الخميس، مايو 24، 2007

فتوات

رحت أنفذ حجز خط اتصالات اللي أنا حكيت عنه قبل كدة
واكتشفت إن فيه إقبال الشركة اللي أنا رحت لها خلصت العقود اللي عندها وأنا آخر عقد
المهم وأنا واقف مستني تفعيل الخط
دخل واحد قال أنا بقالي خمس أيام والخط بتاعي ما اشتغلش أتاري الموظف كان راكن خطه ونسيه -مش موضوعنا

دخل واحد ما شاء الله طول بعرض بعضلات بصدر مع كل الكماليات من تي شرت وخلافه بس على رأي اخواننا الهنود في السعودية
مخ مافيه سنرمز له فيما بعد باللون الأحمر
- عايز الخط
- معاك الرقم السري
- معايا
- طيب حضرتك تشرفني بكرة عشان العقود خلصت
- كل كلامه بعد هذه النقطة وأيضا قبلها كان يلهث ويتكلم بصوت عال وبسرعة يتداخل معها الكلام في بعضه
- (راقصا) يعني إيه بكرة ...لا الخط ده مش بتاعي ده بتاع سيادة المستشار..........رئيس .......عندكم هنا
- على عيني وراسي بس بكرة ماقدرش عشان الأرقام ما تتوهش مني
-لا بكرة أنا مسافر ليبيا أنا هنا في مهمة آخذ الخط وامشي
-ما اقدرش والله
- بص بقة أنا أجيب لكم سيادة المستشار يتفاهم معاكم هنا......هيه؟ تلزق الستيكر ده في أي حتة وتديني التاني والخط وماليش دعوة
- يشرف يا سيدي بس والله صعب ...أقولك ؟ هات صورة الكارنيه وأنا أفعله لك بكرة
- راقصا (بس جامد المرة دي) ياحلاوتك انت عايز تديني الخط من غير ما تشغله
- طيب أقول لك ؟ روح الفرع التاني عند حزب........
- مقاطعا - ........ الحزب الوطني هو الحزب الوطني ده ورايا ورايا؟ - هذه مدونة نظيفة-
- عصفور (متدخلا ببراءة) لزومها إيه الشتيمة مش خايف؟
- بقولك إيه اسكت انت أنا معايا حمايتي
- عند حزب الوفد
- اروح له ازاي حزب الزفت ده أنا معرفش حاجة هنا
- عصفور : اركب تاكسي وقل له عند حزب الوفد - أنصحك تمشي من هنا كان فيه واحد هنا خطه مااتفعلش بقاله خمس أيام
- ومين حيدفع تمن التاكسيييييييي؟ خارجا يغني
قال له الموظف عند كذا ...
- اخرس بقة ما تشغلش بالك بقااااااااااه

- عصفور : أعتقد أن سيادة المستشار نفسه لا يتعامل بهذا المستوى من التسلط ولكنهم الضعفاء حين يشتمون قدرا من السلطة يتجبرون به على أبناء جلدتهم

رجعت إلى المنزل وتعلوني سحابة كآبة أضاعت فرحة الرقم الجديد وأنا أتخيل هذا الأحمر وهو يجلس وسط أقرانه ويشرح لهم كيف ارتعب الموظف الأخضر والعصفور الرمادي بمجرد أن لوح لهم بأنه تبع سيادة المستشار
قلت في نفسي أرباب السلطة والقوة يعرفون أكثر من هؤلاء المستضعفين التابعين أن هذه السلطة زائلة أو على الأقل هذه النقطة تشغل بالهم أكثر من هذا الأحمر


هناك 17 تعليقًا:

Dr.khaled يقول...

سبحان الله ...
فعلا...الحاشية دايما اللي حوالين الظالم المتجبر...بتبقى واخدة لنفسها وضع

سبحان الله

ليس بين الله-العظيم- وبين احد من البشر نسب ولا واسطة ولا محسوبيات

وهذا من فضل الله عينا وعلى الناس

*********
المهم انا مش هقلب الرد خطبة..
لكن هل الخط الجديد ده فيه ميزات كويسة غير المكالمات اللي بالفيديو؟؟؟

يعني مثلا
التغطية بتاعته..سر الدقيقة وكده يعني؟؟
اصلي عايز اشتري واحد.وبقالي فترة منطوي في البيت :)

************
استاذنك اروح افطر
اتفضل افطر معايا يا اخي
************
سلام عليكم

BinO يقول...

أستاذ عصفور
أيه الكوميديا ديه
بس النمرة فيها كام 6
:)

Alaa يقول...

سلام عليكم
تعرف يا أخ عصفور
هتضحك لما تعرف اني لما باشوف الاشكال دي باضربهم :)
بجد
في مرة كنت في المنصورة و واحد من دول كان راكب بوكس و معدي من قدام مستشفى و ست كبيرة السن بتعدي و سيادته كان هيخبطها

و قام نازل واد زي الفحل يا اخي و قام ضارب الست بالقلم
و انا كنت راكب تاكسي و معدي من البوكس
و بعيد عنك دمي فاار

و اللخ يا أخي نزلت من التاكسي جري و قمت جاري و بكل عزمي و ببوز رجلي (عارف البوز :) ) و قمت شايط اخينا تحت الحزام

و اخينا نزل على الارض يصوت زي العيال الصغيرة

تعرف انه صعب عليا بعدها
ههههههههه
و الله العظيم
المهم اني بعد ما ضربته كنت خايف اكيد من اللي هيحصل
لكن الحمد لله الناس اتلمت و لقيت راجل كبير في السن سحبني في الزحمة و خلاني ازوغ من الموضوع
هههههههههه

المهم بأه يا عم انهم بيدوروا في الشوارع على حس بهواتهم و الواحد من دول يادوب معاه دبلوم و بيفك الخط بالعافية ده ان كان بيعرف يقرأ

بالنسبة للخط الجديد
انا مش عارف اجيب رقمي لان الحجز ب 50 جنيه
أصل الرقم فيه خمس أربعات :)
و كل ما اروح لحد يقولي و الله معندناش الحجز ابو خمسين
و يختم بكلمة واحدة
انتا جبت الرقم دا ازاي :)

و شكله هيروح عليا من كتير قرّهم
و بالنسبة للميزات هو ميزته الكبرى في نقل الداتا و اللي بيتميز بيها الجيل التالت
يعني الانترنت سرعته هتكون خرافية
و كمان نقل الفايلات و ال mms ما بين تليفونين جيل تالت
و اعتقد دي ميزة جامدة جدا
بس أكيد هتكون مكلفة
و خدمة ال tv ممتازة و مش بتقطع زي موبينيل .. أنا جربت موبينيل بس زي الزفت
بس المشكلة ان مش اي حد هيقدر يستخدمها لانها تكلفتها عالية
الدقيقة tv بجنيه
دي أهم المميزات

و ربنا يباركلك يا عصفور بيه :)

خمسة فضفضة يقول...

السلام عليكم ورحمة الله وبركاته

مبروك الرقم الجديد يا باشمهندس
اوعي تكون صاحب الرقم اللي كله اربعات ....ههههه
انا كنت كاتبه موضوع عن الارقام دي

بفلوسي يا كلاب

---------------------------------

اما موضوع الفتوات ده للاسف زاد عن حده اوي ، والناس دي بصراحه فلت عيارها و اي واحد يعرف ولو من بعيييييييييييد حد عنده سلطه بيحاول يتمحك فيه ويفرد عضلاته علي حسه

للاسف الناس دول مش لاقيين اللي يصدهم ولا يوقفهم عند حدهم
والفتنونه دي ليها مظاهر كتير من اول االبادج اللي بيتعلق جنب رقم العربيه وبدلة الظابط اللي بتتعلق فوق الكرسي اللي ورا والكاب اللي بيتحط علي الكنبه لحد تطويل اللسان بالشتائم والبذائات واخيرا تطويل الايد والضرب
ربنا ينتقم منهم جميعا


تحياتي

محمد عبد الغفار يقول...

هى جديده ولا ايه ، المفروض انك اعتدت

عصفور المدينة يقول...

يا أخواني ويا أخوات
والله مش جديدة ولا حاجة الجديد في الموضوع إن الراجل ده كان بيستخدم ريحة السلطة اللي معاه بطريقة فجة مبالغ فيها شكله جديد في اللون وخاصة بيستخدمها مع ناس متعاونة معاه وبعدين موضوع الرقص ده كان خارج السياق خالص أنا استغربت جدا مقاطع رقص بلدي في وسط الكلام
أستاذ علاء (مش أنا)
انت خوفتني منك ويبدو إنك عندك كماليات مساعداك
الرقم الجديد فيه44 بس أبشركم هو في المحفظة ما عجبنيش أوي خاصة الخدمت الجديدة مش كلها شغالة في مدينة العصفور
وبعدين باحاول اتصل بخدمة العملاء مافيش حد بيرد كلها رسايل مسجلة ورحت الموقع بعت لهم رسالة قالوا حنرد عليك في 48 ساعة
دكتورة فضفضة قرات موضوعك في حينها طبعا وكنت كاتب موضوع موازي عن الحمى اللي حصلت في الحجز بس طلع فيه من زمايلنا المدونين ناس خدت 4444 الحمد لله مش 6666

عصفور المدينة يقول...

وبعدين اللي استغربت له إنه سب الحزب الوطني رغم إن العنوان عند حزب الوفد

مشروع انسان يقول...

يعنى هما الناس اتعودوا على كده حتى اذا مفيش تعليمات للموظفين عندهم الثقافة دى ثقافة الخوف والانكسار اتعملوها كويس ونجحت الحكومة فى زرعها فينا من غير ما نحس بالاعلام وخلافه نقول ايه بس

ammola يقول...

يعنى اللى يروح يشترى "خط"اتصالات لازم يكون "خط" الصعيد

نقطة مية يقول...

صدقني اكيد الراجل ده بيفتري على الخلق كدة من غير حاجة الا عشان يطلع اللي مرؤوسيه افتروا عليه فيها و مع الوقت و لان مخه ما في بيفتكر ان ده اساس التعامل..
بس مبروك الخط انا جبت واحد فيه اربع اصفار و انت؟؟
:-)

admelmasry يقول...

وانا اتابع سردك
وحكيك عن هذا الاحمر
.
.
فاجئتني كلمة
( هذه المدونة نظيفة )
فتوقعت جل ما قيل من هذا الاحمر
وابتسمت ولكن لم اظهر اسناني
هكذا
هههههههههههه
.
.
هذا الاحمر لا يعلم
لكل داء دواء الا الحماقة اعيت من يداويها
.
.
.
تحياتي اليك وشكرا لتنويهك
والسلام
ادم المصري
اول دكتور احه
مدون غير منحاز

Just a Reader يقول...

أنا بحس إن الناس اللي بتتعامل كده بتستمد الطريقة دي من اللي بيشتغلوا معاهم ...يعني أكيد لو سيادة المستشار له طبع مختلف عمر ما كان أخينا هيتعامل بطريقة سيئة والله أعلم طبعا.
مبروك على الخط الجديد ودخولك زمن العولمة :)والثري جي اللي الله أعلم ده هيبقى نعمة ولا نقمة.

غير معرف يقول...

اجمل حاجة انه شتم الحزب الوطني هههههههه

غير كده ......فموقف يغيظ فعلا يا استاذ عصفور

Alaa يقول...

ههههههههه
لا الحمد لله أنا مش ابو كله اربعات
انا رقمي
0114x4444x
يعني خمس اربعات بس

و بالنسبة للكماليات ربنا يديك يا عصفور يا حبيبي :)
بتنفع وقت الزنقة
ربنا يستر علينا

عصفور المدينة يقول...

أخوتي سامحوني لا استطيع حذف تعليق دكتور آدم المصري
الراجل مستنكر حملة المدونات النظيفة
http://3mkelhyah.blogspot.com/
وأنا حطيت تعليق عنده أوضحت وهو لم يحذفه فالمعاملة بالمثل أنا أرحب به وارحب بالتعاون المثمر
وإذا كان موضوع مدونات عدم الانحياز ده له بروجرام محدد ندرسه يمكن ندخل ونحط بانر وكدة يعني

محمد يقول...

سبحان الله

ولا حول ولا قوة إلا بالله

مهندس مسلم يقول...

صدقت
اخي وكيل نيابه وهو بيعاني من البلاوي اللي بتدحدف عليه بسبب الجهله دول سواء من العاملين معاه او من الارايب والجيران

بس الناس اللي بتسمحلهم وبتعينهم