلا أو ارسال رسائل حمقاء ولا ايه :D

جزاكم الله خيرا :)

طال الليل يقول...

السلام عليكم
أستاذى الكريم كيف أنت وكيف أخبارك
أنا مقصر ولكن مثلك بالعفو أجدر وبه السماح أليق

ولعل هذا مصداق الخبر الذى لست متأكدا من نسبته إلى الحبيب المصطفى من نصحه بالجلوس على الأرض حين الغضب أو كما قال صلى الله عليه وسلم


خقيقة نحتاج غلى أن يسبق الحلم غضبنا كيلا نجرح أهل مودتنا جرحا يتعذر برؤه

أخى الحبيب رزقنا الله جميعا الحلم والصبر ونفاذ البصائر والترفع عن الصغائر

زحل الفلكي يقول...

حلوة الفكره دي
الواحد ساعات مش بيعرف يمسك اعصابة
وبيرجع يندم
لكن في وقت خلاص معادش فيه رجوع
عايزين نعملنا شوية حاجات من جوججل دي في الحقيقة :)
تخيل كده يا باشمهندس لما ييجي الواحد يتكلم يطلعله في مخة عمليه حسابيه يخلصها وبعدين يتكلم :D:D:D

موضوع متميز يا باشمهندس ويارب كلنا نفتكر نفكر قبل منتكلم وانا اولهم :)

الطائر الحزين يقول...

معك و ليس معك

ليس معنى ان اكون على علاقة حميمة بصديق سنوات طوال وياتى مرة او مرتين او مرات اسىء فهمه او اوبخة او يصدر منى ما يسوءه اقوم احكم على كل السنوات الطوال بالفشل واقلل درجة حبى له

=============
اين الحلم والعفو

العاشق....محمد على يقول...

شيخ المدونين اسعد الله اوقاتك بكل الخير
جامد اول موضوع المسامير ده

كل واحد فينا لازم يفكر قوى فى

كل كلمة قبل مايقولها ولوطلعت كلمة غلط لازم يعتذر لصاحبها

ولو اسيئ ليه يعفو عن الاخرين

فكلنا اصحاب زلات واخطاء

"ولمن صبر وغفر ان ذلك لمن عزم الامور"



على خير نلتقى....والله ولى التوفيق

ابو اعصار يقول...

يا سلام عليك يا بشمهندس وانت بتربط خاصية موقع في المعاملات
وبرده فكرة المسامير
وقديما قالوا الرصاصة اللي بتطلع بترجعش
مش عارف مين هما لسا

بس الا تتفق معي ان في مواقف مش محتاجة اي دقيقة تأخير

الله يجعلك دايما دالا للخير

Monzer يقول...

حبيبك يبلعلك الظلط وعدوك يتمنالك الغلط

توصيفها فين من التدوينة دى

أرق تحياتي يا شيخي الحبيب

خمسة فضفضة يقول...

السلام عليكم ورحمة الله وبركاته

حلو الربط ده ياباشمهندس

خصوصا ان خاصيه Goggles فيها جمع وطرح وضرب يعني كله تبع الارقام والهندسه
:))))))))))

fahd يقول...

وهل الاخ جوجل ما اخدش في اعتباره ان ممكن فترة التريث دي ممكن تخنق الواحد ومتخلهوش يعمل خير مثلا


عايز ابعت رسالة شكر لواحد وبعدين لما افكر شويه اقول ما يستاهلش والله ماانا باعت


الناس مش كلها شريرة وعايزة تتخانق

وخير البر عاجلة

صاحب المضيفة يقول...

ربنا يبارك لك يا عمنا ويفتح عليك

موضوع جميل ورقيق

دمت بكل الود

أحمد الدرعه يقول...

هههههههه الله يكرمك يا باشمهندس :)
أنا كنت شفتها قبل كده ولقيتهم عاملينها للجماعه اللي بيسكروا -ربنا يعافينا- فنفضت للموضوع , بس أول مره اخد بالي من ال g المكرره :D

ربنا يبعد المسامير بين الحبايب :)

mahasen saber يقول...

الله ينور عليك يا استاذ محمد ..اول البوست جابلى اذبهلال لانى اتصدمت رياضه وجمع وطرح هيا دماغى ناقصه وقلت هحضر الكالكليتر جنبى وانا ببعت ايميل بقه وهعانى الامرين ...شويه لقيت الكلام احلى وغير الكلام الاولانى خالص ...
بس فعلا التناقض الغريب فى التصرفات ده بيتنافى مع اصل الشئ فعلا ازاى اكون بحب حد واسخر منه او اكون شايفه بيتأذى نفسيا حتى واسكت
الله ينور عليك حللت الموضوع من الطريقه الجوجليه الى طريقه كلها احساس بالغير وتقدير ليهم ...الله يكرمك وينور عليك..

مجداوية يقول...

السلام عليكم

أضحك الله سنك أخى الكريم
ليه ؟؟
لأن مدخل الكلام مختلف تماما عن الموضوع ومع ذلك بينهم ربط شديد ودى براعة أشهد لك بها لدرجة انى بالفعل ضحكت أنا افتكرت حضرتك حتستعرض كعادتك البرامج الجديدة ومميزاتها وطريقة استخدامها واذ بى أفاجىء ان موضوع التدوينة يمس حياتنا كلها والمسامير أماكنها مليئة بالثغور وما زالت هناك مسامير لم تزال كألغام الصحراء الغربية وليس لها خرائط !!! هذه التدوينة أضحكتنى اعجابا وآلمتنى بتفقد أماكن المسامير
أحييك بشدة ,,تدوينة رائعة بحق

بس خلاص ... يقول...

السلام عليكم.....
انا عضوة جديدة واتمنى ان تتقبلونى فرع من هذه الشجرة العظيمة التى اصلها ثابت وفرعها فى السماء بما تناقشه من مواضيع جميله وجذابة ....
وبالنسبة لموضوع التريث ده جميل جدا انك تتريث فى كل شئ لان الاندفاع بيكون له عواقب مش حلوة وساعات كتير بتخلينا مش راضيين عن نفسنا بعد ان تهدئ ثورة الغضب والاندفاع...
و بس خلاص.....سلام

Jana يقول...

أفادك الله يا باشمهندس
انا اول مرة اسمع عن الخاصية ..واسمع عن حكمة المسامير
لكن متهيألى ان بعض الناس واللى ممكن كلمتهم تعلم كعلامة المسمار .وده من هول الصدمة بها ..ولاكتشافنا نفاقهم على غير ما كان متوقع منهم ..هؤلاء من لا يصلح معهم تريث ولن يمهلهم تفكير ..
فالموقف او الكلمة ستصدر عاجلا او آجلا ومتهيالى برده ان ده من فضل ربنا لكشف بواطنهم وهويتهم الحقيقية قبل توطد العلاقة اكتر ...
فإن كانت توطدت بالفعل "حيث شدة العلاقة من شدة المصداقية والثقة"..فالتريث هنا يكون من نصيب المصدوم ..ان يعيد التفكير فى كلمه الآخر فقد يكون الشيطان هو من صورها له كالطلقة وحفرها فى قلبه حفر المسمار..حيث لا يعبث الشيطان بمهارة وحنكة كعبثه فى حب البعض للبعض فى الله

وهنا نصل الى أهمية التريث فى نقطة آخرى
وهى التريث فى الصدمة بجانب التريث فى القول ما ادى الى الصدمة

أميرة محمد محمد محمد يقول...

المشكله طبعا اني مش بفهم حاجه في حوارات الكمبيوتر دي
فخلينا بس نكتفي بنصيحة التريث وعدم الاندفاع
جزاك الله خيرا

أنسانة-شوية وشوية يقول...

علشان كده كنا بندرس في مهارات الاتصال ان لما تجيلك اى رسالة تضايقك متردش عليها علي طول واستنى شوية واذا كان لازم ترد اكتب الرد واحفظه في المسودات وتانى يوم اقراه تانى واكيد اكيد هتغير رايك ولما تقراه هتعرف ان الكلام شديد وهتغيره وده عن تجربة فعلا واقعد اقول معقولة انا كتبت الكلام الجامد ده ليه كده

جزاك الله خيرا

سومه...مجنونه فى بلد عاقل يقول...

:))
استاذ عصفور تشبيه خلانى اسخسخ من الضحك انا عاوزه واحد جوججل فى نافوخى
طيب حقول لحضرتك على شىء ماما قالتهولى زمان اما كنت بطبش فى الاكلام منغير تفكير والموضوع دا نفع معايا قوى عشان متكلمش وانا منفعله
قالتلى اما تحبى تردى على حد وتبقى متغاظه ومتاكده انك حتردى بحديه او انفعال تسكتى خالص وتاخدى نفس وتعدى لعشره هههههههه دا جوججل بتاع ماما شوفت اهى ماما طلعت احدث من جوججل بخمستاشر سنه
واضح قوى ان مهندس بيستغيث اما اروح اشوفه :))
تحياتى لحضرتك سومه_87

موناليزا يقول...

طب ولو حد مستعجل ومش فاضى للعمليات الحسابية دى يعمل ايه وقتها؟؟؟
عليهم حركات!!
ولكن بعيدا عن جوجل
الرسالة قيمة وتستحق التذكرة

nona يقول...

لو الغرض منها مثل ما تقول التريث فهو شى جميل
بس لو احنا كل ما نحب نبعت بوست او رد نلاقى العملية الحسابية دية
يبقا معظمنا هيعتزل التدوين و انا اولهم لانى بكرة الرياضة جدا وكمان اصلا الواحد متعقد من موضوع تاكيد الكلمة عند بعض المدونات قبل ارسال التعليق

اما بالنسبة للقصة فهى جميلة و معناها اجمل و لكن العفو عند المقدرة
و دائما عندما يكون لنا شخص لة معزة فى القلب فاننا نسامح لة كل اخطائة
و من نحن حتى لا نسامح على اخطاء احبابا

جزاك الله خيرا على تحاليك الجميل

عالم حبيب يقول...

سبحان الله .. كنت اقرأ كتاب اسمه " إلقاء الفيل الزهري " فيه فصل بعنوان " البريد الإليكتروني ورصاصات النص أو القذائف المرتدة " يتحدث فيها عن نفس الفكرة .. ويشبه الرسالة التي ترسلها بطلقة ويوصي بالتفكير قبل الضغط على الزناد

هأنقل جزء من الكتاب هنا

إن مشكلة رسائل البريد الإليكتروني أنها ترسل أحيانا بسرعة أكبر من سرعة استيعاب عقولنا .. لذلك السبب أتجنب الرد المباشر على رسالة تحتاج بعض الكياسة .. ففي هذه الحالة أحتاج لرؤية الرد كاملاً .. ثم تنقيحه بعض الشئ .. والتفكير فيه ملياً .. وأحيانا , طلب المشورة من شخص آخر .. وبعدها أرسله

أظن هذا ما يفعله جوججل

محمد الجرايحى يقول...

أخى الفاضل: أبويحيى
السلام عليكم ورحمة الله وبركاته
هذه الشركات لم تصل للقمة وتحقق كل هذه النجاحات والمليارات من فراغ ، هم يعملون فى دأب ولايتركون كبيرة ولاصغيرة من الممكن أن تؤدى للعميل خدمة واستفادة إلا وقدموها له والأغرب أنى قرأت أن هذه الشركة العملاقة أسسها شابين صغيرين فى السن...

أحيى طرحك المتميز وعرضك الرائع والمفيدبارك الله فيك وأعزك
أخوك
محمد

امام الجيل يقول...

جميل

ومن جوجل ناخذ العب
:)

فعلا زى ما ذكرت ان مش بس بالكلام
يعنى ممكن منكنش واخدين بالنا ان الحاجت البسيطة دى بتاثر هذا التاثير الغائر

ولازم منستسلمش للناس
لانها للاسف تعدت ان كل واحد يتريق على الجواز
وكل واحد عادى لما يذكر حد بيحبه قدامه فى هزار وميردش
وووو

فلو تركنا نفسنا لتيار وما تعود عليه الناس
سنصبح مثلهم تماما

عاديين بل اقل

احساس لسه حى يقول...

عزيزى

معاك حق فى ناس بتتسرع كتير فى الاساءه وده بسبب الغضب

وساعات ناس تتسرع برضوا بعمل حاجات حلوة مع ناس وبترجع تندم لانهم مش بيستحقوا الحاجه الحلوة

على العموم المفروض اى انسان يفكر كتير قبل ما ينوى يعمل اى عمل سواء كويس او وحش مع حد


لاننا هنتحاسب على اى شئ هنعمله مهما كان بسيط

احب اشكرك على موضوع WordPress

وانا اهو عمال انقل فى المدونة

ربنا يسهل

تحياتى

سلام

احساس لسه حى يقول...

اه نسيت اقولك

فيها عربى ويا ريت تشرع برضوا بالعربى لمحبى اللغه العربيه مع انها بتشرح نفسها

بس كتشجيع على التعامل باللغه العربية

تحياتى
سلام

نـــــــور يقول...

ملحوظة جميلة اوي يا أستاذنا

ومعاك حق في كل كلمة .. تدوينة في الجون كما هي عادتك دوما..

ادامك الله بخير .. تحياتي.

مؤمنه يقول...

السلام عليكم ورحمة الله وبركاته

موضوع رائع رائع رائع

فعلا ما قلته حضرتك محق فيه مهما تظاهر الطرف الاخر بانه لم يتاذى من تصرفات المخطا الا انه على الاقل ترك بتصرفاته هذه علامات لا تمحى
ومن اسهل الاناس الذين نتركهم هم الاصحاب وليس الاصدقاء ان صح مفهوم الصداقه

موضوع جميل جدا من كتر اعجابى بيه مش قادره قديله حقه

جزاك الله كل خير
ومع التحيه لجوجل

والسلام عليكم ورحمة الله وبركاته

اقصوصه يقول...

موضوع حلو..ومفيد:)

هبة النيــل يقول...

فعلا معاك حق

ناس كتير بنشوفاها تناقدات في تصرفاتها

ربما يرجع إلى "غباء التعامل"

وهو الفعل دون تفكير

ربنا يخليلنا الحج جوجل اللي عملنا جوججل

بوست جميل شكرا لك

وضّاح يقول...

أستاذي الكريم..
معك حق فيما ذكرته..

بعض ردود الأفعال تحتاج لنصف دقيقة تفكير حتى نعرف أننا يجب ألا نفعلها.. وفي المقابل قد تستمر خسائر هذه اللحظات لسنوات..

المفروض يعقدوا العمليات الحسابية شوية, تعرف حضرتك .. أنا لما كنت في التعليم, كانت مادة الرياضيات بتأخذني من الدنيا أثناء مذاكرتها.. ممكن لو طولوا وعقدوا العمليات أنسى الشخص الذي كنت سأرسل له الرسالة..

انكسارات .. احمد البوهى يقول...

الحكمه ان نملك انفسنا عند الغضب حتى لو استعنا بجوجل D:
ــــــــ
ادام الله لك رؤيتك ورسائلك الهادفه

أحمد كمال يقول...

على فكرة الخاصية دي موجودة أصلا في الإنسان ، بس محتاجة إن الواحد يشغلها من لوحة التحكم .

اللي باستغرب له إن في ناس كتير متعرفش إن في حاجة اسمها لوحة تحكم ، زي ما تقول كده جهل بعيد عنك .

فكرة جميلة ، أحييك عليها .

أحمد سعيد بسيوني يقول...

عشان الاعذار للمقتول مش بيوصله

بوركتم

rovy يقول...

السلام عليكم

تدوينه رائعه و نصيحة غاليه

اطيب امنياتى لك اخى الفاضل و كل الشكر لك لتدويناتك الهادفه دائما ..

تقديرى و تحياتى

ahmed_k يقول...

فعلا من أسوأ المثله اللي ذكرتها
هو ذكر الزوجه أمام الأصدقاء بما تكره
فالزوجه هي السكن وهي الشطر الاخر للشخص
والإسائة لها إسائه لذات الزوج
وللأسف كثيرا ما ارى أشخاص يذكرون زوجاتهم بهذا الشكل ولكني اتجنب الحوار معهم او تامين حديثهم وأتعمد أن أعامل هذا الشحص بحذر
فإن كان هذا مسلكه تجاه زوجته
فماذا يكون مسلكه تجاهي ؟؟؟؟

نسأل الله لهم الهدايه

جمعاوى روش طحن يقول...

اسقاطاتك شديدة يا هندسة


أكرمك البارى

mostafa rayan يقول...

هذا موضوع قيم جزيت خيرا عنه

مؤمنه يقول...

السلام عليكم ورحمة الله وبركاته
تعليق خارج نطاق الموضوع لو تسمحلى حضرتك بس ان علقت فعلا من قبل على الموضوع

بالنسبه لموضوع النسخة الاحتياطيه للمدونه على ورد برس
انا جربتها بس بعد عملية تفريغ البيانات الى حضرتك قولت عليه ما جاليش اختيار القالب على طول جالى ان الايميل مش متفعل وانتظر الى ان يصل كود تفعيل على ايميلى
انا وقفت عندى الخطوات لحد كده

ارجو الاستفسار
دومت طيبا
والسلام عليكم ورحمة الله وبركاته

عصفور المدينة يقول...


مهندس مصري

وأعلم أني لم تصبني مصيبة
من الله إلا قد أصابت فتى قلبي
:)

آلام وآمال

أنت أجمل يا حودة

احمد الجميل

مرحبا أخي الحبيب جزاك الله خيرا

Ahmed Al-Sabbagh

إيه الحلاوة دي يابوحميد انت نفسيتك عالية أوي

A.SAMIR

الله يكرمك يا دكتور

دعوة الفردوس

انتي طيبة يا بنتي فعلا
بس انا وناس كثير مش بيضيع عندهم أثر المسامير

Maha

هو في تلميح
By default, Mail Goggles is only active late night on the weekend as that is the time you're most likely to need it
فعلا زي ما انت قلتي إن الناس بتبقى عرضة آخر الأسبوع للأخطاء


طال الليل

مرحبا يا دكتور كل عام وأنت بخير
"
نحتاج غلى أن يسبق الحلم غضبنا كيلا نجرح أهل مودتنا جرحا يتعذر برؤه
أخى الحبيب رزقنا الله جميعا الحلم والصبر ونفاذ البصائر والترفع عن الصغائر"

زحل الفلكي

مبروك يا باشمهندس النجاح
تخيلت الصورة اللي انت رسمتها وأضحكتني

تخيل كده يا باشمهندس لما ييجي الواحد يتكلم يطلعله في مخة عمليه حسابيه يخلصها وبعدين يتكلم :D:D:D


الطائر الحزين

مش حتعرف تقنعني
:)

العاشق....محمد على

مرحبا أخي وحشتنا
فعلا العفو والصفح شيء جميل ولكن أقول أن الجروح أيضا تترك أثرا يؤثر على التعامل فيما بعد

ابو اعصار

جزاك الله خيرا
وقديما قالوا الرصاصة اللي بتطلع بترجعش
بس الواحد بيفعل الخاصية بإرادته

Monzer


حبيبك يبلعلك الظلط وعدوك يتمنالك الغلط

توصيفها فين من التدوينة دى

أرق تحياتي يا شيخي الحبيب

01:33

خمسة فضفضة

أحب الرياضيات وأعجبتني الخاصية لذلك

fahd

يا عم فهد العم جوجل بيقولك فعل الخاصية في الوقت اللي يعجبك وكل واحد عارف نفسه هل هو بيستعجل في إرسال رسائل تجرح الآخرين

صاحب المضيفة

ربنا يخليك يا أنس وينفع بك

أحمد الدرعه

ربنا يحفظك يا أحمد شفت بقى

mahasen saber

لو المشاعر صادقة يبقى لازم التصرفات تنطبق معها

مجداوية

شفتي عنصر المفاجأة أنا كنت أقصد المفاجأة فعلا
وأيضا الفائدة

بس خلاص ...

مرحبا بك عضوة جديدة

Jana

التريث في الصدمة يستلزم أن أتوقعها دوما دوما دوما بلا استثناء وهذا كان صعبا علي في بعض الحالات حتى تعلمت


لكن متهيألى ان بعض الناس واللى ممكن كلمتهم تعلم كعلامة المسمار .وده من هول الصدمة بها ..ولاكتشافنا نفاقهم على غير ما كان متوقع منهم ..هؤلاء من لا يصلح معهم تريث ولن يمهلهم تفكير ..
فالموقف او الكلمة ستصدر عاجلا او آجلا ومتهيالى برده ان ده من فضل ربنا لكشف بواطنهم وهويتهم الحقيقية قبل توطد العلاقة اكتر ...
فإن كانت توطدت بالفعل "حيث شدة العلاقة من شدة المصداقية والثقة"..فالتريث هنا يكون من نصيب المصدوم ..ان يعيد التفكير فى كلمه الآخر فقد يكون الشيطان هو من صورها له كالطلقة وحفرها فى قلبه حفر المسمار..

حيث لا يعبث الشيطان بمهارة وحنكة كعبثه فى حب البعض للبعض فى الله
وهنا نصل الى أهمية التريث فى نقطة آخرى
وهى التريث فى الصدمة بجانب التريث فى القول ما ادى الى الصدمة


أميرة محمد محمد محمد

جزاك الله خيرا
بس على فكرة أنا باستغرب من الناس اللي بتقول أنا مش بافهم في الكمبيوتر وبعدين يفضلوا يقولوا كدة على طول في انتظار قولك أنا بقيت ماهرة

أنسانة-شوية وشوية

أعتقد كما أشرت أن أي إنسان يرسل رسالة لابد أن يقرأها بعد أن يكتبها بعين الناقد

سومه...مجنونه فى بلد عاقل

صح هو احنا فعلا عايزين نركب الجوججل ده على أفواهنا وأيدينا كمان عشان لوحات المفاتيح

موناليزا


nona

الخاصية مش تهمني أوي قد ما كان يهمني فكرة التريث كما أشار أخونا حبيب في تعليقه
أما هدف الذين قاموا ببرمجة الإضافة في الإيميل فهم يحتاطون لبعض من يتعاطون الخمور ثم يرسلون الإيميلات فيقومون بنتنشيط هذه الخاصية في أوقات الأجازات
وأثارت في نفسي مشكلة الكلمات القاسية والإيميلات الصاروخية


عالم حبيب

شكرا لك أخي الحبيب على إضافتك فوق الرائعة للموضوع

محمد الجرايحى

صحيح أخي محمد والذين قاموا ببرمجة هذه الإضافات هم فتية صغار أيضا

امام الجيل

أحسنت
فلو تركنا نفسنا لتيار وما تعود عليه الناس
سنصبح مثلهم تماما

عاديين بل اقل


احساس لسه حى

فعلا لا نضع الإحسان ولا الإساءة إلا في محلها
ووضع الندى في موضع السيف بالعلا
مضر كوضع السيف في موضع الندى
وبخصوص اللغة العربية في وورد بريس كنت قد جربتها فقابلني بعض المشاكل فآثرت المضمون مع كامل اعتزازي بلغتي
احساس لسه حى

جزاك الله خيرا

نـــــــور

جزاك الله خيرا

مؤمنه

تحياتي لك أختي الفاضلة
ومن اسهل الاناس الذين نتركهم هم الاصحاب وليس الاصدقاء ان صح مفهوم الصداقه
وفعلا لا أحب أن أستخدم كلمة الصداقة في غير محلها

اقصوصه

حفظك الله

هبة النيــل

مرحبا هبة النيل
هو الحقيقة ما أردت الإشارة إليه ليس غباء ولكنه عدم صدق في الأحاسيس
وضّاح

بعض ردود الأفعال تحتاج لنصف دقيقة تفكير حتى نعرف أننا يجب ألا نفعلها.. وفي المقابل قد تستمر خسائر هذه اللحظات لسنوات..

انكسارات .. احمد البوهى

جزاك الله خيرا الحكمة ضالة المؤمن

أحمد كمال

حيانا الله وإياك أخي الرائع
وكل إنسان يعلم أنه له لوحة تحكم بدليل أنه يتحكم في نفس عند المطمع والخوف

أحمد سعيد بسيوني

بارك الله فيك أخي الحبيب
rovy

جزاكم الله خيرا

ahmed_k

ما أجمل حكمتك

فإن كان هذا مسلكه تجاه زوجته
فماذا يكون مسلكه تجاهي ؟؟؟؟

جمعاوى روش طحن

أكرمنا الله وإياك

mostafa rayan

جزاك الله خيرا أخي ونورتنا

مؤمنه

شكرا لك أستاذة
بخصوص موضوع الوورد بريس
يعني في هذه المرحلة المفروض يكون وصل لك إيميل ودوري على الإيميل ممكن يكون راح
JUNK MAIL
وبعدين تاخدي الكود وتفعليه في الموقع

ammola يقول...

السلام عليكم
كيف حال حضرتك يا باشمهندس..لعلك بكل خير
الحقيقة من كتر المسامير انا باقدم اعتذار لاى حد مش حيلاقى حتة لمسمار تانى ...

سها السباعي يقول...

سهل جدا ان تنفعل وتتهور
صعب جدا ان تضبط نفسك وتمسك اعصابك
وتتانى وتتريث وتفكر

صعب ولكنني احاول

لاني بحسبة بسيطة وجدت انني اغسر بالسرع اكثر بكثير مما اكسب

وللاسف غالبا ماتكون خسارة لا تعوض

مؤمنه يقول...

السلام عليكم ورحمة الله وبركاته

جزاك الله كل خير
تعليق للمره التانيه خارج نطاق الموضوع

ارجو التماس العذر
بس ايه اقول لحضرتك انى بالفعل عملت نسخه احتياطيه على ورد برس
http://moimena.wordpress.com/

دى اللينك يشرفنى حضور حضرتك وان كان فيه اى ملاحظات اتشرف بيها

بس فيه حاجه انا علقت عند خالو احمد الصباغ ظهر ايميلى هل هو ظاهر ليه انا بس ولا للجميع
جزاكم الله كل خير
والسلام عليكم ورحمة الله وبركاته

asmaa ibnatalislam يقول...

السلام عليكم
معني جميل ذكرني بأشياء احسست بها كثيرا ولكني لم استطع التعبير عنها بلساني او ترجمتها الي كلمات
فاحيانا اتشاجر مع من احب شجارا ربما يكون تافها وعلي شيئ نافه ولكن ما يقال في هذا الشجار من اساءه لمشاعري بشكل او باخر يجعليدني اخرج منه لا اتذكر الشجار ولا سببه ولا شيئ سوي هذه الاساءه التي لم تكن في محلها ولعلها تترك في اثر يدوم اطول بكثير من اثر اي مشكله مهما كبرت

salma mohamed يقول...

انا من محبين مدونتك جدا
ولكني كنت باكتفي بالقراءة دون التعليق
انا فقط اريدك مساعدتي بخبرتك في مجال المدونه
انا حديثة عهد بالمدونات,وقد كنت بحاول اعمل شوية تغيرات,ولكن للاسف لخبط حاجات مش عارفه ارجعهاتاني
منها انه اصبح بدلا من كلمة تخطيط كلمة قالب ,وبقيت هاتجن من كتر محاولاتي لاستعادة شكل مدونتي
او على الاقل استعادة كلمة تخطيط بدلا قالب اللي بسببها اتغيرت مدونتي وضاع تعبي كله هباء
ارجوووووووووووو منك سرعة الرد

just me يقول...

فكرة عبقرية من جوجل و ربطك لها بحكاية المسامير عجبنى قوى
تحياتى

الربان يقول...

تحياتي اخي العزيز

فعلا...هناك كم من المتناقضات يملأ حياتنا....فمثلا : ندعي اننا نحب الله
و نطلب عفوه و رحمته...و نعصيه في نفس الوقت...

ندعي الصداقة و قد نكون من يسيء الي الاصدقاء...ربما عن عمد...و ربما بدون.

ندعي جميعا حب مصر و بلدنا...و قد نكون اول من يضر الوطن بتصرفات خاطئة
لانها تجلب له منفعة او حتي ربما لانه رأي
الغير يفعل ذلك فانساق وراء القطيع.

تحياتي و تقديري

صانعة الحرية يقول...

ما شا ءالله
متميز دائما يا استاذنا
لا تنسانا من صالح دعائك

mahasen saber يقول...

استاذى الفاضل ...ابا يحيى
اعذرلى جهلى وانعدام فهمى بس انا مفهمتش حضرتك تقصد ايه بتعليق حضرتك على بوستى الاخير هل هذا مدح ام زم ام مدحمزمزم
..........
انا اسفه يا استاذ محمد بس مش فاهمه خالص

عبد من عباد الله يقول...

بس المسامير بقت كتيره اوي دلوقتي يا استاذ احمد و يا ريت كمان بتتشال للأسف بيتحط غيرها و يدق عليها اكتر ... دا مش كلام سياسه لأ .... دا زي مرض كدا بدأ ينتشر في المصريين اللي الناس كلها كانت بتتحاكى علينا ( و البعض لازال ) عن الطيبه بتاعتنا و ترابطنا .... يا ترى حنقدر نعالج المرض دا ولا المريض حيفضل مستسلم ؟؟؟

SemSem يقول...

اول زيارة لى فى المدونة
اما قصة جوجل فالسه فى القريب العاجل ممكن تشوفوا حاجات تانيه جديده
ياما نعيش ونشوف

تحياتى

مؤمنه يقول...

السلام عليكم ورحمة الله وبركاته

حضرتك تأخرت علينا كثيرا فى نشر جديد
لم نعتاد على هذا

دومت طيبا
والسلام عليكم ورحمة الله وبركاته

كرم مسلم يقول...

ربط جيد

علينا التريث بالتأكيد فى حياتنا اليومية

أنا إنسان يقول...

ماتصدقش
1\11
مؤتمر القلة المندسة
على الانترنت
مؤتمر موازي لمؤتمر أكاذيب الحزب الوطني
مؤتمر القله المندسه
ردا على اكاذيب الوطنى
ماتصدقش
كل سنه بيقولوا نفس الكلام
كل سنه بيكذبوا نفس الكذب
بقالهم سنين بيكرروا نفس الكلام عن الفكر الجديد و العبور للمستقبل و الرخاء اللى احنا عايشين فيه
و الرفاهيه اللى مش حاسسين بيها
المره دى جايين يعرضوا معجزاتهم اللى حققوها
من تشغيل كل العاطلين و حل جميع المشاكل و رفاهيه و نعيم
و مشروعات و ديمقراطيه غير مسبوقه فى تاريخ العالم
و تعليم ايه و صحة ايه و محاربة فقر و كمان فساد
احنا بقى اللى هانرد عليهم و نفضحهم فى العالم كله بأراء و أرقام و احصائيات
و نعرف كل الناس اللى مش عارفين انهم كذابين ..
وان كنا نشك ان فيه لسه ناس مش عارفين كذبهم
هانفضح كذبهم
و نفضح فشلهم
فى الصحه و التعليم و التنميه و محاربة الفقر و محاربة الفساد
و نعرف كل الناس إن الاصلاح الحقيقى ضد مصالحهم..
و إن الفكر الجديد ما هو إلا خدعه و كذبه جديده يضاف لكذبهم
من 28 سنه
احنا اللى بيقولوا علينا القله المندسه..
رغم اننا الشعب ..
الاغلبيه
مؤتمر الحزب الوطنى..
.ماتصدقش
تابع معانا مؤتمر القله المندسه الالكترونى...
أول مؤتمر افتراضى فى مصرفى الايام 1 و 2 و 3 نوفمبرعلى الموقع
www.anti-ndp.com
برعاية شباب 6 ابريل
تسجيلات حيه
لقاءات جريئه مع كبار المفكرين و العلماء
بيانات للرد على الحزب الوطنى من جميع القوى و الحركات السياسيه الوطنيه
استمع لرأى الناس فى الشارع يردون على اكاذيب انجازات الحزب الوطنى
موقع المؤتمر
www.anti-ndp.com
أو مدونة المؤتمر
http://anti-ndp.blogspot.com/
........................................................................
ملحوظة هامة
ليس هذا إعلان
ولكنه دعوة للحضور والمشاركة
شاركنا في
مؤتمر القلة المندسة
شباب 6 أبريل

(أم البنين) يقول...

السلام عليكم ورحمة الله وبركاته
ربط رائع
نسأل الله أن يلهمنا رشدنا وأن نكون ممن يفكر قبل أن يتكلم أو يكتب أو يدون
جزاك الله الجنة

mohamed ghalia يقول...

أخى فى الله
نصائح رائعة
جزاك الله خيرا
دمت بود وفى سعادة

غير معرف يقول...

السلام عليكم
كيف احوالك يااستاذي اسال الله لك ان تكون بخير حال ووحشني جداا

أنا داخل بس عشان اسلم علي حضرتك
ادعو الله لي
عز
اليعقوبي
والسلام

م/ الحسيني لزومي يقول...

شارك في الحملة الشعبية للقيد بالجداول الانتخابية بوضع بنر الحملة علي مدونتك.
البنر موجود علي مدونتي

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك.
ضع بنر الحملة من علي مدونتك البنر موجود علي مدونتي

mohamedatef يقول...

ماتصدقش
1\11
مؤتمر القلة المندسة
على الانترنت
مؤتمر موازي لمؤتمر أكاذيب الحزب الوطني
مؤتمر القله المندسه
ردا على اكاذيب الوطنى
ماتصدقش
كل سنه بيقولوا نفس الكلام
كل سنه بيكذبوا نفس الكذب
بقالهم سنين بيكرروا نفس الكلام عن الفكر الجديد و العبور للمستقبل و الرخاء اللى احنا عايشين فيه
و الرفاهيه اللى مش حاسسين بيها
المره دى جايين يعرضوا معجزاتهم اللى حققوها
من تشغيل كل العاطلين و حل جميع المشاكل و رفاهيه و نعيم
و مشروعات و ديمقراطيه غير مسبوقه فى تاريخ العالم
و تعليم ايه و صحة ايه و محاربة فقر و كمان فساد
احنا بقى اللى هانرد عليهم و نفضحهم فى العالم كله بأراء و أرقام و احصائيات
و نعرف كل الناس اللى مش عارفين انهم كذابين ..
وان كنا نشك ان فيه لسه ناس مش عارفين كذبهم
هانفضح كذبهم
و نفضح فشلهم
فى الصحه و التعليم و التنميه و محاربة الفقر و محاربة الفساد
و نعرف كل الناس إن الاصلاح الحقيقى ضد مصالحهم..
و إن الفكر الجديد ما هو إلا خدعه و كذبه جديده يضاف لكذبهم
من 28 سنه
احنا اللى بيقولوا علينا القله المندسه..
رغم اننا الشعب ..
الاغلبيه
مؤتمر الحزب الوطنى..
.ماتصدقش
تابع معانا مؤتمر القله المندسه الالكترونى...
أول مؤتمر افتراضى فى مصرفى الايام 1 و 2 و 3 نوفمبرعلى الموقع
www.anti-ndp.com
برعاية شباب 6 ابريل
تسجيلات حيه
لقاءات جريئه مع كبار المفكرين و العلماء
بيانات للرد على الحزب الوطنى من جميع القوى و الحركات السياسيه الوطنيه
استمع لرأى الناس فى الشارع يردون على اكاذيب انجازات الحزب الوطنى
موقع المؤتمر
www.anti-ndp.com
أو مدونة المؤتمر
http://anti-ndp.blogspot.com/
........................................................................
ملحوظة هامة
ليس هذا إعلان
ولكنه دعوة للحضور والمشاركة
شاركنا في
مؤتمر القلة المندسة
شباب 6 أبريل

عايز حقى يقول...

كلامك جميل فعلا لابد أن يفكر الانسان جيداً قبل أن يقدم على أية تصرفات حتى لا يندم بعد ذلك .
وأنا أرى أنه عندما أحب انسان ثم أتكلم فى حقه فى غيابه فأنا فى الحقيقة لم أكن أحبه بل كنت أنافقه.
جزاك الله خيراً على هذا الموضوع

الحب كما ينبغى أن يكون يقول...

من أحب لا يسيىء ولكن قد يخطأ بدون قصد وألا لو تعمد الاساءة لإغن هذا يشكك فى أصل الحب من الاساس .
بارك الله فيك

نهر الحب يقول...

جزاك الله خيرا على البوست
فى معلومات بالنسبة لى جديدة تماما
وكمان تشبيهك غريب وجميل
عارف علينا التروى والتفكير قبل اى تصرف
بجد بارك الله فيك

نهر الحب يقول...

يوم الجمعه 14/11بأذن الله
هنروح نزور دار ايتام فى بورسعيد اللى يحب يشرفنا
ياريت تنورنا ونحاول نرسم بسمه ونتعاون على البر والتقوى
وبعدها هنقعد مع بعض شوية طبعا لو تحبوا
التفاصيل عندى بالمدونة
اعتذر لكنه ليس اعلان لكنها دعوه للخير

Dr- Hema يقول...

فعلاً

التسرع فى التعبير عن شىء من الخطأ

لان قد يسىء إلى هذا الشىء او

ان نخطأ فى من نكلمه او نرسل له شىء

والكلام جرحه أصعب من جرح السيف فجرحه لايلتئم بينما جرح السيف يلتئم بمرور الوقت

د/هيما

كلمة حق يقول...

ندعوكم للمشاركة معنا في رابطة " هويتي إسلامية "

لا تكن بخيلا وشارك معنا لنهضة التدوين

كون معنا أول شبكة تواصل في عالم التدوين

كلنا نتفق في الغاية نختلف في الأسلوب

هيا.................. كن أول المشاركين

رابطة هويتي إسلامية

FREE EGYPT يقول...

فلتسمح لى بهذه المساحة الإعلانية

اذا أردت ان تكتشف من وراء مقتل سعاد حسنى ، فالاجابة لدى فى المدونة

سري للغاية
www.toptop-secret.blogspot.com

بنت أبيها يقول...

فعلا

اثار المسامير عند ناس مش ممكن حتى تعالجها او تخفيها باي شكل من الاشكال


وناس كتير عارفه كده

لكن مش بيحسوا غير لما يحصل ليهم

مشكلتنا اصبحت في عدم مراعاة شعور الاخرين