الأحد، يوليو 29، 2007

تاج 003

هو في الحقيقة كان يعتبر رقم 004 عشان فيه واحد اللي هو الخاص بإدمان التدوين وطلعت 78 في المائة أهو عدينا التاج ده وصلني من مدونة روح وريحان اللي بنشكرها جدا على التوريطة الثالثة والمرة دي حاكون شرير وحامرره
اسم مدونتك؟
سؤال غريب أمال انت هنا إزاي

لماذا اخترته ..وماهي نيتك من وراء اختياره؟
هو ده السؤال لما اتبعت النظام الغذائي الجديد
وخسيت كدة وبعدين بقيت أتمشى بعد الفجر وأكون لوحدي في الشوارع كثير أصبحت أستأنس بعصافير الشوارع اللي هي بيقولوا عليها بالانجليزي سيتي بيرد وبعدين بقيت أحس بتشابه كبير بيني وبينهم أنا خسيت وهم صغيرين أنا لوحدي في الشارع وباصحى بدري نشيط وهما كمان أنا ابن بلد وهما كمان رمادي كدة ومخربشين مش مرفهين
أما النية من الاسم شيء غير النية من المدونة
هل فكرت في إغلاق مدونتك؟ والسبب؟
هو احنا لحقنا ده احنا لسة 9 شهور تدوين وبعدين المدونة بعد ما بيتكتب فيها تعليق واحد بتصبح ملكية مشتركة بين المدون والمعلق واللي ما قراش تدوينة أرجوكم اسمعوني يتفضل مشكورا يفوت التاج ويتوجه لقسم النصائح والإرشادات
صورتك في المدونة ورمزيتها ؟؟
هي الصورة هي الاسم عصفور رمادي ..دول غلبوني يا اخوانا شهور وانا باحاول أصور عصفور من الشوارعية دول والآخر جبت صورة عصفور ملون واديته وش رمادي

لماذا دخلت عالم التدوين من الاساس؟
من زمان وانا باكتب في ملفات عندي وساعات أسجل صوتيات خواطر عشان أولادي ييجوا يسمعوها لما يكبروا وحصل مشكلة هارد ديسك وكله ضاع وبعدين حصل اهتمام بموضوع التحرش الجنسي واكبه اهتمام بالمدونات ولقيت ياللهول ناس بتستخدم لغة أعوذ بالله وفكر أعوذ بالله وأنا باقول على نفسي ابن بلد؟!!! دول بقة ولاد بلد تانية أكيد ...فقررت أن أدون وعلى الله البلاغ

جمله قيلت لك فى وصف مدونتك؟
والله يا اخواننا كثير قالوا وحسن الظن متوفر وباشكرهم جميعا بس باعتز جدا بقول الفاضل
أمجد شلتوني فوجدت كنزا تدوينيا وهو وصف أكيد مبالغ ولكني أعتز به لأنه صدر من إعلامي وصحافي متميز بالإضافة لكونه مدون وأيضا هي أول مدح تلقته هذه المدونة في وقت كان لا يأتيني تعليقات على المدونة

التعليقات بالنسبه لك ,اهميتها؟
ياه ده احنا طحنا هذا الموضوع بحثا عملت تدوينتين عنه وكان عليهم تعليقات مفيدة جدا
بس حقيقة
بدون التعليقات المدون لا يعرف هل حقق هدفه من التدوين أم لا
وثانيا هي معيار للتصحيح وتحسين الأداء لمعرفة أوجه الغموض أو القصور أو الإحسان حتى
احلى بوست كتبته ...ضع اللينك , ثم اذكر لماذا؟
اللي باحبهم كثير بس أكثرهم اللي كنت بابكي وأنا باكتبهم أحزان1 وأحزان 2 والعولمة 100=92 وحدث في مستشفى الجامعة والعلماء ووسائل الإعلام بس أفضل بوست هو بوست لم اكتبه بل كتبناه بالتشارك جميعا وهو دعوة وملخصه
وبعدين أنا باحس إني باكون منتج أكثر في التعليقات على المدونات الأخرى حتى إني عامل ملف عندي للتعليقات الطويلة اللي ساعات باحطها عند مدونين تانيين أحسن حد يقفل مدونته ويضيعها :)
أفضل بوست قرأته؟ وضع لينكه؟
طبعا كثير جدا على مدار اليوم وإلا يعني هو أنا باضحك على الناس في التعليقات كل واحد بيعالج جانب
بس طالما مصممين هاشير لحاجة مجاملة عشان ما حدش يزعل جوجل وآه من جوجل لصديقي الصغير الكبير ده غير بقة سكايار ده موضوع لوحده
أفضل مدونة قرأتها؟
بصراحة كتير كل مدونة ضفتها عندي في المفضلة هي أفضل مدونة يعني ادخلوا عندي وشوفوا المفضلة - الإجابة منقولة وبعدين أضيف عليها هو مين ده اللي متميز على طول كل واحد بيكون عنده حاجات مبدعة وحاجات أقل إبداعا

حد قل أدبه فى التعليق إيه رد فعلك؟
هو ماحصلش بالدرجة دي لكن لو حصل وكان الكلام ده مسيء في حد ذاته حاحذفه بدون رد وبدم بارد لكن لو إساءة لي شخصيا بدون ألفاظ خادشة أتحقق الأول من قصد المسيء وبعدين أحدد موقفي مع نفسي إذا كان معه حق أم لا عشان أستفيد ولا أحذف التعليق طبعا
افتكرت هو حصل مرة أستاذ حط تعليق كويس بس فيه كلمة خارجة وكنت حاطط عنده تعليق مهم نقد لمقالة له وهو تقبل النقد واستجاب فكان من غير المنطقي ان أحذف تعليقه
أسوأ مدونة؟
يوووه دول كثير جدا بس أسوأهم الذين يتجرؤون بإعلان الكفر ويسخرون من الدين
أسوأ بوست أسوأ مدون...............
معروف

هيحصل ايه لإيميلك لما تموت ؟؟
أو علم ينتفع به

اديت الباسوورد لحد قبل كده؟
مش فاكر بس يمكن الطائر الحزين يفتكر عني
بس أكيد لو كان ده حصل أكيد غيرتها في أقرب فرصة:)
كانت إيه طبيعة علاقتك بيه؟
برضه مش فاكر
اسمك؟
محمد
المشهور بيه وسط اصحابك؟
يعني إيه مشهور:) خليها سر بقة

شخصيتك نوعها إيه؟
مودال هو يعني إيه مودال
السفر بالنسبة لك؟
شر لابد منه أو خير لا يوصل إليه إلا بقطعة من العذاب

وقت فراغك بتعمل فيه إيه؟
هو المقصود بالفراغ أكيد بقة يعني واحد مش لاقي حاجة تشغله فده بيقولوا يفتح الباب ويقفله بس نادرا جدا ما يكون فيه وقت للموضوع ده ووقت فراغي باحب اتفرج على أفلام وثائقية
المود بتاعك؟
كل الأنواع والله كله كله من غير استثناء لكن دلوقت حالا هاديء جدا
الاكلة المفضلة؟
الحمام المحشي فريك الله يصبحه بالخير والسمك ربنا يخليه

الصفات اللي أخدتها من بابا؟
الصلابة في الحق والذاكرة والبديهة والمواجهة والإنصاف والصلع
الصفات التي أخدتها من ماما ؟
كثير أوي ما عدا الصلع

اكتر ست حاجات بكرهها؟
الكذب - الظلم - الإهمال في العمل - التشدد في غير محله - الحيدة - الاستهتار بمشاعر الآخرين-إخلاف المواعيد (7 أحسن

اكتر ست حاجات بحبها؟
المدينة - مكة - الإنصاف - الصدق -الإتقان- العزيمة - المشي برضة سبعة
الشغل بالنسبة لك؟
الإتقان واستمرار الحياة

الانترنت بالنسبه لك؟
صديق أحذره وأحذر أيضا تخليه المفاجيء عني

امرره لمين ؟ وحان وقت التدبيس
أ محمد الجرايحي ,أحمد الدرعة ,المهاجر إلى الله ,رفقة عمر ,أماني ,إمام الجيل ,سكايار الجبار
الدكتور المحترم الصامت سكتم بكتم ,الفاضل وقريني في السن عازف الناي
فتاة الجنة ,بيلا,رينا
وأي حد يتفضل والمذكورين أعتقد حيقوموا بالواجب وأنا اخترتهم بعناية عشان هو ماعداش عليهم حسب بحثي وثانيا وراهم ناس تانية يبعتوا لهم

هناك 32 تعليقًا:

mohand يقول...

السلام عليكم
اجابات جميله بصراحه
واعتقد انها اجمل ما فيها الطبيعه
يعني من غير لف ولا دوران

عجبتي قوي الحته بتاعت اسوء مدونه ااو بوست
كتبت معروف

انا بقي عايز اعرف مين علشان انا مش عارف

وبرضه ايه التشدد في غير محله
معلش بقي عايز شرح
تحياتي

عصفور المدينة يقول...

الله يخليك يا مهند
ارحمني من الإجابة على سؤالك ماهو انت لو كنت قريت الإجابة عند ناس تانية حتلاقيهم بيقولوا
المهم أهو يا سيدي ولو أني عارف انك عارف
http://ctybrd.blogspot.com/2007/02/blog-post_25.html

أما بخصوص التشدد في غير محله فده عايز تدوينة ولكني أسوق لك حديث

ما خير رسول الله صلى الله عليه وسلم بين أمرين إلا أخذ أيسرهما ما لم يكن إثما ، فإن كان إثما كان أبعد الناس منه ، وما انتقم رسول الله صلى الله عليه وسلم لنفسه إلا أن تنتهك حرمة الله ، فينتقم لله به

فكلمة كان أبعد الناس عنه دي فيها شدة في أمر الله
وكلمة فينتقم لله به فيها شدة في الله

أما كلمة اختار أيسرهما فيها ترك للتشدد في غير محله

منورنا

قلبى يهذى يقول...

السلام عليكم
اجابات تدل عن شخصيه بنت بلد :)
حضرتك واضح وصريح واجابات محددة
جزيت خيرا

محمد عبد الرحمن يقول...

سيدى العصفور الحر السلام عليكم أود أن أشكرك على مدونتك الراقية لنظيفة وفعلا تشبه العصفور فى حبه للحرية وتحليقهخ شبه المستمر وتلقائيته
أخوك جديد على عالم التقنية والتدوين وعندى سؤال قد يكون ساذجا ما موضوع التاج دةوكيف أوصله وكما أنه يشرفنى أن تتفضل بالمرور على مدونتى الوليدة

مرة أخرى شكرا على مدونتك النظيفة وعلى سعة أفقك

عصفور المدينة يقول...

قلبي يهذي
مرحبا بك منورة وربنا يعيننا على الوضوح اللي ياما جاب لنا مشاكل
========
طال الليل
ها أنت مدعو للإجابة على التاج

eldoctor يقول...

تسجيل حضور و متابعة

مشروع انسان يقول...

جزيت خيرا على التاج استاذى ولكن اسمحلى انى استلمه بعد ما اكتب عن المدون خانة
ربنا يكرمك
شكرا لانك افتكرتنى بيه
انى احبك فى الله

المهـ إلي الله ـاجر يقول...

طبعا مفيش كلام ولا وصف كتير علي ردودك الرائعة يا شيخ العصافير ويا الحبيب الغالي

ردودك في غاية الروعة والإمتاع

وأنا بما أني لسه مفقتش من التاجين اللي أنت مررتوهوملي من يومين فسأستلم تاجك الثالث عندما أفوق شوية

بس التاج ده رائع وأسئلته عجبتني

مشروع انسان يقول...

بس عايز اقول لحضرتك بجد انا بعتبرك اخ كبير ليا وحكاية انك كنت فاكر ان مفيش بينا حاجز وحصل الموضوع اللى فات ده فعلا مفيش قلت بس عشان تعرف ومتحطش حواجز ولا حاجة ربنا يكرمك انا اقدر
كنت عايز اعرف من حضرتك كام حاجة
اولا حكاية التحليلات دى وانك تعرف مين اللى دخل عندك من المدونين بالظبط بتعرفها منين معلش اعذر جهلى وايه تانى
لما هافتكر هابقى اقول
منذر كان عايز يقعد مع حضرتك اكتر وانا برضه فاقترح نبقى نتقابل تانى ايه راى حضرتك مش لازم يكون قريب يعنى ممكن بعد بكره ههههههه بجد هنبقى نتفق ونطب عليك ربنا يسهل

المهـ إلي الله ـاجر يقول...

عندي ليك هدية يا بشمهندس

http://gallery.johina.net/up/9432/1157329818.jpg

أمــانــى يقول...

أســـتاذنا
بسم الله مشاء الله على التاجات
تصدق حضرتك وانا اقول ليه العصفور ده بسم الله مشاء الله صحته كويسة كده قولت مع نفسى تلاقيه قاعد جنب غيط قمح ولا درة
:D
حأعمله انشاء الله

اسلام رفاعى يقول...

اجابات رائعة

Monzer يقول...

أنا أحلى تدوينة بالنسبة لى، الى حضرتك حكيت فيها عن حوارك مع اطفالك حول المائدة، أنا بحب الحاجت الى فيها نفسية والى فيها تربية، بستفيد منها جدا، وبحاول من وقت للتانى انى أدخل على الأرشيف القيدم كده، لانى متأكد انى هاتسفيد جدا

بس بردهماعرفتش يعنى ايه مودال :))

أنا هاعلفق تعليق بره البوست بصراحة باه :)) هيه
ماشى علشان انا ماعرفش الميل، بس هابقى آخدهمن أي زميل ده بعد موافقة حضرتك

بصراحة احلى حاجة حصلت ليا امبارح
انى شوفت حضرتك وإمام الجيل
لكن للأسف ... ماعرفتش اقع اتعلم منك وأتكم معاكم وأفهم منكم واناقشكم
ان شاء الله الجايات كتير

إيمان الحسيني يقول...

ما شاء الله
إجابات جميلة
بس ليا تعليق على إجابة واحدة
إنك أخدت من والدتك كل حاجة إلا الصلع

معلومة وراثية :
الأم هي إللي بتورث جين الصلع لأبنائها الذكور

:D

غير معرف يقول...

يمكن اول مرة ادخل عندك بس اجباتك تدل على انك انسان رائع ثاحب شخصيه جيدة جديرة ان تكون صديق جيد
احمد الجيزاوى

فن الحياة يقول...


بسم الله الرحمن الرحيم
بصراحة في اسئلك كانت صعبة .. ومكنتش هاعرف اجوبها

بس حضرتك ما شاء الله .. جوبتك عليها كويس اوي (Y)
وعلمتي هاقول ئيه فيها :D
ما شاء الله اجابات مميزة :)

رفقة عمر يقول...

اسفه لتاخير استاذى بس والله انا مش فى البيت
ودخولى على النت قليل جدا
ان شاء الله هاعمل التاج وشكرا لتذكرك لى جزاك الله خيرا
انا سبب عملى للمدونه نفس السبب الى حضرتك دخلت عالم التدوين من اجله

بالنسبه للصلع الاب فعلا هواللى بيورث الصلع اذا كان يحمل هذا الجين
واذا كانت الام تحمله
بييكون فى احتمال قليل جدا لظهور الصلع للابناء لانه صفه متنحيه فى الام
انا درست الموضوع دة بالذات لانى كنت علمى علوم ودراسته فى الاحياء فى الهندسه الوراثيه

Islamist Bloke يقول...

كالعادة

حاولت الاجابات ان تكون مجنونة (الاجابات هى اللى حاولت) ولكن جاءت عاقلة كالعادة.....حكمة ليس لها مثيل فى المعاصرين(حتة نفاق) ومش بس حكمة(شوف الجاية دي) وبصيرة ثاقبة وتطلع فى آفاق المستقبل(أى خدمة البق الجامد ده...جهز شوية تراب عشان الحديث) حَدَّثَنَا مُحَمَّدُ بْنُ الْمُثَنَّى وَمُحَمَّدُ بْنُ بَشَّارٍ وَاللَّفْظُ لِابْنِ الْمُثَنَّى قَالَا حَدَّثَنَا مُحَمَّدُ بْنُ جَعْفَرٍ حَدَّثَنَا شُعْبَةُ عَنْ مَنْصُورٍ عَنْ إِبْرَاهِيمَ عَنْ هَمَّامِ بْنِ الْحَارِثِ أَنَّ رَجُلًا جَعَلَ يَمْدَحُ عُثْمَانَ فَعَمِدَ الْمِقْدَادُ فَجَثَا عَلَى رُكْبَتَيْهِ وَكَانَ رَجُلًا ضَخْمًا فَجَعَلَ يَحْثُو فِي وَجْهِهِ الْحَصْبَاءَ فَقَالَ لَهُ عُثْمَانُ مَا شَأْنُكَ فَقَالَ
إِنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ إِذَا رَأَيْتُمْ الْمَدَّاحِينَ فَاحْثُوا فِي وُجُوهِهِمْ التُّرَابَ





أى أى ....عيني والتراب.........حاسب يا عم عصفور .....مش هاعملها تانى
أى


(:

والسلام

BinO يقول...

حمداً لله
:)
بس معلومة الصلع ديه اللي أشارت اليها طعمة اول مرة أعرفها

وكذا الأشارة الدائمة للسئ ببنان مختفي ظريفة
أصبح تحته خطووووووووووووووووط كثيرة
لعلها تستطيع يوماً أن تمحوه
ولكنها سنة الدفع

جزاكم الله خيراً

طهقان يقول...

أخ عصفور

والله انا مقصر في حقك

سامحني على قلة الزيارة

مشغوليات وانت عارف بقا



تحياتي لك

ibn nasser - ابن ناصر يقول...

اجابات جميلة لشخص جميل

تحياتي

محمد عبد الرحمن يقول...

السلام عليكم أخى الكريم جزاك الله خيرا على التاج والنصيحة أجبت عن أسئلة التاج {العجب أنها لا تظهر إلا من أرشيف الشهر{ونفذت نصيحتك ويشرفنى أن تقبل أرق الأمنيات بخيري الدنيا والأخرة

ياسر سليم يقول...

ده التاج ده جديد

أول مره اشوفه

بس اجابات جميلة

بس ما عجبنيش اجابه السؤال ده

أفضل مدونة قرأتها؟

لأن مدونتى مش فى القايمة :(

الطائر الحزين يقول...

السلام عليكم
ايه يا جماعة هو الكل مركز على الصلع ليه
العقاد يرى ان العبقرى اما ان يكون ذو شعر كثيف أو أصلع
وان يكتب بيدة اليسرى او الاثنين

اما موضوع الباسورد اما انت لئيم بشكل قال يعنى لما بتقول الباسورد فى حد بيلحق يستعملها

حاضر هجاوب التاج وامرى الى الله

بارك الله فيك بجد ويارب ما نتحم من خدماتك ولا من نصايحك
تحياتى

رينـــــــــــا يقول...

السلام عليكم
ربنا يكرمك يارب انك افتكرتنى :)
عجبنى اوى موضوع تسجيل على الكاسيت للاولاد
فكرة جميله واكيد ذكريات هتكون احلى من هنا الصراحه
يارب يارب يخلى السمك امين :D
السلام عليك

Aml Ghonaim يقول...

أستاذى الكريم :
غالبا ما أمر هنا ؛ ولا أعلق ؛
سألت نفسى كثيرا لم ؟ ولم أجد اجابة ؛ ربما لضيق وقتى فى الفترة الأخيرة ؛؛؛
قررت اليوم وأنا أفتح حاسوبى أن أبتدأ بالتعليق على مدونتك ؛ خاصة انى كنت قرأت موضوعك السابق عن تأثير صلاة الفجر ومدى رضا الله عنا ....
غير أنى وجدت تدوينة أخرى ؛
وكانت اجابة التاج كما توقعتها من فاضل مثلك ؛ نشرف بوجوده بيننا ...
دمت لنا ؛
وبارك الله لك فى بناتك ....
ولا حرمك أجر الدلالة على الخير .....

عصفور المدينة يقول...

eldoctor
حبيبي أضاء جنبات المدونة وربنا يمتعك بالصحة والعافية
-------------
امام الجيل
اوعى تنسلى
ا-------------
المهــ إلي الله ــاجر
جزاك الله خيرا يا شيخنا
واوعى تجاوب التاجات ورا بعضها
والناس طلبوا إرجاع الصورة الأصلية معلش بقة يابوحميد
-------------
أمــانــى

عصفور مربرب عشان ابن ذوات بس واخد وش رمادي
-------------
اسلام رفاعى
أنت أروع
-------------
Monzer
حبيبي منذر إن شاء الله نجتمع ونتواصل
-------------
طـعـمـة

أم أب أهو العملية بتسحب بس انت كدة بتهدي النفوس عشان والدتي عايشة ووالدي توفي رحمه الله
-------------
احمد الجيزاوى
مرحبا بك صديقا رائعا
-------------
فن الحياة

اوعى تغش الإجابات انت استاذ في المواقف أساسا
-------------
رفقه عمر
الصفات المتنحية كلها طلعت في أنا
-------------
Islamist Bloke
وصلك التراب يا أحمد
أحبك في الله
-------------
BinO

ببنان مختفي إيه يا بينو بس دي الناس كلها عارفة
-------------
طهقان
مشرف
-------------
ibn nasser - ابن ناصر
أنت أجمل وسررت بلقائك جدا
-------------
طال الليل
جزاك الله خيرا
-------------
ياسر سليم

تم التحديث يا أستاذ
-------------
الطائر الحزين
شفت بقة أنا عارف انت اللي فاكر
-------------
رينـــــــــــا
تلحقي تجاوبي قبل ما تسافري
-------------
اصرار أمل
أختي منورة والله بارك الله فيك وحتى الذين لا يعلقون أحس بهم في توفيق الله لي والله المستعان

-------------

غير معرف يقول...

اجابات جميلة يا استاذ محمد

عجبني اوي حتة التسجيل الصوتي واضح ان الموضوع معاك قديم موهوب يعني

ودي حقيقة فعلا

نسرين - أمة الله يقول...

السلام عليكم
الطبيعى والمتوقع والمعهود على حضرتك واضح صريح امين
وتعليق امجد شلتونى فى وصف مدونه حضرتك
فوجدت كنزا تدوينيا
لا مبالغه فيه
وحمدلله على سلامه العصفوره دى اجمل من التانيه
ربنا يكرمك ويجازيك خير ان شاء الله

ftataljanna يقول...

معلش ما رديتش بدرى شوية

انا بعمل التاج وان شاء الله هارد عليه قريب جدا

جزاك الله خيرا

غير معرف يقول...

الشغل بالنسبة لك؟
الإتقان واستمرار الحياة

بجد وجهت نظر تحترم

روح يقول...

السلام عليكم
انا شكلي كدة جيت متاخر اوي
معلش المعذرة يا بشمهندس
بس اجاباتك ممتعة ودايما بيتخللها النصيحة
وحضرتك كدة هتخلينا كلنا
نسيب التدوين ونتجة للتدوين الصوتي
فكرة جميلة بجد بورك فيك
وسامحني في تاخيري وياريت تفتكرني بدعوة
تــحــيــاتـي