الأربعاء، نوفمبر 21، 2007

تاج 008

قمت منذ حوالي أسبوع بإضافة رابط أعلى يمين المدونة أضع فيه رابط متجدد لتدوينة أرشحها لكل يوم وأتمنى أن تعجبكم اختياراتي

تاج من الأستاذة (الشيخة بصفتها من علماء الأزهر الشريف وليس سنا) الأصولية إصرار أمل كل أسئلته تبدأ بلو

لما حطيت العداد بتاع التاجات مش كان بيتهيأ لي إنه حيوصل كدة بس طلعت عامل حسابي على أرقام لحد 1000 يلا شدوا حيلكم

- لو -
لو مكنتش مصري بس عربي

كانت هتبقى إيه نظرتك للمصريين واللي بيحصل في مصر دلوقتي؟

يا حفيظ يارب أول سؤال كدة ؟... مصر ثروات مهدرة وشعب ذكي يلعب بالبيضة والحجر ..محب للإسلام وكما قال شاعر

لكنهم بشر
وطيبون حين يملكون قبضتي نقود
ومؤمنون بالقدر

...أشفق على هذا البلد للتحولات الاقتصادية التي حدثت له ...مساكين نفسي أبعت لهم كام مليون مساعدة ..... مش انا حابقى برضه من شعب غني ولا حتبعتوني الصومال؟

لو كنت أوروبي أو غير مسلم بردو إيه نظرتك للعرب والمسلمين؟

أولا أنا ما اقدرش أتخيل إني أكون غير مسلم

بس كون الواحد يحط نفسه مكان الآخرين مفيد جدا لتحديد نظرتهم ومفيد في التعامل مع الآخرين

أولا الحمد لله أنا أعتقد أنني إنسان منصف ولو كنت أوربي كنت حابقى أوربي منصف وبالتالي نظرتي للمسلمين حتكون نظرة الأوربيين المنصفين يعني سأجرد النظرة بين الإسلام والمسلمين

وأن هؤلاء المسلمين لو تمسكوا بإسلامهم لكانوا أعز قوم أما موضوع عرب أو غير عرب فمش في حيز تقسيماتنا.

لو قالولك إنت بقيت رئيس جمهورية هتعمل إيه؟

إيه ده هو أنا مش رئيس جمهورية؟ طيب أصبر أربعين سنة كمان مش مشكلة

نظرتي لموضوع الرئيس وما يفترض أن يكون هو في الحقيقة الرئيس مدير مش هو اللي بيعمل كل حاجة وحتى في الغرب بيسموها إدارة فطبعا الوضع القائم أكيد مش حيكون عاجبني قصدي أقول إنه على وشك إنه مش يعجبني قصدي أقول مش عاجبني خالص

أول حاجة أحط صورتي في كل المكاتب

لابد من تشكيل لجان متخصصة من ذوي الكفاءة العلمية والأمانة والديانة:) لتشخيص الوضع القائم وتقصي أحوال البلاد في جميع المجالات

تبدأ هذه اللجان المتخصصة فورا بصياغة اقتراحات لإصلاح الأوضاع وتحديد الموارد ومتطلبات هذا الإصلاح

تجتمع لجان فرعية عن اللجان المتخصصة برئاستي طبعا لصياغة الدستور الجديد ومن ثم القوانين والمحاكم الشرعية - لا ما تخافوش المحاكم الشرعية دي مش جلد ورجم وكدة بس برضه فيها إرجاع الحقوق للمظلومين وفيها اقتصاد واستثمارات آمنة فيها زكاة فيها مخالفات مرورية غير ظالمة ولمن خالف فقط فيها إصلاح بين الأزواج والزوجات

ألتزم أنا سيادة الرئيس أن أنزل إلى عمق الشوارع والأحياء الشعبية والقرى والنجوع - بجد مش دعاية ومش حاخد مصورين معايا كمان

ألتزم أنا سيادة الرئيس بألا أترك السلطة أبدا إلا بأحد العوارض عشان نكون واضحين مع بعض أصل الرئيس أو الحاكم مش المفروض يتغير إلا بفقدانه للأهلية

ألتزم أنا سيادة الرئيس بالتدقيق في ثروات أصحاب الثروات الكبيرة وأقولهم بالفم المليان من أين لك هذا

أقولكم إيه الموضوع كبير أنا مش عايز أبقى رئيس خلاص رجعت في كلامي اقروا التدوينة دي أحسن عند "عدى النهار

لو كان ينفع ترجع طفل تاني وتخليك طفل علطول هترجع؟ وليه؟
إيه ده هو انا كبرت .... طبعا نفسي أرجع طفل تاني بس نتفق على السن الأول أنا عايز السن بتاع قبل المدرسة لا مذاكرة ولا مسئولية أما ليه الأمانة شديدة كما تعلمون لمن يحس بثقلها والناقد بصير.

إنت طبيب وعندك مريض ميؤوس من حالته أيهما تفضل انك تصارحه بالوضع وتقوله كل شيء بأمر الله في الاخر ولا تغرس فيه الامل لغاية لما يموت؟

قبل كدة كان فيه سؤال في تاج عندك أمل؟ والكل جاوبه أيوة وكدة أما أنا جاوبت إن فيه حاجات لازم فيها قطع الأمل

والسؤال ده مرتبط بنفس الموضوع فحقيقة لابد من إيضاح الوضع تماما للمريض حتى يستثمر ما تبقى من أيامه في ما يكون له زادا عند ربه بدلا من أن أعلقه بأما باهت لا يزيده إلا تشبثا بحياة بائسة هي أقرب ما تكون إلى الموت ويظل غافلا ومتعلقا بها حتى

وفي نفس الوقت نأخذ بالأسباب في محاولة العلاج بما يراعي هذا الهدف وهو استثمار الأيام في طاعة الله والتزود للقائه

سمح لك برؤية الرسول عليه الصلاة والسلام وإنك تقوله كلمة واحدة بس أو جملة واحدة بس هتكون إيه

الرؤية وحدها شرف عظيم اللهم صل على محمد وآله وصحبه أجمعين أما عن العبارة فهي "السلام عليكم ورحمة الله لأن الرد أكيد وعليكم السلام ورحمة الله وبركاته وده دعاء رائع لو تحقق لي السلام والرحمة والبركة

خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون تصرفك إيه؟.
تاني؟؟؟ هو احنا مش تكلمنا في تعدد الزوجات

طلعت القمرهتكتب إيه عليه؟
هو مش كتابة هي علامة حاحط موضع سجود
كنا في عصر ازدهار الأندلس كنت تتخيل نفسك إزاي؟

مهندس عظيم طبعا

أنا مررت التاج ده لحد وما جاوبش عليهأعمل فيه إيه؟
بتحصل
لو حد عنده أسئلة تانية بتبدأ بلو يضيفها ويجاوبها

أنا عندي سؤال مهم لو التاج ده ماجاليش كنت اكتب عن إيه؟:)
في انتظار الإجابة في التعليقات
أمرر لمين بقى

هما عارفين نفسهم بييجوا يخطفوه ويمشوا

هناك 36 تعليقًا:

غير معرف يقول...

بحجز اول تعليق عند نجم التدوين الحاج الكبير أوي عصفور المدينة

:)

واي جايزة انا موافق

:)

عصفور المدينة يقول...

جايزتك

جزاك الله خيرا يا حبيبي منورنا

عمرو المصري يقول...

the warrior is back to his land

and begin his war again

غير معرف يقول...

هتحط صورك في كل المكاتب

الجملة دي مفطساني علي نفسي من الضحك

وبقية الاجابة عن سؤال رئيس الجمهورية قعدت سرحت معاها وقلت يااااااااه اه لو فعلا يتم كده

ماكانش دا بقي حالنا
===========================
سؤال الطبيب صح جدا جدا عشان يحاول يصلح اللي يقدر عليه مع ربنا قبل رحيله



اجابة حضرتك علي سؤالي في تعليقات البوست اللي فات استفدت منها جدا جدا

جزاكم الله خيراااااااا


وبعدين يا استاذ عصفور الجايزة دي ممتازة بس بشرط.......تداومي لي عليها بالله عليك

دكتور حر يقول...

جزاكم الله خيرا يا باشمهندس على الردد الجميله دي

بس انت كلتنا في الآخر

دعواتك

فرنسا هانم يقول...

عندى سؤال بيبداء بلو
لو عندك حصانه وحصانه جامده قوى
كنت هتقول رايك ايه عن
مفتى الجمهوريه _ مطبخ القوانين خمس نجوم
بس حضرتك
متقولش
هاتيلى الحصانه اولا

وابقى اعمل حسابى فى الكام مليون اللى هتبعتهم للبلد

غير معرف يقول...

حلو اوى اجابتك لو رايت الرسول عليه افضل الصلاه والسلام

واجابتك على سؤال لو كنت رئيس جمهوريه

وبتاعه القمر

ومتفقه مع راى حضرتك فى حكايه الامل والمريض الميئوس منه


بصراحه اجابات حضرتك كلها اكثر من رائعه واسلوب حضرتك شيق جدا


تقبل مرورى

Unknown يقول...

بس كده حضرتك تروح ترشح نفسك في الانتخابات الرئاسيه القادمه ويلا نستعد ننشيء حزب جديد وحضرتك تبقي الرئيس وطبعا صاحب الفكره يبقي النائب والمدونيين ينضموا لينا ونبتدي ننشر فكرنا ونفوز بالرئاسه وحضرتك تبقي الرئيس وانا طبعا رئيس الوزراء والنائب الاول ورئيس مجلسي الشعب والشوري ووزير الاعلام لاني خريج اعلام وصاحب الفكره اه
يانهار مش فايت ايه اللي انا بقوله ده انا هيست وهودي الكل في داهيه متقولش لحد لحسان نكون متراقبين
وجزاكم الله خير استاذي الحبيب
ومتنساش رعاياك في الدعاء

أبو الفـــداء يقول...

"...بس كون الواحد يحط نفسه مكان الآخرين مفيد جدا لتحديد نظرتهم ومفيد في التعامل مع الآخرين..."

حكمة رائعة...

شكرا لك...عصفور

المهـ إلي الله ـاجر يقول...

جميله ردودك يا بشمهندس ):


أحلي ما فيها بساطتها


ربنا يبارك فيك

ابن حـجـر الـعـسـقـلانـى يقول...

أعجبى إلقاء تحية الإسلام على النبى الكريم صلى الله عليه و سلم

و أعجبنى تركك لموضع سجود على القمر

إجابتان جميلتان

و لكن نقطة أنك لن تترك الحكم إلا لفقدان الأهلية .. قد تكون عبارة صحيحة .. و لكن فى دولة المؤسسات هناك آليات لتداول السلطة .. خصوصا فى وجود أحزاب فعالة.. قد يترك الفرد السلطة نتيجة لها.. ليس لأنه غير كفء و لكن لوجود من يستطيع أن يلبى تحديات مرحلية معينة بشكل أفضل

فكما يقول شيخ الإسلام بن تيمية فى مواصفات من يتولى أمر الرعية من حيث اتصافه بالقوة و الأمانة.. يقول فى تفسير معنى "القوة" ما معناه أن لو كان الوضع هو تحدى عسكرى فوضنا الشجاع الجرئ و إن وجد من هو أفضل منه دينا .. و إن كان الوضع يقتضى فضا لمنازعات داخلية.. فوضنا العادل الكيس .. و إن كان هناك من هو أشجع منه .. و هكذا

إذ كل مرحلة لها تحدياتها و بالتالى لها رجالها .. و حالة الحراك السياسى و الشد و الجذب و معارك الأفكار و الخطط التى تحدثها الأحزاب الفعالة هى ضمان بشكل كبير لتولية الأنسب لكل مرحلة من عمر البلد

Unknown يقول...

بس مقلتش هتبقي مهندس ايه ؟
مكنش في كمبيوتر ايامها

Unknown يقول...

هههههههههه
هتحط صورتك فى كل المكاتب انا لو مكانك مش المكاتب وبس
عجبتنى دى
وعجبتنى كمان ردك فى سؤال الطبيب كل يغنى على ليلاه بقى معلش
انا بايدك بصراحه بس انا مع انى اقوله الصراحه وبرضه اديله الامل انت متتخيلش احاله النفسيه للمريض بتكون ازاى مجرد ابتسامه طبيب فى وشه بتقلب يومه لسعاده ويا سلام لو قلتله ياعم انت زى الفل مع العلم انه يكون على درايه كامله بحقيقه مرضه وايه توقعات شفائه
الاجمل بقى اجابه عجبتنى
وصراحه استمخيت منك قوى رغم انها كانت قصيره
وهى العلامه اللى هتحطها على سطح القمر
اجابتك جميله حقيقي يا هندزه
دى اول مره اعلق عندك فى المدونه بس مش اول مره اتابعك
تحياتى لك واسفه للتطويل

مشروع انسان يقول...

هههههههههههههههههه
ايه ده انا شهرتى بقت عالمية ييجوا يخطفوه ويمشوا طيييييييييب
ع العموم انا اتبعتلى من مصدره الرئيسى الحمد لله
تبنا الى الله ورجعنا الى الله
ما شاء الله اجابات متميزة فى كذا نقطة
ايه النضج ده
عجبنى اوى لو طلعت ع القمر موضع سجود
ربنا يكرمك الاجابات دى متجيش من اى حد ومش مجرد كلمة جت على باله
اما حكاية ان الرئيس يقعد لغاية ما يفقد الاهلية فدى مش عارف يعنى فيها دليل بكده والا ايه اصلها مش ناقصة كده هيفرحوا بيك اوى اخوانا البعدا
وبرضه اجابتك عن المريض برضه جميلة انا كنت هجاوب انى اديله امل بس اجابة حضرتك اوقع بس برضه هفكر فيها لما اجى اجاوب التاج
ايه تانى اممممممممم
هشوف كده ممكن اعدى تانى وممكن لا متسننيش يعنى عشان الوقفة فى الشمس وكده

محمد عبد الغفار يقول...

اسئلة التاج مميزه جداً

وانت عارف راى فى اجاباتك

اسلام رفاعى يقول...

ردود ظريفة اوى
تنم عن شخصية ظريفة جدا

غير معرف يقول...

:)
جيد وردود منطقيه الا........"سلام

ابوزياد الفاتح يقول...

جميل حبيبى
احييك
ربنا يكرمك يارب ويبارك لك ويبارك فيك
ويجعله فى ميزان حسناتك

ammola يقول...

رائع وممتع سيدى
فعلا ..المصريين طيبين حين يملكون مائة ألف قبضة نقود
الا لو كان الشاعر يقصد قبضتين من الاسترلينى

Unknown يقول...

عمو
انا جيت أمسي واسلم على الكل يا مجمع الحبايب يا ابو يحي يا جميل

منى يقول...

عجبتنى جدا اجابات حضرتك المنطقيه وخصوصا ان الواحد المفروض يحط نفسه مكان الاخرين بعض الوقت عشان يعرف هما شايفينه ازاى ويعرف برضه هو مضبوط ولا ايه

تحياتى اليك سيدى

مهندس مصري بيحب مصر يقول...

أكيد في الأندلس كنت حتبقى مهندس مدني زيي
يعني إنشاءات
يعني معمار
يعني هندسة ري
يعني مساحة
يعني طرق
يعني شبكات مياه شرب و صرف صحي
:)
كل ده و أكثر كان في الأندلس
للمزيد إقرأ كتاب دولة الإسلام في الأندلس لمحمد عبد الله عنان

سلوى يقول...

إجابات كلها منطقيه

سؤال الدكتور ... بعد ما فكرت في إجابتك بعقل
وجدت إن حضرتك عندك حق

إلقاء تحية الإسلام على النبي
صلى الله عليه وسلم

والسجود على القمر

أشياء جميله جدا
وفقك الله

تحياااااااااتي

دعوة الفردوس يقول...

ماشاء الله

آدي الأجابات الصح

فعلا كذا اجابة بيوافقوا رأيي جدا
منهم بتاعة الدكتور والمريض وبتاعة لو كنت عربي ولو كنت غربي

الاجابة الجامدة ومش متسرعة وبتحقق توازن رائع بين العاطفة والعقل من وجهة نظري
بتاعة الجملة اللي تقولها
للرسول عليه الصلاة والسلام

لو كنت رئيس بقى
مانت رئيس جمهورية التدوين أهوه
عايزين صور تحطها عندنا في كل مدوناتنا:))
جزاكم الله خيرا وثبتكم على خطى الحق

mohand يقول...

السلام عليكم

اكيد كنت هتكتب موضوع جامد كعادتك

صح؟


تحياتي

http://kasperb4.blogspot.com/ يقول...

احنا بنرشح حضرتك لرئاسة الجمهورية بشرط
تحقيق كل ما ذكرت

:D
وربنا يسترها معانا بقى

محمد يقول...

ما شاء الله

تاج لايت جدا

صحيح في لو زيادة من عندي

لو مدخلتش عالم التدوين .. كنت هتقول الكلام دا كله فين ولمين ؟؟

صانعة الحرية يقول...

السلام عليكم
تاج جميل واجابات حضرتك اجمل
برضه شدنى و سمح لك برؤيته صلى الله عليه وسلم
يااااارب يرزقك يا ابى الفاضل رؤيته
بس تقوله انى بسلم عليه وانى على خطاه قدر استطاعتى

وطبعا انا هخطف التاج علشان عجبنى
بس مش هجاوب عليه دلوقتى
يعنى كام يوم كده
والله المستعان



استاذى كان عندى عدد من الاسئله الفقهيه ابتله على اميل المدونه
ولا اعمل ايه؟؟؟؟

Aml Ghonaim يقول...

هذا ما كنت أنتظره حين مررت لكم التاج ؛
أستاذي الكريم : بوركت لكم حياتكم ؛ وطابت ....

والجواب عن السءال : من المؤكد ان حد تاني كان هيمررلك التاج ؛ وبرضه كنت هتجاوب عليه ....

أحمد المصري يقول...

أنا حاخده وماشي اهه..عايز حاجة قبل مامشي؟
ههههههههه..لا التاج جميل جدا جدا و إجاباتك أجمل خاصة بتاعة لو شفت الرسول دي..رد أجمل من الجمال بجد0

Dr.khaled يقول...

انت كاتب لي فوق

لا تعلن عن حملة أو موضوع
إلا بعد أن تعلق على موضوعي
وإلا...فاعذرني إن حذفت تعليقك


أولا أنا مش مندوب مبيعات
ثانيا انا اعلن عن حملة لكسر احتكارك لصداارة التعليق في المدونات...
قريباً

ثالثا:
أنا مش معلق على موضوعك....
إلا أني أحبك في الله :)

Unknown يقول...

ابو يحي
انت بتتكلم جد
الرئيس أو الحاكم مش المفروض يتغير الا بفقدانه للأهلة؟
انت كنت بتتريأ صح؟
أو فهمني الله يخليك
على فكرة انا مش بشوف تعليقاتك غير على الايميل
البتاع العجيب اللي عندي ده بيهرتل على الآخر
وبعدين يا عم هو انا ايش عرفني الفرق بين التوت والخس، أدينا كنا بنأكله حاجة خضرا
أنا نفسي تعمل يومياتك هتعمل تكامل رهيب
أنا فاكر إن الدود كان بيجيلنا في وقت الربيع
المهم بالله عليك قوللي موضوع الحاكم ده

كرم مسلم يقول...

السلام عليكم

احلى حاجة فى أجابتك معانيها وموضعيتها
ربنا يبارك فيك

بس انا مش معاك فى جزئية الدكتور مع المريض وكمان انت عشان تبين وجهة نظرك وضعت الرأى الأخر فى صورة مرفوضة طبعا
من رأى ان الدكتور عليه ان يعطى المريض آمل وفى نفس الوقت يحثه على فعل الخيرات

Ahmed Al-Sabbagh يقول...

جميل اوى ما شاء الله

جزاكم الله خيرا

الردود جميلة وممتعة حقا


تحياتى

L.G. يقول...

لا حملة ولا موضوع وسأعذرك ان حذفت تعليقي .. عذرا لم أقرأ لطول التاج ده وصل لحد لندن بس كان نفسي أحييك بشدة على فكرة أن ترفق أفضل ما قرأت على المدونات التانية أولا لأنها توجد روح التنافس الجميلة وكأنها لوحة شرف ثانيا لأنها ممكن تلفت نظرنا لبعض الموضوعات التي قد تغيب عنا الفكرة جميلة كذلك الاستطلاعات مهمة وشكرا

البيروني يقول...

عجبني جدا اجابتك السلسة و خصوصا منصب رئيس الجمهورية


و أنا من زمان عايز أتعرف على حضرتك من كتر ما قرات لك و عنك


البيروني