الأحد، نوفمبر 25، 2007

وقولوا للناس حسنا

=============
بائع الفاكهة والكهرباء قاطعة شاف موبايل صاحبنا مشغل الكشاف
قال : ده إن سبعين
صاحبنا : ايوة
قال: بينور ازاي أنا معايا إن سبعين برضه
صاحبنا: هات موبايلك شغل البلوتوث وأرسل له البرنامج وشغله له وما مشيش إلا ما قفله وشغله لوحده بعد عدة تجارب
==============
إمرأة عجوز (نصرانية) تحمل كيس خضار وتقطع الكيس ووقع منها ذهب صاحبنا مسرعا واشترى كيس وبسرعة خاطفة كانت اجتمعت أغراضها من الأرض وانتقلت للكيس الجديد مع دهشتها وشكرها
============
رجل يقف على كورنيش النيل يأكل من شجرة(سدر) رأى صاحبنا ينظر إليه فخجل وتوقف
صاحبنا مازحا : السلام عليكم خش وتوكل على الله بس بإيدك اليمين
انهمك ثانية ضاحكا ولكن بيده اليمنى

============
صاحبنا يشترك في وصلة انترنت صاحبها نصراني ومعظم المشتركين هم من النصارى أيضا صاحب الوصلة يعاني من تجاوزات وقطع البعض للانترنت على بعض فقرر أن يعقد اجتماعا لكل المشتركين
وأن يقوم صاحبنا بالتحاور معهم ووضع قوانين للشبكة وإقناع المشتركين بالالتزام بها نيابة عنه
===========
تاجر الموبيليا أخبر صاحبنا أنه يريد بيع سيارته المرسيدس صاحبنا يعرف تاجر سيارات مرسيدس
سأمر عليك يوم الخميس الساعة 1 أصلي معك الظهر ونذهب للتاجر
وعندما جاء يوم الخميس كانت قد انتهت علاقتهما وتسلم الشغل منه
وعندما وجد صاحبنا يصلي الظهر وكان قد نسي الموضوع تفاجأ بذلك وسر جدا وخاصة عندما عرفه صاحبنا على التاجر وانسحب
===========
عم عبده صاحب محل اشترى منه صاحبنا أشياء وبعد أن انتهى قال له
أول مرة أشوف واحد ملتحي ما يفاصلش
أنا فاصلت بس لي طريقة
ازاي
باحاول احرجك تعمل واجب بس ياترى انت عملت واجب ولا لأ؟
والله عملت واجب اقعد اشرب قهوة اقعد معايا شوية
حاضروجلسا يتحدثان في كل أمور الدنيا والسياسة والزواج والأولاد (بينهما عشرين سنة فرق سن)

هو انت لك في الكورة؟
لا والله يا عم عبده
معقول؟معلش بقى بناقص دي....طيب عدي عليا كل ما تبقى فاضي أنا حبيتك أوي
حاضر ياعم عبده وفعلا مر عليه عدة مرات عارف أنا جايلك عشان اشتري حاجات أصلي باحب اشتري يوم الأحد من الناس اللي بتفتح يوم الأحد
يعني أنا حاروح فين مانا بافتح حد وجمعة
قل لي صحيح هو انا بعد السن دي باصلي بس بسورة قل هو الله أحد بس والدعاء بقى ربنا آتنا في الدنيا حسنة وفي الآخرة حسنة وقنا عذاب النار. ربنا اغفر لي ولوالدي يوم يقوم الحساب ... ونفسي أنوع
وفي نفس اللحظة كان يمد يده ليحضر ثلاث جرائد من خلفه ودواء المرارة أصله مفقوع من أحوال البلد
طيب يا عم عبده حاول تحفظ سور كمان بدل الجرايد دي كلها إن شا الله كل يوم آية
حاضر يا حاج.......خذ الشيكولاتة دي لأولادك
============
صاحبنا نازل لصلاة العصر صيفا يقابل عامل دليفري تائه
انت جيت هنا ازاي
مشي أصل المكان قريب
لا... العنوان غلط ..بعيد عن هنا..اركب العربية حاوصلك
عند وصولهما
هي دي العمارة وصل الطلب وتعال صلي وارجعك تاني
جزاك الله خيرا
============
صاحبنا يبحث عن جهاز كهربائي في أحد الأسواق بمكة يجده عند بائع هندي
بكم ؟ بكذا طيب حاشوف سعر تاني لقيتك أرخص أو نفسه حارجع لك
البائع يشكو أن جميع الناس يقولون ذلك ولا يأتون
شوف صديق .. أنا حافظ القرآن.. حافظ القرآن إذا قال كلمة ينفذها
الصديق يرتاب في الكلام
بعد ساعة صاحبنا يعود للصديق رغم صعوبة المكان
الصديق يفاجأ ويضحك..ولكنه يرفع السعر!!!!!
============
التفت الأمريكي في نهاية المناقشة لمدير صاحبنا سائلا
عندك كام واحد زي ده؟
============
صاحبنا وأولاده يشترون أغراض من أحد الباعة الجائلين يتبقى للبائع مبلغ بسيط
يمر صاحبا بعد عدة أسابيع ويعطي البائع المبلغ والبائع يذهل
فيما يلح أبناء صاحبنا مع أمهم لسداد المبلغ عدة مرات
تذهب الأم لسداد المبلغ فيذهل الرجل ويخبرها أن زوجها سدده وتسمعه يقسم لصاحبه
والله ده حصل ياعم صدقني زوجها جه مخصوص عشان يدفع وهي جت مخصوص عشان تدفع
============
رسالة شبه مكررة من أحد المعارف
كيف حالك ،لعلك بخير ، أشكرك شكراً جزيلاً علي مواقفك معي وعلي وقتك الذي لم تبخل به في حين أنه بدون مقابل ،أسأل الله العظيم أن يجزيك عن ذلك بالمقابل الذي تستحقه ويكون رصيد لك عند الله .
ونفسي يأتي يوم أرد لك جميلك
=============
اللهم إنا نعوذ بك أن نشرك بك شيئا نعلمه ونستغفرك لما لا نعلمه
أتمنى أن تقتصر التعليقات على ذكر مواقف مشابهة

هناك 67 تعليقًا:

دكتور حر يقول...

بحجز مكان فقط
طلعت الأول الحمد لله

قوت القلوب يقول...
أزال المؤلف هذا التعليق.
mohand يقول...

السلام عليكم

كان نفسي ابقي الاول
بس لحد ما قريت طلعت التالت
الله اعلم بعد ما ابعت هبقي الكام


عموما صاحبنا ماسبلناش حاجه

ربنا يباركله

الفاتح الجعفري يقول...

رابع تعليق ياسلام ربنا يوفقني ويكرمني والله لازم هديه مينفعش انا عايز شكولاته
استاذنا بمناسبه حكايه الراجل العجوز اللي مش حافظ غير سورة الاخلاص وعمال يقرأ في السياسه ومش عجبه احوال البلد كان في واحد صاحبي خارج في سبيل الله بيقولي وهما بيعملوا جوله عدوه علي راجل عنده بتاع 100 سنه وماسك الشيشه كأنه بيرضع لسه بيفتحوا معاه الكلام قالوهم ضربوا العراق وهيضربوا سوريا وايران في الطريق واحنا دورنا قرب يقولولوا ياعم انت مالك بسوريا ولاايران قوم صلي المغرب المغرب هيضيع يقولهم غلوا السكر والشاي والمعسل هيغلي واسرائيل بتزرعلنا ارضنا بيقولولي الراجل عجوز عجوز بس عامل زي الراديو مبيسكتش المهم ولا عرفوا يخدوا معاه حق ولاباطل ولا صلي المغرب ولا العشاء تنوه قاعد جنب الشيشه وبيسمع الاخبار بس هي دي حياته
وجزاكم الله خير

قوت القلوب يقول...

السلام عليكم ورحمة الله وبركاته

أضحكني (دكتور حر)..يحجز مكان للرد

ذكرني بالجامعة..من يذهب صباحا ليحجز في الأماكن الأولى

عذرا ً عن خروجي عن الموضوع

لقد قرأت البوست باكمله..وجئت في آخره وقرأت( اتمنى ان يكون التعليق بمواقف مشابهة) .. شعرت بالاحراج ..فانا لا يحضرني مواقف الآن ولكني أحببت أن زيارة المدونة ووضع ردي


وما أقوله هو..الله يزيد من أمثال هذا الرجل.. آمين

تحياتي

دكتور حر يقول...

صاحبنا يبتسم في وجه الناس
***************
صاحبنا يقول كلمه حلوه
***************
صاحبنا يلقي السلام على من يقابل
***************
صاحبنا اذا ناقش جادل بالحسنى
***************
صاحبنا مر على صنايعي بيدهن "استرجي يعني" وهو رايح يصلي المغرب كان عايز يقوله تعال صلي قال يمكن ييجي مجاش عدى عليه بعد الصلاه قاله هو انت مبتجيش تصلي معانا ليه رد وقال معلش والله اتلهيت بس مش كنت تقوللي وانت رايح!!!!
***************
صاحبنا رايح يصلي المغرب برضه في نفس الجامع برضه بس في يوم تاني بيلاقي صاحب سرجة طحينه قاعد على مصطبه امام المسجد بس مبيدخلش خالص مع انه ملتحي

صاحبنا : هو حضرتك مبتجيش معانا تصلي ليه
هو: عشان العامل اللي اللي عندي ميقولش ده بيمنعني من الصلاه فبخليه يصلي واصلي انا بعده في المحل وبعدين يا حبيبي انا بصلي الحمد لله وكويس ماشي ؟؟
ابتسم صاحبنا وقاله طب تمام بس باطمن عليك
***********
صاحبنا بيصللي جنب واحد في نفس المسجد اللي في الأول بيلاقي جنبه واحد عجووووووز لابس دبله صفرا وخلص صلاه وسلم وخرج من المسجد بسرعه
صاحبنا خرج وراه وقاله يا عم الحاج هي الدبله دي ذهب قاله لا يبني دي نحاس وضحك وشكره
************
صاحبنا في نفس المسجد فيه امام مش راتب بس متمسك جدا بالإمامه وصاحبنا حافظ القرآن
صاحبنا بس عاوز يقوله انه بيغلط كتيييييير في الصلاة وعنده مخارج ضاربه خالص وهو ميعرفش صاحبنا لأن صاحبنا جديد في الحته
صاحبنا كتب له ورقه فلوسكاب بخط جميل فيها شكر ثم توضيح للأخطاء كلها ثم دعاء واعتذار
وبعتهاله مع واحد تاني كمان وكتب فيها عنوانه عشان لو في توضيه
الأمام ضرب على الورقه وكأن شيئا لم يكن
************
************




كفايه أحسن كده الناس هتدخل تقرى تعليقي وتسيب الوست يا باشمهندس محمد يا سكره
ربنا يخليك لينا ويحفظك ويكرمك على الأفكار الجميله دي

Mohamed A. Ghaffar يقول...

وحد صاحبنا نظارته دراعها انكسر حطه على الشفونيره لحد ما العيد ميخلص ويصلحه
جه يصلحه ملقاش الدراع عشان ابنه الصغير اكيد ضيعه فطلع النظاره القديمه صاحب العمل لما عرف الموضوع قاله تلاقيك قلبت لمراتك الدنيا قاله لا اصل انا الغلطان عشان سبته فى متناول الطفل الصغير
قاله حقانى

واحد صاحبنا كان عليه عهده فى الشغل فجه بتاع الحسابات قاله انت عليك عهده 610.5 قاله لا على عهده 730.5
رجعو للحساب المتسحل فى ورق لقم ان هو له عندهم المفروض 120 جنيه مخدهمش قالهم لا يمكن لازم اخدتهم دوروا على ايصال الصرف ملقوش ايصال صرف قالو له يبقى كده عهدتك 610.5
قالهم لا يمكن صحيح انا كنت متاكدت انى اخدتهم ودلوقى شكيت بس معنديش استعداد اخدهم وانا عندى شك واحد فى الألف انى اكون خدتهم مش عاوزهم وعهدتى 730.5 ومسامحكم ان كانوا فعلاً لى

واحد صاحبنا علم ابنه الصغير اوى يقول اذكار دخول الخالاء والخروج منه ابنه مواظب بشكل مزهل وهو ومراته مكنوش بيقولها انكسفوا على دمهم وبيواظبوا وان نسيوا ابنهم سنتين ونصف يفكرهم

لو اعدنا نحكى هنحكى للصبح صحيح هما خارج نطاق القول الحسن انما فى نفس الأتجاه

لماضة يقول...

ههههههه
عجبتنى قوى حكايه عم عبده البقال
ياريت والله يبقى فى ناس كتير كده
هتتغير كتير خصوصا للناس اللى بتنظر للملتحين واكنهم ارهابيين
مع ان في منهم حقيقى ملايكه
ربنا يكرمك يارب
ويقدرك دايما على القول الحسن

فرنسا هانم يقول...

لماذا تقتصر التعليقات على ذكر مواقف مشابهه ؟
طيب اللى مش فاكر ياباشمهندس
يقعد بره على سلم المدونه ؟

وضـّاح يقول...

ربنا يكثر من أمثال صاحبنا

الفاتح الجعفري يقول...

معلش هعلق تاني رخامه بقي
هو موقف مش مشابه لمواقف حضرتك بس هقولهولك مره كنت بتمشي انا واليعقوبي الفجر وطبعا العبد لله سموه وموتوه الكلاب ممكن اخد طريق راس الرجاء الصالح علشان في كلب واقف المهم واحنا مشيين لقينا كلب جي من بعيد انا طبعا باصص اتجاه الكلب ولاقيت اليعقوبي بيقولي متخفش متبصلوش اوعي تجري والكلب بيقرب وماشي نحيتنا فبقوله ياعز الكلب جي نحيتنا المهم عز اللي عامل فيها عنتر وعمال يدي نصايح ببص لاقيته بيطوي الارض طيا بيجري ولايلوي علي شيء وغبار طالع من وراه قولت اه يابن الذينا وطلعت اجري والكلب طار ورانا انا بجري ادور علي اي حته تحميني من شر الكلب اللي مصدق فلاقيت فرن فاتح فن افرنجي قمت داخل فيه جري الناس طبعا جوه الفرن جالها ذهول ايه ياكابتن فيه ايه قولتلهم معلش في كلب لاقيت واحد بيقولي ياعم اضربوه بطوبه ولاخدوا شلوت وعم عز طبعا كان في اخر بلاد المسلمين

صانعة الحرية يقول...

السلام عليكم
على فكره دى رابع مره اعلق والتعليق يضيع
بس نعلق وامرنا لله
بسم الله
ربنا يبارك فى صاحبنا وزوجة صاحبنا وابناء صاحبنا
وانا هقعد جنب فرنسا على السلم ولما افتكر حاجه هدخل اكتبها





وسلامى لكل عائلة صاحبنا

مهندس مسلم يقول...

صاحبنا واقف في الصف الاول وجنبه صبي قام صديق قال للصبي صلي في الاخر
فصاحبنا بادر الصبي وقاله خليك اول واحد في الصف "لان الصف مش عمودي على جدار المسجد"

المهـ إلي الله ـاجر يقول...

صاحبنا رايح يصلي التراويح مع واحد صاحبه في العربية قابلوا راجل كبير وساحب عجلة قديمة اوي فإيده قام صاحبنا وصاحبه لفوله ونزل صاحبنا وشال له العجلة وحطها في شطنة العربية ونزل وركبه قدام ووصله للحتة اللي عايزها

والراجل كان مستغرب !!

و القادم....أجمل يقول...

السلام عليكم
جزاكم الله خيرا

،،،،،،،،،،،،،،،،،،،،،

صاحبنا يري سيدة مسنة
ترتعش يدها بشدة من ثقل ما تحمل
و علي الرغم انه قطع مسافة كبيرة و كاد ان يصل الي منزله
يصر ان يحمل الاشياء
و يرجع الطريق مرة اخري معها
ليصل الي منزلها
السيدة:- بارك الله فيك

،،،،،،،،،،،،،،،،،،،،،،،،،،

صاحبنا يملك محل للاتصال
صاحبنا (نصراني) ا
يذهبون اليه يطلبون منه وضع بوستر
عن شنطة رمضان
يبتسم و يضعه في الحال

======================

اللهم إنا نعوذ بك أن نشرك بك شيئا نعلمه ونستغفرك لما لا نعلمه

=======================

تحياتي و تقديري
و جزاك الله خير الجزاء

خمسة فضفضة يقول...

السلام عليكم ورحمة الله وبركاته

بارك الله في كل اللي زي صاحبنا وكتر من امثاله

راجل عجوز رايح القاهره يخلص ورق ، وهو راجع الاوراق وقعت منه ، لقاها شاب معوق من بلد بعيد علي شمال السما في اغوار الدلتا ، فتح الظرف لقي رقم تليفون قام اتصل بصاحب الورق وقاله علي عنوانه وتاسف انه مش هايقدر يجيله علشان ظروفه ماتسمحش
الراجل العجوز خد حفيده بعربيته وراح يجيب الورق لقي ان الشاب عايش تقريبا تحت خط الفقر بس عنده عزة نفس ومارضاش ياخد حاجه مقابل خدمته دي ، رجع الراجل العجوز هوه وحفيده وحكوا لصاحبنا اللي ماخلصوش كده وصمم انه لازم يساعد الشاب باي طريقه ، تاني يوم خد بعضه وطلع علي عنوان الشاب ده بالرغم من المشقه وصعوبة الوصول بمواصلات عاديه ومع ان عنده نقرس ومش بيقدر يمشي مسافات طويله ، ووصل للشاب وقدر بتوفيق من ربنا انه يديله مبلغ كويس

مش فاكره حاجه تانيه هاروح اقعد جنب فرنسا وصانعة الحرية لحد ما افتكر

سلام

اسلام رفاعى يقول...

ربنا يتقبل
صاحبنا يبتسم فى وجه امه رحمة بها

واحد من الناس يقول...

1
مرة واحد غاوى عطور غالية
فقرر انه يشوف من اكتر ناس بيحبو النوع ده و راح جابهلهم
2
وواحد مراته بتشترى حاجة ليها و كان ناقصها فلوس و قررت متجبهاش فكملها الفرق و كان كبير الشاهد هنا ان المبلغ ده كان هيجيب له بيه حاجة بيحبها أوى
3
واحد راح يشترى هدوم و عجبه حاجه أوى راح جاب نفس الهدوم لأخوه لمجرد ان كان عايز يعمل كده
4
**********(زينة الحياة الدنيا(0****
واحد تعبان جدا فى العمل
وربنا بعتله واحد قريبه علشان يروح معاه رحلة جميلة
المهم
جهز الشنطه و جهز الفلوس و خد أجازه من الشغل
مهانش عليه يسافر من غير زوجته و ابنه الوحيد و لم يشافر
5
********صلة الرحم***0**********
واحد راح مستشفى مع خاله وكان الخال يعمل تحاليل مكلفة شويه
دفع الواحد ده فلوس التحاليل و خاله لغاية دلوقتى من 5 سنين معرفش حاجة

آسف للاطاله
لكن انا معنديش مدونة خاصة بى و لا أعرف طريقة عملها

منى يقول...

واحده راحت تعمل الكشف الطبى فى مدينه جامعيه فى محافظه بعيده ادولها وقالولها تجيب ورقه من الجامعه الاول راحت الجامعه اكتشفت ان الورق الاولانى ضاع ومش عارفه ضاع فين رجعت مكان الكشف تجيب غيره لقت الموظفه لقيته واستنتها وكان في ورقه ناقصه الموظفه وقفت على الباب تشوف طالبه مملتش الورق وصورتلها منها والدكتور ميعاده فات وخلص وقعد يستناها عشان ميضيعش عليها اليوم

صيد الخاطر يقول...

صاحبنا معاه عربية بيعدي على موقف بلده في ساعة الزحمة ويشوف أي حد واقف مش عارف يركب
أو في وقت متاخر وماشي على طريق
بيحاول ياخده معاه على قد مايقدر

" طبعا مش أنا "

اصرار أمل يقول...

صاحبنا ( لو زيه فى الاسلام كتييير ... الدنيا تبقى صحيح بخير )
أكثر الله من أمثال صاحبنا ...
طيب وبعدين ليه لازم تقتصر التعليقات على مواقف مشابهة ؟! واللي مش في باله موقف معين يعمل ايه ؟
****
بس وبعدين أنا أقول ( صاحبنا دي ازاي وأنا جل معارفي على الجانب الآخر ( صاحبتنا يعني ) ...
( صاحبتنا ) أيام الجامعة كل يوم حد ييجي يسألها عن شرح مادة معينة ؛ قامت لخصت المادة الصعبة وخلتها في المكتبة يصوروها البنات كلهن ...
وكانت بتقول : زكــــاة علمي .
أدو زكاة العلم عند نصابه ؛؛؛ وتجاوزوه بفضلكم وتصدقوا .
_ صاحبتنا مرة كانت بتتسوق وكانت تعبااانة جدا ؛ قامت شافت واحدة شارية حاجات تقيلة أووي ؛ قامت شايلاها معاها لغاية باب بيتها ؛؛؛
- صاحبتنا مرة أدتها ظروفها انها تبقى عند الموقف وقت صلاة الجمعة وكان في راجل كبير قاعد والصلاة بدأت :
قامت رايحة قايلاله : عمو. انت مش هتروح تصلي ؟
قالها : لا ؛ أنا مستني المواصلات .
قالت له : بس ياعمو مفيش حد هييجي دلوقتي ؛ خلاص الصلاة بدأت .
قالها : يمكن عربية تيجي كده ولا حاجة .
قالت له : طيب ياعمو والصلاة ؟! ان شاء الله ربنا هيبعت عربيات كتير بعد الصلاة .
ثم سكتت عندما لم يجبها .
بعد دقيقتين ؛ قام عمو ليلحق بالصلاة .
_
صاحبتنا كانت فى الحديقة مع اخواتها ؛ وبعدين فجأة سمعوا صوت أغاني وكان في فرح فى الحديقة وبنت بترقص - نزه الله أسماعكم وأبصاركم - قامت رايحة واخداها من ايديها بالراحة كده وقالت لها : يا أختي الله يكرمك مايصحش اللي بتعمليه ده ؛ ربنا أكرمك فما تهينيش نفسك .
البنت أحرجت ؛ وصمتت ؛ وابتعدت ....
-
صاحبتنا شافت بنتلا بسة طرحة خفيفة وشعرها كله باين قامت وقفتها كده وقالت لها : على فكرة ياحبيبتي ده مش حجاب ؛ وهيا بتكلمها كانت بتلفلها الطرحة عدل ؛ وبعد لما خلصت قالت لها : شكلك كده أحلى من الأول بكتييير ...
؛؛؛
أعتقد كفاية كده ....
موضوع متألق كالعادة أستاذي الفاضل ؛ أكثر الله من أمثال ( صاحبنا ) وبارك في مجتمع يزخر بأمثاله .........

الطائر الحزين يقول...

يارب تقبل

مؤمنه يقول...

السلام عليكم ورحمة الله وبركاته
صاحبنا أهان صاحبه فى كرامته وجرحه فى مشاعره فأهداه هديه فوق المئة جنيه
ليلقى درجة الاحسان
تقبل الله منه ولندعوالله أن يهديه الى كل ما هو خير
والسلام عليكم ورحمة الله وبركاته

مهندس مصري يقول...

الموضوع حلو
أنا شفت خير ياما ناس بتعمله في ناس بدون انتظار لأي جزاء دنيوي يعني لوجه الله بس مش فاكر حاجة دلوقت
وسعوا لي حتة ياللي على السلم جنبكم :)

امام الجيل يقول...

ماااااااشى يا صاحبنا
عايز افتكر مواقف شفتها
..................
اه بس دى لصاحبتنا ست عجوزة جدا ربنا يكرمها ركبت مينى باص وجه واحد ياخد بايدها مرضتش تلمسه برغم سنها
..................
يعنى ده اللى فاكرة دلوقتى اذا افتكرت ان شاء الله هرجع

mohand يقول...

السلام عليكم

نقول موقف وخلاص

صاحبنا كان اول مره ينزل القاهره وسنه كان صغير

ركب مع عمة الاتوبيس من اول محطة وقعدو في الكراسي الاولي

شوية والاتوبيس اتملي
ركبت ست حجه كبيره

قام وقعدها
عمه قاله بعد ما نزلوا انت عبيط القاهره محدش بيقف لحد فيها
---------------
صاحبنا كبر شوية
وراح القاهره وكان فيها المترو

قعد في المترو وبعد كده المترو اتزحم
راجل مسن دخل وشكلة تعبان قوي
وفيه شباب قاعدين في مكان ذوي الاحتياجات الخاصة والمسنين ومحدش وقفله

صاحبنا وقف للراجل وقعده
ناس بصتلة وسمع وشوشة زي عبيط
------------------
صاحبنا استمر في عمل الموضوع ده اقتناعا منه انه هوه اللي صح والباقيين دول كلهم غلط

تحياتي

باب البحر يقول...

صاحبنا واقف عشان يركب المواصلات .. و واحد بيسأله . ممكن فلوس عشان افطر ، و من كتر تكرار هذه الطريقة الرخيصة قال له آسف.

و لما راجع نفسه .. رجع له و قال له: طب ايه رأيك أعزمك؟

و رجع و جابله فطار .. سبحان الله.. عايز يوفر لصاحبنا و يقول له: سندوتش واحد . واحد كفايه.

ربنا يجازي اللي كان السبب ، خربت الذمم حتى صار لا مكان لأصحاب الذمم.

شكرا أخ عصفور. أسأل الله أن يجمعنا مع صاحبينا في الجنة.

مدونة الدفاع يقول...

السلام عليكم
اخونا كان فى المستشفى مع والده وشاف مريض جاى من سفر مع ابنه وزوجته
ويادوب اول ما دخل توفاه الله ومكانش معاهم حاجه يلفوه بيها فطلبوا بطانيه من المستشفى الممرضه رفضت الا انها تاخد فلوس والبطاقه ابن المتوفى اكيد هيحتاج البطاقه اخونا معاهم طول الموقف قال للممرضه الفلوس اهيه وسيبى الرجل عشان ظروف الوفاه طبعا بزعيق ونجح انه يمشى الابن وساعده انه يخرج بابيه المتوفى من المستشفى
ومش فاكر حاجه تانيه
فرنسا د فضفضه صانعة الحريه فى مكان جنبوكوا فاضى؟؟؟؟؟؟؟؟؟؟

دعوة الفردوس يقول...

كل يوم احترم صاحبنا
وعز صاحبنا اضعاف مضاعفه

مش حاضر في ذهني مواقف كتير لصاحبتنا دلوقت بس هقعد مع فرنسا وصانعة الحرية لحد ماافتكر


بس بجد
فكرة البوست تجنن
يا
صاحبنا
:)

دعوة الفردوس يقول...

كل يوم احترم صاحبنا
وعز صاحبنا اضعاف مضاعفه

مش حاضر في ذهني مواقف كتير لصاحبتنا دلوقت بس هقعد مع فرنسا وصانعة الحرية لحد ماافتكر


بس بجد
فكرة البوست تجنن
يا
صاحبنا
:)

L.G. يقول...

عذرا ولكني وجدت ذكر المواقف يطيل الموضوع ولكن وعلى نفس النهج أقول
إن قابلك سائق تاكسي عاملك باحترام ومودة فادعو له وإن قابلك نصراني خير من مسلم فادعوا له أن ينير الله قلبه وإن وجدت فعل حسن من شخص بالطريق فشجعه واستحسن فعله ولو بابتسامة إذا قابلت رجل حارب في أكتوبر أو عالم فشد على يده مصافحا وقل له شكرا على اسهاماتك
الدعاء يا جماعة للصالحين / الاشادة بالأفعال الطيبة / تحفيز الآخرين على الشجاعة في قول الحق / عمل الخير خزانة تضع فيها حسنات سترد لك يوما في نفسك أو أهلك صدقا
كنت خير أمة أخرجت للناس تأمرون بالمعروف وتنهون عن المنكر وما دخل الرفق في شئ الا زانه وما نزع من شئ الا شانه \ الرفق واللين في الدعوة والقول من أهم عوامل تأثيرها على الآخرين -- وفقكم الله

آلام وآمال يقول...

بارك الله في صاحبنا وجزاه خيرا وكثر من أمثاله


انا بدعيله بس والله مش أصدي امدح فيه ولا حاجة لأن الشخصية دي هي اللي المفروض يكون عليه كل المسلمين مش صاحبنا بس
ولكن الناس بتندهش وتنبهر لأن النوع ده من الشخصيات يكاد يكون اندثر
إلا من رحم ربي

غير معرف يقول...

صاحبينا كان رايح يلعب كورة بعد الفجر مع صاحبه التاني
فقعدوا علي قهوة سياحي من غير مايخدوا بالهم وجاهم واحدعامل نضافة بيقولهم عايز جنيه عشان اجيب سجاير فصاحبنا مسمعش حكاية السجاير سمع حكاية الجنيه فاعطاه الجنيه فصاحبه اللي معاه بيقوله انت ليه اديته الجنيه ده هيجيب سجاير فصاحبنا قاله انا مخدتش بالي خير ان شاء الله
فقاموا عشان يحاسبوا فوجدوا ان الحساب بقي كبير اوي ومفضلش معاهم فلوس كفاية عشان يروحوا الكورة
فكانوا مستنين ابن خالة صاحبنا كان رايح معاهم
فقام بن خالة صاحبنا قام اعطي 30ج لصاحبنا
فصاحبنا بيقوله ايه بتوع ايه دول قال له خالتك ارسلتهم لك عشان عيد ميلادك
فصاحبنا كان مديون بعشرين جنيه دفعهم وفضل معاه عشرة جنيه

اضعاف مضاعفة في الدنيا واسال الله ان تكون في الاخرة

عصفور المدينة يقول...

تدوينة مرتبطة عند الدكتور الحر

الجمال والحب ....لمسات


وكان تعليقي عليها


طبعا أؤكد أن هذه التأثيرات لا تؤثر فعلا إلا إذا كانت صادقة وتخرج من القلب ويقف خلفها حب صادق ورؤية لحسنات الآخرين والجانب الطيب فيهم أمس كنت أمر بسيارتي في موقف سائقوه من أشر الناس فيما يرى الناظر وكان اثنان منهم يتشاجران على سيجارة مشاجرة عنيفة ضرب ورزع وشتيمة وسب دين وهرج ومرج والطريق واقف نزلت مسرعا من سيارتي لأقتحم المتفرجين وأذهب إلى السائق الضارب وقلت له بحزم
بطل سب دين وتوكل على الله وانتبه لأكل عيشك يا أخي قال لي حاضر بفضل الله
وانا أحكي لزوجتي أكدت على أن الأقوياء العنيفين لا يستطيعون مثل هذا لأنهم سيدخلون للتخليص أو الضرب ولكن هذا السائق فيه جانب حب لأهل الخير واحترام لهم لابد من تثميره
وقد حكيت موقف مشابه أيضا عند أخي وطني من قبل

مقصدي هو أن أقول أن من نعتقدهم أشرار في الظاهر لازال فيهم خير في قلوبهم يحتاج لتنميته بالإحسان الفعلي قبل القولي وكنت في تدوينتي المشار إليها أريد أن أقول

وقولوا للناس حسنا بصدق الأفعال وليس بالأقوال بالقدوة الحسنة وبالمثال وبالإتقان في العمل وببذل السلام للعالم وأن تعين صانعا أو تصنع لأخرق وأن تكون عادلا ومنصفا من نفسك وأداء الحقوق لأصحابها وأن تربط جميع هذه الأخلاق بدينك وأن يعلم الناس أن هذه أخلاق ديننا


كانت تدوينتي المشار إليها طويلة جدا ووجدت فيها بعض المواقف الحساسة آثرت فيما بعد أن أحذفها على مدار أربعة أشهر كنت أحذف ولا أضيف ومقصدي من قولي هذا أن حياتنا كلها المفترض أن تكون مليئة بذلك


بقي أن أقول ينبغي أن تكون هذه الأفعال مرتبطة بالدعوة
إلى الله
سبحانه وتعالى وليس الدعوة إلى جماعة أو منهج وإن تيسر أن تصب في خدمة المنهج لا يمنع ولكن أن يقف الإحسان عند حد الدعوة إلى المنهج أو الجماعة وهذه نقطة مهمة جدا أرجو أن تكون واضحة


يتبع بعض نصوص الأحاديث إن شاء الله
عن أبي ذر رضي الله عنه قال قال رسول الله صلى الله عليه وسلم تبسمك في وجه أخيك صدقة وأمرك بالمعروف ونهيك عن المنكر صدقة وإرشادك الرجل في أرض الضلال لك صدقة وإماطتك الأذى والشوك والعظم عن الطريق لك صدقة وإفراغك من دلوك في دلو أخيك لك صدقة
رواه الترمذي وحسنه وابن حبان في صحيحه وزاد وبصرك للرجل الرديء البصر لك صدقة

صححه الألباني

==============

وعن أبي شريح رضي الله عنه أنه قال يا رسول الله أخبرني بشيء يوجب لي الجنة قال طيب الكلام وبذل السلام وإطعام الطعام
رواه الطبراني وابن حبان في صحيحه في حديث والحاكم وصححه

محمد مارو يقول...

ههههههههههههههههههههههههههههههه
ايه الحلاوه دى
انا عن نفسى مش فهمت و لا نكته
انا حاسس انى غبى اوووووووووووووى
و بضحك من غبائى
هههههههههههههههههه

عصفور المدينة يقول...

أ محمد مارو
عفوا لم أكتب نكاتا
أشكرك لتكرمك بالقراءة

رفقة عمر يقول...

ربنا يبارك فى صاحبنا ووزجته واولادة ويكثر من امثاله
ويجعل كل افعاله فى ميزان حسانته اللهم امين يارب العالمين

ياسر مدني ...دينامو الإخوان يقول...

أنا إتفصلت م الجامعة يا جدعاااااااااااااااااااااااان
الحقووووووووووووووووووووووووني

Jana يقول...

السلام عليكم
ربنا يبارك فى صاحبنا وامثاله

صاحبنا بس صغنن شوية
اول مرة يبقى عنده موبايل...فيجيله عن طريق الخطأ تحويل رصيد بخمسة جنيهات من شخص لا يعرفه
فقام بتحويل الرصيد اليه مرة اخرى
وبعدها بدقيقة واحدة...حصل على رصيد خمسة جنيه هدية من الشركة التابع لها الخط..هو موقف بسيط ولكنه كان اول تطبيق عملى فى حياته يرى من خلاله جزاء الامانة
صاحبنا بس المرة دى كبير
وجد جاره المسن وقد وقع فى غيبوبة سكر..فأخذه الى المستشفى ولم يذهب لعمله فى ذلك اليوم حيث انتظر اولاد جاره حتى يأتوا ويبقوا بجوار والدهم
وعندما رجع وجد صديقه الذى كان سيقوم بتوصيله كالعادة الى عمله يوميا...وقع فى حادث بطريقه بسبب انقلاب عربة زيت فى الطريق

إنـســـانـة يقول...

البوست ده عجبنى جدا جزاك الله خيرا لانه بيركز على تعاملات المسلم اللى ينبغى يكون عليها .. دايما مبتسم دايما بيساعد اى حد مسلم او غير مسلم .. ده التطبع بأخلاق الرسول بجد

إن البر شئ هين .. وجه طليق ولسان لين

جزاك الله عنا خير الجزاء يااستاذى

محمد مارو يقول...

استاذى الفاضل
و الله اسف
ااااااااااااااااااااااسف
و بقدم اعتذار امام الجميع
انا بس افتكرتها نكت
لان لها نفس شكل و و طابع النكت ع شان كده انا قلت انا مش فاهم حاجه
و هذا اعتذار على مدونتك و سوف انشره ع مدونتى
ارجو ان يكون سوء التفاهم قد زال

يوميات عيل مصري يقول...

واحد صاحبي اسمه عصفور المدينة مغرقني بجمايله، نشر موضوع مبدع عن وقولوا للناس حسناً ، ومالقيش
قلت مش مهم ورحت حطيت تعليق عنده متأخر
ــــــــــــــــ

واحدة مراتي لقت واحد بيبيع مناديل قماش وشايلها على راسه، سالتها بكم الواحد قالها بجنيه ادته عشرة وخدت تلاتة قالها ربنا يستر عرضك، اشترت منه السبت كله

ـــــــــــــــــــــــــ
واحد صاحبنا دخل مدونة واحد صاحبه، وقعد يقوله بحببببببببببببببببببببببك
والله العظيم بحبك جدا

،،،،،،،،،،،،،،،،،،

عصفور المدينة يقول...

أخي محمد مارو أحسن الله إليك ورفع قدرك

Ahmed Essawy يقول...

انا حكتبلك موقف كتبته عندي من فترة .... مناسب للموضوع هنا

==
موقف رائع شايف فيه معاني جميله جدا تحملها النفوس السويه و الطيبه حبيت اني انقلها هنا علشان تشوفوها معايا :) .
الاشخاص : اتنين ميعرفوش بعض قوي . كل الي بينهم شغل و مصالح مشتركه .
الزمان : من ايام قليله .
الحكايه : اتنان يتفاني كل منهم في عمله ؛ يرتبط الاثنان برباط من التعاون و الاحترام المتبادل . كل منه مثال و نموذج في موضعه في العمل .
استمر الحال علي ما هو عليه حتي جاء يوم مشؤم .
يوم اهان في شخص زميله بكلمات جارحه و مهينه . و لكن لم ينطق المهان بعدها بكلمه واحده . و قد اسكت الموقف جميع جوارحه . وكناتج منطقي كدر هذا الموقف صفو و هدوء الشخص المهان لعلو نفسه لايام قليله .
الي ان مرت ثلاث ايام لم يخاطب فيها الشخص الاول الشخص المهان بشئ .
حتي جاء الليل علي الشخص المهان و نظر الي السماء و هو يسمع شئ غريب يهاتفه في اذنه بقول الرسول " لا يحل لمؤمن أن يهجر أخاه فوق ثلاث ، يلتقيان فيعرض هذا ، و يعرض هذا ، و خيرهما الذى يبدأ بالسلام " .
فإذا بصوت الشيطان يهمس في اذنه كرامتك . انت معملتش حاجه و كمان تعتذر . انت اهبل .و كلام من دا كتير .
فقرر الاخ المهان الرد علي الشيطان بفعل لا بقول .
فقد ذهب لجهاز الكمبيوتر و ارسل هذه الكلمات للشخص الاخر .
السلام عليكم و رحمه الله
انا كرامتي عزيزة عليا جدا
و لكن حبي لله اكبر من اعتزازي بكرامتي
لذلك بعد مرور ثلاثه ايام
وجب عليا البدأ بالسلام .

و ما هي الا دقائق حتي رد عليه اخيه برساله يعتذر فيها عن ما حدث و هو يقص عليه مسببات ما حدث .

انتهي الموقف عند هذا الحد عندما شعر الشخص المظلوم براحه نفسيه و رد اعتبار لكرمته التي قد اهانت و اكيد شعر الشخص الاخر ايضا براحه نفسيه قال الله سبحانه وتعالى في كتابه الكريم: إِنَّمَا الْمُؤْمِنُونَ إِخْوَةٌ فمهما حدث بيننا فنحن اخوه يشد بعضنا بعضاً .



التعليق
اني لا اري في هذا الموقف الا الكبرياء و القوه للمظلوم خمس مرت .
الاولي : انه لم يرد الاهانه بإهانه لذلك فاخلاقه اسمى .
ثانيا : انه من بدأ بالسلام و دا دليل علي قوي شخصيته و احترامه لدينه .
ثالثا : رد لهمزات الشيطان و الانتصار عليه عندما وسوس له .
رابعا : شعورة بالراحه النفسيه بعد ان اعتذر المخطئ له .
خامسا : شعورة بالسعاده بعد ان جمع بين الاربع صفات السابقه .

صدق الرسول عندما قال "و خيرهما الذى يبدأ بالسلام " .
كلمه كلنا عارفينها بس ممكن منكونش فهمين معناها . انا شخصيا اول مرة احس بالمعاني دي للحديث .
صدقت يا رسول الله ...صدقت يا رسول الله . صلي لله عليه و سلم.

===
http://ahmedessawy.blogspot.com/2007/05/blog-post.html

حائر في دنيا الله يقول...

عارف وانا قاعد في منطقة التجنيد مستني النتيجة كان ملطوب مننا السكوت عشان نسمع ونفهم والناس تعرف تتعامل مع الأعداد، ونا حاولت وسكت من نفسي، اللي اقصده لو كل واحد خد باله من اللي عليه أكيد الدنيا هتبقى احسن
ولو اتعاملنا مع الآخرين كما نحب أن يعامولنا ستتحول أمورنا للأفضل

موضوعك جميل وعجبني
لك تحياتي
والسلام عليكم

Noony يقول...

في بالي موقف اتكرر معايا ولسة حاصل النهاردة
أعرف شخص لما يعرف حد بيسأل عن طريق معين ويعرف حد تاني يعرف الطريق يعرفهم ببعض عشان يمشوا سوا للطريق دة ;)

جزاك الله كل الخير يا عصفور
:)
أختك نهاد

عصفور المدينة يقول...


دكتور حر

أول دائما يا محمد

mohand

ربنا يبارك فيك يا مهند

الفاتح الجعفري

شيكولاته هو اليعقوبي مش بيوصلها ولا إيه
لمست عنصر هام يا جعفري وهو هؤلاء المغيبين وفاقدي الأولويات

قوت القلوب

وفيك بارك الله فيك
الراجل اللي بييجي يحجز أماكن د عايزين نشيل الحاجة ونقعد مكانه

دكتور حر

جزاك الله خيرا وجزاك أيضا على البوست المكمل

Mohamed A. Ghaffar

بارك الله في صاحبنا وازاي تقول مش في نفس الاتجاه بالعكس ده مكمل جدا

لماضة

نعم يا لماضة لازم حرب مضادة لأن هذه أوامر ديننا أولا ولكي نغير الصورة ثانيا

فرنسا هانم

نبعت المشاريب على السلم النهاردة مش مشكلة بس برد عليكم

وضـّاح

ومن أمثالك يا أخي أكثر الله

الفاتح الجعفري

انتلحقت تيجي تفتن على الراجل ده هو كان سهران معايا

صانعة الحرية

بارك الله فيك وهم أيضا يسلمون عليك

مهندس مسلم

نعم يا هندسة لازم نحبب الأطفال في المسجد ولاننفرهم

المهـ إلي الله ـاجر

الناس تستغرب يا أحمد وذلك لقلة من يفعلون ذلك يا ليتهم يكثرون

و القادم....أجمل

شكرا على مشاركتك الرائعة

خمسة فضفضة

ربنا يكرم صاحبنا ويجعل مشقته في ميزان حسناته وأيضا يمد في عمره ورزقه

اسلام رفاعى

نعم بر الوالدة من أولى الناس بالقول الحسن

واحد من الناس

إيه الجمال ده يا أستاذنا
ويؤثرون على أنفسهم ولو كان بهم خصاصة
ولن تنالوا البر حتى تنفقوا مما تحبون

منى

نعم أخت منى من أولى الناس بأن يتمثلوا ذلك هم من يتعاملون مع المرضى والزمنى
وأيضا من يتعاملون في الإجراءات المعقدة ولهم أن يسهلوها

صيد الخاطر

بارك الله في صاحبنا وفيك يا محمد سواء كنت هو أم لم تكن
:)

اصرار أمل

يعني انت عايزة تقولي إن الفتاة يمكنها أن تدعو وتؤثر
طيب علي صوتك
وأتم الله زواجك على خير وبارك لكما وبارك عليكما وجمع بينكما في خير

الطائر الحزين

تقبل الله منا ومنك


مؤمنه

وما أصعبها من منزلة أن تحسن لمن أساء إليك

مهندس مصري

تحب تشرب إيه على السلم
بس معنى انك شفت كثير ده مبشر جدا يا محمد

امام الجيل

انت مش فاكر من كثر ما شفت يا محمد
ما شاء الله

mohand

جزاك الله خيرا على عودتك
والمفروض أصحابنا لا يضرهم استغراب الناس ولا يتأثرون به بل يصرون حتى تصل الرسالة

باب البحر

تعليقك أثر في جدا
وهذا ينبه أننا لابد أن نحسن ولا ننظر هل يستحق أولا يستحق ولا نتأثر بكثرة الخبث والمخادعين

مدونة الدفاع

ربنا يعينك يا أستاذ ده انتم بالذات لديكم مجال كبير للخدمة
أعانك الله وتقبل منك

دعوة الفردوس

:)
صاحبتنا تعيش الدعوة بارك الله فيها

L.G.

أولا شكرا على تشريفك لي بالزيارة وخاصة انك منقطعة عن التدوين
وبارك الله في إسهامك معنا ورغم قصرها وانت بتقولي طولت
احنا عايزين المزيد
وخاصة أنك طرقت جوانب متنوعة

آلام وآمال

بارك الله فيك
ودورنا أن نعيد هذه القيم المفقودة يا محمود

Anonymous

اللهم لك الحمد
وبارك الله في جميع أصحابنا

رفقة عمر

جزاك الله خيرا وبارك فيكم أيضا

ياسر مدني ...دينامو الإخوان

ياسر فرج الله همك وكربك

Jana

ياه سبحان الله
مشاركتان رائعتان بارك الله فيك

إنـســـانـة

جزاك الله خيرا يا أستاذة
البرشيء هين فعلا وعلى مدار اليوم

يوميات عيل مصري

ابو حميد الجميل الرائع
مش معتاد إني أعمل دعاية للبوستات بس المرة دي نزلت البوست لقيت 18 تعليق من أول ليلة
لكن مكانك في القلب محجوز
بارك الله في زوجك وذريتك وأهل بيتك أجمعين
انت ماقلتليش انك متجوز كام واحدة
:)

Ahmed Essawy

شكرا على هذه التدوينة الرائعة اخي احمد
فعلا العفو والإحسان درجة رائعة
وأقتبس تلخيصك وما أروع النقطة الخامسة
التعليق
اني لا اري في هذا الموقف الا الكبرياء و القوه للمظلوم خمس مرت .
الاولي : انه لم يرد الاهانه بإهانه لذلك فاخلاقه اسمى .
ثانيا : انه من بدأ بالسلام و دا دليل علي قوي شخصيته و احترامه لدينه .
ثالثا : رد لهمزات الشيطان و الانتصار عليه عندما وسوس له .
رابعا : شعورة بالراحه النفسيه بعد ان اعتذر المخطئ له .
خامسا : شعورة بالسعاده بعد ان جمع بين الاربع صفات السابقه .

حائر في دنيا الله

أقتبس تعليقك أخي بارك الله فيك
ولو اتعاملنا مع الآخرين كما نحب أن يعامولنا ستتحول أمورنا للأفضل

Noony

:)
:D
أسأل الله أن ينفع بك وكم سرني تعليقك هذا حين كان أول ماقرأت هذا الصباح
:)

فى القلب يقول...

التدوينه رائعه وفكرتها ساميه

ولها هدف راقى جدا

تقبل الله منك وأعزك

لا يحضرنى الأن موقف بعينه

شباب بيحب اسلامه يقول...

ما شاء الله فكره جميله ربنا يبارك ليك
صاحبنا بيحب يساعد الناس في مره وهو ماشي ماشي بالليل رايح شقته وشايل شنطته على كتفه قابله سواق ميكروباص تايه عايز يوصل لطيار بيوصله للمطار بتاعه وتايه مع انه ميعرفش البلد قوي لانه ساكن جديد فيه الا انه حاول يساعده فالسواق قال طيب معلش اركب معايا وصلني لاني معرفش حاجه هنا خالص قاله ماشي فراح صاحبنا سائلة طيب متعرفش للطيار دا رقم تليفون قاله اعرف بس مش معايا موبايل فراح صاحبنا مطلع موبايله وقاله خد اتصل بيه وخليه يوصف ليك العنوان بالظبط فقاله على العنوان فصاحبنا وصله للعنوان اللي قاله عليه ملقاش الوصف اللي وصفه فقاله طيب اتصل بيه تاني اتصل بيه تاني طلع تشابه اسماء منطقة اسمها السوبر بس فيه سوبر قديم وجديد وطلع صاحبنا راح السوبر القديم والمفروض كان يروح السوبر الجديد فراح واصف للسواق المكان تاني لحد ما وصله قدام بيت الطيار دا وكان على نص الليل كدا واستاذن منه بعد ما اتأكد ان دا العنوان الصح وخدها مشي لحد شقته

Doba يقول...

أشكرك
ربنا يبارك فيك

حسن ارابيسك يقول...

جميل قوي عقد الحكاوي
اللي انت لضمته بشياكه وحنكة في نفس الوقت
انت خطفتني على فكرة بهدوء من حكايه لحكاية لدرجه اني تضايقت لما الحكاوي فجأة كده خلصت
نحن في انتظار المزيد من عقد الفل والياسمين

ضد الظلم يقول...

اعرف رجل ذو مكانه وعمل له احترامه ومن الممكن ان يسهل له كل شىء
ولكنه لايستخدمه ابدااا
فى مره من المرات تعرضنا لمضايقه امنيه حتى ان مخبرين امسكوبنا وهو معنا فلم يعرف نفسه ولكن صديق اخر لنا عرفه للناس فلم يصدقو حتى تاكدو
بارك الله فيه وفيكم وفى اصدقائك امين

تحياتى

بالله المستعان يقول...

اعتقد ان صاحبنا
كتب مدونه عن صاحبنا

شــــمـس الديـن يقول...

كانت واحدة صاحبتنا سائرة و تعبر الطريق في ميدان التحرير و وجدت امراة صحتها لا تساعدها علي العبور وحدها فتطوعت صاحبتنا و عبرت معها الشارع ... و بعد فترة من السير في الميدان - اصلة فعلا كبير - و كانت تهم لعبور اشارة اخري وجدت امراة تريد العبور و ساعدتها و عندما امسكت بيدها قالت لها المراة ... جزاكي الله خيرا يا بنتي كل ما اريد عبور اشارة اجدك ...و ذهلت صاحبتنا لانها كانت نفس المراة الاولي التي ساعدتها في العبور ...


***********************************

صاحبتنا كانت تجلس في عربة مترو الانفاق الخاصة بالسيدات ... ووجدت امراة واقفة تتحدث علي انها تفضل الرطوب في عربة الرجالة لان الرجال يقومون للمراة ... و جلست هذه السيدة المتحدثة بعد فترة ... ثم صعدت امراة حامل الي العربة و كانت صديقتنا تنتظر لتري هذة المراة التي كانت تطعن في شهامة النساء ... فلم تتحرك و قامت صاحبتنا بالفساح للمراة الحامل لتجلس ... ثم تنزل سيدة و تجلس صاحبتنا ثم تصعد امراة حامل و تقوم لها صاحبتنا ... حتي جلس اربعة نسوة حوامل بجوار بعضهن و هن يضحكن ...

**********************************

البطل هنا ناس كتيرة قلما يتكرروا

كان هناك عدة اسخاص بنتظروا ميكروباس في مدينة نصر ... و من عادة الميكروباسات الاستغلال و مناداه نصف الطريق ... الاساسي ان يكون الي رمسيس و لكن هناك من ينادي الي غمرة فقط و هناك من ينادي الي عباسية فقط و يأخد جنية كامل في جميع الاحوال ... عندما جاء السائق و نادي ( عباسية غمرة ) لم يركب احد و ظل الميمروباس فارغا و لكن عندما قال عباسية رمسيس ركب كل اصحابنا فيه ...


قوة الجماهير الشرائية هي المتحكمة لو كانت الجماهير واعية


***********************************


هفكر في حكاوي تانية قريب ان شاء الله

محمود الدوح يقول...

ازيك ياباش مهندس
اخبارك اية

بوست جميل جدا
وعشان كدا هرد بموقف

ــــــــــ
صاحبنا قاعد فى المترو
سيدة عجوز تدخل
يقف لها ويجلسها مكانة
ولسبب انة محطتة هى الاخيرة
فاصبح كبار السن يتناوبون على مقعدة
وكل يدعو لة بدعوة تريح صدرة
ـــــ،،ــــ،،ــــ،،ـــــ

هو دا الموقف الوحيد اللى حضرنى دلوقت

ارسم بالرصاص يقول...

عصفور المدينة السلام عليكم ورحمة الله وبركاته

ياااااه وصلت متأخرة أوي .. لكن معليش .. جميل ان البوست يحمل شعار زي ده .. قولوا للناس حسنا .. ياريت كلنا نفهم ونعي كويس ان من كمال الايمان ان نتخلق بخلق الاسلام .. واولهم القول الحسن ..

ــــــــــ

صاحبنا راجل محترم جدا كان مربي ولاده كويس جدا .. عيب تعمل كذا .. مش من الزوق تعمل كذا .. زاره واحد صاحبه ف يوم .. قالوا انا مبسوط اوي من طريقتك تربيتك مع ولادك بس حبذا لو تعلمهم كمان يتعودوا كلمة حلال تعمل كذا وحرام تعمل كذا .. اجمل حاجة لو ننشأ أولادنا على الاعتياد على ذلك


ــــــــــ

أعزك الله وأكرمك وجزاك الله كل خير

عاشقه الفردوس يقول...

بجد بوست رائع
جزاك الله خيرا اخى
كا اما اجى اعلق الاقى النت يفصل
يارب التعليق ده يوصل

المهم عندى حاجه كده بس مش عارفه تمشى على البوست ده ولا لا
...............................

كان فيه واحده صاحبتنا عرفت من امها بطريق الصدفه ان امها لها عمه عندها 90 سنه
البنت طلبت من امها انهم يروحوا سوا للعمه دى
اوم البنت تدخل على العمه تلاقيها قاعده فى اوضه فوق السطوح لوحدها
اوم البنت تعيط وتقولها ازيك ياعمتى اوم العمه تقولها انتى مين
الام تدخل وتقولها انا دى بنتى ياعمتى انا ..... انتى مش فاكرانى
تقولها لالالالا

اوم البنت تقولها عمتى متزعليش مننا
اوم الام تنزل تبوس رجل عمتها وتقولها سامحينى ياعمتى انا غلطت بحقك الدنيا لهتنى اوم العمه تقولها بنت اخويا كنتى فين من زمااااااااااااااااان

Ahmed Al-Sabbagh يقول...

والله بوست جميل اوى اوى
عجبنى بجد وبدور عندى على مكان احط فيه لينك للبوست ده باعتبارة اجمل بوست قرأتة هذا الاسبوع

فعلا هى دى الاخلاق اللى نفسنا تسود فى مجتمعنا

واللى نفسى انا والشباب اللى زيى نتحلى بيها وندعو اليها

والاجمل انك صغتها فى اسلوب جميل اوى شدنى لأنى اقراه مرتين

بارك الله فيك وجزاك الله خيرا يا باشمهندس

تحياتى

بالحق قادمون...لا لجرائم أمن الدولة بالمنوفية يقول...

اليوم بدء إخلاء سبيل إخوان المنوفية التسعة

ض/خالد يقول...

صاحبكم....
اللي هو انا يعني...
قاعد مع ابن عمتي من حوالي 5 سنين
قدام بيتنا في بلدي القديمة....
واحد شاب بتاع 30 سنة يعدي ويقول (العواف عليهم)

يرد خالد : وعليكم السلام...

الراجل يعود أدراجه..مضايق...
أنا باقولكم العواف عليهم...
خالد يبتسم وابن عمته يضحك بصوت عالى... :)

mohamed يقول...

واحد صاحبنا مرضيش يركب العربية من الموقف الا لما البنات والستات والناس الكبيرة كلها ركبت

karamella يقول...

هو كله صاحبنا صاحبنا
مافيش صاحبتنا
طيب صاحبتنا صعبت عليها الخادمه واقعدت تعمل معاها شغل البيت ايدها بايدها وساعدتها لما طلعت روحها
وصاحبتنا لما نزلت مع صاحباتها تتسوق قطعت فسحتهم والشوبنج عشان تخليهم يصلوا الفرض في وقته جماعه

البيروني يقول...

ه ه ه ه ه هه ه
طلعت ال63

يا السلم بتاعكو طويل



السلام عليكم أولا


كلام جميل و سلوكيات راقية ياريت تبقى منتشرة بينا أكتر و أكتر

و انا مش هنسسى دكتور عزيز علي جدا

كنت اول مرة أتعرف عليه

مسك أيديه برقة و حنية مع ابتسامة بريئة لا أستطيع أن انسها له و كان هذا أول لقاء

عصفور المدينة يقول...


فى القلب

جزاك الله خيرا
وتقبل الله منا ومنكم


شباب بيحب اسلامه

ما شاء الله على المواقف وجزاك الله خيرا
وما أجملها حين تكون بعد إرهاق

Doba

بارك الله فيك أستاذه هبة
وشرفتينا وجزاك الله خيرا على تعليقك عند دكتور حر ولعل حضرتك وضح لك الموقف

حسن ارابيسك

ما أجمل تعليقك يا أخي


ضد الظلم

وهذا من تواضعه وبساطته حفظه الله

بالله المستعان

كتب عن صاحبنا لأصحابنا وصاحباتنا

شــــمـس الديـن

ربنا يبارك فيك يا أستاذة
شكرا على إسهامك الرائع وخاصة وخاصة الموقف الجماعي

محمود الدوح

ازيك يا محمود بقى تغير مدونتك من غير ما تنبهنا
وشكرا على مشاركتك

ارسم بالرصاص

شكرا شكرا شكرا
مشاركتك هادفة جدا ونبهت إلى أهمية التربية على ذلك

عاشقه الفردوس

الحمد لله أنك نجحت في إضافة هذا التعليق الرائع
أولى الناس بالقول الحسن هم الأرحام
وقصتك ماشية مع التدوينة جدااااا

Ahmed Al-Sabbagh

ربنا يبارك فيك يا أحمد
وربنا يعيننا جميعا على التحلي بالإحسان إلى الناس
ورغم إنك مش ذكرت موقف عنك لكن فيه موقف ذكره أخونا أحمد(عيل مصري) ينفع هنا ربنا يبارك فيك

بالحق قادمون...لا لجرائم أمن الدولة بالمنوفية

اللهم لك الحمد

ض/خالد

صاحبنا أصلا ده زي العسل

mohamed

نعم يا أخي والله العفة واحترام مكانة المرأة من أفضل هذه الأعمال

karamella

ربنا يباكر في صاحباتنا جميعا
حمدا لله على سلامتك يا أستاذة
وفعلامن أفضل الإحسان أن نرشد الناس إلى طاعة ربهم

البيروني

حمدا لله على السلامة يا دكتور
خد نفسك حد يجيب كوباية مية للدكتور
نعم يا أخي كم هو هين أسر القلوب سبحان الله

dr.nour يقول...

مواقف كلها جميله جدا

انا بحسد صاحبنا على كرم اخلاقه

وبحسده على التزامه بتعاليم دينه


جزاك الله خير

نـــــــور يقول...

موضوع رائع بجد بجد .. تحفة المواقف دي ربنا يكرم صاحبها .. آمين

حضرتك فكرتني بعدة مواقف كنت كتبتها من فترة .. سوف أضعها الآن في مدونتي .. وبانتظار تعليقك الطيب عليها

تحياتي لك

د/اجدع بنوته يقول...

البائع يشكو أن جميع الناس يقولون ذلك ولا يأتون
شوف صديق .. أنا حافظ القرآن.. حافظ القرآن إذا قال كلمة ينفذها
الصديق يرتاب في الكلام
بعد ساعة صاحبنا يعود للصديق رغم صعوبة المكان
الصديق يفاجأ ويضحك..ولكنه يرفع السعر!!!!!

حصلت معايا قبل كددددددده

والبياعه قالتلى

طالما رجعتيلى يبقى ياملقتيش سعرى

ياملقتيش جودة بضاعتى

وف الحالتين لازم اعلمك القناعه وترضى بالنصيب وتبطلى جشع

الست كانت بتعلمنى الادب يعنى

مع ان معرفتى بيها كانت لا تتعدى جملتين .. تلاته

بس باعتلى ف الاخر بالسعر اللى كانت قالتلى عليه الاول

مواقف كلها حلوه

وصاحبنا خلوووق جدا ربنا يباركله

تحياتى يابابا