الأربعاء، يوليو 11، 2007

صورة - وصورة


ليه لما باشيل اللاب توب في الشنطة اللي على الظهر باتعرض للتفتيش أكثر؟ وخاصة وانا داخل البنك هل الشنطة دي مجهزة لحمل القنابل أكثر من التانية وهل الناس اللي بيعملوا تفجيرات لما بيروحوا يفجروا مكان بيكونوا حاطين إعلان انهم رايحين يفجروه.

ملحوظة :سألني حارس بوابة المرور الشنطة دي فيها إيه ؟ قلت: فيها قنبلة قال :آه مانا باقول كدة برضة!!!
طيب سؤال تاني :هل لما باشيل الشنطة اللي على الظهر باصغر في السن ولا حاجة



صورة السلة المفتوحة: علاقتي بيها قديمة جدا عشرات السنين يعني.... وأنا أمر في الشوارع منذ صغري كلما وجدت سلة من هذه أقوم بغلقها هي مصممة تفتح من أسفل لتسهيل تفريغها وطبعا لا يقوم من يفرغها بغلقها وأقوم أثناء المشي بغلقها ..ياكش تعمر

صورة السلة المغلقة: جديدة قام عبقري يبدو أنه كان يعاني من نفس ما أعاني منه قام بعمل كل السلال الجديدة لحام من أسفل ورأيتها قلت أكيد عملها دوراة بحيث تدور حول نفسها لتسهيل تفريغها وجدتها مثبتة تثبيتا كاملا طيب أنا كدة دوري انتهى معاهم


هناك 45 تعليقًا:

Unknown يقول...

هيه اول واحد اخيرا
كنت فاكرك حتعلق علي ان لوحة الكرباء مفتوحة واي واحد بيحاول يتعامل مع السلة ممكن يتعرض لزغزغة جامدة شويه ;)

عازف الناى يقول...

ياريت كل الناس تعمل زيك وتقفل السله او تقوم باصلاح سريع لاهمال الاخرين
اما بالنسبه للسله الملحومه فسهل قوى يفكوا العامود

حائر في دنيا الله يقول...

السلة دوما مفتوحة من تحت لأجل أن تريح ضمائرنا المعذبة وهي تقي القمامة في الشارع على الفور بدلا من بحث عن سلة هي غير موجودة ولو وجدت فهي كما صورت

مع تحياتي
السلام عليكم

Maha يقول...

هههههههههههههههههه

أسعدكم الله وأثابكم

elbostagy2 يقول...

السلام عليكم ورحمة الله وبركاته

أستاذي الكريم

ياريت حضرتك تشارك في الحمله دي

غزة لن تجوع ولن تركع

Unknown يقول...

الشنطة اللى عالضهر بتاعة حضرتك مناسبة اكتر ان يكون فيها قنبلة موقوتة وفيها مكان للتايمر وفيها مكان للموبايل اللى هتكون ناسى تمسح من عليه اسماء بقية اعضاء التنظيم

وبالنسبة للسلة الملحومة انا كمان رأيى انهم هايفكوا العامود يفرغوا منه القمامة ويرجعوه مكانه تانى

mohand يقول...

السلام عليكم
طيب والراجل اللي هيفرغ مين هيقوم بدوره
ربنا يكون في عونه

بالنسبة للشنطة
ابقي ادخل البنك من غيرها لحد ما ربنا يسهل ويجيبوا جهاز يكشف اللي جواها من غير ما تتفتح

تحياتي

mo'men mohamed يقول...

افتكر ان الأستاذ بتاعى حكالى قصصة طفل صغير فى فلسطين كان معاه بتنجان
وبعدين فى دورية اسرائيلية معدية
فقام رامى عليهم البتنجان
افتكروه قنبلة
سابوا الدبابات و العربيات و طلعوا يجروا
ولما عرفوا ان الموضوع لعبة من عيل صغير
ضربوه بالنار قتلوه



سبحان من أجرى الحق على لسان أعداءه
حكمت فعدلت فأمنت فنمت يا عمر
جزاك الله كل خير أخى
السلام عليكم

Alaa يقول...

بص يا أستاذ عصفور
ابو شنطة لاب توب راجل مهم زي سيادتك كده :)
لانها بتكون شنطة برده مش رخيصة :)
انما ابو شنطة راجل غلبان اخره 40 جنيه فمحدش هيعبره
هم يهمهم يضايقوا المهمين :)

انما موضوع السلة انا باضوفه كتير جدا
بس بصراحة مش كنت باقفلهم زيك
بس من النهاردة هاعمل زيك

تحياتي

abdo يقول...

بالنسبة للشنطة دى حاجة أنا متوقعها
أما بالنسبة للسلة الملحومة دى علشان محدش هيفضيها أصلا ولما تتملى الناس تبقى تتصرف وتشوف حتة تانية يرموا فيها

مشروع انسان يقول...

بس والله جميل حكاية انك بتقفل السلة دى حلوة الايجابية دى محتاجينها اوى فى مجتمعنا ده وحكاية الشنطة دى نعمل ايه بقى شنطة مع دقن وممكن جلباب تبقى كارثة ههههههههههه
نقول ايه بس حسبنا الله ونعم الوكيل

ibn nasser - ابن ناصر يقول...

بعد أدور علي سله مش مفتوحه مش بلاقيها!! بلاقيها اما مكنش عايزها
!!!!!
تحياتي

أمــانــى يقول...

أســتاذنا
اصل الشنطة هاندباج شكلها اظرف واشيك يعنى ممكن تكون خبير ولا شغال تبع المعونة الامريكيه تقوم حضرتك عاملهم مشكلة
ام بقى شنطة الظهر ممكن حضرتك تكون جاى وجايب فيها عصير ولا كورة تقوم حضرتك تضايقهم وتخبط الكورة فالقزاز يتكسر
بس فى حد بيمشى بقنبلة هيقولهم انا معايا قنبلة
بس ايه حكاية السلة احنا مش عندنا الشكل ده من السلة كلها متقفل عاملين حسابهم مفيش حد هيقفلها زى حضرتك
:D

غير معرف يقول...

طيب كويس يا عصفور انك لفت نظري ان القاهرة لسه فيها سلال للمهملات :)

غير معرف يقول...

أخى الفاضل: عصفور المدينة
السلام عليكم ورحمة الله وبركاته
أحييك على الصورة الإيجابية
ولو كل واحد فينا كان إيجابياً مثلك
كان ممكن حاجات كثيرة تنصلح

تقديرى واحترامى
أخوك
محمد

Dr.khaled يقول...

:(
:)
دي بمناسبة التناقضات
-----------------
طيب ممكن بس لو سمحت بعد اذنك يا هندسة
تقلل عدد البوستات في الصفحة الاولى...يعني ممكن يبقوا تلاتة او 4
مهو اصل انا قريت اللي فاتوا
:) :(

شباب روش طحن يقول...

مره كنت ماشي وبعدين رميت بعلبة في سلةمن دول وفجعت حينما سرت خطوةواحده ثم سمعت صوت إرتطام العبوة بالأرض فعلا فوجئت بشدة كأني أري معجزة تحدث أمامي ففي بداية الأأمر لم أفهمما حدث ثم أدركت أنها ليس لها قاعدة أساسا يبدو أنها أصبحت تاعه لملعب كره السلة وفعلا الشنطة التي تحمل علي الظهر تجعلك مشتبه به في أغلب الأحيان وأسألني أنا دائما يحدث لي تفتيش للشنطه

ftataljanna يقول...

بص هاقول لحضرتك حاجة هات اللاب توب وارتاح من التفتيش وانا هاجى اتفتش لحضرتك كل يوم يا سلام وانا اطول
:D

ربنا يصبرك

اما بقى عن السلة وكده فانا بشيل شنطه زى اللى عالشمال كده تقولش طفله فى ابتدائى وانا رايحه الجامعه اه والله

وعامله الجيب اللى قريب لايدي للمناديل اصل انا على طول عندى برد ماتفهمش ليه

والجيب التانى لاكياس الشيبسى الفاضية وخلافة ولما باجى البيت بفضيهم هنا واخلص

ماهو اصلا مافيش سلات ولا مفتوحة ولا مقفولة

اللى يضحك حضرتك بقى لما تمشي في المنصورة وتلاقى مكتوب عالصناديق الخضراء الكبيرة دى بتاعت المهملات نظافة حى شرق

:D

ويا سلام تلاقى الصندوق فاضى بس حواليه كل حاجة ممكن تتخيلها مش هارضى اوصف لك لا تكون بتاكل حاجة وت.......

ياللا بقى معلش

واحد من التعليقات عالموضوع ده

ftataljanna يقول...

قال ما يغيروها ويكتبوا

عكس كلمة نظافة

حى شرق

:)

ابقى ترجم حضرتك

:D

كرم مسلم يقول...

السلام عليكم

بص ياعصفور المدينة سواء شيلت الشنطة على الظهر أو فى اليد أو حتى مشيلتهاش خالص هتتفتش هتتفتش

تحياتى

طهقان يقول...

عصفور

حبيت احييك ،/
بس ..مافهمتش الموضوع وخصوصا بتاع السلال
لان

الصور مش ظاهرة عندي

للأسف الأسيف

خمسة فضفضة يقول...

السلام عليكم ورحمة الله وبركاته

ماهو لو حضرتك وانت شايل الشنطه علي ضهرك كنت لابس تي شيرت روش علي شورت ديرتي جينز مقطع من جميع النواحي وضارب شعرك اصفر ما كتش اتفتشت ، دا كان العسكري اياه وقفلك وضرب تعظيم سلام ، ومش بعيد كان مد ايده يساعدك ويشيلك الشنطه لعل وعسي كان يطلعله بدولار بقشيش ولا حاجه

اما موضوع السلال ده فهما اكيد قدروا تعب حضرتك معاهم في القفل والفتح فقرروا يخلوها ثابته


تحياتي

sakayar يقول...

ههههه
موقف الشنطة ده لسه حاصل مع أخويا ..لكن أول ما طلعله كارنيه النقابة رجع لورا خطوتين وآسفين يا دكتور ومش عارف إيه بس علشان منظره أدام الناس قاله افتحها بس اصلها مكلبظة
هههههههه
وأما عن النظافة
ففيه لسه كام سلة من دووول مفتوحين بس مفيش غطا من اللي تحت ده أساسا عشان أقفله
بس حلو أوي الايجابية دي مش قلت ياي زبالة وايدي وكده يعني
تحياتي

الطائر الحزين يقول...

متجبش سيرة التفتيش

انا وقفونى النهادرة فى المترو
الا ايه يا خويا عاملين بوابة الكترونية يدخل فيها الناس اللى معاهم شنط بس
وطبعا انا دخلت منها
وبعد وما طلعت من البوابة قال البية هى الشنطة دى فيها حاجة
قلت له لأ
قالى طيب

ضحكت بينى وبين نفسى وعاوز اسأل الناس هو ايه اللى حصل ولا فى أيه خفت اسال شخص غلط وما اروحش المشوار بتاعى

المعونة الامريكية

*********
تعرف انا ساعات بفضل ماسك ورقة فى ايدى طول ما انا ماشى علشان الاقى صندوق اسم الله على مقامك يا خويا مش بلاقى وساعات بحطها فى جيبى

مع ان الشارع كله ورق بس والله ما بعرف

غير معرف يقول...

ربما عامل النظافة اللى كان بيكسل يقفل سلة القمامة يكسل برده يعدلها بعد ما قلبها ، عشان كده مصر محتاجاك يا عصفور ، اوعى تتخلى عنها
:)

AbdElRaHmaN Ayyash يقول...

يا سيدي و الله البلد دي فظيعه
السلة دي انا بشوفها على طول مفتوحة
أما الشنطة :D
فهكذا البلد والعقلية المفكرة في مصر يا صاحبي
وربنا يستر
و شرف ليا متابعتك لمدونتي يا استاذي(F)

لك سلام

ammola يقول...

باشمهندس عصفور..كيف حال حضرتك
بالنسبة لشنطة الظهر طبعا بتدى مظهر اصغر واروش وياللا عيشولكو يومين مش مشكلة
اما حكاية السلة دى فمعروف ان مصر من الدول اللى بتحط سلة وصندوق القمامة علشان الناس ترمى الزبالة حواليها فمش حتفرق اذا كانت بتلف واللا ثابتةفالنتيجة واحدةوبصراحة العيب مش فى السلة ولا فى العامود العيب فى الحكومة اللى مش عاملة لكل واحد فينا زبال برايفت ياخد الزبالة من ايده

عصفور المدينة يقول...

أحمد الدرعه ..
ما انت لازم تكون اول واحد مش قلت لك حانزل بوست دلوقت
أنا ما حبيتش أعلق ع الكهرباء أحسن يقطعوها

عازف الناى ...
يفكوا العامود صح حل كويس تكسب معانا
حائر في دنيا الله ...

عمر الواحد ضميره ما يستريح إلا لما يعمل الصح
Maha ...
ربنا يسعدك يا بنتي

elbostagy2 ...
مشارك إن شاء الله
مناجاة ...
تصدقي أنا كنت محتار أحط التايمر فين
mohand ...
بخصوص الراجل اللي حيفرع طبعا مش أنا اللي حاقوم بدوره
وبخصوص الجهاز موجود بس دايما يصفر مش عارف أنا هو عارفني ولا غيه

mo'men mohamed ...
أحسنت والله الخوف يسكن في قلب الظالم
علاء ...
جزاك الله خيرا معانا في فريق الإيجابية

abdo ...
الناس بتتصرف من غير حاجة وعايشة

امام الجيل ...
شنطة ودقن واللي بالي بالك في الشنطة أقصد اللاب توب
ibn nasser - ابن ناصر ...
شرفتنا أول زيارة اوعى ترمي في الشارع
أمــانــى ...

شغل الصعيد كله لحامات مفيش حاجة تتقفل عشان بيقلبوا العمود أكيد

وشوشات ...
استاذة علا أنا لست من القاهرة ولا أحبها وده سؤال الحلقة

محمد الجرايحى ...
والله يا أستاذي الإيجابية دي تاعبة الواحد حيث أن السلبيات أكبر من المجهود
ض/خالد ...
حصل وقللت ساعتها على طول خفت أكيد بتدخل من الموبايل

شباب روش طحن ...
مرحبا في سلة المتهمين
وبعدين أهي تمارين باسكت
مرحبا بكم أو بك مش عارف
ftataljanna ...
فكرة والله أحط كيس شيبسي في الجيب الشبكة عشان يبقى (عيل ) رسمي
أهم حاجة يبقى شرق مش مهم إيه

كرم مسلم ...
أنت مطلوب على كل المحاور
طهقان ...
مش عارف إيه حكاية الصور انت أكيد مانعة عرض الصور

خمسة فضفضة ...
دكتورة ما عندكمش علاج للصلع
ضارب شعري أصفر ازاي شعري بيصلع يوميا هذه الأيام

SAKAyAR ...
أخو حضرتك ده أكيد راجل هيبة عارف لو انت كنت ممسوك ممسوك
وبعدين السلال المفتوحة دي حط جردل تحتيها
الطائر الحزين ...
ما تاخدش سندوتشات في الشنطة عشان التفتيش
Mads ...
مصر محتاجلنا كلنا يامادز مبروك الموقع الجديد
bdElRaHmaN Ayyash ...
شرف ليا زيارتك الأولى وأتمنى تتكرر

ammola ...
أستاذة طيب واللي يقلق على حضرتك يطمئن عليك إزاي
اعملي مدونة حطي فيها بوست واحد والله اقتراح بجد
واحنا نعلق عندك وانتي تردي علينا يعني نطمئن عليك

BinO يقول...

أستاذ عصفور
يعلم الله تعالي ديه ثالث مرة أكتب فيها التعليق
:)
دائماً ما كنت أنظر الي سلال المهملات المغلقة من أسفل وأتجب كيف يتم تفريغها
وهي لا تملك عجلة دوارة

غير معرف يقول...

ههههه
فكرتنى قبل كده كنت ماشيه انا وواحده صحبتى فى الشارع وكان فيه الامن المركزى مالى المكان وغصب عننا مشينا فى طريق ممنوع حد يمشى فيه لدواعى امنيه
ولا اكننا كنا معدين اصلا ... يعنى لو كنا ارهابيين وعايزين نفجر المنطقه مكنوش عملولنا اى حاجه ولو كانوا ولاد هم اللى معديين كان زمانهم اضربوا بالنار

ammola يقول...

باشمهندس عموم المدونات
اشكر عطفك السامى على شخصى الضعيف ولكن ده عشمى برضه وهكذا هم المؤمنون فى تراحمهم..بالنسبة لموضوع المدونة فسيادتك اقرتنى قبل كده ان عملى كمعلقة ممكن يكون افضل واجدى من عملى كمدونةواهو يعنى من باب التنويع ناس تكتب وناس تقرا وتناقش وبعدين انا من خلال تعليقى برضة باقول رايى الشخصى يعنى تقريبا كده كل الطرق بتودى روما
جزاك الله كل خير يا اخى الكريم ودايما كده الكبير كبير

غير معرف يقول...

عارف.........بحس بحاجة غريبة جدا فى مدونتك


كل يوم ازورها........اقرأ الكلام.......افتكر انى علقت.........اقفل الصفحة

لما بقرا كلامك بسرح معاه ومع التأملات الجميلة دي وبعدين احس انى علقت لانك انت قلت كل اللى فى بالى اصلا


وبعدين اجى تانى يوم-زي دلوئتى- عايز اشوف انت رديت عليا قلت اية
(:


بجد انا داخل المدونة عندك دلوئتى عشان اشوف انت رديت على تعليقي باية فى موضوع السلة المفتوحة والتفتيش لما الشنطة تكون على ظهرك مش فى ايدك

واكتشف انى مسبتش تعليق
(:


اعذر لى سهوي ونسياني

والسلام

The Manager يقول...

هى فعلا حاجات غريبة بننفرد بيها فى بلدنا

ربنا يسهل ونبقى احسن بلد إن شاء الله

جزاك الله نى خيرا :)

خمسة فضفضة يقول...

السلام عليكم ورحمة الله وبركاته

شوف يا باشمهندس العلاج بيختلف باختلاف الاسباب

يعني فيه اسباب وراثيه وده مالوش علاج

واسباب مرضيه وده بقي له علاج

واسباب سياسيه اجتماعيه بسبب شد الشعر من الغيظ وده علاجه في حته تانيه مش في الصيدليات خالص ..ههههههه

سجدة يقول...

دى السلة مفتوحة
ولوحات الكهرباء
والبلاعات
يعنى السلة دى أأمن حاجة مفتوحة

ياسر سليم يقول...

السلام عليكم

موضوع الزبالة ده مشكلة اساسا مع الشعب المصرى

ياريتها بتيجى على الصندوق اللى مفتوح من تحت

ممكن تلاقى مواطن مصرى يشوف بس مكان الزبالة فين وتلاقية بيرمى جنبها مش يرمى جوة الصندوق

ويبقى كده حاسس انه عمل اللى عليه ويشكر كمان

http://kasperb4.blogspot.com/ يقول...

في الحقيقة رأيت اسمك عند ناس كتير اوي وكنت بكسل ادخل بصراحة

لكن لما دخلت ندمت اني مدخلتش من زمان

تقبل مروري وياريت تعتبرني زائر دائم بإذن الله

الدفاع يقول...

السلام عليكم
بالنسبه لموضوع التفتيش ده فمش من حق اى حد انه يفتش شنطتك
شنطتك زى بيتك عاوزه اذن نيابه عشان تتفتش وكمان سيارتك ارجو انك المره القادمه تاخد موقف ارفض التفتيش وادخل امدير البنك هما من حقهم يحطوا جهاز كشف فقط وانت من حقك ماتعديش منه ده نظريا طبعا الموضوع ده على فكره محتاج ان الناس تعرفه لان معظم الناس مفكره ان من حق رجل السلطه العامه انه يفتش متعلقاتك بدعوى انك فى البنك او فى المترو او خلافه
وده مش صحيح والناس محتاجه تعرف حقوقها
اما بالنسبه للسله ففى اقتراح انك تشترى كيلو اكياس تحطه فى الشنطه على ظهرك وكل ماتلاقى سله ملحومه او سله جايز تتلحم تحط فيها كيس عشان لم يكون فيها قمامه يتشال بكيسه وندعو الناس كلها تعمل كده ونبقى شعب لا يخلو من الكياسه ونعمل حمله نسميها
كله يكيس

عمرو المصري يقول...

والله هو موضوع الشنطة ده مولانا البحبحاني قال فيه قولان
الاول لو كنت شاب روش طحن بمعني لابس بنطلون واقع من وسطك وتي شيرت بتاع اخوك الصغير ويا سلام بقي لو ساحب معاك مذة اجنبية ولا حاجة عندها يجوز تلبس شنطة الضهر ويتضربلك تعظيم سلام

والثاني هو اذا كنت شخصية محترمة مربي دقنك تبقي ارهابي ولو دقنك منيتة بس تبقي ناوي تنبقي ارهابي ولو حتي معندكش دقن بس باين عليك الاحترام تبقي اكيد نفسك بتراودك انك تبقي ارهابي لذلك يستوجب علي ولي الامر ومن معه ان بشكوا في امرك فانت خطر علي المجتمع ومن حقه لو شاف معاك مصحف يعتقلك كمان
هذا والله اعلم
عشان بس مولانا مبيحبش يفتي فتوي ناقصة للمزيد من الفتاوي ارجع لموقع الشيخ علي الانترنت


اما بالنسبة لموضوع الزبالة الشيخ افرد فيه حديث خاص له مع احدي جرائد الحكومة عشان محدش يتهم الشيخ انه مع الارهابيين بتوع قال الله وقال الرسول عشان كده برضه يفضل ترجع لموقع الشيخ



هو حضرتك بقالك مدة مش بتزور المدونة ليييييييييييييييييييييييييييه
هو انا عملت حاجة غلط ولا اييييييييييييييييييييييييييييييييييييه



سلامي
من
ارض الحرب

غير معرف يقول...

ههههههههههههههههه

اضحك الله سنك

روح يقول...

لا احنا عندنا سلال والحمد لله بس محدش بيفضيها هههههه بتتملي لغاية ما الناس يررموا المهملات جنبها عموما انا بحييك علي الايجابية دي ومشكور علي المدونة الجميلة دي تحياتي

نسرين - أمة الله يقول...

السلام عليكم
جايه متأخره قوى انا عارفه معذره
كانت عندى مشكله من انا ولسه فى مدرسه الا بتدائى كانت لما تخلص الفسحه كل العيال يجروا على الفصل
وانا اقعد الف على كل الحواض اللى فى الحوش اقفل الحنفيات وبرضه فى الحمام
كنت اقعد اقول لنفسى انتى مالك روحى فصلك وارجع اقول ربنا حيجازينى خير ولو مقفلتهاش ربنا حيحسابنى
ولغايه دلوقتى اتجنن لو فى حنفيه مفتوحه

عصفور المدينة يقول...

BinO
ما كنتش تعرف إنهم حيقلبوا العمود
حراس الحقيقة
حصانة نسائية بس اوعي الجعلة أحسن ما بيفرقوش
ammola
أستاذة أنا قلت مدونة واحدة بس عشان نعرف نسأل عليك

islamist bloke
ردي هو بحبك يا أحمد

The Manager
أحسن بلد بينا بإيجابيتنا إن شاء الله
وتعليمنا لغيرنا الإيجابية
خمسة فضفضة
أنا وراثة من الناحيتين أضرب دقني أصفر أحسن بقة

سجدة
أما الأبواب فمغلقة

ياسر سليم
الزبالة عشان اكثر حاجة بتبان فيها السلبية وعدم الإحساس بالآخرين

kasperb4
منور والله وربنا يجعلني عند حسن ظنك

مدونة الدفاع
انت بتشغلني بقة يا أستاذ
عمرو المصري
أنا هو التاني الوحش ده
ومعاك في أرض الحرب
منة الله
بارك الله فيك منورة والله
ro7
ده بنسميه
overflow

نسرين - أمة الله
الشخص الإيجابي لا يمل من تكرار هذه الأفعال طول اليوم
وانت جاية قطر ولا مشي

محمود محمد حسن يقول...

يمكن علشان الأرهابيين اليومين دول ارهابيين روشين طحن فعلشان كده الشنطة التانية انسب

نسرين - أمة الله يقول...

السلام عليكم
ايون كنت راكبه الناقه من اسبوع ولسه واصله هههههههه