من يوميات سقراط

اتنين عمال بيكسروا ويظبطوا عشان يبلطوا الرصيف عشية زيارة رئيس الوزراء للمدينة
واحد شاب بعضلات والتاني كبير في السن شوية
عصفور (مقبلا عليهما):عداد السيئات بتاعك شغال على آخره
الكبير : ليه بقة يا عم الشيخ هو كل بلاطة بسيئات
عصفور : أستغفر الله أنا قلت كدة ده هو عمال يتحرش باللي رايحة واللي جاية
الكبير :صحيح قل لي يا عم الشيخ انا عايز اسألك هو حرام عليه؟
عصفور : أيوة حرام والله
الكبير : طيب لو كان النفر بيفك عن نفسه بكلمتين حرام برضه؟
عصفور : ترضى إنه يفكهم على بنتك؟
الكبير : بنتي ؟... لا ... بس كل واحد عارف نفسه على إيه بنتي راجل بميت راجل
الشاب : والله أنا بقوله كدة .... طيب ما هم اللي مش متحجبين
عصفور : طيب وافرض يعني كل البنات مشيوا يعني يعني من غير حجاب يبقى لازم كل الرجالة تعاكسهم يعني البنات هم اللي سايقين البلد؟ يعني يضلوا البلد كلها تضل؟ مش فيه حاجة اسمها الواحد عنده مبدأ؟
الكبير : طيب صحيح يا عم الشيخ عندنا في البلد الست بتقول أنا راجل واقعد في وسط الرجالة وانا عارفة نفسي على إيه يبقى حرام عليها؟
عصفور : مش عارف والله قول انت
الكبير : طيب افرض رحت لابن عمي البيت ولقيت مراته في البيت لوحدها هي والعيال وعندي مصلحة منه وهو مش موجود أرجع يعني؟ وهي مصممة إني أدخل
عصفور : الرسول عليه الصلاة والسلام بيقول "الحمو الموت" يعني قريب الزوج دخوله على زوجة قريبه = الموت
الكبير : بس الستات عندنا محترمين
عصفور : يعني مبيحصلش حاجات غلط أحيانا؟
الكبير : لا أبدا
عصفور : والله؟ طب عينك في عيني كدة ما انا شيخ بقة مش عارف حاجة
الكبير(ضاحكا) : سواعي بيحصل حاجات
عصفور : طب وليه المغامرة بقة.....؟ احنا ضامنينك وضامنينها بس مش ضامنين الشيطان
الكبير : صح معاك حق ... طب ما هي بتزعل وتقول هو انا مش راجل والا ايه ده انا ارجل من ميت راجل
عصفور(مودعا) : الغلطة على ابن عمك ... حد يتجوز راجل يا راجل؟