السبت، يوليو 21، 2007

أرجوكم اسمعوني

السلام عليكم ورحمة الله وبركاته أول مرة أكتب تدوينة فيها عدة موضوعات ومع سبق الإصرار والترصد
رجاء تحملي والقراءة حتى النهاية
سأبقى بالإخاء لكم وفياً ......فأنتم رفقتي وضياء دربي
هذه بذرة مقالة سوف ننميها أيضا بتعليقاتكم إن شاء الله ورؤاكم لتحسين الحال
ولا أزعم أن شيئا من ذلك هو من قبيل الحق والباطل أو الخطأ والصواب ولكنها طلبات أبثها إليكم لكي نساعد بعضنا في التواصل
موضوعات مرتبطة هموم تدوينية وأيضا تلخيص التلخيص
النية والأهداف
تكلمت عدة مرات عن هذا الموضوع والنية مطلوبة لكل عمل وكما هو معلوم واستصحاب النية دائما بل عند كل تعليق وكل تدوينة
أيضا تحديد الأهداف وهو ما يمثل وقود النية
أؤكد على صياغة الأهداف التدوينية بشكل محدد لماذا أدون ولماذا أعلق
طبعا ما ينفعش أتكلم في الموضوع ده كثير عشان هو ياخذ مساحة كبيرة عن كدة
التدوينات المطولة
بالله عليكم يا أخواني وأخواتي لا تطيلوا التدوينة الواحدة ونصيحة فعلا فإن الناس بتميل للسرعة في القراءة وإذا وجدوا أن الموضوع حيطول ممكن ما يكملوش وهذا يظهر أحيانا في التعليقات تكتشف وبفطنتك أن من كتب هذا التعليق لم يقرأ بل يجامل
ثم إن الرسول صلى الله عليه وسلم يقول
إن قصر خطبة الرجل مئنة من فقهه
يعني أن قصر الخطبة هو علامة على الفقه والفهم وكان رسول الله صلى الله عليه وسلم قد أوتي جوامع الكلم يقول الكلام البسيط الذي يفسر في مجلد وففيه من الفوائد المتجددة إلى قيام الساعة
فالإنسان يستطيع وبالتركيز أن يوصل الفكرة التي يريد إيصالها باختصار بعض الكلام وإعادة صياغته ووضع نفسه مكان القاريء هل لو كنت تقرأ هل كنت تتحمل قراءة كل هذا
قد تقول إن المدونة هي بيتي وأنا حر فيه نعم ولكن تجمل لزوارك ولو كنت لا تريد زوارا فاقفل الباب عليك وفضفض زي ماانت عايز
اقرأ التدوينة بعد كتابتها مرة واحدة على الأقل وتخيل إنك القاريء وأيضا تخيل الخلفيات المتنوعة للقراء
الأسلوب
مش حاتكلم عن الأسلوب بس بانصح بقراءة هذه التدوينة الرائعة للمهندس ما علينا
الموضوعات المتعددة
من فضلك ركز على موضوع واحد في التدوينة الواحدة فلربما يكون تعدد الموضوعات في التدوينة مانعا من الاستفادة من أي منها
الآيات القرآنية
من فضلكم لا تسردوا الكثير من الآيات التي تكون حول الآية التي هي محور الاستدلال ويا حبذا لو كان الاكتفاء بذكر موضع الاستدلال للتركيز عليه
وأيضا أنا اتعب من قراءة الآيات التي تكون بالتشكيل لأنه تشكيل زيادة جدا فمش عارف لو كان الناس زيي ولا لأ
المتصفح
رجاء راعوا أن هناك متصفحين رئيسيين يستخدمان وهما إنترنت إكسبلورر وأيضا فاير فوكس
فيا حبذا لو يتم تجربة مدونتك على كليهما حتى تراعي المساكين الذين لا يستخدمون ميكروسوفت
لأن هناك بعض الخصائص تظهر بشكل مختلف هنا عن هناك
الصور والملفات الصوتية
دي بقة كانت نقطة مهمة والآن أصبحت نقطة في غاية الأهمية
قبل كدة كنا بنقول يا إخواننا بلاش حكاية الأغاني اللي بتشتغل في الخلفية (ولا الأناشيد ولا القرآن) عشان على الأقل أركز على محتوى التدوينة وأقرأ في هدوء مش حأبقى بأقرأ في كلامك قال الله وقال الرسول ونفس الوقت الأغاني شغالة في الخلفية
وهذا يعتبر من اتخاذ آيات الله هزوا ولاحتى أناشيد ولا قرآن عشان نركز
ممكن أنا باقرأ وفيه حد نايم جنبي أفتح الصفحة ألاقي الصوت على آخره ده انتم عقدتوني وخليتوني قافل صوت الجهاز بشكل دائم ناهيك إني باكون فاتح عدة مدونات ي نفس الوقت وهو ما يشبه في هذه الحالة السوق اللي كل واحد شمغل كاسيت لوحده
مش موضوعنا
أنا حكلمكم اقتصاديا
دلوقت أسعار الانترنت السريع رخصت بس حيحكموها بحجم تنزيل ملفات وعلى مستوى كل السرعات حتى 1 ميجا ونصف حيكون محكوم بحجم دونلود والوحيد اللي مش محكوم بحجم هو ال 2ميجا اللي هو ب 700 وشوية في الشهر
وأنا بصيت على حجم الشغل اللي أنا باشتغله على النت وهو معظمه قراء وتصفح عادي يعني مش باعمل دونلود لقيت إني يادوب يكفوني ال 2 جيجا تحميل في الشهر طيب والناس اللي محتاجة تحمل يبقى اكيد مش حيكفيهم ويشحنوا بكروت وممكن تبقى نايم وبتعمل دونلود ويجيلك مندوب من الشركة في الحلم يقول لك عفوا لقد نفدت صلاحية البطاقة وقوم اشحنها عشان تكمل الملف
فطبعا كل صورة موجودة على الموقع أو ملف صوتي عمال يشتغل في الخلفية لوحده ده يعتبر بيعد في العداد بتاع الخلق كلاتها اللي بتقرا مدونة سعادتك مالوش لازمة فاحنا بننادي بمرحلة من التقشف في استخدام الإمكانيات اللي موجودة ممكن سعادتك تكون أو تكوني ديموقراطية شوية وتحط لينك تقول اللي عايز ينزل فيلم مرجان أحمد مرجان من هنا زي جماعة اتصالات اللي كل شوية يؤذوني بالرسالة دي
وهذا أيضا يستدعي تقليل عدد التدوينات في الصفحة الرئيسية عشان اللي عايز يدخل من على الموبايل ماهي حياتنا بقت في الجيل الثالث

لقد قمت بتخزين محتويات الصفحة الأولى لمدونة ممن أزورهم ووجدت حجمها 1 ميجا وكان عدد التعليقات 44 فخزنت صفحة التعليقات لقيت حجمها 670 كيلو واللي واخد الحجم هو صور البروفايل بتاعة الناس طبعا لو كان عدد التعليقات أكثر ضربوها انتم إذن فيه حوالي 1.7 ميجا في زيارة واحدة لمدونة غير ملفات الصوت اللي شغالة في الخلفية ودي حسب حجم الملف ناهيك لو كان بقة فيه فيديو فده بمزاجي إني اشغله أو لا مش مشكلة خلينا نقول فيه 2 ميجا اتنقلوا في هذه الزيارة(مع التقريب وإهمال الكاش)
وأيضا أرجوكم الأخوة اللي حاطين الخاصية بتاعة
snapshot
يشيلوها عشان عصر التقشف وأيضا من وجهة نظري هي غير مفيدة رغم جمالها

وبما إن ال 2 جيجا دول بيمثلوا 2048 ميجا ولو قلنا الواحد بيتصفح في اليوم 20 مدونة ده غير التعليقات يبقى فيه 1200 ميجا في الشهر في تصفح المدونات تقريبا وبقية شغل النت كله له الباقي اللي هو حوالي 800 ميجا
مش معقول
بعد شوية إجراءات تقشفية وصل حجم صفحة مدونتي إلى تقريبا 260 كيلو يعني بالوزن ربع ميجا
التركيز على الهدف من التدوين بدلا من الانشغال بالتدوين
استبعدوا ارجوكم حكاية الزعل وفلان علق عندي وباعتذر عشان ما رديتش وغبت عنكم وجاي لكم بعد قليل والذي منه عايزين أفكار عايزين خواطر عايزين مشاركة عايزين تفاعل عايزين ننمو فكريا مع بعض
كل واحد له ظروفه الخاصة ولابد من تقديرها وكل واحد له شخصية مختلفة وقناعات مختلفة ولازم نقدر كدة كويس مش عايزين نقعد نتكلم عن تجمعات وحملات للمدونين وننسى ندون فعلا
وأخيرا
اوعى تقفل المدونة إن التدوينات التي كتبتها والتعليقات التي عليها هي ميراث الجيل ولا يصح إضاعتها هكذا بضغة زر
عارفين قريت خبر عن إن بريطانيا عايزين يعملوا أرشيف للرسايل التي يتناقلها الناس عبر الإيميل والنكت والقفشات عشان تمثل ثقافة المراحل الزمنية
وأنقل لكم هذه العبارة من الخبر وهو هام جدا أن نفكر في مدوناتنا بنفس الأسلوب
The Email Britain collection of real-life emails will provide an important snapshot of British life over email – the good, the bad, the ugly and the amusing – to produce a unique social history catalogue of life and culture in Britain today which can be read and enjoyed by Library visitors for centuries to come



هناك 28 تعليقًا:

كرم مسلم يقول...

السلام عليكم

حيقيى نصائح مهمة ياريت نشوفها على أرض الواقع

جزاك الله خيرا

Bella يقول...

التدوين حديث ذو شجون

بداية من اسلوب الكتابة
وأدوات الكاتب التي يستخدمها للتعبير
مرورا بطريقة الكتابة نفسها وطول الموضوع واستخدام الفاظ بغرض الاستعراض هذا فضلا عن الاخطاء اللغوية والاملائية التي ماأنزل الله بها من سلطان.
نترك هذا وذاك وننتقل للتعليقات التي غالبا تشغل فيها المجاملات حيزاً كبيراً.
هذا اذا سلمنا اصلا ان من علق قد قرأ الموضوع الطويل وسيناقش جزء فيه.

عن نفسي صراحة لااميل كثيرا لقراءة التدوينات الطويلة التي يُغرق اصحابها في مقدمات طويلة ويظلون يمهدون للموضوع ويستطردون حتى تطلع روحي وبعدها يتحدثون في الموضوع الاساسي.

هذه الطريقة في الكتابة لاتستهويني واشعر ان متابعة هكذا تدوينات مرهقة لي بصريا وتضيع الكثير من الوقت فأختنق بسرعة واهرب من المدونات الطويلة التي يهو اصحابها الاستطراد .
أمر آخر لااحبه الصراحة وهو حجم الخط والوانه
فمن المعروف ان حجم الخط له تأثير على القارئ او يعتبر من الادوات التي يستخدمها الكاتب لتوصيل فكرته.
فلايريحني على الاطلاق الحجم الكبير جدا للخط والألوان الفاقعة التي يصرخ مستخدمها في وجهي منبهاً لأمر ما.
لون المدونة نفسه من الامور التي يؤثر على القارئ
وبصراحة لااميل كثيراً للذهاب للمدونات السوداء او القاتمة التي يستخدم اصحابها الوان كالابيض او الاسود في الكتابة اللهم الا اذا كانت مدونة فريدة من نوعها وماسأقراها فيها لن أجده في مكان آخر واخشى ان تفوتني متعة متابعته.

بالنسبة للتعليق

صراحة انا لااهوى التعليق للتعليق والسلام
واتابع كل التعليقات في التدوينة التي اقرأها ولو كان فيها تعليق به مااود قوله لااعلق فلامعنى مطلقا لتكرار الكلام او قول انا رايي مثل راي فلان او علان.
ولاأعلق للتعليق والتواجد وخلاص مجاملة لصاحب/ة المدونة
أعلق فقط إذا كنت ساقول كلام سيفيد الحوار الدائر او سيفتح زاوية جديدة للنقاش.

واكتفي بهذا الرد لانه طال مني
ومعذرة على الاطالة

تحياتي

نسيت اقول نقطة اخرى
اتفق معك في باقي الامور الاخرى الخاصة بملفات الصوت او الصور وماشابه
فالطريقة الجديدة التي ستحاسبنا بها الهيئة على اشتراكات الدي اس ال ستجعنا نتقشف جميعا

Unknown يقول...

بالنسبة للنية والأهداف
جزئية لابد من تنشيطها الدائم مع التدقيق ان التدوين يكون دائما مرتبط بفكرة او بحدث وليس بكون الناس كلها بتنزل التدوينة ورا التانية وانا بقالى كتير محلك سر
مع العلم ايضا بوجود الاختلاف بين شخص وآخر فمنهم من يبرع فى التدوين ومنهم لا يبرع الا فى التعليق
سواء يدون او يعلق لابد انه يقوم بدور فعال وايجابى
ولو الواحد هايعلق فقط لهدف متحدد كإثراء الفكرة مثلا
هايتخلص من عبء التعليق مثلا لمجرد انه بقاله فترة ماعلقش عند فلان او الاهتمام بكونه دائم التواجد

بالنسبة لطول التدوينة بالاضافة للملل اللى بتسببه فى بعض الاحيان تخيل كمان ان اللى بيكتب ده ليس عنده موهبة الكتابة أصلا اكيد صياغته للموضوع لن تكون بالشكل الذى يضمن استمرار القارئ للنهاية

دائما وابدا هاعترض على فكرة ان المدونة بيتى وانا حرة فيه لأنى ببساطة لو مش مهتمة بأمر الزوار يبقى افضل لى انى اكتب فى اجندة واحطها فى درج مكتبى ولا يطلع عليها غيرى
واللى بيقول كده ببساطة يراقب نفسه بعد مابيكتب التدوينة هل بيدخل على مدونتة يتفقد عدد التعليقات ولا بيدخل تانى لما يكون هاينزل تدوينة جديدة فقط


تعدد الموضوعات فى التدوينة الواحدة غير انه بيكون ضد الاستفادة بيحمل المعلق ايضا عبء التعليق على جزئية جزئية زى ماباعمل كده حاليا بس مافيش مشكلة ده مش من طبيعة مدونة عصفور المدينة او هايوجه كل معلق للجزئية اللى تلفت انتباهه اكتر من غيرها

اقنعتنى تماما بفكرة الغاء حكاية الملفات الصوتية وعلى فكرة انا كمان باتابع دايما من غير صوت
وبالوم نفسى دلوقتى انى اضفتها لمدونتى رغم انى نفسى لا أسمعها وباتضايق من اللى عاملها
وحتما ولابد لازم نتخلص من مرض ترويش المدونات اللى مش هايعود علينا بفائدة تذكر
وياخوفى من السبع الشداد اللى هتخلى كل واحد يقيس مدونته بالسحتوت

وياسلام لو كل واحد تخيل الورثة بتوعه وهما بيتفرجوا على مدونته بعد موته
مش عارفة هايركز فى كل كلامه ولا هايفضل مصر على حكاية بيتى وانا حر فيه
وحكاية ثقافة المراحل الزمنية انا عندى تخيل دايما ان المدونات فى حد ذاتها عبارة عن ارشيف عن الشعوب اخطر من فكرة التخابر لحساب الموساد ولا السى اى ايه

والله المستعان

غير معرف يقول...

الأخ الفاضل الكريم : عصفور المدينة
السلام عليكم ورحمة الله وبركاته
أحييك على هذه النصائح المخلصة
ولقد قرأتها وتمعنت فيها جيداً
وأخذت نقاط كثيرة لأجعلها نبراساً هادياً على طريق التدوين

لك تقديرى واحترامى

أخوك
محمد

سكتم بكتم يقول...

السلام عليكم ورحمة الله وبركاتة

معاك تماما يا أستاذنا وخاصة في نقطة البوستات الطويلة

أن من الفطنة فعلا الأيجاز في العبارة والإبداع في المضمون

وإن كان ده موضوع صعب مش أي حد يقدر علية .وأنا الحقيقة بلاقي مشقة شديدة في متابعة البوستات الطويلة مهما كانت مهمة

جزاك الله خيرا يافندم ولا أقول ياعمي
ههههههههه
السلام عليكم

Zika يقول...

ساعات بنحتاج اننا نتكلم عن موضوع طويل بيحكم عليك الموضوع بانك تزود في الموضوع ..اعتقد ان ده بيعتمد علي القارئ انه لو الموضوع نفسه شده بيقراه كله..
ثانيا بقي انت طريقتك في عرض الموضوع منطقيه ولذيذه جدا وانا كملتها للاخر ... رٍغم ان ده يعتبر من اطول المقالات اللي قريتها في اي بلوج قابلته ...:)
شوفت قصدي ايه
...بالنسبه لموضوع النت ده ربنا يستر
كده مش هيبقي فيه بديل الا ان الواحد يدخل ال 2 ميجا
اللي هو باكتر من 700 وشوية في الشهر
يعني المرتب هيطلع عينه ..
وربنا يستر عالنت وعالمرتب

أمــانــى يقول...

أســتاذنا
هو فعلا البوستات الطويلة مشكلة خصوصآ لو حد مش فاضيى زيي بأحس بالمعاناة وانا بأقرأ وامتى اخلصه خصوصآ لو الخط كمان صغير يبقى يا صباح العمى
:D
يا عينى عايزة علطول كشف نظر
بس برضو انا بألاحظ فى موضوعات لا يجوز فيها تقليل وتقصير لان كاتب البوست حابب يقول شئ معين ومش هيوصل اللى بالشكل ده فيبقى عادى
الظاهر الدولة دى معاندة معايا لانها هتغلى النت مش هترخصه زى ما بيقولوا الظاهر شموا خبر ان ربنا خلاص هيكرمنا ويدخلوا عندنا الدى اس ال لو على كده اقولهم بلاش من اولها
الملفات الصويتة مش كلها وحشة لان فى مدونة كنت بازورها ومكنتش بأقدر اعلق عنده كان حاطط قران وهو سبب انى ابدأ فى التغيير
ساعات بيكون مؤثر
خصوصآ لو كلامه دينى واللى شغال قرأن
معلش بقى انا بقيت رغاية فى التعليق
معذرة يا أســتاذنا
:D

نـــــــور يقول...

ماشاء الله يا أستاذنا الفاضل
نصائح حضرتك دي طيبة جدا وقيمة جدا بارك الله فيكم
أنا فعلا مش بحب اطول في التدوينات.. ولو حسيت الموضوع هيطول بقسمه :)

بس النقطة الخاصة بالانترنت وحكاية الداونلوود وكدا مافهمتهاش بصراحة خالص

يالا خير.. وجزاك الله عني خيرا

عازف الناى يقول...

عندك حق يا عصفور
طول المقال يفقده قيمته لان ربع من يدخلون المدونه يواصلون قراءته للنهايه
اما بالنسبه لملفات الصور والصوت
انا معك فى ملفات الصوت اما ملفات الصور فهناك بعض المواضيع تكون الصوره متحدثه لبقه
اما بالنسبه للسايدبار
فاحيانا تكون الصور صرخه او اضراب او متنفس عن مكتوم داخلى
جزاك الله عنا وعن المدونين خيرا

ftataljanna يقول...

اما عن اسعار النت وخلافة وكده والداون لوود والكلام ده

فانا تضامنا منى مع حضرتك شيلت ملف الصوت اللى هندى

بس انا مش عايزة اشيل صورة البروفايل
:(

سماح فيها بقى اوك

اما عن فى الآخر خالص عن ميراث الجيل فده بجد اللى دايما بحاول اقوله وحتى قلته لما كنت بتكلم فى موضوعى مدونة تحكى حكاية انسان

ان المدونات دى بتشكل حقبه زمنية ما ينفعش تتلغى من حياتنا كده بكل بساطة
لازم نحتفظ بيها

وجزاكم الله خيرا

ma 3lina يقول...

حضرتك بتعمل ستاندرد للتدوين

البوست دا المفروض يكون عليه حقوق ملكية فكرية .. بجد مش هزار .. يتعمل في شكل نقاط .. وكل مدونة تقول إنه تتبع مواصفات قياسية كذا .. حيث كذا دا اسم المواصفات اللي حضرتك حتختاره ...

الموضوع جد يا باشمهندس قبل ما الفكرة تتلطش .. وأنا أول واحد ممكن يلطشها منك ..

:D

أنا جربت مدونتي على الأوبرا والنيت سكيب والاكسبلورر ستة وسبعة حنزل دلوقتي الفاير فوكس وحشوف ...

ربنا يستر

eldoctor يقول...

طيب و اللى يكتب معلقات زى حالاتى و لما أختصر تقولوا لى وضح و اشرح ؟؟؟؟؟

فن الحياة يقول...



:) تسجيل مرور ومعلومات قيمة ..

تعليقي فقط على الدونلود .. اظن الملفات التصفح ئلي بتنزل دي .. ملهاش دعوة بالدونلود .. ياعني لا اعتقد انها هاتتحسب على 2 جيجا ئللي ناوين يفرضوا عالينا :S

واتفق معكم كل الاتفاق .. على عدم فاعلية الاغاني ئلي بتكون مع بداية المدونة ببطء المدونة اوي .. وكمان مش بيكون في تركيز .. ده غير برنامج التحميل ممكن تفتح بسبها وتبطيء الدنيا .. ده غير اذا زي ما حضرتك قلت .. المدونة بتقول قال الله وقال الرسول .. واتلاقي اغنية فلان الفلاني شغالة ..

جزاكم الله كل خير :) اخي الكريم

mo'men mohamed يقول...

iده يبقى كارثة لو حكاية النت الجديدة دى حصلت
انا واحد من الناس على طول على النت مابين منتديات و مدونات و برامج
حسبى الله ونعم الوكيل
اما عن المواضيع الطويلة أخى
فأنا عن نفسى مبقدرش امسك نفسى
لما بأكتب موضوع بأسرح فيه و بأنسى نفسى
أما عن النشيد فأنا حشيله ان شاء الله
جزاك الله كل خير
السلام عليكم

soosa el-mafroosa يقول...

طب مانت لسه قايل بلاش تدوينات طوييييييييييييلة
والا انت قصدك ان دي تبقى آخر واحدة و مش هتطول بعد كده

:))

اقتراحاتك كلها طبعا اقتراحات مفيدة جدا..و مهمة للغاية بالنسبة الى سرعة التنزيل و التصفح

لكن التدوين أصله حالة خاصة و يتدخل فيه كثيرا بند الحرية

يعني فيه ناس متمسكين قوي بموضوع أغنية الخلفية
أو الفيديوهات
أو السلايد شو

يعني بيقولوا هي حرية شخصية

أنا مثلا ماتخيلش اني أنشر تدوينة من غير صورة
أحس انها ناقصة

لكن طبعا المدونات الخفيفة اللي ماتغلبش و هيا بتتفتح بتبقى أهدى للنفس

تحياتي على البوست القيم

Rehab Saber يقول...

انا استفدت من تدوينة حضرتك دى جدا

ربنا يجعله فى ميزان حسناتك

غير معرف يقول...

ماشاء الله بوست جميل جدا ومفيد ، وياريت فعلا يتنفذ
وبارك الله فيك

رفقة عمر يقول...

استاذى
فيه جزء من البوست مرتبط بالبوست عندى بسن انا شخصيتى انى بتفاعل مع الناس ومشاعرهم مقدرشى اغيرها
انا عارفه انى عامله لنفسى هدف اول ما بدات التدوين
بس مش احب اشوف حد حزين او اصابه شئ بجد بياثر على تفكيرى ويشتت افكارى
نفسى اتغير بس مش عارفه فعلا
وبخصوص الاعتذار عن التاخر فى التعليق
انا شايفه انه جبر لخاطر المعلق لتنه بيكون منتظر الرد على تعليقه ولازم اعطى لكل شخص دخل عندى المدونه قدرة ومكانته لانه يعتبر ضيف عندى
الرسول الكريم قال
من كان منكم يؤمن بالله ورسوله فليكرم ضيفه
بالنسبه لملفات الصوت انا ملف الصوت عندى احيانا بيوصل فكرة لا استطيع توصيلها فى البوست واحيانا يكون مكملا للبوست نفسه
الصور مهمه عندى ايضا لانها ايضا بتكمل فكرة البوست
بس هاحاول اضع الملف الصوتى اذا كان ضرورى مع البوست وبعد كدة اشيله بعد نزول البوست بيوم
حضرتك الاب الروحى للتدوين
جزاك الله خيرا
وربنا مش يحرمنا منك ومش تغيب عن مدونتك ابدا للهم امين يارب العالمين

بهلوله يقول...

والنبى يابو العصافير يا خويا انا مبحبش ادخل مدونه والاقى فيها صوت على طول اوطى صوت الجهاز
اما الصور دى حلوه يا عصفر
ساعات بتعبر عن معنى انا مش قادره اعبر عنه بالكتابه دى وجهه نظرى وكل واحده حره فى رايها والارزاق بالله يا جدع

اه يا دماغى يقول...

انا مش بحب التدونيات
الطويلة زيادة عن اللزوم

فى مدونات مشهور جدا
بتكب بوست طويل جدااااااا

بصراحة ملل

خير الكلام ما قل ودل

تحياتى

عصفور المدينة يقول...

كرم مسلم
وعليكم السلام
حنشوفها واقعا بمجهودنا جميعا إن شاء الله
=======
Bella
مناجاة

جزاك الله خيرا أدعو الجميع لقراءة تعليقكما القيم
=======
=======
محمد الجرايحى
أخي وحبيبي وأستاذي
=======
سكتم بكتم
أن من الفطنة فعلا الأيجاز في العبارة والإبداع في المضمون
جزاك الله خيرا يا عمنا وقابلني بعد 10 سنين
ههههههههه
=======
el3araby
مرحبا بك
أيوة بس إذا كان يمكن إيجاز الموضوع يكون أفضل
وربنا يستر عالنت وعالمرتب

=======
أمــانــى
ربنا يبارك في نظرك الذي أراك تستعملينه في طاعته
التأثر بالقرآن هممممممم جزاك الله خيرا مش عارف أوازن الفوائد والأضرار
=======
نـــــــور
جزاك الله خيرا وأظن أن موضوع النت بان جدا دلوقت كل الناس بقت تتكلم عنه
=======
عازف الناى
جزاك الله خيرا اوعى تقفل المدونة
بس حندفع فلوس عشان الأخوة اللي عايزين يطلعوا صرخاتهم
=======
ftataljanna
أنت أستاذة فتية
=======
ma_3alina
هكذا هم المهندسون ناخذ منهم معايير ومقاييس وتجارب وكمان أدب وفن وبيان
=======
eldoctor
اكتب أيد الله قلمك
=======
فن الحياة
جزاك الله خيرا بس أؤكد لك وبصفتي مهندس في المجال إن الحساب حيكون على كل بايت يتنقل عبر الخط
=======
mo'men mohamed

جزانا وإياك يا حبيبي بارك الله فيك وربنا يستر
=======
soosa el-mafroosa
جزاك الله خيرا أنا عارف إن التدوين هو كذاكذا بس برضه إنت عايزة الناس تقرا وإلا كنتي كتبتي في أجندة
زي ماناس أيدوني الصور معبرة جدا بس بانصح بتقليل حجمها عشان فيه ناس حتدفع فلوس تمن الصور دي
أهلا بيك وكلنا مفروسين
=======
Caaaaat
جزاك الله خيرا ونحن دائما نستفيد من تدويناتك
=======
نهياوية

مرحبا بك إن شاء الله نكون رأي عام نحو تدوين هادف
=======
رفقه عمر
مرحبا بك مرتين تعليق على التوالي
:)
أعرف عنك ما ذكرتيه ولكني أنادي بان هذه الحالات النفسية تتحول إلى جانب الفعل وليس إلى حزن وإحباط
جزاك الله خيرا
وأنا ومن هم في سني ربما سنموت ولكننا إن شاء الله نترك من يواصلون الطريق
=======
بهلوله
ما تقوليش والنبي يا أستاذة بهلولة قولي والله
الصور حلوة بس بفلوس يعني شوية الصور اللي عندك ام 150 جنيه فيه ناس حتدفع دم قلبها عشان تشوفها
=======
اه يا دماغى
أحسنت نحتاج إلى الابتكار لنصل إلى
خير الكلام ما قل ودل
=======

شباب روش طحن يقول...

الحقيقة أن المدونات مازالت في بدايتها وأعتقد أنها لو أنتشرت أكثر من ذلك فقد يكون لها تأثير كبير في حياة المستخدمين لخا فلا نكون قد جاوزنا الحد إن قلنا ان المدونات قد تساهم في إثراء الحاله الثقافية والفكرية في الوطن العربي ولكن طبعا ده بعد عشر سنيين مثلا لما كل واحد يبقي عنده مدونه

Noony يقول...

أيوة صح...أنا مع حضرتك في كل جاجة مع إني مش بحسب الكلام دة كله
بس باتغاظ جداً من الأغاني والصور اللي شغالة في المدونات بطريقة زيادة عن اللزوم
الطبيعي بتاعي اني بابقى قافلة السمعات..ولو حبيت في يوم أفتحها بأصاب بحالة من حالات الصرع

أنا مع حضرتك إن أهم حاجة هي الموضوع..فلازم نركز فيه ومنطولش أوي لا نختصر أوي

اسمحلي أنادي بكل اللي حضرتك ذكرته وأحط الموضوع دة عندي في المدونة بتاعتي

:)
نوني

الفاروق يقول...

انا مش فاهم موضوع الدون لوج كويس ممكن توضحه
وجزاك الله خيرا

أفكار مسلم يقول...

جزاكم الله عنا خيرا
لقد قرأت مدونتكم أرجوكم اسمعونىز
وأتمنى منكم بعض الدعم الفنى وخاصةً
فى اعداد الأرشيف
مع الشكر

أفكار مسلم يقول...

جزاكم الله عنا خيرا
لقد قرأت مدونتكم أرجوكم اسمعونىز
وأتمنى منكم بعض الدعم الفنى وخاصةً
فى اعداد الأرشيف
مع الشكر

و القادم....أجمل يقول...

جزاك الله خيرا

هيا نقط مهمة

بس الموضوع كان يتقسم يكون افضل

لأنه طويل

!!

و يا ريت نراعي التنسيق في الالوان

بجد بتفرق

تقبل خالص تقديري و احترامي

جزاك الله خيرا

عصفور المدينة يقول...

والقادم أجمل شكرا لك وسف آخذ بالنصيحة فيما عدا موضوع التقسيم لأني كنت مضطر للظروف الآنية التي كانت على اسلاحة وقتها أن كافة هذه النقاط تكون تدوينة