الأحد، يونيو 03، 2007

تاج 0002

التاجين دول من السيد نفسه يبقى مسلم بجد
وأنا أساسا ما كنتش ناوي أبعت تاجات لحد بس حارد المقلب للاتنين اللي دبسوني في التاج اللي فات بس مش حد تاني

انت مين

عصفور المدينة.....عصفور زي كل العصافير الرمادي الأحرار المتوكلين على الله ..أنظر يمين المدونة تعرف واقرأ لك خمس ست تدوينات حتعرفني ...إنسان معقد شوية .....أحمل كثيرا من المتناقضات..هي دي ميزتي وهي نفسها عيبي .....مسلي جدا .....بس متعب في التعامل عشان ردود أفعالي أحيانا بتكون زيادة عن حجم الفعل بس كثرا أرجع للحق

وسر التسمية أنني أقول أنني راجل ابن بلد مش من المترفين يعني مش عصفور زينة يعني بعبارة تانية "عصفور الشوارع
مين أكتر ست أشخاص بتحبهم

أحياء

1-أمي

2-ابنتي الكبرى

3-باقي الأولاد

كدة كام ? كان فيه غلطة في العدد هنا!!

4- زوجتي (وهي عارفة كدة زي ما هي عارفة إني معلم أولادي يحبوا ماما أكثر من بابا)

5- أخوتي (وكدة العداد ضرب)
6- المكان ده فيه كثيرمتساويين على رأسهم مديري...ششششششش..بجد والله..لوفيه حد عارف غير كدة يكدبني

انت سعيد

أحيانا ....وأحيانا....بيقولوا الرجل يسعد بالإنجازات فطول ما فيه إنجازات أنا سعيد ...من غير إنجازات بابقى ساعات حسن وساعات جميل ودائما عبد الله

لو اجتمعت أنا وحسني مبارك في غرفة واحدة

انا وانت وحسني مبارك والجميع محبوسين في أوضة واحدة هي سجن المؤمن وجنة الكافر
لو معاك مليون و نص جنيه تعمل بيهم ايه

وانت عرفت منين انهم مش معايا؟... عادي زي كل يوم عادي.. س سؤال هي نص عايدة على جنيه ولا على المليون عشان بتفرق معاي المبالغ دي شوية ... وبعدين أنا بعد ما أعد ثلاثين جنيه باتلخبط ..على فكرة أوعى تكون فاكرني ما جاوبتش أنا جاوبت والله عادي فعلا مش حاسس حتفرق كثير
بتحب مصر؟

بحبها.....بس يعني إيه مصر....هل هي أماكن وناس وحكومة ....ولا أماكن بس....لو بتتكلم ع الناس أنا باحب ناس كثير مش مصريين ولو بتتكلم عن الأرض فيه أراضي بحبها أكثر ...لو بتتكلم عن حاجة تانية أنا بحب عمر بن الخطاب
بتحب البنات؟
أيوة.. عندي منهم ثلاثة
انت مسلم؟
نعم اللي هي أيوة

ليه؟

أولا ربنا أنعم علي أن ولدت مسلما بفضل الله وعرفت المسجد من سن أربع سنوات وعرفت طريق الطاعة وأحببت القرآن وحديث النبي صلى الله عليه وسلم ..ثم عرفت طريق الضلالة الفكرية وتشتت قلبي في البوادي وأحببت وأعجبت بكل كافر وعرفت عذاب البعد عن الله وتعاسة اللاهدف.

ثم أخذ ربي بناصيتي إليه وعرفت لذة الطاعة وعرفت بعض من حققوا حسن الاتباع والإحسان فأحببت الإسلام وأبغضت الكافرين وعرفت نعيم المسلمين ومصير الكافرين ثم عرفت ربي بصفاته ونعمه فأسلمت له.

تاج 2
مين أكتر شخصية متقدرش تستغنى عنها في حياتك

كثير..لو بتتكلم عن الاستغناء الاختياري....ولكن إذا قضى الله أمرا فليس منا إلا الرضا بقضائه....يوم ما والدي توفي كنت حاسس إني عيل صغير رغم إني كنت متزوج ومخلف... ورغم إنه علمني أكون راجل من سن صغير بل ومستشار له لكن إحساسك بوجود مستشار أمين لك مشفق عليك يملك أن يجبرك على الصواب إذا رآك تجانبه وفقدانه فجأة شعور مؤلم.....أولادي فيهم صفات كثير مني فأحس انهم جزء مني..كما قال النبي صلى الله عليه وسلم إن فاطمة بضعة مني يريني ما يريبها ويؤذيني ما آذاها

بس تعال نتكلم في معنى كلمة متقدرش....يعني هل الحياة تتوقف ...الحياة لا تتوقف...والكلام ده في الأفلام بس لكن دائما تستمر الحياة وتستمر العبودية لله
و ليه؟
أنظر أعلاه
ايه أكتر موقف محرج تعرضت ليه

هو شخصيتي أساسا ماسكة نفسها شوية ممكن أستحي أو اتجنب أدخل مواقف...لكن لو كنت في الموقف باتكيف وأتعامل بفضل الله وفيه قاعدة بتقول ما من شر إلا ووقوعه شر من انتظاره


من زمان شويتين مديري في أحد الأماكن أرسل لي السكرتيرة قلت لها روحي قولي له مش جاي ..مشغول...بعتها تاني وتالت..أنا صممت..قامت راحت قالت له بيقولك مش جاي شفت الندالة....جالي قال لي تعال معي..وهو جه لقاني قاعد باهزر مش مشغول ولاحاجة..

و اتصرفت ازاى
قال لي قدامي على مكتبي .... الميزة بقة إني كنت ماشي قدامه

بابعت لك ليه مش بتيجي ؟....قلت له مشغول...قال لي تعال ورحنا للمدير الأعلى قال له معلهش...وقال لي ما تعملش كدة تاني.....أهو زي مديرك برضه أصله كان بيحبني واللي بالي بالك كان بيكرهني عشان........

والحقيقة المواقف الصعبة المحرجة كثير بس بتعدي

مرة كنت في السعودية وولد وأخوه بيشتروا آيس كريم فعمال الصغير يقول للكبير ويش هذا وهو يخبط أي حاجة وبعدين قاله وين الفستق فأنا تطوعت وشاورت له على الفستق فنظر لي في وجهي بكل حدة وقال لي ويش دخلك انت؟

الحقيقة كان معاه حق.....ولا زلت أذكر الموقف... بس أنا زعلان منه جدا :)
ايه الأمنية اللى بتدعى دايما ربنا انه يحققها ليك
توفني مسلما وألحقني بالصالحين

و اتحققت ولا لسة

جاوب انت

هناك 20 تعليقًا:

islamist bloke يقول...

اجابات جميلة ومنها 3 عبقرية

بس نسيت فى الاخر تقول تمررهم لمين

عصفور المدينة يقول...

يابلوك أنا مررته لاتنين بس هم عارفين نفسهم في الأول
وبعدين مش تقول لي إيه هم التلاتة عشان أعرف من اللي غاششهم ولا حاللهم بمجهودي

رينـــــــــــا يقول...

السلام عليكم

ماشاء الله تاجين مرة واحدة:D
هو حضرتك كنت بتحوشهم والا ايه :D

ربنا يخليلك كل اللى بتحبهم يارب
ويرزقك بما تتمنى
ومش تزعل من الولد الصغنون لسه صغير:)

وكالعادة اجابات تفور منها الحكمه والعقل
ربنا يحمى حضرتك

Just a Reader يقول...

إجابات حكيمة جدا ما شاء الله
- "من غير إنجازات بابقى ساعات حسن وساعات جميل ودائما عبد الله"
جملة رائعة ....دمت عبدا لله راضي بقضاءه
- فرحت بجملة أحب الأشخاص لك ابنتك الكبرى وبعدين باقي الأولاد :))...غالبا كل الآباء كده فرحت ليه بقى ...لأني الكبرى :)
أدام الله عليك حبك لأهلك
- الولد الصغير ده تحفة دايما الأطفال كده تعك الدنيا.
تحياتي

abdo يقول...

الأجابات جميلة ما شاء الله
وبما انى أعرفك جيدا
فمتوقع هذه الأجابات من حضرتك بس أحلى حاجة التركيز على اللغة فى حتة النص دى هو عائد على الجنيه ولا المليون

رفقه عمر يقول...

باشمهندس عصفور المدينه اى حاجه من حضرتك اكيد ااقبلها من غير تفكير طبعا وفى موضوع الفستق دة احيانا االانسان بنفعل لموقف ومن غير ما يشعر ويتفاجأ انه كان المفروض مش يعمل كدة اجاباتك جميله جدا وبتقول على حضرتك انك عجوز امال احنا بقى نبقى ايه بس على فكرة اى تاج يوصلنى بعد كدة كن مستعد للاجابه عليه ان شاء الله علشان تكمل الالف

مصراوي أوي يقول...

حلوة اوي ان العيال كتير ما شاء الله

ربنا يحفظهملك وعقبالنا يارب


طبعا اجابات جميلة كالمعتادددددددددددد

نسرين - أمة الله يقول...

السلام عليكم
كلامك دايما بيفرحنى وبيحسسنى ان كده فعلا مفروض يكون المسلمين
ردودك فعلا متزهقش يعنى تحب تقرأها انت ويتضحك ربنا يزيدك ويكرمك خير ان شاء الله ويخليلك اللى بتحبهم ويفرحك بهم على طول ويخليك ليهم
وبعدين احنا حناخد على كلام العيال

ma_3alina يقول...

ههههه .. عجبني أوي موقف مشغول بتاع المدير .. بجد موقف جامد
باتخيله واتخيل المدير .. مش ممكن

ساعات بعمل كده برضه بس على خفيف خالص .. مش كده أبدا

بنتعلم من حضرتك يا باشمهندس

Mohamed A. Ghaffar يقول...

تاج لطيف اوى وربنا يخليلك بناتك

bastokka طهقانة يقول...

ربنا يحسن خاتمتنا جميعا و يكفينا شر التاجات

متحرمش منك ابدا

أمــانــى يقول...

ليه بس كده يـا أســتاذنا
يادوب انا خلصت من واحد يجيلى اتنين مرة واحدة أهئ أهئ
يلا مش مشكلة كله من أســـتاذنا وطلباتك اوامر يا أســـتاذنا
تصدق حضرتك انا الاطفال بأخاف اقولهم حاجة لو انا فى الطريق او جم عندى لانهم طبعا بيتعاملوا بالفطرة والكسفة بتكون محرجة للغاية
ربنا يــبارلك فى اولادك يــاااااااارب آمـــــــــــين واهل بيتك يــــاااااااااارب آمــــــــــين
وربنا يجعل كلامنا خفيف على المديرين ههههههههههههههههههه

حائر في دنيا الله يقول...

اللهم توفنا مسلمين والحقنا في الصالحين
وأمتنا على ملة الإسلام غير منافقين ولا ظالمين

آمين يارب

shab masry يقول...

من الحاجات الي ضحكتنى بجد... وايش دخلك انت؟؟؟

صحيح ايش دخلك انت؟؟:P:P:P:P:P

ربنا يا رب يكرمك ويعزك ويحفظلك اولادك وينشئهم على طاعة الله عزوجل وعز الاسلام

امام الجيل يقول...

تاجين يلا بقى العملية مشيت معاك الحمد لله اهو ماشاء الله شخصية تحولت من البعد لله وافكار ضالة الى الرجوع لله والهداية كان نفسى اعرف تفاصيل يعنى ايه الافكار اللى كانت فد دماغك ساعتها

sherif alashery يقول...

موضوع جميل جدا جدا جدا , انا قرأته حتي الان 3 مرات وان شاء الله ناوي اقراه تاني اكتر من مرة , واحسن نفطة في هذا الموضوع (بصراحة محتارة اختارة احسن نقطة لان كل النقاط جميل جدا جدا ) ولكن اقول افضل رد فيهم الامنية

sakayar&romio يقول...

عصفور المدينة باشا
واحشني كتيييير معلش والله انا متابعك لكن مش كتير بلاقي وقت أكتب علشان ألحق اقرا شعب المدونين... اجاباتك هايلة وربنا يكرمك ويعزك

علاء يقول...

ربنا يوفقك يا عصفور و ييسرلك أمورك
و يثبتك على دينك

Maha يقول...

أتفق مع أخونا إسلاميست في التعبير :

اجابات جميلة ومنها 3 عبقرية

ما شاء الله :)

Ma-3lina يقول...

ماشاء الله تلت بنات ربنا يكرمهم و يحفظهم ان شاء الله

عجبنى اجابة حضرتك على سؤال من انت؟؟