كهرباء

عدة أيام والكهرباء مجنونة عندنا وأكيد معها الانترنت بافكر أشوف راوتر ببطارية
الناس حوالينا عندهم الكهرباء تمام ونحن منذ ثلاثة أيام والكهرباء تزيد وتقل وتنقطع وحاجة آخر مناخوليا
طبعا حتقولوا اتصل باﻷعطال... على مدار هذه الأيام اتصلنا عشرات المرات ونفس الحوار
الكهرباء قاطعة عندنا في العمارة لوحدنا وبتقطع وتيجي
طيب يعني هية دلوقت شغالة ولا قاطعة...هي شغالة ﻷ قطعت ﻷ اشتغلت
طيب هابعت لك العربية حالا
الاسم العنوان التليفون
ولا مجيب...
آخر حاجة اتصلت بيهم قلت لهم أنا حاقول كلام وحش (هذه مدونة نظيفة) أقصد يعني: قلت له لو حصل حريقة أنا باحملكم المسئولية
أنا اللي جنني إن كل مرة بيرد علي صوت مختلف هم صحيح شكل بعض (نايمين) بس كل مرة صوت تاني مش عارف أفش غليلي
آخر حاجة قلت لهم أبوس إيديكم تقطعوها عشان كدة خطر.. قعد يضحك
واللي جنني أكثر وهذا هو محور القصة إن كل واحد فيهم كان بيقول لي مش أنا (مع تحياتي لعلاء)
وبعدين تتحول المكالمة إلى جلسة فلسفية وأنا مستغرب إنه مديني فرصة أتكلم ودي كانت بتعوضني عن انقطاع الكهرباء

سعادتك ليه واخد الموضوع بشكل شخصي أنا مش باتهمك بالتقصير ولا أنا باتعامل معاك شخصيا انا باتعامل مع شركة يعني المفروض فيه سجل باﻷعطال والاتصالات وإيه اللي تم إصلاحه وإيه ﻷ وفيه أولويات وفيه حالات طواريء

يقول لي أيوة فيه بس اسمك مش عندي أنا ورديتي بدأت الساعة 10 من ساعتها مفيش حاجة وبعدين احنا بالليل بنطلع طواريء بس
ماشاء الله طيب مادي طواريء
اسمي وعنواني وتليفوني
المهم الساعة 1 بالليل قلت له إيه رأيك أتصل بالنجدة أقول لهم فيه حريقة وماس واعمل لكم دوشة أنا متصل فوق العشرين مرة
قال لي خلاص ربع ساعة العربية حتكون عندك

وبما إني من النوع الذي لم تفقد هذه الكلمات معانيها عندي - ربع ساعة = 15 دقيقة
نزلت انتظرهم في الشارع الساعة 1 وربع ووصلوا بسلامة الله بعد 45 دقيقة
وتم إصلاح العطل والسواق كان نايم وبيقول إن الدنيا حر وهو مش عارف ينام
وردية نوم!!!
وبتوع النهار يظهر بيرحلوا كل حاجة لليل

الراجل واقف على العمود بيصلح وواحد من السكان طلع بفانلة داخلية يقول له أوعى تقطع وصلة الدش وزعق له جامد
!!!!! -هو رمز الوش اللي بيشد في شعره إيه-
أصلا مفيش تلاجة شغالة من يومين وده خايف على وصلة الدش اللي هي متركبة على العمود وسارقين كهرباء من العمود وانا قلت للراجل اقطعها قال لي ما اقدرش قلت له إنت مش موظف في الشركة ودي مخالفة يعني سرقة كهرباء ... ولا عبرني

بعد ما مشيوا والكهرباء جت صاحبا بتاع الوصلة يظهر اتكسف ونزل يسألني أنا دفعت لهم كام حيث ان السكان كلهم كانوا واقفين في البلكونات
المهم قلت له دي حاجة بسيطة قال لي شكرا وسافر

المهم مشيوا من هنا وقطعت الكهرباء عن شقتي لوحدي وهذا من توابع اللخبطة المهم نزلت عافرت معها واشتغلت الحمد لله وكان هذا قبل صلاة الفجر بساعة كملت بقة
الساعة 2 ظهر الخميس
الكهرباء قطعت عن العمارة لوحدها تاني
اتصلت بالشركة .... قاللي عشان أكون واقعي معاك خلينا بعد الساعة 3 عرفت من خلال المناقشات ان عندهم سلم واحد
قلت له أيواااااه عشان تكون الوردية انتهت
قال لي لا والله 3 وربع لو ماحدش جالك ابقى اتصل
اتصلت 3 ونصف
قال لي أيوة انت فلان قلت له أيوة قال لي العربية راحت لك
المهم بعد خمس دقايق لقيت الكهرباء اشتغلت لوحدها واللي قالقني هل هم جم شغلوها من الكشك ولا دي محض ذبذبة مجنونة

اللي يجنن بقة أننا ولنا في هذا السكن 4 شهور لم تأتينا فاتورة وكل ما ييجي قاريء جديد يقول مش أنا أصل القاريء القديم مش عارف ماله وحاضر الشهر الجاي وكدة