مشاهدة المنة ومطالعة عيب النفس 2

مش عارف هل هي حتبقى عادة ولا إيه - تدوينة ملحقة بتدوينة سابقة
كان فيه واحد كاتب نصائح للمدونين بيقول ممكن ترجع للمواضيع القديمة وتكتب فيها تاني فعلا فكرة حلوة ممكن تعالج جوانب أخرى من الفكرة
كتبت قبل كدة عن بن تيمية لماذا نحبه ولماذا يكرهونه وكتبت عن بن القيم عن كتاب واحد من كتبه بحبه جدا من أكثر الكتب اللي هو طريق الهجرتين

وقلت هناك ليه أنا باحبه (وليه الناس اللي بيحبوه بيحبوه) باختصار يا إخواني أنا لما باقرا له أو باقرا لابن القيم أو غيرهم من العلماء القدامى عقلي بيكون شغال على الخامس ومش بابقى ملاحق الفوائد وأكثر فائدة بتكون في النواحي الإيمانية التطبيقية مش معسول كلام وخلاص لا يجاوز الآذان

المشكلة برضة إني من صغري باكره لغة الصحافة (لغة مواضيع التعبير) وباحس فيها جفاف ..طيب ما هي عامية بس بألفاظ عربية

كتاب الوابل الصيب من الكلم الطيب لابن القيم واحد من كتبه القيمة صغير 142 صفحة على طبعتي المقطعة المهربدة رفيقتي من 20 سنة
الكتاب المفروض إنه عن الأذكار ز كتب الاذكار الأخرى بس هو مش زيهم بداية الأذكار اللي هي اذكار الصباح والمساء وذكر النوم الخ في صفحة 88 يعني عندنا أكثر من نص الكتاب مقدمة يانهار ابيض ع المقدمة دي مليئة بالنفع

بس خلي بالكم ما ينفعش معاها ولا مع كتب بن القيم وبن تيمية والكتب الأصيلة نظام هات م الآخر أو تفوت صفحتين تلاتة ولا يحصل حاجة ...لا مفيش كدة كل جملة فيها فوائد ممكن تكون مكررة بس بفايدة جديدة
القراءة الصحيحة التعمق. طيب ما هو لوأنا حاخذ الموضوع من فوق الوش وبسرعة كدة ماهو حيطير بنفس السرعة دي

الشيخ الحويني كان عامل برنامج وبدأ يشرح فيه باب من صحيح البخاري مع شوية علم حديث وكان في مقدمة الحلقات بيقول عايزين نرقى بذوق المشاهد يعني عايزين نتعمق شوية المهم هو ما كملش في الموضوع وأظن بسبب الناس قالوا الكلام ده صعب..ماشي بس مشروع الرقي بذوق المشاهد ده فعلا فكرة جميلة جدا

وانا باقرأ في كتاب ابن القيم الوابل الصيب مش عارف المرة الكام قلت آخذ فكرة من الأفكار التي في المقدمة أم 88 صفحة فكرة تدوينة وكان أخي الديب في نفس اللحظة ينوه عن الإخلاص - إخلاص النية للعمل


نرجع لموضوع التدوينة هي كلمة لشيخ الإسلام بن تيمية نقلها بن القيم

باختصار والتنفيذ يطول وقد يستغرق عمر الإنسان كله

بيقول إن الإنسان عشان يتجه إلى الله اتجاه صحيح لازم حاجتين

أولا يستحضر نعم الله سبحانه وتعالى عليه.. النعم هذه لا تحصى ولكن أهمها هي نعمة العمل ده نفسه اللي انت ممكن تكون بتعجب بيه وتفخر بيه وتطلب المدح من الناس بيه
شوف مثلا ذكر سبحان الله وبحمده يعني إيه سبحان الله وبحمده فيها أقوال بس منها إن أنت سبحت الله بتوفيق منه سبحانه واصبر وما صبرك إلا بالله فربنا سبحانه وتعالى وفقك للعمل فمشاهدة مة الله عليك في الأعمال وكافة نعم الله سبحانه يجعلك تحب الله سبحانه وتعالى

وثانيا تتفكر في عيوب نفسك مش بس كدة ..لا وعيوب العمل نفسه ونقصانه وعدم رقيه لدرجة الكمال المطلوبة .. وبالتالي تتذلل لله سبحانه وتعالى حتى يجبر تقصيرك وفي نفس الوقت تخليك ما تعجبش بنفسك وتدعي لنفسك أفضال ما هياش فيك لأنه وكما قال الإمام الدعوى حجاب يحجب عن الله والدعوى هي ادعاء الإنسان لنفسه فضل وهذا ما يعرضك ان يخذلك الله ويكلك لنفسك

طيب وصلنا فين ؟..حب وتذلل... والعبودية هي كمال الحب وكمال الذل يعني كل ما تحقق الحب والذل أكثر تحقق العبودية لله أكثر اللي هي طريق الوصول إلى الله شوف ربنا سبحانه وتعالى بيقول عن نبيه في الإسراء
سبحان الذي أسرى بعبده

ثم قال رحمه الله وإنما يستقيم له ذلك باستقامة قلبه وجوارحه وبدأ يفصل في استقامة القلب والجوارح
استقامة القلب بشيئين
1-أن يكون محبة الله عندك مقدمة على كل محبة
2-وأن تعظم أمره ونواهيه(طبعا تعظيما قلبيا قبل الأفعال)وهذا التعظيم ناتج عن تعظيم الله سبحانه وتعالى الذي يأمر وينهى

طيب وازاي أكون معظم للأمر والنهي ؟
2-1- أبعد عن الترخص الجافي (يعني لا أغرق في الأخذ بالرخص والوقوف في الرخص عند ضوابطها الشرعية
2-2- أبعد عن التشدد والغلو
2-3- أبعد عن ربط الأحكام بعلل أو فهم الحكم وربطها بالعقل فإذا ظهرت لي الحكمة من عمل شرعي فهذا يزيد الانقياد وتعظيم الأمر والنهي وإن لم تظهر فالتسليم لأمر الله ونهيه

الخ ماقال رحمه الله


والله المستعان على التطبيق ممكن نقعد نتكلم كثير عن الموضوع لكن عايزين نفعله فعلا في أنفسنا

هل أنت محتاج لأحد يعدد لك نعم الله عليك؟
هل أنت محتاج لأحد يعلمك بعيوب نفسك وعيوب الأعمال التي تعملها؟
خليك فاكر دايما لايغرنك المدح ورؤية الناس .. لا يغرنك صور العبادات وانظر كم حصلت من روحها
وأضفت على ذلك خاصية ثالثة وهي هامة من وجهة نظري
ويطالع أفضال ذوي الفضل ومن هم خير منه ويرى نفسه إلى جانبهم