الخميس، ديسمبر 13، 2007

مسدات ومسجات

من كام يوم قاعد في حالي لقيت رقم بيرن لي زي رقمي بالضبط بس 018 ضحكت أول ما شفته
رديت ما حدش بيتكلم اتصلت بيه بيفتح ومش بيتكلم
استمر يتصل ليلا ونهارا ومن الساعة سبعة ونص الصبح كل يوم وبالليل

شغلت برنامج على الموبايل بحيث يفتح عليه تلقائيا وهو مستمر يا عيني كل شوية يرن
آخر ما زهقتش (أيوة مكتوبة صح) أصلي كنت باضحك وهو بيتصل
الساعة سبعة ونص رديت برسالة

صباح الخير

انتظرت شوية ولقيت رسالة طبعا الطير الحزين ده تشابه أسماء مع الطائر الحزين

رسالة من تلك الإصطمبات التي لا أحبها ولا أقرؤها

ترددت شويةقلت أحسن يطلع واحدة ولا حاجة والرقابة تقفشنا المهم اتصلت وبلهجة جادة
السلام عليكم
لقيته راجل ولهجته صعيدية
قلت الحمد لله ربنا ستر

قلتله ياراجل انت مسلينا الصراحة برناتك وانت صاحب واجب ربنا يبارك فيك انت منين
قال لي من قنا
قلتله أحسن ناس وما تحرمناش من رناتك و رقمك جميل وكلام كدة يعني لا يتجاوز الدقيقة (شايفك يا عبده بتضحك
وفي آخر ثانية بيقول
مين معايا !!!!!!!!!!
طيب
السلام عليكم
طبعا لحقت قفلت كفاية على كدة أصل الكلام بفلوس
ودي كانت نهاية المسدات من هذا الرقم على ما يبدو

بحسبة بسيطة كدة الموضوع التافه ده اتهدر فيه مبلغ حوالي 10 جنيه (ماحدش يقول أنا السبب) غير الوقت اللي هو قاعد ماسك الموبايل فيه يعني رغم الظروف الاقتصادية المعروفة والتي تكاثرت النذر حول اتجاهها نحو الأسوأ وربما تعرفون أن عدد الناس الذين يهدرون هذا الإهدار ليس بالقليل

مشكلة الإهدار من وجهة نظري إن كل واحد بينظر له على مقدار بسيط وهو إهداره هو لكن لو نظرنا له بمنظور إجمالي حنلاقي أرقام كبيرة يعني مثلا 220 مليون جنيه لب وسوداني سنويا وشوف مسجات ومعاكسات زي كدة كام وهلم جرا

وانا كنت فاكر الظاهرة دي انتهت !!! على كل :

تهئنة مليانة ورد وفل
أرسلها قبل العيد ما يهل
علشان أكون قبل الكل

أحب أسابق الأنفاس وأقول قبل الناس وبصادق الإحساس
كل عام وانتم بخير

هناك 68 تعليقًا:

دكتور حر يقول...

مش فاضي أقرا ولاأعلق
بكره ان شاء الله
هههههههههه
لكن بفتح الجهاز لقيت العصفور عنده تدوينه
دعواتك

همسة قلم يقول...

يييييييه من ده كتير اخونا الكريم عصفور المدينة

مرة تليفوني قعد يرن من رقم لا اعرفه ارد مش يتكلم اكنسل يتصل تاني اطنش يفضل يرن
خليت اخويا يتصل بيه واتاريه كان مبسوط من الكول تون اللى كنت حطاها وعايز يعرف يحطها ازاى ...

ومن ده كتير

لكن اسخف شئ لما الواحد يكون في عز النوم وتليفون من دول يتصل وباصرار ويطلع في الاخر عايزي شيرين مثلا او عايز يتعرف والواحد بيفتكر انها حاجة مهمة وحد لا قدر الله حصل له حاجة

ياللا خير

وكل عام وانتم بخير اخونا الكريم

حياكم الله

دعوة الفردوس يقول...

برضه هحجز
وبعدين اقرا
انا اتطورت اهوه وبقيت في اول خمسه
لولولولوي

أمير القلوب يقول...

أخي الحبيب:أبو يحيي
ده عادي أصل الشعب كله كده زي ما بيقولوا في المثل
أقرع.. ونزهي
كل عام وأنت بألف ألف خير
وأسأل الله أن ينظر إليك وهو يباهي بك ملائكته ويقول: إني أحببت عبدي فأحبوه
تحياتي لك

دعوة الفردوس يقول...

ههههههههه
موقف جميل
والأجمل انه طلع رااااجل صعيدي على حج"حق"
علشان الرقابه والعصفورة متعليش صوت تغريدها

المواقف من دي كتيييير
وبجد طلعت في دماغي اعمل تدوينه عنها بما ان لدي منها الكثير بل والعجيب بجد عندي انفرادات
وكل سنه وحضرتك طيب
وقبل الدبح والبهدله
والفته المفلفله
اتمنالك عيد سعيد
وفرحه مجلجله

بالله المستعان يقول...

التركم
حاجه ضعيره علي حاجه ضغيره علي حاجه ضعيره يعملوا حاجة كبيره

خلينا نقولها بمعني تاني لو كنا في هولاء العشر ,,, خلينا نقول
لا تحقروا من المعروف شيئا ,,, خصوصا في هولاء العشر

كل سنه وانت طيب يا استاذ عصفور

L.G. يقول...

ربنا يعلم عن نفسي مبتكلمش في الفاضى وبقفل بسرعة ومبرميش الكل وده كل لأني مبشتغلش دلوقتي ودمتم
بس انت غلطان ممكن تكون خسرته وهو مش فاهم انك بتفتح الخط عليه كل ما يطلب كنت طلبته من الأول وقلتله عايز ايه
انت كنت فاكره ست صح عيب كنت كلمته وشفت مش تخسر الراجل 10 جنيه حرام عليك وياتري نصحته ولا قفلت وخلاص ؟؟؟
ابعتله ماسج قله حرام عليك الفلوس طلعها لمنكوبي القرصاية ولا الناس اللي ماشية في الشارع مش عارفيين رايحين على فين

وضـّاح يقول...

فكرتني برقم بين علي .. نفس رقمي ولكن مرة 012 ومرة أخرى كان 016 وعلى كدا كل ما واحد من الناس يجيب خط جديد بيجرب خطه على باقي الشبكات

طبعا دا غير الرسايل والفتح عليه ومفيش رد

ربنا يهدينا ويهديهم

عاشقه الفردوس يقول...

الحق مركز متقدم وارجع

عاشقه الفردوس يقول...

مممممممممممممممم
مش بتحصل معايا
وده الىل مخلينى متطمنه
ان فعلا زى مالاحصائيات بتقول ان الناس حالتها ميسرش


كل عام وانت بخير والامه الاسلاميه بخير
والعام القادم تكون فى الحرم باذن الله

جمعاوى روش طحن يقول...
أزال المؤلف هذا التعليق.
المهـ إلي الله ـاجر يقول...

يا معجبينك يا بشمهندس (:

جمعاوى روش طحن يقول...

طيب المفروض أقول ايه بعد التعليقات دى


الواحد دايما بييجى متأخر


ينفع كده ؟

موجة يقول...

مووعك جميييييل
مبسوطة يا ستي
ههههههههههه
تسمحيلي اعلن حملة أو موضوع بقى
مممممممممممم
مش لاقي حاجة أقولها بس صعبان عليا الراجل اللي ضيعتيلوه رصيدوه ده
خالص تحياتي

عبدالرحمن ياسين يقول...

السلام عليكم
كل عام وأنتم بخير

أنا نزلت بوست جديد على المدونة...ماتنساش العيدية وإنتا جاي

تحياتي لك
سلام

Mohamed A. Ghaffar يقول...

هناك تداخل حاد بين مفهومى اهمية التقنية واهمية الأقتناء

أمــانــى يقول...

أســتاذنا
ازيك يا أسـتاذنا اخبار حضرتك ايه يااااارب دايمآ حضرتك بخير
ممكن اضحك الاول ههههههههههههههههههه
دا كلام وفى الاخر طلع صعيدى فضحنا وسط الاجانب
اصل احنا شعب معانا فلوس كتير اووووووووى علشان كده الحكومة قررت اخيـرآ هتشيل الدعم
وبما ان الموضوع مسجات وتهانى واعياد
كــل سنة وحضرتك طيب أعاده الله عليك بالخير واليمن والبركات وعلى الامة الاسلامية يااااااااارب آمــــــــين

لماضة يقول...

هههههههه
طيب اقول ايه
بتحصل فى احسن المسدات

عبدٌ من عباد الله يقول...

بتحصل
لكن الجميل عندما تكون من صديق بس هزاره تقيل شويه
و السئ لما تكون من صديق سوء ابتعدت عنه و يحاول معودة العلاقات
سلام
و متقساش تانى
المفروض ان قلبك قلب عصفور و ليس ديناصور

A.SAMIR يقول...

هو تقريبا من هواة الهزار
غاوي هزار
معلش المؤمن دائما مصاب
تحياتي

غير معرف يقول...

السلام عليكم ورحمة الله وبركاته

استاذنا الكبير

فعلا حضرتك اثرت موضوع له عواقب كبيره تخيل حضرتك مثلا ناس منتظرين محادثه تليفونيه مهمة
متعلقه بحياة انسان ويرن التليفون وفجاة يبقى او تبقى حد فاضى عاوز يتعرف
او انسان مريض فى امس الاوقات للراحه
وبرده يرن التليفون وبرده حد عاوز يتسلى

الطامه الكبرى بقى استاذنا

لو زوجه بجوار زوجهاوالتليفون بيرن وتتطلع واحده
عاوزه تتعرف
لك ان تتخيل ما سيؤل اليه الموقف
وياسلام لو حاول ان يسترسل فى الكلام ويستفسر وفين يبداء يقول النمرة غلط
هذا يحدث مرار وتكرار
وهنا يقع مالا تحمد عقباه
ولكن استاذنا عصفور من الرجال الذين يحسمون الامور ويكونو حازمين بالنسبه لهذه المواقف
ويا ليت كثير من الناس مثله

لك احترامى وتقديرى استاذى

ام الابناء

راجيه عفو الله

خمسة فضفضة يقول...

السلام عليكم ورحمة الله وبركاته

هههه
ناس فاضيه وهايفه ، وفيه منهم كتير

الغريبه انه صعيدي ، دا اللي خلاني افكر ان ممكن يكون حد من العيال الصغيرين هو اللي بيعمل كده من غير ما يعرف

----
كل سنة وحضرتك طيب ياباشمهندس والسنه الجايه ان شاء الله نكون صحبه علي عرفات


سلام

رفقة عمر يقول...

كل سنه وحضرتك طيب
بصراحه انا بحب اكلم صحباتى جدااا
فمعلش سماح فى موضوع المكالمات دى

مهندس مسلم يقول...

مش عبده لوحده اللى بيضحك ولا عبده ده مجاز
انا هموت من الضحك

واضح من التعليقات ان الموضوع ده بيحصل كتير

الحمد لله الذي عافانا

مش 018 ده حزب " نحب نتعرف ورانا ايه ورانا ايه"

Jana يقول...

السلام عليكم

عجبنى قوى رد حضرتك عليه:D
أحرجته بذوق

ها يا باشمهندس
العيد جاى والكلام على لحمة بقى
يعنى خلاص مافيش بيتزا الفول ولا فول بالبشاميل!!؟؟
ولا حضرتك حتلاقى صرفة وتخترع فتة بالفول؟؟
:)
كل سنة وحضرتك والعائلة بخير
والسنة الجاية ان شاء الله متجمعين على عرفة

سها يقول...

السلام عليكم
والله موضوع المسجات ده مشكله
طب في الاعياد والمناسبات لازم نهني ونرد
المشكله في الناس اللي على طول تبعت رسائل من العينه اللي جات لحضرتك وكلها قوافي ومالهاش معني
اصحابي في دولة اخرى كانوا مستلمينني كده
وانا مش عارفة ارد
كان احسن عندي انهم يبعتولي رسايل يطمنوني عليهم وعل اخبارهم او يشاركوني في حاجة مهمة
فضلت ماردش لحد ماهما بطلوا
ودلوقت ما بنبعتش رسايل لبعض الا لو فيه حاجة مهمة

شكرا لك

ma_3alina يقول...

إني أحبك في الله

أحمد مصطفى يقول...

لفت نظرى كثيرا

اسم عصفور المدينة

عند معظم اصدقائى المدونين

فقرارت ازروك

وسعدت جدا عندما تصفحت بعض تدويناتك

تحياتى لك وارجو ان نتواصل

أحمد مصطفى

abdul-salam khamis يقول...

عندي موضوع مماثل.. وانت كنت مشاركني فيه بتزويدي بالبرنامج المذكور إللي بيفتح لوحده على المتصل.. بس الموضوع بتاعي مستفز في أوله ومضحك أوسطه ومحزن آخره..
1-مستفز.
لما لوجدت رقما لاأعرفه يرن لي عشرات المرات وكنت قد عاهدت نفسي حتى الان على عدم الاتصال بأي رقم لاأعرفة يرن علي..
2-مضحك.
فلما استشرتك ووضعنا البرنامج المذكور فظل البرنامج يفتح عليه مرات لحد لما خلصت له رصيده مرات على ماأعتقد .
3-محزن.
لما علمت صاحب الرقم قدرا وأنه أخذ رقمي من غيري للتودد لي ولم أعلم برقمه أصلا للأسف الشديد..المحزن في الموضوع أنه رجل بسيط الحال مادياً وأنا أعلم ذلك جيداً.
فأحسست بألم شديد في نفسي وعاهدت الله أن هذه المبالغ دينا علي تسترد بشكل آخر ..
وهذه تجربتي المماثلة والحمد لله أن رقمي غير مميز ليرن لي الناس عمال على بطال .
وجزاكم الله خير وكل عام وأنتم جميعا بخير

الفاتح الجعفري يقول...

استاذنا الكبير
ربنا يبارك فيك
والله الصعايده اتطوروه وبقوا يعاكسوه اهو
علشان عز يعرف ان في تنميه في الصعيد
مره كان عندنا لقاء مع اخوانا وكان عز واخ تاني مشيين فكانوا مش متأكدين من معاد اللقاء بالظبط فعز قال للراجل التاني اتصل وشوف
وطبعا الحكايه دي كارثه امنيه
ممكن تودي الكل في داهيه
الراجل طبعا مكنش واخد باله فاتصل بالراجل يقوله هو معاد كذا الساعه الكام
طبعا الراجل التاني اتفزع وقاله مين معايا حضرتك مين
قاله فلان الفلاني
قاله معرفش حد بالاسم ده وكنسل عليه
يعني الشاهد ان حضرتك خد بالك
سعات بيوصل شويه ارقام لاخونا البعده
يبقوا عيزين يتأكدوا منها او يعرفوا اصحابها
فيتصلوا يعملوا الحركات دي
قبل كده واحد بيتصل بيه علي الموبايل بيقولي انت مين!!!!1
قفلت في وشه طبعا
وربنا يكفيك وينجيك من كل شر
وجزاكم الله خير

منى يقول...

اهنيك يا استاذ عصفور على صبرك وردك الجميل
تحياتى

ض/خالد يقول...

أجدع ناس

ammola يقول...

السلام عليكم
طيب انا بيتبعت لى رصيد من ناس ما اعرفهاش وطبعا مش بارضى على نفسى انى اقبله فاقوم ارجعه على نفس الرقم لغاية ما بقت دى شغلتى وطبعا الموضوع فيه غرامة عليا
انا عايزة فتوى انى ماليش دعوة بعد كده
:)
كل سنة وحضرتك وكل احبائك بالف خير

mohand يقول...

السلام عليكم

ههههههههههههههههههههههه
هههههههههههههههههه
ههههههههههههههههههه
هههههههههههههههههههههههه
ههههههههههههههههههههه
ههههههههههههههههههه


والله ضحكتني قوي قوي قوي

انا بقي مبستحرمش
بفتح وازهق اهله

الحمد لله مش بيجيلي معاكسات بقالي فتره

الرقم بقي قديم بقي

هنعمل ايه


بس الرساله حلوه

ال اتصل نتعرف علي بعض

دا راجل صحيح ......... ولا بلاش

التوأمان يقول...

كل عام وانت بخير

(واذا خاطبهم الجاهلون قالو سالاما) وماشاء الله انا بودي ياسين قالي علي مدونة حضرتك

وهيا فعلا مدونة جميلة اوي.

صاحب المضيفة يقول...

بس حضرتك طلعت جامد في تكوين العلاقات الشخصية

لكن تستحق كده بجدارة

وفعلا ظاهرة كبيرة وتستحق النظر وياريت نشوف لها حل جذري وسريع

دمت بخير

ا بـن عــمــر يقول...

كل الناس عندك بتحجز ان لا استطيع ذلك
***********
اسأل "الله" ان يحبب خير خلقه "فيك" ومن حوض نبيه "يسقيك" وفي جنته "يؤويك" وبرحمته "يحتويك" وبقضائه "يرضيك" وبفضله "يغنيك" ولطاعته "يهديك" ومن عذابه "يحميك" ومن شر حاسد إذا حسد "يكفيك

الراقص مع الذئاب يقول...

السلام عليكم ورحمة الله وبركاته
يا باشمهندس دي اسمها هيافة
ودا سبب حجات كتير اوي بايظة
جزاك الله خيرا علي الموضوع

يوميات عيل مصري يقول...

كل سنة وانت طيب يا عم عصفور
سامحني باكتب وانا لا نايم ولا صاحي

مهندس مصري يقول...

طيب دا أنا حصل لي أنقح من كده في رمضان من 3 سنين فاتت
كنت ماشي أنا و مهندس زميلي بس أكبر مني و يعتبر رئيسي المباشر و راجل كبير و محترم
و كنا بنعمل رفع مساحي لمناسيب مجموعة من الحواري اللي حنمد شبكات مواسير مياه جديدة فيها في مشروع تجديد شبكات مياه مدينة دمنهور
و شايلين جهاز الميزان المساحي و عمالين نلف على رجلنا في الصيام و الشمس وفجأة
زميلي ده يلاقي تليفونه المحمول بيرن بنمرة غريبة من بره مصر و بكود دولة مش معروفة ففتح لقى مين بيعاكس
بسام من رام الله و عايز يتعرف
آه واللهي واد فلسطيني عايز يتعرف على بنات مصريات و بيعاكس دولي على المحمول في نهار رمضان
المهم قفل معاه بأدب لأنه مؤدب و كمان من كبار الإخوة
مفيش خمس دقايق و راح متصل تاني راح مديني الموبايل و أنا كنت تعبان من اللف في الشوارع و الحواري بالجهاز و الصيام عامل عمايله
رحت ماسكه سالخه و أنبته إنه بيدور على إيه في نهار رمضان و القدس أسيرة و المسجد الأقصى مهدد و الإسرائيلين بيهببوا معاهم ايه كل يوم و قلت له إنت في ايه و لا ايه و كبسته و قفلت معاه فما إتصلش تاني
بس بخته حلو إني كنت صايم لأني لو كنت فاطر كنت سمعته شوية شتايم تكفيه بقية عمره لأن الصنف ده هو اللي بيدمر القضية الفلسطينية و ما يستاهلش يكون في الأرض التي بارك الله فيها و حولها
ربنا يا يهديه يا ياخده و ينضف فلسطين منه و من أمثاله

امام الجيل يقول...

الحق الرقابة با فندم العملية مش ناقصة واحنا عايزينك :)
انا حكاية الميسدات دى حصلتلى كتير بس مع رقم غريب ومن بلد غريبة وواحد بيتكلم برضه بلغة غريبة شكلها افريقية كده ويتصل بيا فى كل وقت وعلى فترات وبرضه كل ما ازهق افتح عليه واسيب الموبايل شغال
اكلمه انجليزى مفيش
وكذا مرة بتاع مرتين كلمتنى نمرة برايفت نمبر
قالولى شكلها مخابرات ولا مش عارف ايه
يلا كلنا لها
كل عام وانتم بخير
ابا يحيى
ابا حسان
ابا بنت ابيها
براقبك من زمان انا

islamist bloke يقول...

الموضوع ده حصل لى برضة بالظبط......بس كان الرقم اللى قبل رقمي مباشرة في فودافون........اتصلت بيه......كان شاب اسمه كريم واتعرفنا واتفقنا نتقابل وكدة بس طبعا الحاجات دي مبتحصلش غير فى بلاد الناس الفاضية

فعلا الاسراف ده سخيف جدا

عم عصفور انا عندي خاطرة عايز اقولها

هو لية الواحد معادش عنده تفاعل ايجابي مع الناس فى تدويناتهم ومواضيعهم واصبح كل كلامه موافقة وشكر (لان اغلب الموضوعات انا موافق عليها ومش بقرأ الا الناس اللى برتاح لكلامهم) واينعم هو فيه اعتراضات بس قليلة جدا واصبحت غير مثمر ابدا

اية السبب؟

فراغ؟ خواء؟ عدم اكتراث؟ عايز تحليل صادق ومش هازعل

تحية طيبة

والسلام

نـــــــور يقول...

يااااه .. دا انا لسة في رقم قارفني في عيشتي بجد .. ويرن .. ارد ما يردش
ما أردش .. يرن يرن .. اكنسل يرن تاني
أقفل موبايلي افتح الاقيته متصل مية مرة.. الظاهر انها هواية عند بعض الناس ولا ايه

والله الهادي

وكل سنة وحضرتك طيب ومن ربنا قريب

محمد على يقول...

ياخويا ياعصفور انا نفسى ربنا يحقق امنيه وهيا انى اكون اول واحد بيعلق على البوست بتاعك مواعيد الشغل بتخلينى اخش على النت متاخر ويكون تعليقى الكام واربعين يالا كله خير...اول حاجة انا بشكرك قوى على تمرير التاج ليا وجزاك الله كل الخير وده يبقى اول تاج يتمررلى منذ ان اصبحت واحد من المدونين...التاج ده هيبقى تاريخى بالنسبة ليا..تانى حاجة موضوع التليفونات ده بقى حاجة تزهق ربنا يعافينا...مرة واحد تصل بيا وقالى التليفون اللى معاك ده بتاعى قولتله ده تلفونى ياسيدى الفاضل قالى لا ده تليفونى قولتله طب ايه مواصفات تليفونك قعد يقولى موصفات غريبة وفى الاخر بدأ يقبح قمت شكرته وقفلت السكة فى وشه...
اخويا ياعصفور عايز اتواصل معاك اكتر من خلال الماسنجر انا هبعتلك ايميلى لو حبيت تضيفه
houda_930@hotmail.com>
واخيرا كل عام وانت الى الله اقرب وعلى طاعته ادوم ومن الجنة اقرب...والله ولى التوفيق.

إنـســـانـة يقول...

هههههههههههههههه
لالالا انا مضحكتش خالص .. انا فطست من الضحك بس هههههههههههه

لا بجد الفراغ بيعمل اكتر من كدة والله

معلش يا استاذ عصفور اديك اتسليت حبة والرقابة كمان مزعلتش الحمد لله
:D

صانعة الحرية يقول...

ايه ده ما شاء الله
هو انا اغيب يومين ارجع الاقى موضوع جديد
والكره الارضيه كلها قراته
هو انا اخر من يعلم
يلا خير
اولا اطلب منكم الدعاء لانى مريضه جدا جدا
بموت يعنى هههههههه
رغم انى قلما انى امرض بس يلا خير
اما عن الموضوع فايام زمان قبل الحاج شحيبر ما يتسرق كانت بتحصل معاى كتيييييييير
بس طبعا انا كبنت مينفعش اتصل
ساعات كنت بخلى بابا يتصل على الرقم من تليفونه دا بقى لو اللى بيرن غلس
وساعات كنت بقفل الموبايل خالص
وساعات كنت بحطه جنب الراديوا او الكمبيوتر علشان الذبذبات وافتح عليه
شوفتوا ساعاتى كتير ازاى
كل عام وحضرتك بخير يا استاذنا
ابو يحيى وسلامى لكل افراد العائله نفر نفر
وكل عام وانتم بخيييييير

ابن حـجـر الـعـسـقـلانـى يقول...

يا أستاذ عصفور أنا قرأت موضوعك دة من 24 ساعة تقريبا و كان فيه حوالى 5 تعليقات .. الشغل أخدنى و عملت كام مشوار لقيتنى فى التعليقات الأربعين

أنا مش عارف امتى هاكون أول تعليق

المهم

و الله ضحكتنى يا أستاذنا .. لكن بالفعل زى ما بيقولوا .. هم يضحك

دكتور حر يقول...

أنا عن نفسي
لو وضعوا الشمس في يميني والقمر في يساري عشان اتصل برقم بيرن عليا معرفهوش
ما قعلت

المنوفه جيده في مثل هذه الحالات
وهذا رأي الجمهور
والله أعلم

عصفور المدينة يقول...


دكتور حر

أعانك الله يا محمد

همسة قلم

صحيح بتعملوا الكول تون ليه وتدفعوا فيه فلوس كمان مش ده إهدار
:)
3 جنيه في الشهر
صح
صحيح بتعملوا الكول تون ده إزاي

دعوة الفردوس

أول خمسة بيدفعوا فلوس للحجز

أمير القلوب

شعب أقرع.. ونزهي
انت جبت المفيد يا أميرنا
أحبك الله

دعوة الفردوس

لا هو مش صوت تغريدها
هو الصوت وأشياء أخرى
كل سنة وانت طيبة وفي انتظار تدوينتك عشان نحط بقية مواقفنا عندك

بالله المستعان

كل عام وأنت بخير
وجزاك الله خيرا على هذه الخلاصة
التراكم
التراكم في الإهدار وفي الطاعات كما أشرت أنت وفي الذنوب أيضا

L.G.

ربنا يبارك فيك يا أستاذة ومرحبا بعودتك
وفعلا الإهدار ده شيء سيء جدا
أنا مش غلطان والله انا اتصلت بيه 3 مرات ويفتح علي ويفضل ساكت
لما تلاقيه عمال يتصل الساعة 2 ونصف بالليل ويرجع يبدأ من سبعة سبعة ونص تاني
واطلع انا غلطان أنا اطالبك بتعويض تحولي لي رصيد
:)
ده انا لوحكيت لك تجارب أخرى أسوأ في الموضوع ده والله شعرك يشيب وتطالبي بإلغاء الموبايلات


وضـّاح

نفس المشكلة يا وضاح قل للأستاذة إل جي أصلها بتقول إن انا غلطت

عاشقه الفردوس

منورة الحجز بعد كدة بفلوس تحويل رصيد
طب احمدي ربنا انا ما اعرفش حد بقى غير حضرتك مش بيحصل له الموضوع ده
أكيد رقمك مش مميز


المهـ إلي الله ـاجر

معجبين إيه يا احمد الراجل ده ما عندوش بلوج
:)

جمعاوى روش طحن

بعد كدة أحجز لك بس انت ادفع مقدم

موجة

مرحبا بك أستاذة بس على فكرة
أنا مهندس
Male
مش
Female
أنا عدلت البروفايل عدة
لدرجة حطيت في البروفايل
اسمي محمد
وبعدين صعبان عليكي الراجل وانا ما صعبتش عليك لما يصحيني من النوم كل ربع ساعة

عبدالرحمن ياسين

ماشي يا بيدو أنا حافوت لك الإعلان عشان تشجيع الأشبال

Mohamed A. Ghaffar

زي ما انا متعود ما اردش على تعليقك وأنقله كما هو للفائدة

هناك تداخل حاد بين مفهومى اهمية التقنية واهمية الأقتناء

وأضيف وسور الاستخدام وإهدار الموارد

أمــانــى

الراجل من جنا يعني بحريكم شوية
حمدا لله على سلامتك

لماضة

وأحسن المسجات

عبدٌ من عباد الله

يا بني ارحمني
مخصوم منك 3 أيام
عشان كلمة قلب ديناصور دي
عمال

A.SAMIR

منورنا أستاذنا

Anonymous Anonymous

فعلا إضافتك قيمة
راجية عفو الله
مخاطر عديدة تحيق بحاملي التليفون المحمول من المتزوجين
:)

خمسة فضفضة

لا والله يا دكتورة ده راجل كبير وصوته محشرج كمان
كل عام وأنت بخير

رفقة عمر

ماشي يا أستاذة سماح 30 يوم
بس احذري الإهدار احذري الإهدار
ربنا سبحانه وتعالى حيحاسبنا على هذه النعم


مهندس مسلم

عبده مش اسم مجازي يا هندسة واهو جه وعلق زي مانا توقعت
abdul-salam
أصل هو دايما يلومني إني باوفر في المكالمات وبعدين دلوقت بقى يوفر هو كمان لدرجة إن فاتورته أصبحت أقل من فاتورتي
التلميذ الذي تفوق على أستاذه
بس هو أكبر مني في السن برضه
018 ده حزب
اللي معاه قرش محيره يجيب موبايل ويشحنه
:)

Jana

لا يا أستاذة العيد ده بقى الكبسة بتشتغل
والفتة طبعا كل عام وأنت بخير
لا للفول
وفعلا الراجل ممكن مش كون اتحرج هو ممكن يكون تأكد تمام اليقين إن صاحب التليفون راجل مش واحدة

سها


تعليقك رائع جايزة أحسن تعليق
قولي ليه

لأن تعليقك لمس الهدف الذي كتبت من أجله هذه التدوينة
رسائل القوافي والتي تهدر الكثير من المال في تناقلها بمناسبة ومن غير مناسبة وبعضها يكون على أكثر من رسالللللة

يا جماعة ياريت نقرا تعليق الأستاذة سها

ma_3alina

أحبك الله الذي أحببتني فيه ياهندسة يا مختفي

أحمد مصطفى

نورتنا أستاذ أحمد وربنا يبارك فيك

abdul-salam khamis

عارف يا عبده لو ماكنتش علقت الناس كانت حتقول باكلم نفسي



أكمل الردود لاحقا إن شاء الله......

مؤمنه يقول...

السلام عليكم ورحمة الله وبركاته
وكل سنه وحضرتك طيب
وأدعو حضرتك للمشاركه معنا فى بوست ولماذا قالوا رأى حضرتك يهمنا
والسلام عليكم ورحمة الله وبركاته

الطائر الحزين يقول...

انت تعرف طير حزين غيرى

وبعدين ما احنا كنا فى قنا
ما جلتش ليه كنا عرفنا هو مين وكنا جبناه زيارة معانا يتعرف عليك شخصية بدل المسجات والكلام ده

أبوشنب يقول...

هههههههههههههه

والله انت ظلمت واد عمي بتاع قنا

اوعاك تكون فاكره كان بيعاكس

لا لا لا استغفر الله في سرك

تلاقيه بس بيجرب النمرة الجديدة

او حتى عدة التليفون لسه واصلة البلد وبيحاول يستخدموها ونمرتك لطشت معاهم

عموما انا من اسبوع كان بيكلمني واحد من الهند

وارد عليه

واكلمه انجليزي

ما فيش فايده

هندي

ما فيش فايدة

عربي ما فيش فايدة

وتني وراه لغاية ما خلصت له الكارت والحمد لله

bos bos يقول...

يوة بتحصل كتير قوى

كل سنه وانت طيب

تحياتى لك

عمر بوك ستورز يقول...
أزال أحد مشرفي المدونة هذا التعليق.
bedo يقول...

على رأي اللي بيقولو ا
ربع جنيه على ربع جنيه يعملوا أول مليون

صحيح كلامك والله بس مين يسمع

أنا أسف على التأخير

بس إن شاء الله أخر مرة

وجزاكم الله خيرا

عمر بوك ستورز يقول...
أزال أحد مشرفي المدونة هذا التعليق.
عدى النهار يقول...

كل سنة وإنت طيب ومنور المطرح دايماً
:)

مشكلة مشابهة عندى فى كمية التليفونات الخاصة بالإعلانات من إشتراك فى جريدة لتبرعات لإشتراك فى كريدت كارد وغيره كتير لدرجة إنى فى أحيان كثيرة لا أرفع سماعة التليفون.. مش موبيل

مدونون ضد ابو حصيرة يقول...

شكرا على اشتراككم معنا في حملة مدونون ضد أبو حصيرة .. ونرجو منكم وضع بنر الحملة على موقعكم للأعلان على الحملة ونشرها .. وشكرا

عصفور المدينة يقول...


الفاتح الجعفري

أخونا الحبيب بارك الله فيك
اطمئن علي الله خير حافظا بس الاحتياطات اللي انت ذكرتها جميلة ربنا يكرمك

منى

شكرا لك يا أستاذة وبارك الله فيك

ض/خالد

018؟

ammola

مانت ممكن تحولي الرصيد ناقص التكلفة
يعني كنوع من الغرامة تخصمي جنيه
ما هو المفروض يتحمل خطأه
يعني مثلا جالك 30 جنيه اخصمي 25 جنيه وحولي 5
باهرج طبعا ممكن تخصمي جنيه مثلا

mohand

أنا قلت يا مهند معرفة الناس كنوز بس هو طبعا عايز يتسلة وخلاص


التوأمان

منورين يا شباب

صاحب المضيفة

الحمد لله فعلا أنا قلت أكسبه
الحل الجذري والسريع لهذه المشكلة هو قلة ذات اليد

ا بـن عــمــر

جميلة رسالتك يا بن عمر

الراقص مع الذئاب

فعلا الإهدار منبعه الفراغ
ربنا يعينك يا أستاذ

يوميات عيل مصري

كل عام وانت بخير
بس شكلك ما عرفتش تنام
:)

مهندس مصري

مشاركتك جميلة أوي يا محمد
ده اللي ممكن اسميه
extreme
بتاع الموضوع رمضان ودولي ومش من أي دولة وعايز بنات يعني فعلا
extreme

امام الجيل

عايزين نديك كورس في اللغة السواحيلي

Anonymous islamist bloke

المشكلة يا احمد انه هو بدل ما كان يتعرف عليك فيه قدامه فرصة يتعرف على ناس كثير من حواليه من غير مكالمات
وبعدين ممكن يستفيد من المكالمات دي في صلة الأرحام
بخصوص سؤالك
أولا انت معذور وفترة الجفاف العاطفي دي عادية
ثانيا اقتصارك على المدونات التي توافقها في الرأي وعدم وجود مشاركة مش عيب بالعكس ده بيزيد الاستقرار النفسي بالذات في مرحلة ما تكون عايز هدوء مش بدل ما تدخل مدونات تكون تختلف معاها وتعمل لك تشتت ذهني في هذه الفترة التي أنت تحتاج الاستقرار فيها؟

نـــــــور

فعلا هي ظاهرة ولكنها تقل

محمد على

فيه ناس يا محمد بتستظرف عشان تسجل الكلام ده وتعمله نكتة

إنـســـانـة

بس بفلوس يا أستاذة وبعدين الرقابة عندنا مش حاقولك


صانعة الحرية

شحيبر ده موديل من النوكيا؟
شفاك الله وعافاك يا بنتي

ابن حـجـر الـعـسـقـلانـى

ربنا يبارك فيك انت مركزك متقدم في القلب يا محمد

دكتور حر

يعني انت بتثبت التهمة يعني يا دكتور على المنوفية
بس انت كريم وانت اللي دايما تتصل بي
!!!
مؤمنه
وعليكم السلام ورحمة الله وبركاته
واعذريني يا أستاذة لانطحاني في العمل

الطائر الحزين
انا شكيت فيك أصلا
!!!!
لولا إني عارف إنك مقاطع 018واخواتها
أبوشنب
منور يا أستاذنا
أستغفر الله
بس انت عديت من الهند!!!
طب انا لوكال هنا الحمد لله
bos bos
فعلا انا حصلت لي كثير بس دي أول مرة أدير الموضوع بهدوء كدة

bedo
فعلا يا أخي إهدار الموارد ده مش بيحسوا انه بيمثل ثروة

عدى النهار

كل سنة وانت طيب أستاذ مدحت يا راجل يا ذوق
دايما فاكرنا رغم ما أظنه من انشغالك ربنا يحفظك يارب
لا التليفون الأرضي ده أصعب فعلا الالموبايل له حلول لكن الأرضي فعلا معاناة



عمر بوك ستورز

اعذرني لحذف تعليقاتك الدعائية

MerMaid يقول...

ههههههههههههههههههه

ضحكتني بجد علي الراجل الصعيدي
طيب هو كان عاوز ايه ؟؟؟

مفيش مغزي للموضوع

:)))

عصفور المدينة يقول...

MerMaid
بارك الله فيك والله ليس قصدي سخرية من أحد ولا الموضوع أصلا للتسلية ولكني ذكرت ما حدث والزوار ذكروا أحداث مشابهة والغرض الوصول لفكرتين بسيطتين

البعد عن التكلف في الرسائل
والتنبيه للإهدار في المكالمات شكرا لزيارتك

صانعة الحرية يقول...

شحيبر ده موديل من النوكيا؟
هههههههههههههههههههه

وائل_صح ولا غلط_ يقول...

كل عام وانت بألف خير

rena يقول...

السلام عليكم
كان بيحصثلى كتييييييييير حاجات شبه كدا
بس كنت بدى التليفون لاخواتى وهما يتصرفوا
الموبيل اصبح متاح للجميع
ولكثيييييييير بيسيىء استخدامه للاسف الشديد

عدى النهار يقول...

متابع دايماً إنشاء الله حتى لو لم أكتب تعليق

ياريت ترفع التكلف بيننا.. مش ضرورى أستاذ دى خالص
:)

ŞoŖśậŖấầ يقول...

دا الموضوع منتشر جدا اهو وانا مش واخدة بالى

فى السابق كان بيجيلى رسايل من ناس مجهولة الهوية
بس كانت بتيجى قبل مايبدأ رمضان للتهنئة بقدومه يعنى

وكتييير بقى يكون فى ارقام بترن وماعرفش برضو مين البشر دول بس بطنش

الغلاسة بقى فرقم ماسكنى بقاله كام يوم وصبح وليل بيرن ومش عارفه القطه وافتح عليه
اقول يمكن حد غير نمرته وبيغلس شوية قبل مايقوللى
بس الغلاسة طولت اوى وانا جبت اخرى بصراحة


مش عارفة انا ايه الناس الفاضية دى

وانا بكتب التعليق دلوقت لمحت تعليق همسة قلم وافتكرت برضو موقف زى اللى قالته دا
صحيت الساعة 8 الصبح عالموبايل عمال يرن وقمت مفزوعة
طلع طبعا اخ ظريف شكله من ذوات الدم البارد

انا طولت اوى بس فعلا الموضوع دا فاقع مرارتى

اللى يغيظ انهم بتكون مستوياتهم مش اوى وتلاقيهم بيستلفو وبياخدو من اهلهم عشان يشحنوا

انا بقول يشحنوا دماغهم بحاجة تفيدهم احسن بدل المال السايب اللى هيتسألو عنه

رغاية اوى واجيب صداع انا عارفه اعذرونى

تحياتى لحضرتك

باب البحر يقول...

:)

أضحك الله سنك أخي

و الله أنا مش عارف اشمعنى أنا اللي مش باتعاكس و لا بتطلع النمرة غلط !!!

مع ان الموبايل معايا من تمن سنين و مغيرتش النمرة غير مرة واحدة !!!

د/اجدع بنوته يقول...

هههههههههههههههههههههههههههههههه

انا مره عملت زى عم الصعيدى ده

بس كان معايا رقم قبل كده وسبته واترفع م الخدمه

فكنت كل شويه ارن عليه وملاقيش حاجه

لحد ف يوم ادى جرس وواحده ردت

سلمت عليها وقفلت وخلاص

هههههههههههههههههههههههههههههههههه

شكلى ف عرق صعيدى وانا مش عارفه

نايس يوميه يابابا