الأحد، ديسمبر 23، 2007

منوعات

تحديث
رسالة وصلتني بالإيميل من أحد أصدقاء المدونة والذي لم يعلق ولا مرة ولكنه يراسلني بالإيميل حفظه الله

السلام عليكم ..أنا رجعت من الحج الحمد للة النهاردة..ودعيتلك فى عرفات وسلمتلك على الرسول صلى اللة علية وسلم
اخوك فى الله : اسلام
بارك الله فيك أخي الحبيب وتقبل الله منكم وملأ الله قلبك سرورا

ممنوع التدخين





الفيديو ده بيعرض تجربة مبالغ فيها شوية عاملين جهاز آلي لتدخين السجاير وشفط الدخان وتمريره على مية وطبقت التجربة على 400 سيجارة وصلت المياه لدرجة السواد وبعدين أخد المية غلاها وبخرها لحد ما تبقى القطران اللي في ال 400 سيجارة
معدل التدخين 400 سيجارة لشخص بيشرب علبة واحدة يعني عشرين يوم تقريبا وكمية القطران كمية لا بأس بها شوفوا الفيديو


مدونة مخصصها صاحبها أستاذ باسم لمتابعة حياة مولوده عمر وبالصور يتابع معظم لحظات حياة الطفل عمر الشهير بعمر أفندي
رحت نادي المهندسين بالمنصورة/طلخا النهاردة وانا داخل لقيت مكتوب عقيقة عمر أفندي وسهم كبير كدة وكنت أنا أصلا زرت المدونة عدة مرات قلت ده تشابه أسماء ولا إيه دخلت على الموقع من الموبايل لقيت مكتوب عقيقة عمر أفندي كدة أكيد
وبعدين شفت الطفل جده شايله وشفت والده رحت سلمت عليه وقلت له حضرتك عمر أفندي وأبوه؟
ضحك وقال لي أيوة قلت له أنا عصفور المدينة وباركت لهم وكدة
الإحساس اللي كان عندي هو خلطة جميلة بين العالم الافتراضي والعالم الواقعي إحساس جميل جدا
على أي حال بابارك تاني لعمر أفندي وأبيه

فسيخ وسردين
زوجتي على الأكل بتحكي انها شافت زحام شديد تاني يوم العيد على محل السردين المملح
ردت بنتي قالت :زهقوا من اللحمة
رديت :قلت لهم لا دول أكيد مش لاقيين لحمة ومش لاقيين حاجة تانية فلجأوا للسردين والرنجة

أرقام السيارات
ابني متتبع أرقام السيارات ملاكي نقل قطاع عام حكومة الخ دار بيننا حوار شرحت له فيه معاني المسميات وبصعوبة معنى القطاع العام ومعنى الحكومة وكانت نقطة تساؤل ازاي طيب قطاع عام وراكب فيها الراجل وزوجته وأولاده بيتفسحوا وطبعا طلعنا من هذا الموضوع لعدة نقاط في الحقوق والحرام والحلال ويبدو إنه فهم الموضوع كويس بس سألني سؤال محرج
طيب لو المدير هو اللي قال له روح اشتري الخضار يعمل إيه؟
رديت على قدي : المدير هو اللي ياخد الذنب

توبة موقع
موقع اسمه رعودي
كان مليئا بالأغاني والفلاشات والكليبات أعلن صاحب الموقع توبته
ووضع دعاء سيد الاستغفار في موقعه ووضع هذه العبارة

إلى كل من زار موقعي ورأى ما رأى أرجو منه أن يستغفر لي عن ذنبي فقد أذنبت في حقي الكثير وأرجو من الله المغفرة ، كما أرجو منه أن يتخلص من أي بطاقة فلاشيه حملها من الموقع وكانت تحمل المنكرات من الأغاني والصور ولا احلله ولا أبيحه إن بقيت لديه واحتفظ بها سواء كان على جهازه الشخصي أو صاحب موقع يعرضها في موقعه، واشهد الله على إنني تبت إليه توبةً نصوحة ، اللهم هل بلغت اللهم فشهد ،،، رعودي ..
ومن قبله موقع اسمه طرب
افتتح موقعا أسماه الحكمة

هناك 37 تعليقًا:

دكتور حر يقول...

ينور علة منوعاتك يا غالي

جميله فعلا لما تنزل بعالم آخر على الأرض
أو تسمع أو تقابل ناس انت عاملهم صوره تانيه

يعني أختي راحت فرح قابلة همسة قلم وقالتلها انا أخت دكتور حر وقريبة المضيفه ومزاجات واللؤلؤه المكنونه وانا واقف تحت مع حياتنا كلمات وكومانوز البنا ومش هنسى

وعلى كده بتبقى فعلا حاجه جميله لما تحصل

وكل سنه وانتم بخير
ومنتظر الإكسير

عصفور المدينة يقول...

أيوة يا دكترة مش ناسيه طبعا بس مش عايز اسلقه عايز اظبطه وانت عارف واجبات العيد

دكتور حر يقول...

أنا عارف طبعا يا غالي انك هتظبته
وواثق انك بإذن الله أحسن واحد هتظبطه

عشان كده مش مررته لحد تاني

ومعذرة على الخطأ المطبعي

الله ينور على منوعاتك

BoHSaiN يقول...

موضوع جميل,,,

ارسلت رابط موقع رعودي الى شخص يملك موقع غنائي, فأخبرني بأن موقعه سيغلق ايضا نهاية هذا الشهر :)

الفاتح الجعفري يقول...

استاذي الحبيب
ربنا يبارك فيك
الحمد لله الذي عافانا مما ابتلي به كثيرامن الناس
اول ماشاهدت الفيديو تذكرت حديث سيدنا سلمان وابو الدرداء
الذي في نهايته قال سيدنا سلمان لسيدنا ابوالدرداء ان لبدنك عليك حق
يعني الراجل كان يهلك نفسه في طاعه ولايجوز ان يهلك نفسه فيها
فمابالك بمعصيه
وانما اجسادنا وانفسنا امانه يسألنا الله عنها
وحلوه اوي المواقف اللي حضرتك عرضتها
ربنا يجزيك خير

خمسة فضفضة يقول...

السلام عليكم ورحمة الله وبركاته

يا منوعاتك يا باشمهندس
حلو الفيديو ده ، بس حضرتك عارف ان 90% من اللي بيدخنوا عارفين كويس اوي مخاطر واضرار التدخين ، ومش بعيد يكون منهم دكاترة صدر وقلب كمان وبيدخنوا بشراهه ، ولا هامهم حاجه
الحاجات دي مش بتأثر فيهم ولا هاتخليهم يبطلوا تدخين

ارجع اقول ان الهدايه من عند الله سبحانه وتعالي

---------
بالنسبة للسردين ، هما المصريين كده ما ينفعش يعدي عليهم عيد ، اي عيد ، من غير فسيخ وسردين ورنجه ، حتي لو كان عيد اللحمه
ده ادمان حضرتك
:-D
------------
رحت مدونة عمر افندي ، اول مره اسمع عنها ، حلوه اوي ،بس نادي المهندسين بتاع المنصوره هو اللي مش حلو

--------------
اما ارقام العربيات والحكومة والقطاع العام
فلا تعليق
----------
موقع رعودي
اللهم تقبل توبته ، ولعل غيره يتعظ
--------------


كل سنة وحضرتك طيب

اخبار الخروف واللحمة معاك ايه ؟ ان شاء الله تكون اتبسط في العيد
:-D

سلام

صاحب المضيفة يقول...

منوعات رايقة يا عمنا

ربنا يبارك في حضرتك وتتحفنا بكل جديد ومفيد


دمت بكل الود والخير

وقول لابن حضرتك يبطل أسئلة محرجه لانها بقت كتير قوي اليومين دول

سلاماتي

مصراوي أوي يقول...

موضوع اننا نقابل اصدقاء المجتمع الافتراضي فعلا بتبقي جميلة وان شاء الله اشوفك قريب


موضوع عربيات الحكومة دي ....ربنا يبارك لك قي ابنك اللي لاحظ كده واتحدي ان دي ممكن تفوت علي ملايين من الناس باعتبارها عادي يعني ما كله كده

صيد الخاطر يقول...

أستاذي الكريم
السلام عليكم
منوعات رائعة
بورك فيكم
وآه لما بتقابل واحد من المدونين

أذكر اني لما قابلت أحد المدونين

قعدت اتصل بيه واقوله انت فين يقوليأنا واقف عند بتاع العصير في الحتة الفلانية وأقوله وانا كمان

وأبص في وجوه الناس مش لاقي حد

فقابلته قدرا وكان واقف جنبي على بعد خطوات

وقالي أنا شايف بقك بيتحرك بنفس الكلام اللي علىالموبايل
واقوله أنا سامع صوتك من الموبايل ومن بره
فمش عارف أشيل الموبايل من على ودني أسمع صوتك أحطه أسمع صوتك

محمود الدوح يقول...

جميل والله يا اخ محمد

فعلا منوعاتك جامدة جدا

ونفسى اقابل حد من المدونين زيك
نفسى اقابلهم صدفة

الا صحيح هو اية الاكسير اللى الدكتور بيقول علية

طال الليل يقول...

ما شاء الله على المنوعات
بس فعلا ملاحظة إبنك بارك الله فيكما أصبحت مألوفة للناس مع ‘إنها سرقة وعينى عينك وببجاحة
فعلا لو المسئول يفكر بعقلية الحلال والحرام مش ممكن يعمل عمل زى ده

فرنسا هانم يقول...

جميله منوعاتك يا باشمهندس
وخد من العربيات اللى مشغلينها لحسابهم بالجمله قطاع عام وشرطه
سؤال ابنك ذكى
لا
مش اسم ابنك ذكى
انا اقصد ان سؤاله فيه ذكاء
سلام يا ابو يحيى

أحمد منتصر يقول...

والله إحنا أكلنا رنجة تالت يوم عشان كنا زهقنا من اللحمة وكان تغيير لذيذ أوي

Maha يقول...

فيديو التدخين :

رأيته في الفيس بوك الأسبوع الماضي .. مذهل فعلا

عمر أفندي وابوه :

جميلة الفكرة جدا .. بارك الله لهما في الموهوب لهما

أرقام السيارات :

ذكرتني بأبي وبنا .. دوما نجلس لنسأل أبي ودوما يجلس أبي ليشرح لنا :)

وأضحكني سؤال ابنك كثيرا .. يذكرني بأسئلة أخي الصغير 8 سنوات

توبة موقع :

بجد قصة مؤثرة .. صحيح مش أول قصة من النوع ده أسمعها .. لكنها مؤثرة دائما وأبدا

اللهم اجعلنا من التوابين

جزاك الله خيرا

فى القلب يقول...

كل سنه وحضرتك بألف صحه وسعاده

بنت أبيها يقول...

تمام

موضوع التدخين فعلا صعب واللى بيدخن مش بيصدق انه بيسبب كل كده

وبالنسبة للعربيات ... فاغلب الشعب المصرى مش بيراعى حرمة المال العام فى كل حاجة من القلم بتاع الموظف فى الحكومة لعربية القطاع العام

وبالنسبة للموقع .. فده افضل من موقع طرب

لان موقع طرب لا يزال مستمر فى انزال احدث الاغانى والكليبات من كل البلاد العربية

ولكن افتتح الموقع بجوار الموقع القديم

اما صاحب هذا الموقع فقد اغلق موقعه نهائيا

امام الجيل يقول...

هلا ابا يحيى
العيد خلص وفضينا
كيفك اتمنى ان مطحنة الشغل
تبقى خفيفة على قلبك
حلوة المقتطفات دى
وجميل صحيح لما تتحول علاقة على النت لعلاقة مباشرة كده
بيبقى ليها تاثير خاص
زى اما شفتك كده مش هنكررها تانى ولا زهقت مننا :)
وفرحتنى بخبر موقع طرب ده اعتقد انه كان موقع كبير للاغانى
الحمد لله اللهم اهدنا فيمن هديت

القلم السكندري يقول...

كل عام وانتم بخير

ولو أنها متأخرة لكن معذرة

تحياتي

نقطة مية يقول...

الحقيقة الناس فعلا مش لاقية لحمة و مجبتهاش في العيد و شكلها مش هتشوفها كتييييييير..الخوف على الغلابة بقى من ان الحكومة تقرأالبوست وتعرف انهم لقوا بديل فترفع سعر الرنجة!!!
مش بعيدة

منى يقول...

ان شاء الله نبقى كلنا على عرفات السنه الجايه ولو انت اللى رحت متنساش تدعلنا
انا شفت مدونه عمر افندى لاول مره يوم العقيقه بالضبط، وحضرتك بقى حضرت
اتارى المنصوره نورت

تحياتى

NIDAAL PAL يقول...

بوست جميل اوى
و يارب تكون حضرتك المرة الجاية الى فى الحج
آآآآمين يارب ..آآآآمين يارب
بوست منوع و جميل جداً
دمت ودام قلمك

mohand يقول...

السلام عليكم

بالنسبة للحاج

مبارك ان شاء الله

بالنسبة للسجاير بلاش يا ابو يحي
الناس مجرحه

بالنسبة لعمر افندي
مبارك ان شاء الله

بالنسبة للقطاع العام والحكومي والسؤال اللي رديت فيه علي قدك

كنت مردتش احسن


بالنسبة لموقع رعودي
دا تاب من سنتين تقريبا
بس ليه معملش فلاشات اسلامية زي ما كان بيعمل زمان قبل توبته برضه

تحياتي

klmat يقول...

كل سنه وحضرتك طيب
وكل اسرتك بخير
تدوينه منوعه وقويه
رائع ان يكون هناك من يدعو لك فى بيت الله ربنا يتقبل وعقبالنا جميعا
دايما تدعو للخير ويارب الكل يبطل سجاير. سعدت لمن جعل مدونته تهدف للحكمه وتغيير مسارها وربنا يهدينا جميعا.جميل ان يتحاور الابناء مع
الاباء فى مواضيع تمس الحياه
وجميل ان يتلاقى المدونين ويتعرفوا
على بعض ولو بالصدفه
بارك الله فيك وفى اسرتك
مدونتك رائعه
تحياتى لك

شقاوة شعب يقول...

اكتر حاجة عجبتنى موضوع توبة اصحاب المواقع اللى حضرتك ذكرتها
ولفت انتباهى على وجه الخصوص موقع طرب عشان كنت فعلا بدخل عليه من يجيى 5 سنين كدة عشان انزل من عليه الاغانى ففرحت قوى لما عرفت ان صاحبه تاب وغير الموقع
لان اى حد كان بيعوز اى اغنية كان بيلجأ لطرب لان كله متوفر عليه والتنزيل من عليه كان سهل وسريع

الحمد لله الذى هدانا وهداهم

اما ابن حضرتك اللى بيتابع ارقام السيارات ... فقله فى واحدة اعرفها بتتابع الجمل اللى مكتوبة على ظهر السيارات ومش عارفة تتخلص من هذه العادة اللى بتحولها عنيها


تحياتى
شيماء

باب البحر يقول...

جزاكم الله خيرا أخي على هذه المنوعات السريعة

كل عام و أنت بخير أخي

Ahmed Essawy يقول...

كل عام و انت بخير يا استاذ عصفور المدينه ...

بمناسبه ارقام العربيات ...
:D
انا شوفت في مدينه نصر عربيه بي ام دابليو سوداء اللون موديل 2006

رقم العربيه
ملاكي 2006
دي مش نكته دي حقيقه ...

عصفور المدينة يقول...


BoHSaiN

جزاك الله خيرا أبا حسين وبارك في جهدكم في نشر السنة والهدى

الفاتح الجعفري

الحمد لله على العافية أخي أحمد
وفعلا كان السلف يفنون أنفسهم في الطاعة وأجيالنا تفني أنفسها في الكرة والمقاهي والنواصي والتدخين والخدرات
ولكن لا يزال في الأمة الخير

خمسة فضفضة

:)
فعلا يا أستاذة ولكن الرؤية غير النظري يعني ممكن واحد يشوف القطران ده يخاف وانا شفت تعليقات على الفيديو من ناس بيقولوا انهم قرروا محاولة الإقلاع
وبمناسبة الخروف
إحنا شاركنا في عجل عدم المؤاخذة
:)

صاحب المضيفة

الله يحفظك يا أخي الحبيب
الأسئلة المحرجة كثير يا حبيبنا بس ربنا بيستر


مصراوي أوي

إن شاء الله ربنا ييسر لقاءنا أخي الحبيب

صيد الخاطر

أذكر أنا قابلت ناس كثير من المدونين وباحبهم في الله

محمود الدوح

ممكن نتقابل صدفة بس قل لي انت فين
الإكسير ده هو البوست القادم تاج يعني انتظرونا

طال الليل

جزاك الله خيرا أخي محمد
وفعلا الأمين على المال إذا لم يتق الله فيه
!!!

فرنسا هانم

فعلا هو كان سبب السؤال إنه شاف سيارة قطاع عاك راكب فيها أطفال

أحمد منتصر

نورتنا يا أحمد وشكرا على إضافتك على المسنجر وعلى فكرة أنا سلفي
:)
وقريت مدونتك كاملة كاملة ماسبتش ولا تدوينة
وبالهنا والشفا الرنجة

Maha

أيوة هو احمد الدرعة بعته لي فانا حبيت انشره
وجعلنا الله وإياك من التوابين وعلى فكرة الواد المقروض ده عنده 7 سنوات

فى القلب

كل عام وأنت بخير

بنت أبيها

تمام تمام
لا والله دي عينة صغيرة لآثار التدخين وبيأثر علينا كمان
فعلا حرمة المال العام مشكلة عامة نريد التنبيه عليها
انا شفت موقع طرب قافل خالص على فكرة

امام الجيل

العيد خلص وفضينااااااااااا
:)
انت بتشتغل جزار ولا إيه
المطحنة انت شفت الفيس بوك أنا كتبتها قبل ما اروح وعينك ما تشوف اإلا النور يا حاج
ربنا يهون بقى آخر السنة
نفسي اشوفك بس إن شاء الله ننسق في معرض الكتاب

القلم السكندري

كل عام وأنت بخير وصحة وسعادة

نقطة مية

فعلا يا أستاذة أنا شايف إنها أزمة مش ترفيه انهم لجأوا للسردين

منى

يعني انت كمان لاحظت ان المنصورة نورت ؟بس انا كنت في طلخا
:)

NIDAAL PAL

الله يحفظك أخي المناضل
تقبل الله منا ومنكم

mohand

معلش يا مهند شكلي عكيت ولا حاجة؟
المهم فيه ناس زي حالاتي خبر المواقع ده يلفت انتباههم
حصل خير إن شاء الله
على فكرة كنت أتغدى عند الشيخ العثيمين رحمه الله وسأله أحد زملائي مسألة تتعلق بأن رئيسه في العمل يطلب منه أشياء خاصة في وقت العمل وأنه لا يستطيع الرفض
فأفتاه بمثل ذلك سمعته أذني


klmat

كل عام وأنت بخير أستاذة
تقبل الله منا ومنكم وقد قرأت عدة تدوينات عندك ومتابع إن شاء الله
وأنت أيضا مدونتك رائعة

شقاوة شعب

صاحبة السعادة مرحبا بك
الحمدلله الذي هدانا لهذا
بمناسبة الجمل اللي على السيارات الحقي روحي استراحة الكاشفة حتلاقي عنده بوست عن الموضوع ده شاركي معانا فيه
http://kashefa-shop.blogspot.com/
كل عام وأنت بخير

باب البحر

كل عام ,أنت بخير أخي الحبيب بارك الله فيك

Ahmed Essawy

كل سنة وانت طيب يا احمد
وانا مبسوط إن تدوينة الكويت لاقت منك استحسانا
ملاكي 2006

دي نوع جديد ماشاء الله

أصل طالعة موضة برضوا عربيات بدون أرقام بس ده غلبهم

محمد الجرايحى يقول...

أخى الفاضل
السلام عليكم ورحمة الله وبركاته
طرح طيب
وزاده تنوعه ثراءً

أخى: التدخين أصبحت مشكلة تؤرق المجتمعات ومما زاد الطين بلة
هو دخول الفتيات هذا الأتون المحرق

ومع الأسف أيضاً الشريحة الأكبر من المدخنين من الفتيان صغار السن
زهور غضة تحترق ومازالوا فى بداية مشوار الحياة

غياب الأسرة عن دورها
واستغراقها فى صراع البحث عن لقمة العيش من أهم أسباب انحراف الأبناء
واتجاههم إلى سلوكيات ضارة كالتدخين والأدمان وغيره
ـــــــــــــــــــــ
إنه أخى الكريم
لشئ محزن
أن نرى من لايجد قطعة لحم فى عيد الأضحيات
والذى هو من المفترض تكون فيه صورة التكافل الاجتماعى متمثلة
إشباع احتيجات فقراء المسلمين
من اللحوم وغيرها
أى عار أن يفتقر الفقراء إلى قطعة اللحم فى مثل هذا الأيام المباركات
ـــــــــــــــــــــ
أسف على الإطالة ولكن ماذا أفعل وأنت حركت الشجون بأطروحاتك

تقبل أخى تقديرى واحترامى
أخوك
محمد

ŞoŖśậŖấầ يقول...

انا قعدت نص ساعة اكتب فى تعليق وفى الاخر الصفحة مافتحتش
عاااااااااااااااااا

ماعلينا:)

انا اول ماكتبت اخر بوست قلت الحق استاذ عصفور قبل مايكتب تعليق عندى
وسبحان الله لسا بدوس عاللينك لقيت حضرتك كتبت تعليق
ماشاء الله اللهم لاحسد:))

بس ليه حضرتك قلت انى مليش صبر عالقراءة

يمكن عشان لما كتبت تعليق من غير ماقرأ البوست واشوف بيتكلم عن ايه؟

هو كان بس ظرف طارىء بمناسبة العيد وكل عام وانتم بخير

كنت بعمل جولة واسعة المدى عشان كدا كنت عاوزة اروح لاكبر عدد مالمدونين واهنيهم فالبالتالى مش بشوف ايه المواضيع اللى مكتوبة

بس انا فعلا بزهق لما بيكون الموضوع طويل من غير فايدة يعنى نفس الجملة بس بصيغ وتعبيرات مختلفة

كمان لما بيكون الكلام مكلكع اوى
انا مش بقول كدا على اساس انى من مدارس اجنبى بقى
الحمدلله احنا حكومى لحد ماتخرجنا:))

بس انا افضل الموضوع يكون مبسط وكل جملة مفهوم ايه اللى بتقصده
بس مش معناه ان يكون فى مصطلحات وضيغ فصحى عشان القراء اللى دماغهم بتكون موسوعة
بس برضو يكون فى جانب للغلابة اللى زيى:))

وكمان مايكنش طويل زيادة عن اللزوم
طبعا فى مواضيع طبيعتها تتطلب الاطالة وبالذات لما بتتكتب باسلوب شيق ومختلف كل جملة عن التانية انا بقرأه كله

انا كلامى دا بشكل عام ولااقصد به اى احد من الاحاد:))

انا بقول حضرتك تجهز حباية بانادول لانى لسا ماكملتش رغى

اروح بقى اشوف التتدوينات اللى فاتتنى

ŞoŖśậŖấầ يقول...

جيت تاااااااااانى

بالنسبة للسجاير:
ربنا ينتقم ماللى اخترعها

بالنسبة للفسيخ اند الرنجة:
الحلو بتاعهم الفول والطعمية

بالنسبه لعمر وابوه:
مبروك لعمر ولو انى ماعرفوش بس فعلا الدنيا صغيرة وهى مرة واحدة اللى قابلت فيها مدونة وكنت فرحانة اوى بس للاسف بقالى فترة ماعرفش عنها حاجة.. ربنا يطمنى عليها

نمر العربيات:
دى هوايتى المفضلة:))
اشوف الرقم وملاكى ايه والموديل لو لقطته:)
وشفت مرة عربية شرطة كان راكب قدام بنتين جنب السواق شكلهم كانوا رايحين درس
هى البلد خربانة من شوية

ايه تانى.. اه.. توبة الموقع:
ربنا يتقبلها منه ويهدينا جميعا لكل خير

بالنسبة لبانادول
حضرتك اخدته واللا لسا؟:))

ŞoŖśậŖấầ يقول...

صحيح ربنا يتقبل من كل حجاج بيته ويكرمنا بالزيارة احنا كمان
ااااااااميييييييين

Eng. Khalid يقول...

هاي عصفروت
احي العزيز ، بصراحة يكفي المدخن انه عندما يتحدث اليك يجعلك تريد ان تدير وجهك في اي اتجاه بعيدا عن فمه برائحته الكريهة مهما كان موقعه او منصبه

وبالنسبة للفسخاني ـ انا عارفه اللي جنب مسجد السطوحي - ربنا يرزقه ياعم ، دا راجل طيب ، بس عيبه انه من اخواننا اياهم ، اما غير كدا كله كويس، ههههههههه

كل سنة وانت طيب يامحمد انت والعائلة الكريمة

ولي ادراج جديد اتمنى تشريفك له .

Doba يقول...

كل سنة وانت طيب
والحمد لله على عودة صديق سالم وربنا يتقبل دعوته لك ويرزقنا وإياكم

انا قريت لعمر افندى وابوه قبل كده وجميل فعلا ان العالم اللى كلنا بنتابعه من ورا شاشة يتحول لواقع ملموس وحقيقة

بالنسبة لمواقع الاغانى فربنا يهدى

والسجاير بكل مساوؤها فكل الناس عارفة المساوىء لكن المشكلة يا صديقى فى انعدام الإرادة

ربنا يبارك فى ابنك ويكون بار بوالديه وقرة عينيك

تحياتى على يوميات ممتعة
هبة

د/اجدع بنوته يقول...

هههههههههههههههههههه

جامده اوى بابا اللى فرحان بعمر افندى ده

ربنا يخلهوله يارب

وربنا يتقبل م الاخ اسلام الدعوات اللى دعهالك يارب

بس لا فعلا بيبقى ع الفسيخ زحمه اوى بعد العيد .. فعلا ممكن يكون علشان زهقوا م اللحمه زى بنت حضرتك ماقالت

بس بقى يابابا ممكن سؤال

ايه الفرق بين الحكومه وقطاع العام

علشان ساعات بلاقى حكومه وساعات بلاقى قطاع عام

واسمحلى اكون زائره دائمه لمدونتك الرائعه يابابا ...

واسمحلى قبلها تقبلنى م بناتك واولادك ف العالم الافتراضى

... تحياتى

ابن همام يقول...

كده يا بشمهندس تيجى المنصورة من غير ما تعرفنا كنا عملنا لك استقبال يليق انا زعلان جدا والمرة الجاى لازم تعرفنا عشان نعملك الاستقبال اللى يليق بعصفور المدينة ولا ايه

appy يقول...

ايه الفسيخ والحركات دى بس بقولك ايه هى ليه العادة دى عند المصريين يأكلوا الفسيخ والسردين فى العيد دة حتى وجع بطن

دعوة الفردوس يقول...

رااااااااااااائــع
منوعات وملاحظات رائعه