الخميس، أبريل 26، 2007

جيراننا اللي فوق

موضوع قفل البوابة عندنا موضوع مهم
جم جيران سكنوا فوق وهم بينقلوا فضلوا كل شوية حد يخبط ويستسمحنا ياخذ مفتاح البوابة أو حد أولادي ينزل يفتح لهم
الموضوع ده نرفزني جد ا تاني يوم تالت يوم المهم طلبوا مني المفتاح قلت لهم خذوا المفتاح اعملوا عليه....حاجة تنرفز
طيب بلاش تروحوا تعملوا عليه انا حاعمل لكم ثواني وراجع رحت عملت لهم نسختين
خرجت ورجعت لقيت حد بيخبط .....المفتاح لوسمحت
هو حضرتك تبع الناس اللي انا عملت لهم المفاتيح؟ أيوة.... طيب اتفضل كدة عليك واحد...معلهش أنا آسف
المهم تاني يوم طول النهار جرس وعيالي طالعين نازلين يفتحوا البوابة ويقفلوا البوابة...
بصوا بقة انتم مش مسئولين عن البوابة أي حد يخبط يرن تجاهلوه وآخر مرة دي حد يفتح لحد فاهمين
تاني يوم لقيت عيالي كل شوية طالعين نازلين يفتحوا البوابة بمنتهي الأريحية ....أنا مش قلت ما حدش يفتح البوابة لحد؟
قالوا إن هؤلاء الجيران هم عبارة عن امرأة كبيرة في السن توفيت ابنتها وزوجها في حادث سيارة وتوفي معهما ابنتهما أو اثنين من أبنائهما وأن هذه السيدة أتت تقيم هنا ليكونوا قريبين من أقربائهم مع ابن وبنت المتوفاة واللي هم اصلا مصابين في الحادث والبنت بتعمل عدة عمليات ولازال الولد والبنت لا يعلمان بوفاة والدهما ووالدتهما
وناس كثير بتيجي تزورهم وبيسيبوا البوابة مفتوحة
والسر في طلب المفتاح كثيرا وضح وأنا اللي طلعت........

وطبعا لما بالاقي البوابة مفتوحة لا اعترض بل ربما لو جاء ضيف انزل انا افتح
والحمد لله على العافية

هناك 17 تعليقًا:

الطائر الحزين يقول...

الحمد لله على نعمائة . اعلم ان الخير يسير خلفك متى كنت وهذا باب حسنات مفتوح اغترف منه قدر طاقتك بالمباشرة لهم عن طريق اولادك وسؤلك عنهم .
ذكرتنى بجارة لنا فى بيتنا القديم كانت عمياء وطانعه فى السن ساكتب عنها ان شاء الله
بارك الله فيك

أحباء فى الله يقول...

جزاك الله كل خير أختى على حرصك على عمل الخير
وربنا يجعله فى ميزان حسناتك و تسعدى به يوم العرض إن شاء الله

عصفور المدينة يقول...

على فكرة صاحب هذه المدونة رجل وليس سيدة
عصفور وليس عصفورة:)
وعلى فكرة أنا قصدت من وراء التدوينة أننا احيان كثيرة نرى الأمور بنمنظورنا الخاص ونقيم الأشخاص وتصرفاتهم بانعزال عن تفهم ظروفهم وعن الاحتمالات التي ممكن تكون تعذرهم
لو مشينا المنطق انا كنت منفعل جدا من تصرفاتهم لكن لما تراعي ظروفهم........

Mohamed A. Ghaffar يقول...

تحياتى لك على تربيتك اولادك
اما شفت تعليق احباء الله اتخضيت وقلت ينهار اسود وانا اللى فاكره طول الوقت ده راجل ضربت بعينى كده تحته حمد ربنا

خالد وليس بخالد يقول...

السلام عليكم
اخونا المهندس محمد
فضلا -وليس امرا- راجع ايميلك

khadiga يقول...

فعلاً
ساعات بيبقى الشيطان عامينا عن خير لينا جايلنا من ورا حاجات
ممكن نكون احنا متضايقين منها جداً
وعجبتني جداً كلمة الطائر الحزين
ده بااااب مفتوح اغترف منه قدر طاقتك
عموماً بوست واقعي
جزاك الله خيراً

BinO يقول...

هي هي هي هي
جامدة جداً
معلش يا أستاذنا جل من لا يسهو
سبحانه وتعالي
بس جزاك الله خيراً

abdul-salam يقول...

قدر المرء يعلو بمقدار إدراكه لظروف الاخرين ، ولذا تجد رسولنا الكريم يشفق على المشركين واليهود لعلمه أنهم في معاناه نتيجة بعدهم عن الايمان والقرب من الله والذي هو بمثابة قمة النعم التي ينعم بها المسلمون بقربهم من الله ،
وجزاكم الله خيرا لرجوعك الفوري للحق عند علمك بالظروف ، والحمد لله الذي أعطاك الصحة وهيئ لك الظروف للمزيد من الحسنات ،وربنا يجعل تعبك وتعب أولادك في ميزان حسناتكم إنشالله،،
واضح أن أبواب الخير لديك في إزدياد مستمر ياباشمهندس

علا يقول...

اللي حصل لك ده يا باش مهندس بيسموه في مجال التنمية البشرية Paradigm Shift
و ستفين كوفي نفسه حصل له موقف مشابه و بأوا يضروبوا بيه المثل لما ييجي يشرحوا ازاي احيانا بيبقى مطلوب نبص للأمور من وجهة نظر الطرف الآخر عشان نفهم.. و نتفهم.

عصفور المدينة يقول...

جميع الأخوة المعلقين جزاكم الله خيرا
الأخت خديجة والأخت علا فعلا وضعا أيديهم على الغرض من التدوينة
والوعي بهذه النقطة بيريح كثيرا وهو أولا مفيد في الدعوة والنقاش والتماس الأعذار لللآخرين والنجاح في التواصل معهم والله الموفق
أعتقد كان الصواب بالنسبة لي كراجل عاقل إني افترض كافة الافتراضات بخصوص هذه العائلة الجديدة طالما أنني لا أعرف ظروفهم ماهم بالتأكيد ماكانوش عايزين ينرفزوني أو بيستفزوني والصواب بانسبة لي أن أفكر كذلك يعني أنا غلطااااااااااان

khaled يقول...

سبحان الله
فتبينوا
و ان كان من عند غير الله لوجدوا فيه اختلافال كثيرا

SAKAyAR يقول...

اللي يشوف هموم الناس تهون عليه بلوته ... تصدق طلعت مقولة صحيحة؟؟

يلا اصبر واحتسب

امام الجيل يقول...

صحيح الواحد كتير اوى بيسئ الظن بالناس بعد كده يعرف انه كان غلطان بس ربنا يجزيك خير

خالد وليس بخالد يقول...

سبحان الله العظيم

ان بعض الظن إثم
وفقك الله يا باشمهندس
وبارك في اولادك

اخو الطائر الحزين يقول...

الحمد لله الذى عافانا واياكم مما ابتلى به كثير من خلقه
كلامك صحيح يا اخى كلنا نخطئ حينما ننظر للامور نظره سطحيه ولا نفكر ماذا لو كنا فى مكان الاخرين ولماذا يفعل الاخير هذا التصرف وفى الختام احب اقولك انك فعلا غلطان وده جزائك لان لو كان عندكوا بواب للعماره مكنتش غلطت الغلطه دى وكان هاينوبك ثواب كمان انك شغلت واحد مش لاقى شغل ومكناش هنعرف حاجه عن الموضوه ده صح؟

sharkawoo يقول...

جميل أن نشعر بالآخريين ونساعدهم ... لن في ذلك طعم جميل للغاية ...

ربنا يعينك دائماً علي فعل الخير ...

صاحب البوابــة يقول...

جزاك الله خيراً اخي الكريم

تحياتي

واشكرك لإظهارك لنا هذه المعاني الرائعة