الخميس، يونيو 21، 2007

كهرباء

عدة أيام والكهرباء مجنونة عندنا وأكيد معها الانترنت بافكر أشوف راوتر ببطارية
الناس حوالينا عندهم الكهرباء تمام ونحن منذ ثلاثة أيام والكهرباء تزيد وتقل وتنقطع وحاجة آخر مناخوليا
طبعا حتقولوا اتصل باﻷعطال... على مدار هذه الأيام اتصلنا عشرات المرات ونفس الحوار
الكهرباء قاطعة عندنا في العمارة لوحدنا وبتقطع وتيجي
طيب يعني هية دلوقت شغالة ولا قاطعة...هي شغالة ﻷ قطعت ﻷ اشتغلت
طيب هابعت لك العربية حالا
الاسم العنوان التليفون
ولا مجيب...
آخر حاجة اتصلت بيهم قلت لهم أنا حاقول كلام وحش (هذه مدونة نظيفة) أقصد يعني: قلت له لو حصل حريقة أنا باحملكم المسئولية
أنا اللي جنني إن كل مرة بيرد علي صوت مختلف هم صحيح شكل بعض (نايمين) بس كل مرة صوت تاني مش عارف أفش غليلي
آخر حاجة قلت لهم أبوس إيديكم تقطعوها عشان كدة خطر.. قعد يضحك
واللي جنني أكثر وهذا هو محور القصة إن كل واحد فيهم كان بيقول لي مش أنا (مع تحياتي لعلاء)
وبعدين تتحول المكالمة إلى جلسة فلسفية وأنا مستغرب إنه مديني فرصة أتكلم ودي كانت بتعوضني عن انقطاع الكهرباء

سعادتك ليه واخد الموضوع بشكل شخصي أنا مش باتهمك بالتقصير ولا أنا باتعامل معاك شخصيا انا باتعامل مع شركة يعني المفروض فيه سجل باﻷعطال والاتصالات وإيه اللي تم إصلاحه وإيه ﻷ وفيه أولويات وفيه حالات طواريء

يقول لي أيوة فيه بس اسمك مش عندي أنا ورديتي بدأت الساعة 10 من ساعتها مفيش حاجة وبعدين احنا بالليل بنطلع طواريء بس
ماشاء الله طيب مادي طواريء
اسمي وعنواني وتليفوني
المهم الساعة 1 بالليل قلت له إيه رأيك أتصل بالنجدة أقول لهم فيه حريقة وماس واعمل لكم دوشة أنا متصل فوق العشرين مرة
قال لي خلاص ربع ساعة العربية حتكون عندك

وبما إني من النوع الذي لم تفقد هذه الكلمات معانيها عندي - ربع ساعة = 15 دقيقة

نزلت انتظرهم في الشارع الساعة 1 وربع ووصلوا بسلامة الله بعد 45 دقيقة
وتم إصلاح العطل والسواق كان نايم وبيقول إن الدنيا حر وهو مش عارف ينام
وردية نوم!!!
وبتوع النهار يظهر بيرحلوا كل حاجة لليل

الراجل واقف على العمود بيصلح وواحد من السكان طلع بفانلة داخلية يقول له أوعى تقطع وصلة الدش وزعق له جامد
!!!!! -هو رمز الوش اللي بيشد في شعره إيه-
أصلا مفيش تلاجة شغالة من يومين وده خايف على وصلة الدش اللي هي متركبة على العمود وسارقين كهرباء من العمود وانا قلت للراجل اقطعها قال لي ما اقدرش قلت له إنت مش موظف في الشركة ودي مخالفة يعني سرقة كهرباء ... ولا عبرني

بعد ما مشيوا والكهرباء جت صاحبا بتاع الوصلة يظهر اتكسف ونزل يسألني أنا دفعت لهم كام حيث ان السكان كلهم كانوا واقفين في البلكونات
المهم قلت له دي حاجة بسيطة قال لي شكرا وسافر

المهم مشيوا من هنا وقطعت الكهرباء عن شقتي لوحدي وهذا من توابع اللخبطة المهم نزلت عافرت معها واشتغلت الحمد لله وكان هذا قبل صلاة الفجر بساعة كملت بقة
الساعة 2 ظهر الخميس
الكهرباء قطعت عن العمارة لوحدها تاني
اتصلت بالشركة .... قاللي عشان أكون واقعي معاك خلينا بعد الساعة 3 عرفت من خلال المناقشات ان عندهم سلم واحد
قلت له أيواااااه عشان تكون الوردية انتهت
قال لي لا والله 3 وربع لو ماحدش جالك ابقى اتصل
اتصلت 3 ونصف
قال لي أيوة انت فلان قلت له أيوة قال لي العربية راحت لك
المهم بعد خمس دقايق لقيت الكهرباء اشتغلت لوحدها واللي قالقني هل هم جم شغلوها من الكشك ولا دي محض ذبذبة مجنونة

اللي يجنن بقة أننا ولنا في هذا السكن 4 شهور لم تأتينا فاتورة وكل ما ييجي قاريء جديد يقول مش أنا أصل القاريء القديم مش عارف ماله وحاضر الشهر الجاي وكدة

هناك 26 تعليقًا:

Unknown يقول...

هههههههههه
معلش والله مش قادر امسك نفسي وانا قاعد باتخيل المشهد بتاع الراجل ابو فانله ده :D
شركة الكهرباء دي حكاويها بلاوي
ليها موقف معاهم برضه
http://aderaa.blogspot.com/2007/05/blog-post.html
وجاري مركب العداد بقاله سنة كده مجالوش ولا فاتورة ولسه بادئين يدفعوه
ولما بدأو يحاسبوه قالوله عليك 39 شهر مع انه العمارة أصلا مكانتش موجوده من 39 شهر !!

والأشنع من أعطال الكهرباء أعطال التليفونات الساعه عندهم بأسبوع مش بساعه الا ربع!!

بالمناسبة الوش ده ينفع ؟
>:-(

:-@

هنا تلاقي كتير منهم
http://www.englishclub.com/esl-chat/faces.htm

http://www.webopedia.com/quick_ref/textmessageabbreviations.asp#smiley

دنـيـا محيراني(ايناس لطفي يقول...

عزيزي عصفور بدايه دعني اسجل اعجابي الشديد و انا بتابع كل تعليقاتك علي المدونات الصديقه و اتابع قلمك الجميل في مدونتك و لم تاتي الفرصه لتعليق عندك مش عارفه ليه مره النت يعلق مره الصفحه بتغتحش و الحمد الله ان اليوم اتفتحت الصفحه - حضرتك ما تعرفش البوستين الاي فاتوا بذات اثروا في اد ايه ربنا يكرمك
انا حبيت بس اسجل اعجابي و احترامي لكلمات حضرتك
اما بالنسبه لقطه الكهرباء الحمد لله انهم ردوا و وكمان اتوا انا مره قعدنا 3 ايام متواصله مقطوعه الكهرباء و لا حد كان بيعبرنا لنا الله
في حكومتنا الرشيده
تحياتي

مشروع انسان يقول...

ياااااااااه انا كنت ناوى امسح بكرامتهم السيراميك عشانك بس بعد اخر سطر نقول ايه احمد ربنا حد لاقى كهربااا ببلاش كده المفروض نحمد ربنا ونسكت سكتم بكتم
لابجد فعلا انقطاع الكهربا والميا يدل على تقدم البلد دى ومشاريعها العريقة والانجازات العظيمة اللى تمت والحمد لله انا الميا قاطعة عندى دلوقتى وبقالها كام يوم بتقتطع باستمار حاجة مش كويسة بس نقول ايه مش النيل بتاعهم كترررررر خيرهم

أمــانــى يقول...

استاذنا
بعد اذن حضرتك ممكن اضحك
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
لاننى برضو بأعانى من قطعة الكهربة باستمرار ودائما يبقى أكيد حضرتك فى مصر
اقول لحضرتك هما اصلا من المفروض يعملوا احلال وتجديد قبل الصيف طبعا هما لاء الصيف يجى والمحولات خربانة ويا عينى جابت اخرها والمكييفات والثلاجات والمراوح وهلم جر ده بيعمل ضغط
انا بقى عاملة احلل وعملت فيها بتاعتة الكهربة
:D
اقول لحضرتك حاجة جميل اووى اكتب شكاوى واقرفهم فى التليفون اى نعم هما هيرفعوا السماعة بس برضو خلى عندك صبر
احنا بقى الحمدلله قرفنهم لغاية ما جابوا محول مستقل لينا
فليحيا الصــمود فى وجه شركة الكهربة
ربنا يعينك وخلى بال حضرتك على الاجهزة
معلش بقى دولت على حضرتك
تحياتى لحضرتك

أمــانــى يقول...

صح قبل ما انسى لازم حضرتك تروح وتسأل فى الشبكة على الفواتير احسن هما ممكن يجبوا لحضرتك الفواتير متجمعة يعنى غلاسة
وهيقولوا لحضرتك احنا مالناش دعوة بيجى مش بيجى قائ العداد من المفروض تجى تسأل وتدفع
:D
تحياتى لحضرتك

غير معرف يقول...

هذه ليست يوميات عادية ..ههههههه
هذه يوميات مواطن عربي ..

أجمل ما في الموضوع ان الشركة لديها سلم واحد فقط ..
الحمد لله انه في سلم ههههههه

أخي العزيز ..

مع انك اضحكتني هنا ..

غير انني جئت اليك من مدونة الأخ محمد الجراحي معجبة جدا بتعليقك هناك على نداءه بنبذ الفتنة ...
قد لا اتفق معك بكل كلمة قلتها ..ولكنني اتفق مع الأغلب ..
طريقة عقلانية في التفكير تشكر عليها ..فالعواطف الخادعة لن تصنع وحدة للأمة العربية

سررت بالتعرف عليك ..

بارك الله فيك ..

ammola يقول...

الحمد لله الذى عافانى مما ابتلاك به وفضلنى على كثير ممن خلق تفضيلا
لالالالالالالالالالا انتو صعبانين عليا بجد
يعنى ولا تكييف ولا حتى مروحة ولا كوباية ميه متلجة؟؟
ما قلنا تعالوا صيفوا

عصفور المدينة يقول...

باشمهندس أحمد
أنا كنت عارف ان أول تعليق حييجي منك عشان انت مخنوق منهم
أنا لي مغامرة يوم الدي إس إل تكتب بماء المخلل
وبعديم موضوع الوشاش ده أنا زهقت منه من زمان الموضوع كبر أوي
أنا بعد كدة حاكتب الكلمة أحسن

الأستاذة دنيا
مشرفة وإن شاء الله أتابع معك

عصفور المدينة يقول...

أستاذة اماني
انت جنب السد العالي وبتشتكي
إن شاء الله أنا محضر لهم مقلب
حاروح أقنن القراءات أنا
إمام الجيل
جزاك الله خيرا على الفزعة والنجدة
النيل لا بتاعنا ولا بتاعهم النيل بتاع اللي بالي بالك

أستاذة نور كلمات خاصة
عثرت على مدونتك وقرأت ولم استطع التعليق بسبب فايرفوكس
أستاذة أمولا
ولا انترنت ولا أي حاجة
وبعدين لو الكهرباء انتهت والانترنت انتهى والبترول خلص حنعمل إيه
حنروح اسكندرية برضه
؟؟

جهاد خالد يقول...

هههههههههههه
ماهو ده طبيعي طبعا
مافيش كهربا
ومافيش فاتورة
ومافيش ذمة
ومافيش بلد
ومافيش حاجة

بجد ربنا يعينكم
ويعين
.
.
مصر

خالد أبوالفضل يقول...

عااااااااااااااااااااااااااااادي
عااادي جدا
عادي أوي
عادي مطلقا
الأخ بيتكلم زي مايكون كان عايش حياته كلها بره مصر
طب انتو عندكو الكهربا بتقطع احنا عندنا كل حاجة بتقطع وتقعد تتحايل علي أهاليهم ييجوا يخيطوها وكأنهم يا أخي بيدفعوا من جيوبهم
يا أخي صلي علي النبي واحمد ربنا ان عنكو كهربا أصلا
واحمده إنهم عبروك وردوا علي تليفونك ده انت حصللك الشرف .. فأنت أحد القلائل جدا الذين سمعوا لأصوات موظفين الصيانة

خالد أبوالفضل
el-aseef.blogspot.com

عصفور المدينة يقول...

يا خوانا عادي
انقطاع الكهرباء عادي المشكلة إنها عمارة واحدة وتقطع خمس دقايق وتيجي وتعلى وتوطى
وكل المكالمات ردوا علينا وفي اﻵخر مفيش سجل بالأعطال
وبعدين أنا هدفي من التدوينة حتة
مش أنا
كل واحد المهم يطلع سليم
وبعدين برة مصر إيه
انا جلست في السعودية خمس سنوات قطعت الكهرباء مرة واحدة بس في البلد كلها

Alaa يقول...

يبقى أنتا أكيد في مصر

عدى النهار يقول...

المنطقة اللي ساكن فيها مافيهاش كلاب ضالة خالص تقريباً لكن فجأة لقينا كلبة والدة جيش وراكنة بيهم داخل جراج البيت المهم السنترال إدانى رقم أتصل بيه علشان ييجوا يشيلوا الكلاب.. إتصلت بالرقم والرد كان كله زوق لكن مافيش حاجة خالص إتعملت. الكلام ده إستمر يمكن 10 مرات أتصل وأسمع رد زوق ومافيش حل وفى الآخر كان معاد سفرى جه

كله ملخبط يا أستاذ

Gid-Do - جدو يقول...

ابو العصافير

معلش تعليقى بعيد عن موضوعك لانى جيت على السريع ـ كان لازم ادخل المستشفى علشان تقولى ياجدو ـ خلاص بقينا حبايب

اشكرك من كل قلبى على تعليقك ودعائك لى واتمنى من الله ان لاتختبر فى صحتك ما حييت ـ تحياتى

Gid-Do - جدو يقول...

ابو العصافير

الله يبشرك بالخير ـ وانا اللى عمال الم فى الكركوبتين اللى حيلتى واحطهم فى كراتين ـ علشان الشنط غالية حبتين ـ وبقول ادلى على مصر ـ خبر يه ؟

شئ مؤسف ان الناس تدفع تمن خدمة محدد من الشركة وحسب قوانين السوق ان الشركة مسؤليتها تقديم اعلى خدمة بناء على حصولها على الفلوس واذا تم تقصير من المشترك بتقطع عنة الكهرباء وبالتالى اذا تم تقصير من الشركة يعوض المشترك عن فقد الخدمة والتلفيات الناتجة عن هذا ـ فساد الاكل فى الثلاجة مثلا ـ مع الاعتذار من الشركة عن سؤء هذه الخدمة وابداء الاسباب ومتى سيتم التغلب على هذه الاعطال ـ كان الله فى العون ـ تحياتى

خمسة فضفضة يقول...

السلام عليكم ورحمة الله وبركاته

هههههههههههههه

معلش يا باشمهندس
شوف علشان تنتقم منهم انت شويه وتنقل عماره تانيه قبل ما الفواتير بتاع الاربع اشهر تيجي ، وبكده تبقي اخدت حقك منهم


ولا اقولك الطيب احسن ، منهم لله ، انت تدعي عليهم في صلاة الفجر وتسيب المنتقم الجبار ياخدلك حقه



تحياتي

Unknown يقول...

كهربا ميه تلاجة تليفونات انترنت
احمدك يارب
معلش بحمد ربنا على النعم وأسأل الله العافية والسلامة

غير معرف يقول...

ياحبيبي انت منور فعايز كهربا ليه وبعدين السادة الافاضل رجال الكهربا الشجعان (وانت عارف موقفي من الكهربا كطاقة) محتاجين واحد باله رايق ويقعد يتسلى معاهمفبدل من البهدلة ورفع فاتورة التليفون كنت خطفت رجلك لحد مكتبهم الكريم المفتوح 24/7 وجبت واحد على ايدك وساعتها كانت مشكلة السلم طلع لها حل والمسألة بدل السلم ييجي اسانسور وهكذا أو مثلا كنت ميلت على واحد فاضي زيي يجيبهم او او لكن حضرتك انت المخطئ على مبدا واحد تخين داس على رجل واحد رفيع فالرفيع قال له آسف ان رجلي جت تحت رجل سعادتك و....عجبي
Ancient Mariner

sakayar يقول...

يا سيدي اعتبر نفسك قاعد في فرح أبو اسماعيل ابن العمدة
ولو خايف ع الحريق هات طفاية العربية وحطها جنب منك أو شغل مروحة ببطاريات لو التكييف بايظ

رينـــــــــــا يقول...

ينهار ابيض
كهربا تنقطع فى الحر دا
ايه الاهمال دا
ان لله وان اليه راجعون
دا حال المصالح الحكوميه!!
الحمد لله على كل حال

Just a Reader يقول...

أضحك الله سنك :) أضحكتني فعلا :) صحيح الموقف يغيظ بس سردك له مضحك بجد.
صحيح الواحد مش بيعرف قيمة النعمة إلا لما يفقدها. مرة الكهربا قررت تنقطع الصبح وأنا رايحة الشغل وطبعا مكنتش عارفة استخدم المكواه وكان توقيت مش ظريف خالص الحقيقة.
ومرة عليت فجأة ولقيت الشاشة بتاع الكمبيوتر بتطلع دخاااان ودي كانت نهايتها. ربنا يديمها علينا نعمة ويهديهم علينا بتوع مصلحة الكهربا.

abdo يقول...

أنا مش متخيلك وأنت قاعد من غير نت ولا كهربا وخصوصا لما بطارية اللابتوب تفضى ويبقى لانت ولا كهربا
أنا بقى لى حكاية مع الكهربا وكأنهم قصدنى أنا فعد شهر كل يوم خميس أرجع من الشغل ألاقى الكهربا قاطعة ومتجيش غير الجمعة واحنا بنصلى الجمعة وكنت ببقى قاعد زى اليتيم من غير الكمبيوتر وكانو ساعات يفرحوا فى فى البيت علشان الكمبيوتر مش شغال وأبقى مليش نفس أقرأولا أعمل أى حاجة ومتعقد حتى يوم الأجازة مش عارف أقعد أمام الكمبيوتر فى البيت ولما كنت اتصل بالكهربا كانو يقولو ان فى اصلاحات وهتيجى بعد ساعةومكنتش بتيجى غير واحنا بنصلى بس الحمد لله المسجد الذى أصلى فيه به به ماكينة كهرباء فمكنتش مشكلة بالنسبة للمسجد
بس الحمد لله بقالها ييجى شهرين كده معملوش معايا المقلب بتاع الخميس والجمعة
وربنا يستر ورجعش الأسبوع ده الخميس ألاقيها قطعت
وفى مرة من المرات دى كان عندى امتحان دولى يوم السبت والمذاكرة كلها على الكمبيوتر والامتحان ده مالوش ورق أو كتب مطبوعة فقلت لو الكهربا مجتش بعد الصلاة هتصرف
هتصرف يعنى مش هشتكيهم لأ كنت هشوف حد صاحبى أو قريبى عنده كهربا أخد الجهاز واروح له بس الحمد لله الكهربا جت واحنا بنصلى الجمعة كالعادة
وسلام

الطائر الحزين يقول...

السلام عليكم
عرفت بقى فائدة الشغل يوم الخميس راجع نفسك ياعم ولا اقول لك بلاش لحسن تحصل عندنا وتبقى كارثة ما انت فاهم العملية بتبقى عاملة ازاى من غير كهربا وانت عندك لقيت واحد طالع بفانلة احنا عندنا هنلاقى بلاوى
الله يكرمك يا باشمهندس بالله عليك دعواتك

مهندس مسلم يقول...

علشان تبطل تقف على سلوك الكهربا

عصفور المدينة يقول...

مهندس مسلم
جايزة أحسن تعليق