الأربعاء، يوليو 04، 2007

قانون مورفي

أعوذ بالله ...............
قرأت تدوينة رائعة عند نوني
حيث قررت تلك الفتاة العاقلة أن تترك العمل وتعمل من منزلها ونعما فعلت ولكن أول تجربة لها حدث لها ما أكل وقتها
ذكرتني تدوينتها بقانون مورفي
Murphy's law
وهو مثل شعبي في الثقافة الغربية يقول "اذا كان هناك أكثر من نتيجة محتملة لعمل أو مهمة، وإحدى هذه النتائج ستؤدي إلى كارثة او نتيجة غير مرغوب فيها، فهناك من سيفعل ذلك العمل بتلك الطريقة.

نعم هو قانون تشاؤمي ولكنه يحدث دائما في مجال الأعمال وخاصة في مجال المعلومات - لا حول ولاقوة إلا بالله

عايز تجيب البيانات من على كمبيوتر يعمل بنظام تشغيل شاذ والجهاز شاذ- الشبكة لا تعمل تدور على السويتش تلاقيه فاصل كهرباء تدور على الوصلة تجيبها تشغله يطلع بايظ ... السي دي موجود ولا يعمل - يوجد تيب يعمل ولا يوجد أحد عنده تيب درايف لأجل قراءة الشريط ناخذ موعد آخر ما ينفعش الشهر ده يوم 20 القادم نروح يوم 20 نعلق على الملف حياخذ 24 ساعة نمشي ونسيبه يقطع لوحده والهارد ديسك يتملا ناخذ معاد تاني لا 20 اللي بعده عشان ما ينفعش الشهر ده طيب يوم 22 لأ خليها 30 نجيب البيانات يطلع الملف غير قياسي نعمل له برنامج يفكه يطلع البيانات العربي اللي فيه متشفرة بطريقة شاذة غير قياسية ابعتوا لنا عينة بيانات على الورق عشان نفك الشفرة نفك شفرة العربي تطلع الأرقام متخزنة بطريقة غير قياسية نجرب كل طريقة خلقها ربنا عشان نفك شفرة الفلوس دون جدوى
نحاول ننزل نظام التشغيل الشاذ على جهاز محاكاة وقد كان نحاول ننزل قاعدة البيانات الشاذة ما ينفعش مش عارفين نحاكي الاسطوانة نرجع تاني نحاول نجيب البيانات بطريقة أخرى وقد كان .....هيييه...فيها مشكلة بسيطة تاخذ يومين لمعالجتها ومن ثم البداية في نقلها

يوم جمعة تكون صاحي بقالك يومين وترجع من صلاة الفجر عايز تنام تيجي من الساعة 9 تلاقي كل الناس افتكرتك وتتصل بيك ويظلوا يتصلوا ويتصلوا لازم ترد..... ترد وبعدين تحاول تنام الكهرباء تقطع تصحى على صوت التكييف بيطفي تفضل كل شوية تصحى تبص على الكهرباء لا زالت قاطعة ......آه تيجي الكهرباء فاضل ساعة على صلاة الجمعة أنام ساعة إلا ربع واصحى ألاقي المية قاطعة تنزل تدور العربية ما تدورش تدوخك على ما تدور تروح المسجد ما تلاقيش مكان تركن ترجع بعد الصلاة فورا عايز تنام وا زوجتك تقول لك مش حتروح فرح أخت مرات أخوك حاضر مش بعد العشاء؟ طيب أنام بقة فيه فرح عند الجيران والجيران التانيين بيصبوا السقف ....هو نهار أبيض أصلا!!!!!!


يوم كنت في السعودية ولازم أسافر ولي فلوس عند واحد هات يا عم الفلوس ...طيب اعمل لي الشغل الفلاني ...أنا مسافر الصبح ....معلهش تروح تفك الجهاز تفتح الكرتونة بعد ماقفلتها تفك اللزق بالمفتاح يتكسر المفتاح مفتاح سيارة زميل استعرتها منه ....أيوة يا محمد معاك نسخة تانية من مفتاح السيارة ....لأ..لميت المفتاح المكسور مافيش تاكسي رضي يقف أروح مشي ...الراجل ينجح بأعجوبة في عمل المفتاح..تيجي تشغل الكمبيوتر فيه مشكلة...الخ


مرة تانية كنت راجع من سفرية أول يوم رمضان عايز أفطر في البيت وأصلي التراويح ...أوصل المطار قبل المغرب بساعة أتفق مع التاكسي يقول لي نفطر هنا أقول له لأ أبدا.......نطلع نعمل حادثة على بعد كيلو من المطار...العربية تتدمر طيب يا عم أستأذن ربنا يخلف عليك ....لا استنى حاجيبلك عربية قريبي .....يتصل بقريبه ييجي قريبه بعد ساعة نطلع ....الطريق يتعطل طبعا أوصل بعد العشاء بكثير


القائمة طويلة جدا وكل الزملاء اللي في هذا المجال يعرفون هذا القانون جيدا وممكن يضربوا أمثلة كثيرة

دايما ما تقعش كوباية شاي غير على ورق مهم

دايما الانترنت يقطع ساعة ما تكون عايز تبعت إيميل وحتى بعد ما تبعته مايوصلش مع إن الرسايل الدوراة عمرها ما بتتأخر
دايما أي جهاز تحاول تفكه يطلع فيه مسمار على الأقل معصلج
دايما الهاردديسك يضرب لما تنسى تعمل نسخ احتياطية لمدة أسبوع أو أكثر
دايما حذاءك يتسرق لما تسيب مسجد وتروح برجليك مسجد تاني
وكما يقول المثل الانجليزي إن المطر ينزل حينما تغسل سيارتك

ملخص قانون مورفي
-إذا كان شيء غير مرغوب فيه محتمل أن يحدث فسوف يحدث

-إذا كان هناك عدة احتمالات لأشياء غير مرغوب فيها فالأسوأ سوف يحدث

- إذا كان هناك شيء غير مرغوب فيه غير محتمل الحدوث فإنه سوف يحدث

- إذا توقعت ان هناك أربع احتمالات لأشياء غير مرغوب فيها وأخذت احتياطك فإن شيئا خامسا غير مرغوب فيه سوف يحدث

- إذا تركت الأشياء تسير لوحدها فإنها تتحول من سيء إلى أسوأ
-إذا كانت الأمور تسير على مايرام فإنك حتما نسيت شيئا

- دائما العيوب الخفية تظهر
-أي شيء سيء يحدث فإنه سوف يحدث ثانية وربما اسوأ

خلاصة الفوائد من القانون

أولا نقول "كل شيء بقدر حتى العجز والكيس بقدر" رواه مسلم
ثانيا : نقول بقول الله عزوجل "لقد خلقنا الإنسان في كبد"



إن الذين وضعوا هذا القانون لم يريدوا به التشاؤم أو القعود عن العمل ولكنهم استخدموه في التصميم الاحترازي والذي يضع في الحسبان كافة الاحتمالات السيئة - قدر الإمكان- وأيضا أخطاء المستخدمين.
وفي المقال من ويكيبديا أشار إلى تصميم الاسطوانات مثلا بحيث لا يتم تركيبها في السواقة بطريقة خاطئة منعا لأخطاء المستخدم والتي قد تتسبب في تلف السواقة وهذا بناء على جزئية في القانون أنه إذا كان هناك احتمال أن تركب خطأ فسوف يأتي المستخدم الذي يضعها خطأ

وهم أيضا يعتمدونه في الميكانيكا يقولون إذا كان هناك قطعة يمكن تركيبها خطأ فسوف يأتي الشخص الذي يقوم بتركيبها خطأ

وقد تعرض هذا القانون لانتقادات كثيرة نظرا لأنه غير تفاؤلي وأنه لا يقدم شيئا مفيدا وبهذا المعيار المذكور أعتقد أنه يقدم شيئا مفيدا :

أن نحاول أن نضع كافة الاحتمالات التي نستطيع تصورها وهو ما أشرنا إليه سابقا في تدوينة استعن بالله ولا تعجز ونقوم بعمل ما يجب والتوفيق بالله.

وبعضهم قال إن قانون مورفي لا يعمل إلا في الأنظمة التي تأخذ قانون مورفي في اعتبارها
أي بمفهوم "اللي يخاف من العفريت يطلع له" وإن الذي لا يعلم بوجود القانون أصلا أموره تسير على ما يرام وهذا ما عبروا عنه أن النظام الذي يقوم عليه مجموعة من المبتدئين أو البسطاء - دي ترجمتي المهذبة- لا تحدث فيه أي مشاكل وهذا ما أسميه أنا "توفيق المبتديء"

وفي النهاية أؤكد أننا نعمل بمنهج
استعن بالله ولا تعجز
يمكن زيارة هذا الموقع ويوجد مواقع كثيرة شبيهة لتطبيقات عملية على قانون مورفي

هناك 31 تعليقًا:

ftataljanna يقول...

قانون مورفىى ايه

يا خبر

ده الحوادث اللى بتحصل لحضرتك دى عجيبه بس على فكرة كل الناس بيحصل لها زيها عادى يعني

انا مثلا كان عندى امتحان ومادة كده اعوذ بالله طويله بطريقة مش عايزة اقول لك

وكان ايه قدامها يومين بس
وبقى عذاب المهم

المادة دى حضرتك فى اليومين دول حصل عندنا ظروف كنت بعيط سيادتك علشان عايزة اذاكر ده اللى هو انا اللى مش بحب المذاكرة اصلا بعيط علشان اذاكر الحمد لله الظروف دى راحت لحالها ليلة الامتحان

عارف لما الظروف روحت ايه اللى حصل الكهرباء قطعت

ههههههههههه

والله نكته هم يبكي وهم يضحك زى ما بيقولوا يعني والحمد لله راحت

بس ما تقلقوش حليت كويس ازاي بقي بفضل ربنا اللى قريتوا بعد الفجر جه فى الامتحان الحمد لله

المادة دى كانت
public administration
يعني حفظ وتسميع للركب بصراحة ربنا ستر الحمد لله

بهلوله يقول...

سعيده
انا كنت ماشيه من هنا قلت امسى

عصفور المدينة يقول...

فتاة الجنة
هوة ده قانون مورفي ولازم احنا لما نخطط نخطط على الاحتمال الأسوأ
===========
بهلولة
سعيدة وسعيد

BinO يقول...

أي يا أستاذ كده مش حنلاحق نعلق
:)
هو فيه كلمات أؤمن بها تماماً تقول
تفائلوا بالخير تجدوه
ولكن تطبيق مورفي في مجال الصناعة يعتمد علي قاعدة " المستخدم غبي " يعني لا تعطي المستخدم فرصة أن يفكر , خلي للمستخدم طريق واحد بس
:)

الطائر الحزين يقول...

السلام عليكم
بما انى لسه ما حكيتش حكايتى مع تركيب الستارة بتاعة البلكونة وكنت ناوى اقولك عليها يبقى هعملها فى تدوينة هى والدكتور اللى مات من 15 سنة مع بعض بس لما ارجع من كشف الاعادة

ستارة بقالها شهر وشوية مش راضية تركب

تحياتى

أمــانــى يقول...

اســتاذنا
ليه كــده يا أســتاذنا أهئ
قوانين ايه بس ده الحاجات اللى بيحصل للواحد بيعدى ويفوق كل القوانين اللى فى الدنيا دى
:D

بس الواحد يقول الحـمد لله على حال واعوذ بالله من حال اهل النار

غير معرف يقول...

هو حلو القانون ده ان الواحد يعمل حساب المشاكل السوده والمهببه اللى ممكن تقابله فى اى حاجه بيعملها
بس وحش اوى انه يمنعنا نشتغل او يخلينا نقول ماهى بيظه بايظه او خلاص اتشائمت من الشغلانه دى ومش هكملها ... هى بينه من اولها
عن نفسى مؤمنه جدا بمبدأ الحيطه والحذر والقانون لايق علي المبدأ ده
شكرا

Unknown يقول...

هيه مواقف كتتيره اوي من دي النوعية دي وخصوصا في البرمجه ومشاكلها

و في نوعيه من الناس عندهم القدرة علي استنتاج تلك المسارات السوداء ألا وهم الTesters بتلاقيهم يطلعولك حاجات غريبة فعلا مكانتش تخطر علي بالك

خمسة فضفضة يقول...

السلام عليكم ورحمة الله وبركاته

تقريبا كده قانون مورفي ده اتعمل تفصيل علشاني .......عاااااااااا

دايما 90% من الكوارث دي بتحصل معايا

ولو حبيت احكي مش هاخلص والصفحه مش هاتكفيني
هي حاجات شبه بتاعت حضرتك كده بس علي اشد شويه


تحياتي

sakayar يقول...

أنا متأكد من إن الناس دي ما تقصدش بيه التشاؤمية أكتر منها خد بالك اللي مقدر هيكون لو عملت بتنجان
لكن من الآخر طالما احنا بنؤمن إن ماشاء الله كان وما لم يشأ لم يكن فاحنا ملناش غير بالأخذ بالأسباب والنتيجة مش بتاعتي بقى
تحياتي دايما عندك جديد كده
ربنا يبارك فيك

Noony يقول...

يا خبر
كل دة حصل؟...يا خبر يا خبر
أولاً...جزاك الله خيراً على الهدية دي
بجد تحفة
:)
ثانياً...تكملة للأسبوع اللي فات عندي..حاجة حصلتلي النهاردة الصبح ..مش هقولها عندي في المدونة...هقولهالك هنا بس
امبارح العصر أختي اتصلت بيا بتقولي عندي مقابلة شغل النهاردة الصبح في العين السخنة...مكنتش عايزة أسافر بس في الآخر قررت إني أسافر أشوف نظام الشغل دة...وصلت 10:30 بالليل السويس..فاضل أعرف هروح السخنة إزاي...الحمد لله ربنا يسر ورحت مع خالتي الساعة 7 الصبح...السعاعة 10 الصبح جاتلي مكالمة ان الراجل اللي هيمتحني تعب فجأة ومجاش..وأجل المقابلة يوم الأحد ومش مؤكد...أخدت شنطتي من البيت ومعايا خفي حنين ورجععت القاهرة تاني...مع العلم إن احنا كدة كدة مسافرين يوم السبت الصبح السويس
كنت فرحانة أوي
هههههههههههههههههههههه
الحمد لله على كل حال
في رأيي المتواضع، أهم حاجة في الموضوع هو الرضا
والله ساعات كتير أوي الدنيا كلها تتكرب فوق راسي...بسيب كل حاجة ومعملش ولا حاجة...ربنا بييسر الأمور وكل حاجة تتحل لوحدها

أنا فعلاً مكنتش أعرف قانون مورفي..بس عجبني أوي
وعجبني أكتر أسلوب حضرتك في شرحه

:)
شكراًَ مرة تانية
نوني

Egyptian يقول...

مورفي اللي انت بتتكلم عليه ده يبقى من تلاميذي

أنا صاحب النظرية اللي بتقول" الإنسان متشائم بطبيعته"

النظرية دي انا لسة مألفها حالا
نيااهاهاهاهاهاهاهاو

غير معرف يقول...

أخى الفاضل: عصفور المدينة

السلام عليكم ورحمة الله وبركاته
قرأت تدوينتك وتعجبت لهذا الكم الهائل من العناد....
أقصد عناد المشاكل معك
سبحان الله
أنا دائماً أضع أمامى حديث النبى صلى الله عليه وسلم
تفاءلوا بالخير تجدوه

والحمد لله

بارك الله فيك أخى الكريم
أخوك
محمد

عصفور المدينة يقول...

========
مهندس بينو
معلش حبيت أردم موضوع الأحزان
طبعا التفاؤل شيء والشغل على السوأ في الصناعة والهندسة شيء آخر
طلعا أنا راجل متفائل ولكن لازم نعمل حسابات على أخطاء الآخرين
ولا نسيب الأمور بالبركة (كما يزعمون) وهي بالتفريط
========
الطائر الحزين
أنا وانت ذكرياتنا طبعا تملأ كتاب عن هذه النظرية
========
أماني الشتاء
أهلا بيك في فريق مورفي
وأسأل الله أن يعيذنا جميعا من النار
========
حرائس الحقيقة
انت جبتي الخلاصة
لا نقعد عن العمل مع أخذ الاحتياطات
========
الدرعة
بيقول لك بعضهم بيكون عنده سحابة رمادية على عينيه كفيل إنه يجيب أي سيستم داون في خلال 5 دقايق
========
دكتورة فضفضة
انت بما إنك ليلية أكيد بيحصل لك كدة كثير
========
سكايار
والله باحبك
وخاصة تعليقك على اللي فاتت انت الوحيد اللي ايدتني (شرير)
=======
نوني
شرفتيني وشكرا قبولك الهدية المتواضعة وشكرا ع البونص
========
مصري
لا للتشاؤم نعم لافتراض الأسوأ والتخطيط
=======
أ محمد الجرايحي
أنا متفائل بس الناس اللي في المجال الهندسي عامة عارفين إن التفاؤل في الشغل له اضراره
وبعدين معي مؤيدين كثير كما تلاحظ

Unknown يقول...

بتحصل فى احسن العائلات

هى اينعم التدوينة اصابتنى بالتوتر
بس كويس ان الواحد يخطط

لكن من غير تفاؤل صعب نتحرك

بافتراض الأسوأعلى طول الخط هانتعقد

بالنسبة لى بآخد بالأسباب وبيكون عندى
حسن ظن وطبعا مع عدم تواكل والأمور بتمشى

عاوزين تعويض بقى لأننا مش عارفين ايه اللى ممكن يحصل معانا بعد ما عرفنا القانون وتم استبعادنا من توفيق المبتدئ

عصفور المدينة يقول...

استاذة مناجاة
فيه توفيق أيضا لغير المبتدئين ولكنه مرتبط
التوكل على الله
التخطيط السليم
العمل الدؤوب

ترك الثقة بالنفس
كثير من التشاؤم وافتراض الأسوأ

كرم مسلم يقول...

السلام عليكم

استعن بالله ولا تعجز

Islamist Bloke يقول...

عم عصفور


فعلا يا عم عصفور ساعات بتحصل بس اقولك.......... لما الواحد يتوكل على اللى بيلاقى كل خير


وشكرا للمعلومة الجميلة......... جزاك الله خيرا وزاد فى علمك

والسلام

لحظة يقول...

ده زي المثل بتاعنا
المنحوس منحوس ولو علقوا على بابه فانوس؟
عموما لما ده يحصل
ربنا يلهمنا جميعا نقول قدر الله وما شاء فعل
بس برضه مهم ناخد بالنا على قد ما نقدر
والباقي على الله
الحمد لله

عازف الناى يقول...

الاخ عصفور المدينه
بما ان علاقتى بالكمبيوتر سطحيه وضعيفه
اردت ان اسجل تحياتى لك

عازف الناى يقول...

اضافه
بعد قرائتى للموضوع عرفت انه لايخص الكمبيوتر وحده
ولكن يا اخ عصفور شكل قانون مورفى ده انه قانون فلسفى لانه يحتمل حدوث اشياء من الممكن حدوثها يعنى لم ياتى بجديد
وارجوك انت راجل عاقل سيبك من مورفى وتذكر قول الله سبحانه وتعالى
قل ما يصيبنا الا ما كتب الله لنا

Maha يقول...

تدوينة متميزة جدا .. فعلا سبحان الله أسوأ الإحتمالات اللى الانسان بيكون خايف منها بتطلعله

فيه مثل تقريبا بيقول حاجة زي كده .. اللى يخاف مالعفريت يطلعله = قانون مورفي :D

أحلى حاجة .. إن المؤمن بجد عارف إنه يفر من قدر الله إلى قدر الله .. وكله له خير

جزاك الله خيرا :)

eldoctor يقول...

على فكرة قانون ميرفى باطبقه فى حاجات كثيرة فى عملى و فى احوال كثيرة جدا يبنطبق... بس بصورة مختلفة .. يعنى وجهة نظر

غير معرف يقول...

اول ما قريت مواقفك يا استاذ عصفور قلت يا ستير يا رب ومن توالي المواقف قعدت اضحك ايه دا كله

بس تحليلك النهائي للقانون افدني جدا لان احتمالات حدوث الاسوأ تنجح العمل اكتر واحنا بنعمله

ومتنساش الفرح الله يخليك يا استاذ عصفور بتاع اخت مرات اخوك
ههههههههههههه

عصفور المدينة يقول...

إخواني الأعزاء
قرأت لابنتي اليوم التدوينة وشرحتها لها وفي خلال الشرح كان هناك كوب ماء على الأرض فقلت لها
إذا كان هناك كوب ماء على الأرض وكان هناك احتمال أن يأتي طفل فيوقع كوب الماء فإنه سوف يأتي طفل ويوقع هذا الكوب وفي نفس اللحظة خرج الأستاذ الصغير مسرعا من الغرفة وصدم كوب الماء
قلت لها يبقى كان الصح ألا يوضع كوب الماء على الأرض
==========================
كرم مسلم

وعليكم السلام
جزاك الله خيرا
============
Islamist Bloke

جزاك الله خيرا هي عشان ساعات بتحصل بنقول المفروض التخطيط السليم يكون على الاحتمالات السيئة
والسلام
===========
لحظة

المسألة مالهاش دعوة بالنحس هي تشديد في الاحتمالات من أجل الاحتياط
مرحبا بك
==========
عازف الناى
نؤمن بالقضاء والقدر والموضوع مش فلسفي ولاحاجة هو زي ما حضرتك قلت بيتكلم عن إن احتمال الحاجات الوحشة تحصل فنكون محضرين لها قدر الإمكان فإم اصابك شيء فلاتقل لو أني فعلت كذا لكان كذا وكذا
==========
Maha
أحلى حاجة .. إن المؤمن بجد عارف إنه يفر من قدر الله إلى قدر الله .. وكله له خير

جزاك الله خيرا وإيانا
=========
eldoctor
دكتور في مجال الطب أصلا هو أولى المجالات بتطبيق هذا القانون
========
مصراوي أوي

الغرض من المواقف هو إثبات النظرية وده شيء قليل مما يحدث
بل إنني مثلا عندما أفك مسمار أقول بصوت عالي طبعا مش حيفك ويالسعادتي حينما يفك

نقطة مية يقول...

ممكن لو كنت قدييييييمة جدا..كان القانون ده بقى باسمي..
:-)

بس كل شىء مكتوب عند رب العباد
و تفاءلوا خيرا
تحياتي

صاحب البوابــة يقول...

اضحكتني اخي الحبيب

تخيلت نفسي يوما مكانك وامر بتلك الظروف

:)

كان الله في عونك

ftataljanna يقول...

انا سمعت قريت يعنى فى تعليق هو كان طلب الى حد ما ان حضرتك تعمل مدونة فى النحو معنى كده ان حضرتك دراستك فى النحو ؟

ده سؤال

كمان كان ليا طلب من حضرتك ياريت هو طلي غريب يعنى بس كنت عايزة حضرتك تكتب لنا بوست عن حساب الجمل فى اللغة العربية يعني

اللى هو

ابجد هوز حطى كلمن سعفص قرشت ضغظ ثخذ

مش هما كده

وارقامهم وكده يعى يا ريت يافندم ولو حضرتك مش فاضى فكانك عملته مافيش مشكلة خالص

:D

Sally يقول...

بجد ربنا يكون في عون حضرتك
بس أنا كمان بتحصلي مواقف عجيبه كدا وبالذات مع الكمبيوتر
بس
القانون دا فكرني بمادة اسمها الخطر
هي اشائم بمراحل من القانون دا
يالا الله المستعان

نـــــــور يقول...

أضحك الله سنك أخي الفاضل

بجد تدوينة جميلة جدا .. وسبحان الله الحاجات دي بتحصل احيانا

تبقى خايف من حاجة تقوم تحصل .. وخصوصا حكاية الكمبيوتر والنت دي

:) جزاك الله خيرا

مهندس مسلم يقول...

طبعا كل الكلام ده بيحصل وبالزات في مجال الهردوير "انا اشتغلت حوالي سنه وبعدين لقيت نفسي في البرمجه"

واعتقد ان قانون مورفي اتحط للمتفائلين مش للمتشائمين

المتشائم لو اقتنع بالقانون ده هينتحر فورا
اما المتفائل فعلى طول هيبدأ يفكر ازاي يتفادى احتمالات الاخطاء واكيد هيوصل لحل وغالبا هما دول المخترعين