الخميس، يوليو 19، 2007

الإيجابية

حوار مع أطفالي على الطعام
مين عارف يعني إيه شخص إيجابي؟ وبعد إجابات متنوعة
طيب مين عارف يعني إيه شخص سلبي؟
يعني بيعمل نفسه مالوش دعوة او مش واخد باله
كويس ...الإيجابية دي حاجة كويسة جدا وخلق جميل لازم المسلم يتخلق بيه السلبية هي لما يكون فيه حاجة المفروض حد يعملها - أي حد - وبعدين كل واحد يتوقع إن فيه حد غيره حيعملها وبالتالي مفيش حد بيعملها

مثلا احنا طالعين على السلم كلنا وفيه واحدة أو واحد منكم المفروض ينور نور السلم....... كل واحد يطلع ويتوقع إن غيره هو اللي ينوره


ماشيين في الشارع والشمس طالعة نور العمود منور وفيه زرار ممكن نطفيه نقول احنا مالنا ماهو فيه ناس وظيفتهم يطفوه


أو العكس الدنيا ضلمت ولمبة العامود طافية ممكن أشغله

جرس الباب يرن كل واحدة فيكم تعمل نفسها مش هنا أو التليفون يرن وماحدش يرد عليه علشان كل واحد مستني الباقيين يشوفوا مين

مثلا فيه حاجة واقعة على الأرض وكلكم بتمروا عليها وتسيبوها وتمشوا وكأن المفروض ماما هي اللي تشيلها


الشخص الإيجابي بيتوقع دايما إن مافيش حد غيره حيعمل الحاجة الخير دي وبالتالي بيسبق ويعملها هو وهو حريص إنه هو اللي ياخذ الثواب

زي الهدهد لما راح جري لسيدنا سليمان وقال له فيه قوم بيعبدوا الشمس كان ممكن يقول "ما هو حيعرف لوحدة" بس عشان الهدهد إيجابي ما انتظرش
طيب ليه الواحد بيشيل الأذى عن الطريق
عشان البلد تبقى نظيفة
الرسول عليه الصلاة والسلام بيقول الإيمان بضع وسبعون أو بضع وستون شعبة فأعلاها قول لا إله إلا اله وأدناها (يعني أقلها) إماطة الأذى عن الطريق (يعني إن احنا نشيل الحاجة اللي ممكن تؤذي الناس من الطريق) يعني الإيمان أجزاء كل ما تعملي حاجة زيادة تبقى حققتي جزء أكثر من الإيمان ويزيد إيمانك يعني الشخص الإيجابي إيمانه بيزيد وما بينتظرش غيره عشان هو نفسه يسبق غيره ويكون عنده إيمان أكثر
بابا ...طيب أنا كنت بانصح صاحبتي وهي قالت لي مالكيش دعوة أنا عاجبني كدة


سيدنا لقمان عليه الصلاة والسلام نصح ابنه قال له إييه ؟

يا بني أقم الصلاة وأمر بالمعروف وانه عن المنكر واصبر على ما أصابك إن ذلك من عزم الأمور

ليه قال له واصبر على ما أصابك ؟
عشان أي حد يأمر بالمعروف أو ينهى عن المنكرلازم يصيبه أذى ولازم يكون مجهز نفسه إنه يصبر على الأذى ده


وكمان الرسول عليه الصلاة والسلام ورقة بن نوفل قال له إن قومه (قريش يعني) حيخرجوه من مكة قبل ما يبدا دعوة أصلا طيب عرف إزاي ؟
والرسول عليه الصلاة والسلام قال له "أومخرجي هم؟" يعني حيخرجوني من مكة؟
قال له ورقة : لم يأت أحد بمثل ما أتيت به إلا عودي وأخرج
يعني أي نبي أوذي يبقى الواحد لازم يجهز نفسه إنه يتحمل الأذى

الآن الحمد لله أصعد وهم ينيرون السلم
............

هناك 36 تعليقًا:

ftataljanna يقول...

السلام عليكم ورحمة الله وبركاته

تصدق يا باشمهندس كنت بفكر لما يبقى عندى اولاد ان شاء الله هاتكلم معاهم فى الدين ازاى طريقة حضرتك جميلة

وبشرى طيبه ان ان شاء الله الجيل الجاى احسن

بس اهم حاجة فى الموضوع انك ارتحت من تشغيل النور:)

دى علامة على استجابتهم جيدة جدا

ربنا يبارك لك فيهم يا رب ويجعلهم قرة اعين لك ولامهم وللامة كلها اللهم آمين

عــلا يقول...

كعادتك يا باش مهندس.. تدويناتك في الصميم.

اللهم اجعلنا مممن يصبروا على الأذى في سبيلك يا رب.

أمــانــى يقول...

أســــــــــتاذنا
بسم الله مشاء الله
ربنا يزيدك يااااااااااارب آمـــــــين ويوفقك لما يحب ويرضى يااااااااارب آمـــــين ويباركلك فى اهل بيتك واولادك يااااااااااااارب آمــــــــــــين
لازم الواحد يعلم اولاده ازى يكون ايجابى فى كل شئ وازاى يطبق تعاليم دينه صح لان دينا بيقول الايجابية وينكر علينا السلبية واللامبالاة
تحيــاتى لحضرتك
وجــزاك الله خـــيرآ ياااااااارب آمـــــــــــين ويجعل التدوينة فى ميزان حسناتك يااااااارب آمـــــــــــين

Maha يقول...

سلمت لهم وبارك الله فيهم

الإيجابية من الصفات الهامة والتي تضيف للإنسان الكثير

رب يجعل المسلمين من الإيجابيين

Jana يقول...

بسم الله ما شاء الله ولا قوة الا بالله
ايجابية اطفال حضرتك ظهرت فى حوارهم واشعلت نور المستقبل امامهم...قبل ان تظهر فى اشعال نور السلم

بارك الله فيهم..وحفظهم
وهب لك من زوجك وذريتك قرة أعين

سابدأ بفتح هذا الموضوع مع اولادى
علهم يبدأون باشعال نور الطرقة

تحياتى ..الايجابية

مصراوي أوي يقول...

السلام عليكم ازيك يا استاذ عصفور

اولا جزاكم الله خيرا ودعواتك لي دائما بالله عليك


كالعادة اسلوب جميل حتي مع اطفالك ربنا يعز بيهم الاسلام

islamist bloke يقول...

ربنا يبارك لك فيهم ويكتب لك عنهم كل خير فى صحيفة حسناتك

ويارب كل الاباء يكونوا زي حضرتك أو زي القدوة العامة لنا جميعا

والسلام

صاحب البوابــة يقول...

اعتذر عن التحليق خارج السرب

لكنني أريد رأيكم للأهمية في آخر موضوع لي

بعنوان

شكــر وإعتــذار

تحياتي

الديب يقول...

بورك كيبوردك

:)

كرم مسلم يقول...

السلام عليكم

اسلوب حضرتك فى الحوار جيد خصوصا مع الأولاد
جزاك الله خيرا

ربنا يبارك لك فيهم ويجعلهم من الأئمة الأعلام
آمين

ma_3alina يقول...

كل ده يا باشمهندس عشان نور السلم ..

طيب ما كنت حضرتك عملت زي كل الأباء وقلت لهم بطريقة مباشرة شغلوا نور السلم واللي مش تسمع الكلام يبقى مفيش مصروف ويمكن ضرب كمان .. فالولد والبنت يطلعوا يكرهوا حياتهم ومتعقدين في عيشتهم ..

:D

خلتني يا باشمهندس افكر في موضوع بوست عن التربية .. ربنا يسهل واكتبه

في موضوع الإيجابية .. يقال أن أحد الأمراء أعد أناء ضخم وأمر أهل البلد إن كل واحد يضع ليلاً في هذا الإناء كوب لبن .. وفي الصباح وجد الأمير أن الإناء قد امتلأ عن آخره بالماء ..

مناجاة يقول...

احنا كمان الكبار محتاجين ننمى الصفة دى اكتر واولادنا يشوفوها بطريقة عملية لأن الطرق الغير مباشرة بتنفع معاهم جدا
ربنا يعيننا على تربية أولادنا
الحقيقة الواحد طول النهار يتكلم فى ايجابية وسلبية وفى صدق وكذب وفى وفاء وخيانة كل حاجة بنتكلم فيها
الحمد لله الفطرة السليمة موجودة ولابد من استثمارها
ولابد كمان شرح المتناقضات اللى بيشوفوها حواليهم علشان مايحسوش بالغربة من بدرى اوى

بمناسبة التربية
عاوزين تدوينة عن الأسئلة المباغتة اللى بنتعرضلها من اولادنا ونقع فى حيص بيص لغاية مانرد باجابة مقنعة
مثال مثلا ابنى بيقولى ليه ياماما انا اكون حريص انى اروح المسجد قبل تكبيرة الاحرام علشان اكون فى الصف الأول ويجى راجل بعدى يشدنى جامد ويقولى يلا يابنى ارجع ورا؟هل ينفع اقوله انا ياعمو جيت قبل حضرتك؟

سكتم بكتم يقول...

أستاذ عصفور المدينة

جوزني بنتك

مش حنلاقي تربية بالمنظر ده ربنا يكرمك

وفكر في الموضوع وحستناها لو حتي عشرين سنة

Bella يقول...

طريقة ممتازة جدا وتربوية سليمة لتعليم الابناء السلوكيات الحميدة وابعادهم عن السلوكيات السلبية

وفي نفس الوقت تعويدهم على النقاش والأخذ والرد

افضل طريقة في التربية هي النقاش وعدم الحجر على سؤال الطفل او منعه من التعبير عن رايه

احييك على هذه الطريقة السليمة في تربيتهم
بارك الله لك فيهم ويارب تحقق بهم مالم تحقق لنفسك

تحياتي

الطائر الحزين يقول...

اعتقد أنك اردت تعدى نور السلم
انهم ينيرون لك الحياه و وانت تغرس فيهم ما تريد ان تجنى منهم غدا

افحسب الناس ان يتركوا ان يقولوا امنا وهو لا يفتنون

بارك الله فيك
دعواتك

طـعـمـة يقول...

فكرتني يا باشمهندس ببنت أختي :)
هي عندها 7 سنين دلوقتي
وبنحاول نعودها من دلوقتي على تقبل أمر الحجاب
وإن إللي بتتحجب ربنا بيحبها وبيدخلها الجنة

تخيل بقى لما تبقى معانا وسط ناس كتيرة نعرفهم أو ما نعرفهمش
وتلاقي واحدة مش محجبة
وفجأة ووسط الزحام ده تلاقي صوت مسرسع طلع بكل قوة ويقول :
خالتوووو ... الست دي وحشة علشان مش لابسة الحجاب
:)


بارك الله فيك أخي الكريم
وبارك لك في أبنائك
اللهم آمين

Caaaaat يقول...

ماشاء الله

:)

امام الجيل يقول...

تعرف جميل اوى ان يكون فيه اب ملتزم وفاهم ويعرف ازاى يربى اولاده صح يعنى اولادك اذا استمريت معاهم كده عمرهم ما هيطلعوا سلبيين ودى حاجة مش بسيطة ابدا وهكذا كل خلق بجد انا برضه بقول اذا ربنا رزقنى هاربى اولادى ازاى وهاغرس فيهم كل الخلق والاداب ازاى
اكرمك البارى

mo'men mohamed يقول...

طب الحمد لله ان الحوار جاب فايده
اصل حتة انك تطلع السلم وهو ضلمة دى مشكلة


انت عارف اخى عصفور
انت المقال ده أشعل بداخلى شعلة شوق لأمور فى نفسى اخجل ان ابوح بها ولكنها لابد منها
على العموم
اتمنى انى فى يوم أقدر أعمل اللى حضرتك بتعمله ده
وجزاك الله كل خير
السلام عليكم

عصفور المدينة يقول...

ftataljanna
أختي ربنا يرزقك ويستعملك في التربية الإيمانية
أهم حاجة إنك ش تعتبري انهم صغيرين مش قادرين على فهم الكليات
لا في الحقيقة هم قادرون بس احنا اللي بنصغرهم ونعيشهم طفولة ممتدة
أنا مش بس استريحت من تشغيل النور دي حاجات كثير غير انهم لما قروا البوست كمان ثبتت الفكرة
==========
عــلا
جزاك الله خيرا وآمين على دعائك
========
أمــانــى
========
جزاك الله خيرا أنا باحس انك بتفكريني بوالدتي مش في السن لا في كثرة الدعوات الجميلة
===========
Maha

آمين وجزاك الله خيرا
=======
Jana
جزاك الله خيرا وشدي حيلك معاهم
انت أول مستفيدةمن صلاحهم في الدنيا والآخرة
=========
مصراوي أوي
شفاك الله وعافاك وأصلح دينك ودنياك وأقر عينك في الدنيا والآخرة
=======
islamist bloke

جزاك الله خيرا يابوحميد فين بوستاتك
========
صاحب البوابــة
تحليقك مقبول ياسيدي بس كنا نتوقع تعليق ولو مجاملة حتى
=======
الديب
والله انت عسل
=========
كرم مسلم

والله احنا شغالين حوارات على طول
جزاك الله خيرا
========
ma_3alina
كان ممكن نأجر واحد ينور السلم
فيه ساعات بنلجأ للتهديد والوعيد برضه حسب الجدول الزمني
أما موضوع اللبن دي إيجابية مغشوشة
إيجابية بس معاهاش أمانة
=========
مناجاة
دكتورة حضرتك لمست نقطة مهمة كنت ناوي أتكلم عنها وسأفعل إن شاء الله
وهي موضوع شرح التناقضات ده
وهو نفسه الرد على سؤال حضرتك بخصوص موضوع المسجد
فعلا ألجأ لشرح الواقع واوعيهم أن الصح كذا مع وجود كذا وكذا وكافة الاعتبارات
يعني مثلا باقولهم في موقف زي كدة
هو الصح إن الشخص يصلي في الصف اللي يلحقه وعمو ده غلطان بس عشان هو عمو لازم نحترم سنه وممكن هو مش عارف
وكافة التفاصيل أتكلم فيها بانفتاح وربنا يكرم
لا ده الأدهى من ذلك أنني أكلمهم في السياسة بانفتاح عشان ما يتصدموش
============
سكتم بكتم
حبيبي والله يا حاتم
:)
الكبيرة لسة 12 سنة
=========
Bella
بارك الله فيك
أحسنت
فعلا الحوار وأيضا الكلام على الأصول بدلا من استهلاك الطاقة في التفاصيل
=========
الطائر الحزين
جزاك الله خيرا انت عارف انا باتفقع أد إيه من السلبية
=========
طـعـمـة
بارك الله لكم فيها
ومن ضمن التربية التي أسلكها أني أنبههم عدم الوقوع في مثل هذا الخطا المذكور شوفي ردي على دكتورة مناجاة
=========
Caaaaat
بارك الله فيك
=========
امام الجيل
التربية محتاجة دراسة وخطط وتفكير وإدارة ومحاولات متنوعة للوصول للهدف وانشغال يعني مش تكبير دماغ
===========
mo'men mohamed
والله يا مؤمن يا خويا أنا مابخافش من الضلمة بالعكس باتحرك في الضلمة عادي وهم اللي بيخافوا ومع ذلك أحيانا الكسل بيخلي الناس تبقى سلبية تجاه نفسها
وربنا يارب يرزقك ويزوجك ويعينك على التربيةالصالحة ونفرح بيك ياسيدي
وتخلف صبيان وبنات وتعيش في تبات ونبات

محمد الجرايحى يقول...

أخى الفاضل الكريم : عصفور المدينة
السلام عليكم ورحمة الله وبركاته

طرح أكثر من رائع
لم يتعلم منه أولادك فقط بل وتعلمنا نحو أيضاً كيف يكون الحوار البناء والتعليم وبأسلوب غير مباشر

بارك الله فيك وأعزك

أخوك
محمد

المصباح المنير
منارة للكلمة الراقية والفكرة الناضجة والمعلومة الهادفة
هنا
http://mmm2000.ahlamontada.com/index.htm

فى القلب يقول...

الله
لقد انرت طريقنا نحن
لقد تعلمت كيف أعلم الاخر
معنى الاجابيه
بكل سلاسه وبدون أنهيارات عصبيه
مااجمله من كلام
ربنا يباركلك

بهلوله يقول...

والله يا عصفور يا خويا انا اموت قوى فى الايجابيه اللى انتا بتقول عليها
بس اهم حاجه حد غيرى يطفى النور او يفتح الباب
انا هاعزم بهلول عندك علشان يبقى ايجابى
بس اوعى تقفل عليه المدونه وتروح بيتكم......علشان ساعات بيسبنا من غير مصاريف

عازف الناى يقول...

والله بجد انا بحييك على موضوعاتك
والايجابيه من اهم صفات المجتمع المتكامل
ومن اهم صفات التحضر
بارك الله لنا فيك

المهــ إلي الله ــاجر يقول...

ولا عجب ولا غرابة أن تستطيع تربية أطفالك الصغار بهذا الشكل المثير للإعجاب .. فلقد قدرت بمنتهي البساطة ان تربي فينا نحن الكبار معاني طيبة جداً بأسلوبك الهاديء البسيط السلس

جزاك الله خيرا

loumi يقول...

العزيز عصفور المدينه
جميل ان نعلم اولادنا كل ما هو ايجابي
والاهم فعلا ان نعلمهم عدم اليأس والمثابره على فعل الخيروتحمل الاذى من الغير
بس ازاى حنقدرنحميهم من غدر الناس اللى بره البيوت فى الشارع والمدرسه والعمل فيما بعد؟
----------------------------------
كل اللى انت عملته ده عشان ترتاح من تنوير نورالسلم وانت طالع؟
:):):)
تحياتى للاسره الكريمه

شهاب الأزهر يقول...

رائع.. أسلوب متميز في الشرح والاسترسال، بارك الله فيك وفيهم وأنبتهم نباتا حسنا

اسلام رفاعى يقول...

فعلا قيمة مفتقدينها اوى اليومين دول لان السلبية دلوقتى بقت فى كل حتة وفى كل مكان
.................
سعيد بزيارة مدونتك واتمنى انك تشرفنى فى مدونتى

BinO يقول...

بارك الله فيك أبانا عصفور
حنتعلم منك تربية
:)
جزاكم الله خيراً
وباك في زريتك

الصارم الحاسم يقول...

كله ده عشان ينوروا هما السلم

(:

الصارم الحاسم يقول...

مشفتش تعليق ما علينا قبل ما اعلق

صاحبي وحبيبي وكفاءة

(:

رفقه عمر يقول...

بصراحه انا تعلمت زى ما بنت حضرتك اتعلمت
جزاك الله خيرا الدرس دة كان ليا بجد
ربنا يكرمك ويبارك لك فى اولادك وينفع بهم الامه اللهم امين يارب العالمين

عصفور المدينة يقول...

محمد الجرايحى
جزاكم الله خيرا أنتم أساتذتي وقدوتي
ولقد سجلت في الموقع وإن شاء الله أتفاعل
======
فى القلب
مرحبا بك وجزاك الله خيرا
أحيانا لازم العين الحمراء أيضا
======
بهلوله
ابعتي لي بس أستاذ بهلول وأنا أظبطه
وكله إلا الفلوس
======
عازف الناى
أصبت أخي من صفات التحضر وجزاك الله خيرا على مداومة الزيارة
======
المهــ إلي الله ــاجر
جزاكم الله خيرا
مدح مبالغ فيه وأنتم أهل الإحسان
كما نحسبكم
=====
loumi
أختي الكريمة المواضيع يمكن تجزئتها وأهم شيء أن يكون الإنسان عنده هم التربية
وتربية الشخصية المتكاملة القوية التي تكون ضد الصدمات
======
شهاب الأزهر
جزاك الله خيرا
======
اسلام رفاعى
المشكلة أن كثير من الناس إيجابي فيما يخص مصلحة نفسه فقط
وتجده سلبيا تجاه الآخرين والأمة
======
BinO
حبيبي يا يا(الأحبة) بينو أحسن الله إليك أنت عند الأساتذة وتقولي كدة
======
الصارم الحاسم
اللي يتعود الحاجات البسيطة دي وإنه يبادر بعدين حيكون إيجابي
ويعلق في المدونات على طول
:)
======
رفقه عمر
جزالك الله خيرا وكلكم أولادي
منورانا
:)

غير معرف يقول...

جزاك الله خيرا يا ابى فقد علمتنا درسا لن ننساه ابدافي حياتنا لان الايجابية شطر من الايمان
السلام عليكم ورحمة الله وبركاته

غير معرف يقول...

الابنة الثالثة للشيخ عصفوربارك الله فيك يا ابي لقد علمتنا درس مفيد ولكن ابي ذكر موقف واحد وانا ساذكر شيئا اخر وهو عن المروحة لان ابي ينصحنا باطفاء المروحة كلما خرجنا من الغرفة وارجو لكم الاستفادة من هذا الموضوع
السلام عليكم ورحمةالله وبركاته

عصفور المدينة يقول...

أخي الحبيب صاحب البوابة
بداية سألخص ملخص إحساسي هو

وعدتنا فأنجزنا ما وعدت

وأؤكد على دعوتي للأخوة على الانخراط في التدوين والإصلاح بدلا من الانخراط في التحابيش التي حول التدوين من قبيل سأغيب عنكم
عدت إليكم
سامحوني اعذروني
وقد كتبت هذا الكلام في تدوينتي هذا الاسبوع بعنوان
أرجوكم اسمعوني
وقد لاحظت أن حضرتك مررت على مدونات كثيرة محلقا خارج السرب وهذا السرب كان يقدم مشاكل وأيضا معها حلول
وضربت الذكر صفحا عن كلمة مشاركة في ذلك السرب
أو النظر بعين الاعتبار لما كتبه ذلك الجمع الكبير والحافل بالمشاكل والحلول والفوائد
أنا لا ألومك على دعوتك لقراءة تدوينتك تلك ومتابعة التغير الذي تنوي إدخاله على مسار مدونتك وقد رأيت بعض الإخوان طرحوا كلمة من الدكتور الزعفراني وهي نافعة جدا وفيها نصائح عملية
فمرحبا بالتغيير عمليا
وياريت نقلل من الوعود الانتخابية
وأيضا أقول ياريت نقرأ تدوينات الآخرين بنفس العين التي نريدهم أن يقرؤوا تدويناتنا
نحن نسيج واحد متجانس ليس هناك مسرح يعلوه أحد وجمهور نحن كلنا غي اجتماع مغلق دائم بهدف الإصلاح
أيدك الله