الجمعة، يونيو 22، 2007

فتوى الفرن

حين هممت بدخول منزلي الآن بعد صلاة الجمعة استوقفني رجل يحمل كيسا مليئا بالخبز - المدعم
وسألني بعد تردد حيث سألني عن الساعة أولا ثم بعد ما مريت ناداني
هو الواحد لو فوت صلاة الجمعة عشان يجيب عيش يعمل إيه
قلت له أولا انت يجب عليك تصلي الظهر أربع ركعات
بس ياراجل حد مسلم يعمل كدة انت مش عارف قدر صلاة الجمعة
انت مش عارف إن ربنا سبحانه بيقول : ومن يتق الله يجعل مخرجا
قال مكملا : ويرزقه من حيث لا يحتسب
أنا عارف والله أنا دايما مواظب على صلاة الجمعة وسورة الكهف بعد الصلاة على طول
انت من هنا
أنا أصلا من مصر -القاهرة يعني
ساكن هنا ولا على سفر -نفسي ألاقي له عذر
لا ساكن هنا بس معزول عن أهلي والظروف صعبة
بس ندمان والله وقعدت أأنب نفسي بس وقت الصلاة الفرن كان رايق شوية
بالله عليك أوعى تعمل كدة تاني وتوكل على الله وشوف ربنا حيرزقك ازاي .......الخ

هناك 29 تعليقًا:

Dr.khaled يقول...

طاب كان يدي لك رغيف عيش
حق الفتوى :)
****************
ربنا يهديه ويغفر له ويرحمه ويوسع له في رزقه ويبارك له في اهله وماله وولده وانت وانا وكل المسلمين

Gid-Do - جدو يقول...

ابو العصافير
انت صليت الجمعة والعصر ـ تقبل الله ـ وانا هنا الساعة تسعة الصبح من نفس اليوم ـ سؤال بيلح عليا ـ ويصبح لامعنى لسؤالى اذا كانت ملابسك تدل على انك من رجال الدين
ـ خلاص الناس كدة بقت تسال اى حد ـ مع كل احترامى لشخصك الكريم ـ انه يفتيها؟ وخلاص وصل الجهل بالناس انهم مش عارفين معنى الاية التاسعة من سورة الجمعة اللى عارفها اى مزارع فى مصر
والف شكر

نـــــــور يقول...

:(

الناس هتا في مصر للاسف .. بتصدمني

بجد .. كل مااقول ان الناس بدأت تصحى آلاقي بالمقابل ناس كثير نايمة في العسل وغرقانة خالص ولا عارفة اي حاجة

بحس انهم امانة في رقبتي !

الله المستعان

رينـــــــــــا يقول...

السلام عليكم
اخبار حضرتك ايه
ان شاء الله خير

طيب والله كويس على الاقل دا أنب نفسه فى منه امل

الدور والباقى على اللى بيكونوا قاعدين على القهاوى وبيسمعوا الصلاة وهما بيلعبوا كوتشينه والا طاوله

ربنا يهدينا اجمعين

sakayar يقول...

باشا .... هوه السؤال الملح بس الفتوى كانت أي فيهم ... الساعة كام ؟؟؟ ولا اللي يفوت صلاة الجمعة؟؟؟
يا رب يغفر له ولينا ويهدينا كلنا

Unknown يقول...

فى مشكلة تانية الحقيقة

مش هو بس اللى ماصلاش الجمعة

ده الفريق كله اللى كان سبب فى خروج رغيف العيش
مصيبة
إنا لله وإنا اليه راجعون.

عصفور المدينة يقول...

جدو
شكلي طبعا الشيخ الباشمهندس
بس الراجل أكيد ضميره كان مأنبه وكان محتاج حاجة كدة زي الاعتراف للأسف
أو محتاج حد يقول له أيوة انت مكافح ويجوز لك ذلك
والفتوى اﻷساسية زي ما بيقول سكايار هي الساعة كام

وبعدين هو كان عايز يعرف يصلي ركعتين ولا أربعة
واﻷخت مناجاة نبهت إلى مشكلة كنت عايز انبه ليها وهي غن الدنيا شغالة وقت الصلاة
عادي جدن
وأختنا نور نبهت ﻷن على كل إنسان دور في التوعية فعلا

Just a Reader يقول...

لا حول ولا قوة إلا بالله .... ربنا يغفر له ويصلح حالة ... والله الجمعة لها قيمة عظيمة أكاد أغبط الرجال عليها خطبة أسبوعية تجدد النية والأهداف وتعمق أكثر في الدين وتجمع لصحبة صالحة تقوي العزيمة وإتحاد للملسمين ولدعائهم كثيرا ما نفتقدة...ربنا يصلح حال كل من يتأخر عنها أو يذهب على ميعاد الصلاة فقط.
أجمل حاجة سمعت عنها في السعودية ولكني لم أراها للأسف إغلاق كل المحلات والمصالح وقت الصلاة ....نفسي نكون زيهم.

أمــانــى يقول...

حقيقى مش عارفة
ربنا يرحمه ويرحمنا ويرحم امتنا الاحياء والاموات منهم ياااااااارب آمـــــــين
تحياتى لحضرتك

abdo يقول...

لا حول ولا قوة إلا بالله
الراجل بيقولك إن الفرن كانت رايقة شوية يعنى فى ناس غيرة كانت بتشترى عيش وقت الصلاة
بس الراجل فى منه امل لأن قعد يأنب نفسه انه لم يصلى الجمعة
بس أكيد الراجل ميعرفش معنى الأية دى
"يَا أَيُّهَا الَّذِينَ آَمَنُوا إِذَا نُودِيَ لِلصَّلَاةِ مِنْ يَوْمِ الْجُمُعَةِ فَاسْعَوْا إِلَى ذِكْرِ اللَّهِ وَذَرُوا الْبَيْعَ ذَلِكُمْ خَيْرٌ لَكُمْ إِنْ كُنْتُمْ تَعْلَمُونَ "
ربنا يهديينا جميعا ويعافينا

غير معرف يقول...

اولا ربنا يغفر له ويهدينا جميعا


وربنا ينتقم من اللي وصل الناس انهم مش لاقيين او مش عارفين يجيبو عيش ويفتنوهم انهم يسيبوا الصلاة عشان العيش


طبعا دة مش مبرر استغفر الله

خمسة فضفضة يقول...

السلام عليكم ورحمة الله وبركاته

احلي حاجه شفتها في السعوديه ونفسي اشوفها في مصر ، ان وقت الصلاه مقدس ، قبلها بحوالي 10 دقايق تلاقي الناس كلها خلاص بطلوا بيع وشرا وسابوا كل حاجه في اديهم وكله راح علي الجامع يصلي ، ولو حبيت تكلم حد مايردش بس يقول :
صلاه ...صلاه .....صلاه

يعني بعد الصلاه

ربنا يهدينا اجمعين الي صراطه المستقيم

نقطة مية يقول...

اذا ربنا اصلا منع البيع في وقت صلاة الجمعة..مش هسأل ازاي الفرن ده بيبيع..لاني عارفة اجابات مش اجابة..
بس ربنا بيقبل التوبة الصادقة..ربنا يهدي الحال..حال المصريين..
تحياتي

غير معرف يقول...

ما هى دى المشكله من اساسها ... اننا سايبين دينا عشان رغيف العيش.. وخايفين نتكلم عشان رغيف العيش.... ونايمين وساكتين عشان رغيف العيش
بجد على اد ما الحكايه بسيطه...على اد ما هى السبب الاساسى اللى بيهدد ديننا
المصلحه الشخصيه

عدى النهار يقول...

ربنا هدى ويصلح الحال. للأسف تم تمييع كل شىء.. صلاة الجمعة تُقَارن بشراء العيش أو قضاء مصلحة أو .....

الطائر الحزين يقول...

يا اخى والله العظيم دمعت عينى
ولا اجد للموضوع مجالا للسخرية ابدا
وفكرت فى الموضوع من منظور اكبر شوية من مجرد صلاة جمعة فاتت
الرجل وجد بك شخص امين يحدثك لتقتص منه وتوبخة
يريد ان يشعر انه ما اقترفة من أثم اخذ علية الجزاء ولو ضمنا ولو على سبيل تأنيب الضمير
كان ممكن ان يكتفى بما يحملة فى نفسة وهو يعلم انه لا احد سيسألة ولا سيناقشة ولا يعتب علية كونة فضح نفسة امامك وكلمك عن تركة للصلاة هذا شىء كبير والله كبير اوى ربنا يكرمة ويهدية ويهدينا معه انه واجه نفسة بمعصيتة واستحسن شخص ليأخذ على يدة ويظل يتذكر هذا الموقف حتى لا يكررة
رب اغفر لى وارحمنى

غير معرف يقول...

أخى الفاضل: عصفور المدينة
السلام عليكم ورحمة الله وبركاته
لهذه الحادثة مغزى آخر
الإنسان فى هذا الزمن الصعب أصبحت قسوة الحياة ومع صعوبة الحصول على
لقمة العيش قد تضيع منه أشياء هامة
فى لحظات الضعف الإنسانى
ولكن بعضاً من بقايا ضمير مازالت تؤرقه

هدانا الله جميعاً إلى مافيه الصلاح

بارك الله فيك أخى الكريم وأعزك

أخوك
محمد

ammola يقول...

الحمد لله ان الراجل سال حد زى حضرتك يعنى لو كان وقع فى ايد مفتى من اياهم كان قاله ان الله غفور رحيم ولو ضيعت الجمعة ممكن تصلى السبت
بس حقيقى ربنا ينتقم من اللى كان السبب فى ان الناس اصبحت فى الدوامة دى وبقت بتفاضل بين دينها ودنيتها
بالمناسبة...هو العيش كان بلدى واللا شامى؟

نسرين - أمة الله يقول...

السلام عليكم
والله بالرغم من ان صلاه الجمعه مش فارق ان البنات تصليها فى الجامع ويمكن كمان البيت اولى بس الواحد حاسس انه خلاص اتعود علها ويمكن كمان بتجدد معايا احاسيس او قرب ربنا يدومها نعمه على المسلمين

mo'men mohamed يقول...

فعلا أختى
ربنا يهديه ويسامحه ويغفرله
جزاك الله كل خير أختى
السلام عليكم ورحمه الله و بركاته

BinO يقول...

هو أنا اللي ممكن عجبني
أن الراجل ضميره مأنبه
جداً

تعرف
أعرف ناس
ربنا يهديهم
كانوا بينزلوا شوارع القاهرة يخلصوا شغلهم
ساعة الصلاة
عشان الشوارع بتبقي رايقة
علي حد قولهم

عصفور المدينة يقول...

إخواني وأخوتي
جزاكم الله خيرا على التفاعل
يقول لي صديقي الكبير أ عبده
أنه أصبح يعرف أخباري من المدونة
رددت عليه أنني لا أحكي كل مواقف حياتي في المدونة ولكن أحكي ما يحمل فكرة أو مبدأ ويكون نافعا وعاما للجميع والحمد لله تأتي التعليقات لتؤكد ذلك فليست التعليقات من قبيل التمتع بالحكاية بل كل تعليقاتكم أثابكم الله عن المباديء التي في طيات الكلام
- هل يستفتي أيا كان
- غفلة بعض الناس عن دينهم
- انشغال الناس بأكل العيش لدرجة تضضيع الفرائض
- بل وانشغال الناس بللهو أحيانا عن ذلك
- الظلم في أمور الدنيا أدى إلى الفتنة في الدين
-دور اﻷمر بالمعروف الغائب
- وازع الله في قلب المؤمن موجود
جزاكم الله خيرا

غير معرف يقول...

واللى صحابه عشموه انهم بيصلوا الجمعة على المركب وبعدين وعلى المركب قالوا له احنا مش علينا جمعة احنا هنصليها ظهر وبعدين الظهر اتحولت لجمع وقصر مع العصر وبعدين احنا نازلين من المركب الساعة 5 يبقى نصلى الظهر والعصر جمع قصر بعد ما ننزل -وانا مش عارف اصلى لوحدي يبقى كانى مغرور بلحيتي وبحرجهم وبقول لهم ان كل اللى مش ملتحين مش ملتزمين وانا احسن منكم وهصلى لوحدي وابقوا صلوا لوحدكم-بصراحة كنت محتار وبعدين نزلت لقيت واحد منهم صلى لوحده فى المطعم اللى اغتسلنا فيه قمت ندمت وقلت انا اللى استاهل


نعوذ بالله من شياطين الانس والجن

والسلام

mohand يقول...

السلام عليكم
عجبني قوي تعليق ان كله بيجري ورا رغيف العيش
وسايب كل حاجه علشانه
فعلا هي دي المصيبه
ان رغيف العيش اهم من حاجات كتير دلوقتي
الكرامه
الدين
التربيه
الاخلاق
بس علي الاقل ضميره لسه صاحي ومش جري هوه كمان ورا رغيف العيش
تحياتي

Gid-Do - جدو يقول...

ابو العصافير

الف شكر ياباشمهندس لاهتمامك وسؤالك انا والحمد لله بخير وعدت امارس نشاطى اليومى ـ تحياتى ومتحرمش من سؤالك عنى

shab masry يقول...

والله حال الناس باة يبكي..

انا اذهب مع اصدقاء لي الى منطقة عشوائية.. اغلب من فيها تحت خط الفقر..
فعلاً الواحد بيكون مذهول الناس دي عايشة ازاى..

وتيجي تكلمها في توعية دينية وكده وانت مشفق بصراحة.. ازاى هتوصلهم كده وهم بيفحتوا نفسهم ليل نهار عشان يجيبوا لقة تسد جوع اولادهم...

والله حال الامة باة صعب اووي.. وحال المصريين اقتصادياً باة صعب اكتر.. والواحد مش عارف يعمل ايه للناس دي..

ولا حول ولاقوة الا بالله

الديب يقول...

لا حول ولا قوة إلا بالله

eldoctor يقول...

شوف يا أخى انا حاحكيلك قصة بتحصللى انا شخصيا كل فترة ..
انا عملى يحتم على كل فترة ان اداوم فى الحوادث فترة الجمعة صباحا كل فترة .. و اكون انا و معى اثنان اخرين ..
جرى العرف ان نعمل سويا حتى موعد الصلاة فاذا كان الحال هادىء نسيب واحد و حبذا لو كان من الاطباء الهنود(هنا فيه اطباء هنود كتير) او لو طبيب نصرانى و نروح نحضر الخطبة و الصلاة . اوقات بيكون الثلاثة مسلمين منهم واحد من اهل البلد ..كويتى يعنى
فاحترنا نعمل ايه .. كنا بنعمل ايه واحد يروح بدرى يصلى فى مسجد بعيد بخلص بدرى شوية .. ويرجع و بعدها الباقيين يطاعوا يصلوا فى مسجد ثانى

او نعمل قرعة ..
المهم ان حتى ده ماعجبش بعض الرؤساء و المسئولين (المسلمين) الكلام انك ما تسيبش مكانك و تروح تصلى .. و سبحان الله وقت الصلاة فيه ناس الله يسامحها و احيانا اقول الله ينتقم منها .. مفيهمش حاجة فعلا ييجى علشان الكشف و يقول الطبيب مش موجود لمجرد الاذى و اذا تجرأت و قلت انا اصلى .. تسمع فتاوى عجيبة . انت اجير مالك تسيب مكانك ..
مرة من المرات رديت (لانى لا اجادل السفهاء و العبط .. وهم للاسف كثيرين) و قلت له هل ارجر الذى اخذه فى مقابل العمل ام ان اترك الصلاة ؟؟؟؟؟
فماردش .. ... بس حبيت اضيف حاجة بتحصل فى بلد مسلم ... تحياتى

محمود الدوح يقول...

الحمد لله اننى امسكت دموعى
رجل يقارن بين اكل العيش والصلاة
انا لا الوم على الرجل
لكن الوم عن من اوصلة الى ذلك
اللهم اعنا على ذكرك وذكرك وحسن عبادتك
اللهم اهدنا واهد بنا واجعلنا سببا لمن اهتدى
يارب