الخميس، مايو 31، 2007

مانا عارف

عائلة السيد عارف دي منتشرة جدا وكل مدة بتنتشر أكثر وأكثر
شخصية السيد المثقف الذي يفهم في كل شيء ويعرف كل شيء وكل فروع العلوم والثقافة والخبرات والتجارب الإنسانية والغير إنسانية
وسأقتبس كلمات لأحمد فؤاد نجم بغض النظر عن مناسبتها فهي عندي تناسب شخصية العدد!!

مراسح وسيما وجميع الفنون
صحافه ومنابر
وتليفزيونات
وخطبا ف جوامع
وجبنه وزيتون

العلماء زمان كانوا ولا زالوا بيحذروا من ظاهرة التعالم وكانوا يتكلمون دائما عن طلاب العلم الذين يدعون أو يلبسون ثياب كبار العلماء ويقول نرى ونميل إلى كذا والراجح عندنا والذي منه.

ودائما فيه راجل من عيلة مانا عارف دي يحكوا عنه بيسموه
مفتي الخنفشار وهو أحد المتعالمين كان لا يسأله أحد عن شيء في اللغة العربية إلا ادعى علمه وأورد شواهد عيله وأفاض في ذلك فأراد بعضهم أن يوقعه فسأله عن الخنفشار وهي كلمة لا أصل لها فقال : الخنفشار نبات طيب الرائحة ينبت في اليمن ، وهو نبات له خاصية عقد الضرع لدى البهائم فإذا أكلت البهيمة منه انعقد ضرعها فلم يجر حليبها لأيام
قال شاعرهم :
لقد عقدت محبتكم فؤادي .. كما عقد الحليب الخنفشار
وقال فلان كذا وقال الإمام الفلاني كذا إلى أن قال .... وقال رسول الله صلى الله عليه وسلم ........... فمنعوه وأوسعوه ضربا

هؤلاء المتعالمون موجودون في كل زمان ومكان وكل فرع من فروع المعرفة وليسوا في أوساط علماء الدين أو طلبة العلم الشرعي وفقط بل في كل مكان وفي نواحي حياتنا جميعا وفي شوارعنا ومقاهينا وأسواقنا وعلى مكاتبنا ومن خلف جرائدنا

سؤال هام : هي كلمة مش عارف عيب؟

طب ماالناس بتوع مش عارف دول من عيلة الحاج عارف برضة


كلمة "لا أعلم" متعة لا يعلم حلاوتها إلا من تعود قولها في مواطن تعود الناس على المكابرة فيها والتباهي بالتعالم


زميل قرر يفتح شركة فأعطاها اسما وبدأ بالبحث عن المقر واتفق لأخذ وكالة وبعدين قابل واحد فجرب يبدأ دعاية لشركته
فقال له : شركتنا شركة كذا
قال له الرجل : أيوة عارفها.

الموقف ده متكرر في حياتنا كثيرا وبنبقى مش عارفين نعمل إيه هل نحرج السيد "مانا عارف" ولا نسكت ونكتم الغيظ مع فقدان المصداقية والاحترام لذلك الشخص

طيب خذوا هذه : واحد من هذه النوعية مدير حاجة كنت فيها كل ما يقول حاجة يقول "حديث ما معناه" ويخبط الكلام اللي عايز يقوله ويبرر لنفسه إن أكيد فيه حديث بالمعنى الجميل ده.
وبعدين في يوم جاب خطاط يكتب آية قال له اكتب هنا "وكل شيء أحصيناه في كتاب مبين" مر عليه واحد نصراني(مسيحي) زميله قال له مفيش آية في القرآن بتقول كدة رد بمنتهى الصلف : انت ايش عرفك انت إيه دخلك في ديننا جاب واحد أزهري من مرؤوسيه : صحيح اللي بيقوله الراجل ده قال له صح: الآية "وكل شيء أحصيناه في إمام مبين" سورة يس آية 12


المشكلة الأكبر أنك ربما تجد هؤلاء يتطوعون لإبداء نصائحهم وربما يشيرون عليك بما فيه هلاكك أو على الأقل ضياع وقتك واحد شفته كانت امرأة مريضة جدا وهو صمم إن علاجها في الكوسة أم سكر (كوسة مسلوقة بسكر) ...يمكن.. وبحكم سنه كان متشبثا لإنفاذ رأيه.

تقابل مسئول الآي تي في شركة ما ولأول وهلة يتهيأ لك إنك أمام عملاق من عمالقة العصر الملم بكل نواحي الآي تي والواي فاي كمان :) وفي كثير من الأحيان تجده ربما لا يتقن فرعا واحدا - بس سامع-
وهو بس يكون ضارب التكشيرة بحيث يغطي على أنه من عيلة
"مانا عارف"

كلنا عارفين الشوارع شارع شارع ولافين الدمهورية كلاتها .....لعلمكم اللي قالوا المثل بتاع اللي يسأل ما يتوهش دول غلطانين في أحيان كثيرة اللي يسأل يتوه وخاصة في بعض المدن بدون ذكر اسماء يقعد يشرحلك ودقة التفاصيل توحي لك إنه عارف المكان ده غير يشاور بإيده اليمين ويقولك تدخل شمال والعكس
ده إذا أساسا ما دخلش معاك في الموضوع اللي انت رايحه وتدخل لإقناعك بعدم الذهاب أو شيء آخر بديل.
كلنا بنفهم في السياسة ..كلنا بنفهم في الدين بل وبنفتي في الدين كلنا بنجتهد كمان في الدين..كلنا بنفهم في الطب ..كلنا علماء ببواطن الأمور وعلى علاقة وثيقة بمصادر مطلعة ... وإيش دراك انت وكدة يعني

الفضائيات أيضا على كثرتها وتشعبها واضطرارهم لملء الوقت أفسح المجال لهؤلاء كثيرا
خلي بس انفجار يحصل في كراتشي أو طائرة تقع في هونولولو (فين هونولولو دي) ولا بورصة الجاز يحصل فيها اي حاجة وتلاقي السيد "مانا عارف" الباحث والخبير في المتفجرات أو السيد "أيوة واخد بالي" المتخصص في شئون الصندوق الأسود الخ ناهيك عن الباحثين المتخصصين في شئون الجماعات الإسلامية !!

ناهيك عن أن تجد هذه الممثلة أو تلك الراقصة أو ذلك المطرب يتكلم في شئون الدين والدولة والملة ويفتي فيها والحمد لله ربنا راضي عليا وكدة!!!

لا أقلل هنا من شأن الخبراء المختصين فعلا في علم من العلوم ولكن أحيانا يقال تخصص أستغربه جدا يكون مفصل تماما على الحدث

طيب اسمع هذا الحديث الرسول عليه الصلاة والسلام يقول "من تطبب ولم يعلم منه طب فهو ضامن"
يعني إنسان ادعى أنه طبيب وهو ليس بطبيب وبناء على فتواه الطبية شخص هلك او اصابه ضرر يضمن هذا المتطبب يعني يغرم فلوس أو دية اويقع عليه إثم

اسمع هذا الحديث أيضا

عن جابر رضي الله عنه وأيضا عن بن عباس قال خرجنا في سفر فأصاب رجلا منا حجر فشجه في رأسه ثم احتلم فسأل أصحابه هل تجدون لي رخصة في التيمم فقالوا ما نجد لك رخصة وأنت تقدر على الماء فاغتسل فمات فلما قدمنا على رسول الله صلى الله عليه وسلم أخبر بذلك فقال قتلوه قتلهم الله ألا سألوا إذ لم يعلموا فإنما شفاء العي السؤال إنما كان يكفيه أن يتيمم ويعصر أو يعصب على جرحه ثم يمسح عليه ويغسل سائر جسده

أفتوه بغير علم فتسببت فتواهم في موته فأخبر عنهم النبي صلى الله عليه وسلم أنهم قتلوه وقال إنما شفاء العي السؤال
شفاء الجهل التعلم
وقد قال الله عز وجل "فاسئلوا اهل الذكر إن كنتم لا تعلمون" طيب لو كانت الأمور سبهلل كدة واصبحنا كلنا أهل ذكر في كل المجالات مشكلة فعلا
الفتوى الطبية ضررها بدني طيب لو كانت فتوى دينية تسببت في هلاك إنسان او ترخص إنسان

يا إخواننا قبيلة "مان اعارف" هؤلاء أساسا بينهم وبين المعرفة حجاب اسمه "مانا عارف " و"مانا واخد بالي"

المشكلة الأكبر عندما تكون هذه المعلومات التي يعلمها هي موروثات لا أصل لها أو أصلها خرافة أو أصلها عنوان في جريدة أو جلسة منظرة بين وبين أحد أفراد القبيلة الآخرين

ملحوظة : بعد كتابتي هذه التدوينة في المسودة قرأت هذه التدوينة فأخرت تدوينتي عدة أيام رجاء القراءة استكمالا للفكرة

هناك 30 تعليقًا:

الدفاع يقول...

السلا عليكم انا اول مره اكون اول واحد اكتب تعليق فى اى مدونه واحب اقولك ان جميع عائلات مانا عارف و اسمع اللى انا بقولك عليه وغيرها من العائلات الكريهه كلهم مروا علىّ وبخاصة فى بدايه عملى كمحامى وكنت مضطر الى انى استحملهم واسمع وانهل من علمهم الغزير وياما ناس راحوا فى داهيه بس عيلة مانا عارف ولاده ومستمره الظاهر ان الناس دى ليس عندهم اى حياء وعمرهم مابيتكسفوا على دمهم نجانا الله واياكم من شر فتوى الماناعارفين اجمعين

نقطة مية يقول...

مش قولتلك انو توارد افكار و اختلاف في الطرح...بس والله معاك حق تزعل....
ممممممممم

بمناسبة احمد فؤاد نجم كان قال على الصنف ده:
يعيش المثقف على مقهى ريش
يعيش يعيش يعيش
محفلط مزفلط كتير كلام
عديم الممارسه
عدو الزحام
بكام كلمة فاضيه
وكام اصطلاح
يفبرك حلول المشاكل قوام
يعيش المثقف
يعيش يعيش يعيش


(كلمة "لا أعلم" متعة لا يعلم حلاوتها إلا من تعود قولها في مواطن تعود الناس على المكابرة فيها والتباهي بالتعالم)
الجملة دي شدتني جدا و فعلا معاك حق..دائما بستغرب من اللي واثق من غلطه و مع ذلك بينشره و بيحث الناس عليه اكيد لو الموقف بالعكس مكنش هيحب يبقى في الموقف ده و حد بيتسبب ليه في ضرر و لو بسيط..فين الضمير في التعامل!؟..كمان اللي بيحيرني الدوافع اللي خلف التصرف ده..دائما بقول الناس نسيت كلمة "لا اعلم"و افتكرت كلمة"افتى"

احييك على اسلوب الطرح و انا يجي موضوعي ايه قدام الاساتذة
:-)
كفانا الله و اياكم شر المحفلطين المزفلطين كثيري الكلام

عصفور المدينة يقول...

أستاذ أسامة مرحبا بك
فعلا في مجالكم العائلة هذه منتشرة

أستاذة المياه
أولا والله حضرتك أستاذة وأسلوبك ف طرح الموضوع شيق جدا
حاقول حاجة للفائدة من تعليق حضرتك
لاحظت أن أحيانا أذهب لأعلق على موضوع في مدونة فأضطر لنقل كلمة من المقال اضطرارا ووضعها في تعليقي
ووجدت بعض المدونين يفعل ذلك معي
دققت كثيرا في هذه الجمل التي ينقلها المعلقون فوجدت دائما تكون أكثر جملة

طالعة من قلبي

في الموضوع وأعتقد ايضا أن الجمل اللي انا بانقلها في تعليقاتي بتكون طالعة من قلبهم وهذا يحدث أحيانا عندما اعلق عند أحد كلما كنت متأثرا بالفكرة كلما لاقى التعليق انتباها من صاحب المقال
وليس غرضي موضوع الانتباه ولكن أقصد
ما خرج من القلب يصل إلى القلب ومايخرج من اللسان لايجاوز الآذان
فالله المسئول أن ينفع بما نكتب ويكون ميزان حسناتنا

بخصوص عين العبارة
الحمد لله أنا استمتع في كثير من الأحيان بكلمة مش عارف
حتى إن البعض يستغرب من متعتي بقولها بل والبعض يخشى أحيانا أن تخرج مني في مناسبات من اللي قلت عليها
مواطن تعود الناس على المكابرة فيها والتباهي بالتعالم

وأعرف إن فيه ناس تعرفني شخصيا يقرؤون
هذا الكلام ويكذبوني لو باكذب
:)

برضه غرضي أؤكد على الفكرة
إحساس الإنسان بما يكتب

abdo يقول...

السلام عليكم
على فكرة الموضوع ده جميل قوى
وعائلة ما أنا عارف دى منتشرة جدا
يعنى ممكن تلف وتدوخ وتسأل ييجى خمستاشر واحد عن المكان الفلانى وكل واحد يقولك وصف غير التانى ومكان مختلف تماما وخلاص المثل بتاع زمان اللى يسئل ميتوهش ده خلاص اتلغى
اللى يسئل لازم يتوه ومتسئلش ألا واحد تعرفه كويس وتثق فيه
وايه المشكلة ان الواحد لو مش عارف يقولك مش عارف يعنى هو هيبقى وحش ولاهيخس شوية لو قال مش عارف ده بدل ما يساعدك هيتعبك بزيادة
وياريت اللى مش عارف يقول مش عارف ويرفع أيده بأنة مش عارف وميتكسفش وميخافش مش هينضرب لو قال مش عارف
وربنا يبعدنا عن عيلة ما أنا عارف
وأمثالهم اللى بيدعوا انهم عارفين كل حاجة
والسلام

محمد عبد الغفار يقول...

نعملك ايه اذا كنت انت الوحيد اللى مش عارف

حاول تعرف اسهل بدل متخلى كل الناس مش عارفين

ammola يقول...

حاحكى لحضرتك موقف حصل معايا زمان قبل ما يخترعوا الساحل الشمالى.كنا رايحين ابو تلات فى اسكندرية وبعدين ما كانش فى اى يافطة تقول هو فين ولقينا واحد عسكرى واقف عالطريق بينظم مرور طريق مطروح فقلنا نساله "يا عم ما تعرفش فين ابو تلات؟"رد علينا بكل شموخ وافتخار "ايوة ده لسه معدى فى العربية اللى جبليكو علطول"وطبعاجرينا ورا العربية علشان نتعرف على ابو تلات وام تلات.

sherif alashery يقول...

موضوع شيق جدا ويحصل مع الكل الناس في مصر وأكد مصر لان مصر ام الفهلوه والنصاحة وتقريبا المصرين عارفين كل حاجة وصعب اوي يكون في واحد مصري مش عارف في كل حاجة لانه مصري واظن هذة الظاهر موجود في دول اخرى ولكن ليس مثل مصر
وجزاك الله خيرا

Ehab يقول...

يعني حضرتك قصدك تخبط فينا والسلام وعلى العموم
انـــا عـــــــــــــــارف
انت قصدك ايه وفـــــــــاهم كلامك كويس بس يعني فيها ايه ان الواحد يعني يبان ناصح حبتين
هههههههههههههههههههههه
احييك على الموضوع الهايل ده بس انت خلتني اخدت بالي من نقطه مهمه ان ساعات اي حد فينا بتيجي لحظه وهو كمان يلاقي نفسه الإحراج من فكرة الجهل بتخليه يقول ايو انا عارف
اكيد ده غلط بس ساعات الموقف بيخليك تقول حاجات تداري بيها احراجك
بس انا هاحاول ابطل اقول انا عارف ويا ريت تيجي المدونه بتاعتي عارف العنوان
اكيييييييييييييد عارف
ولو مش عارف اسأل اي حد اكيد هيقولك عارف
سلاااااااااااااااااااااااام

Alaa يقول...

المشكلة أن هذه المسألة جعلت الكثير لا يقرأون اصلا اعتماداً على معلومات قالها فلان او سمتعها من علان

تخيلوا قعدت اناقش واحد ساعة و نص عن موضوع الموسيقى و هو كل شوية يقول لي فتوى الدكتور القرضاوي و في الاخر سألته انتا قرأتها
قال لي لأ بس سمعت عنها

كلمة "لا أعلم" هي كنز لانها تدفع الانسان للتعلم و القراءة و الدراسة
اما اخبنا ابو العريف على رأي نقطة ميه فهو عارف كل حاجة يعني مش محتاج يزوة نقطة ميه في بحر علمه :)

و سلام عليكم

eldoctor يقول...

ايوه طبعا .. مانا عارف كل الكلام اللى انت قلته .. واللى ناوى تقوله .. اصلى فاهم .. طرقكم كلها ..
...
تدوينة تستحق التوقف عندها طويلا

ma 3lina يقول...

لا بقى يا باشمهندس كله إلا كده ..

عايزني كمصري أقول مش عارف .. طب دي تبقى عيبة في حقي والناس تاكل وشي ..

دي فلسفة شعب وتقاليد عريقة يا باشمهندس ما ينفعش نتخلى عنها بسهولة كده ...

ههههههههههه

فكرني تعليق الست أمولا .. بموقف بس في القاهرة وسألت العسكري على مكان فوصفه لي وقالي خمس دقايق مشي وتوصل ليه .. وفضلت ماشي ماشي حسب وصفه ومش بوصل لحاجة .. وفي الآخر أخدت تاكسي وعطيته حسب المسافة خمسة جنيه .. الله يسامحه بقى

أمــانــى يقول...

لا ازاى كل الناس مشايخ وكل الناس اطباء وكل الناس محامين وايه تانى كتير
تصدق بقى حضرتك أخدت ساعتين بالظبط وانا لف فى شارع طلعت حرب علشان اوصل الفندق ههههههههههههههههههه
وانا أصلا كنت هأوصل خلاص بس طبعا الناس الحلويين لما سألتهم قالولى ايه اللى جابك هنا ارجعى تانى واصلا انا كنت خلاص قربت وبعد المعاناة قررت هامشى لوحدى وححاول جاهدة اوصل والحمدلله وصلت طبعا كان الساعتين ههههههههههههههههههههههههههههههههههههههههههههههههههههههههههههههههههههههههه
الـــكل عارف

الديب يقول...

هاها ..

تدويمة رائعة

رضي الله عنك وأرضاك في الدنيا والاخرة

:)

غير معرف يقول...

الأخ الفاضل: عصفور المدينة
السلام عليكم ورحمة الله وبركاته
لقد وضعت يدك على مشكلة وسلوك متفشى
بين الكثيرين الآن ..
أبو العريف
الذى يعرف كل شئ ويفتى فى كل شئ
إنه مرض عقلى ..ويروج كلما اشتد الجهل بالناس

فلا تجد عالماً حقيقياً إلا وكان التواضع السمة المصاحبة له
ومن قال لاأعرف فقد أفتى .. أين نحن الآن من هؤلاء

جزاك الله خيراً على ماتقدمه فى مدونتك العامرة من قضايا جديرة بالنقاش وبأسلوبك السلس الراقى

أخوك
محمد

Unknown يقول...

شر البلية ما يضحك فعلا
انت كده عقدتنى من كلمة انا عارف دى انا كده كل ماهاجى اقولها هافتكر التدوينة دى
أختك فى الله بتخلع سنان خلق الله أحيانا بكون قاعدة فى وسط مجموعة عارفة تماما مهنتى وواحدة من الحضور تشتكى من وجع ما فى اسنانها تبدأ مناقشة عامة بينهم عن الطريقة المثلى للعلاج لدرجة انى باستنى ان دورى يجى عشان اقول رأيى انا كمان
عموما لما باسمعها فى اى مجال بيصعب علىّ اللى بيقولها ماعدا فى الدين بتصيبنى بنوع من الحساسية يصعب علاجه
والله المستعان
أختك فى الله أم عارف

الطائر الحزين يقول...

السلام عليكم
استاذى شوف بقى يعنى كنا مع بعض وتخاطر لنا نفس الكلام عن الحديث الى قالة الشيخ وقبيل ما اكتب الرد على التاج كنت مجهز تدوينه اسمها تعميم المفهوم وفوائد معرفش وطبعا انا عارف شكلك لما بتقول معرفش ووقع الصدمة على المتلقى
فعلا طامة كبرى خصوصا فى مجال الطب وبعدين هى عيلة ما انا عارف دى مش بتعمل تحديد للنسل ولا ايه ولا هما بيتشتطروا علينا

Just a Reader يقول...

ولكل عائلة عارف أقول لهم ربنا قال "وما أوتيتم من العلم إلا قليلا" ..."وفوق كل ذي علم عليم" ...الواحد هيفضل لآخر لحظة في عمرة يتعلم سبحان الله ...أصعب حاجة إن الناس بتتمسك برأيها وتفتي رغم أنها لا تعلم...ده من قال لا أعلم قد أفتى ..أعتقد إن ده عيب عصر السرعة اللي احنا فيه ناخد كلمة من هنا وكلمة من هنا ونبقى كده عرفنا كل حاجة ...اللي بس يضايق أكتر إن حد في مجال تخصصة اللي المفروض إنه يكون متعمق فيه يفتي وميعترفش إنه لا يعلم تماما مثل الدكتور الصيدلي اللي أفتى لي باسم دواء غير اللي الدكتور كاتبة في الروشته لمجرد إنه معرفش يقرأ الخط مع إن لو ركز شويه كان لازم يكتشف إنه دواء ملوش علاقة بباقي الأدوية ...مكنش هيجرى حاجة لو اتصل بالدكتور سأله مش شايفه إنها عيب إطلاقا!!
ربنا يصلح حالنا جميعا ويبعدنا عن عائلة عارف :)

أسوور يقول...

والله انت صدقت
فى ناس تقعد تفتى فتى عجيب جدا جدا بدون أى سند
بس برضه فى ناس بتفكر وبتتدبر وتحكم عقلها فى اللى بيتقال

هقولك واقعة تضحك فاكراها من أيام ثانوى
اصل انا على أيامى كانت البنات فى ثانوى بضفاير سيادتك وما يعرفوش حاجة فى الدنيا لكن الفتى طبعا وراثة
كان الحمام بتاع البنات بيتصلح وكنت عاوزة ادخل حمام الولاد وطلبت من زميلاتى ياخدوا بالهم عشان ماحدش يدخل
فواحدة من بتوع دار الإفتاء قالتلى بمنتهى الثقة والخوف ان لو بنت دخلت حمام الولاد ممكن تحصلها حمل
باقى البنات أمنوا طبعا على الكلام وكلهم خوف علية من الفضيحة
:)))))))))))
لكن انا فكرت شوية وقررت اقول ان الكلام دة مش ممكن يكون صح .. ازاى يعنى طب ما أنا بأدخل الحمام فى بيتنا واخويا وابويا بيدخلوا برضه
وكان عندهم المبرر على طول وهو ان البنت مش ممكن تحمل من أبوها ولا أخوها
أنا طبعا ماسكتش .. اصل الفتى وراثة .. فقلتلهم وكلى ثقة .. مش ممكن طبعا نحمل لو دخلنا حمام الولاد .. عشان احنا عذارى
:)))))))))))
هو دة السبب اللى جه فى عقلى

انا هنا باضرب عصفورين بحجر بالقصة دى
الأول .. حكاية الفتى
والثانى .. حكاية الجهل الجنسى والحصول على معلومات مغلوطة من الأصدقاء
ونيجى نقول هو الجواز بيبوظ ليه
تحياتى على البوست خفيف الدم

soosa el-mafroosa يقول...

شوف هو الموضوع ده منتشر و مش عايزة أقولك أد ايه بالذات في مجالنا ..مجال الصيدلة

الناس بتاخد أدوية بالنصح..أدوية ضغط و كبد و كلى و مرارة ..لما فقعولنا المرارة
ماتعرفش حاجة للنهجان
آه خد الشريط الأحمر أبو نقطه صفرا ده هايل جدا

و تكون النتيجة هبوط في الضغط و أزمات قلبية و غيبوبة سكر و كل يوم نتعامل مع الحالات العبقرية دي

اللي بينرفزني أكتر بأه موضوع عدم السؤال على إرشادات الطريق ..خصوصا الرجالة

أنا متهيألي الستات من النوع اللي بيسألوا عن كل حاجة لمجرد السؤال

الرجالة هما اللي معظمهم بيحس انها وحشه في حقه لو قال على أي حاجة مش عارف

أما في الفتاوى الدينية..فحدث ولا حرج

ربنا يهدي الجميع

khaled يقول...

السلام عليكم
كيف حالك اخى الكريم
اشكرك جدا ع السؤال
هى بس كانت شوية مشاغل كتير فى الشغل اخرتنى و ان شاء الله نستمر
على فكرة فى المرات القلائل اللى دخلت فيها ع النت قريتلك كام بوست من اللى فاتوا يعنى تقريبا كده ما فاتنيش حاجة من الحاجات الجميلة و الحمد لله

خمسة فضفضة يقول...

السلام عليكم ورحمة الله وبركاته

يووووووووووووووووووه دي عيلة مانا عارف دي عيله كبيييييييييييييييره اوي ، تعود جذورها مصر الفرعونيه سنة 7000 قبل الميلاد ، وجدهم الاكبر الملك
عا-ريف- رع ، وجه بعديه عا-ريف الاول وبعدين التاني ، لحد ماوصلنا لعارف بيك الكبير مؤسس الاسره العارفيه في العصر الحديث واللي له الفضل في اعادة لم شمل الاسره في شمال وجنوب مصر وتطويرها لحد ما ظهرت بالشكل اللي احنا شايفينه دلوقت
وطبعا اكيد كلكم عارفينه

عيبهم الوحيد انهم ناس خنقه ، بتبقي عاوز تشيل اي حاجه جنبك تديهم بيها في دماغهم

ربنا يرحمنا منهم...ويجعله عار....اقصد عامر

تحياتي

عصفور المدينة يقول...

الأستاذ عبده
مش حتنضرب ما تخافش

أستاذ محد عبد الغفار
مش أنا الوحيد زي مانت شايف يظهر انت الوحيد هنا

أستاذة أمل
حصل لي موقف مشابه وكنت في الزمالك وعايز أروح ميدان التحرير قال لي هو ده ميدان التحرير اللي احنا فيه

أ شريف
أم الفهلوة..

الشنكوتي
منور يافدم وأنا رحت وراك بس وصلت بالفهلوة باتنين كليك
عايز ابعت لي صورتي وأنا ماسك عصاية كل ما تيجي تقول أنا عارف!! تفتكرني

أ علاء
يعني انت رأيك الواحد يحرجهم؟ بس بلاش ضرب؟

الدكتوووووووووووووور
منور وشرف عظيم لنا زيارتك

ماعلينا
هو قال خمسة جنيه ولا خمس دقايق؟

أ أماني
احمدي ربنا ما لقيتيش نفسك في أسوان

الديب
أدام الله ظلك

أ محمد الجرايحي
جزاك الله خيرا أنا باتكسف ساعة أما حضرتك بتعلق عندي والله باحس إن احنا مش قد المقام
شرفنا دائما ولا تبخل بالنصح

الأستاذة مناجاة
ولا الدكتورة مناجاة؟
إيش دراك أنت

الطائر الحزين
وشهد شاهد من أهلها

القارئة المفكرة
شفاك الله وعافاك وبعدين انا سبت لك تعليق من واحد عارف!!

أ ياسمين
شكرا بس بلاش ضرب عصافير أحسن فيه رقابة....رقابة ذاتية

أ سوسا
فعلا مجال الصيدلة أكثر مجال وقبليها بيتمثل دور الطبيب ويكتب دوا وبعدين يشتعل صيدلي ويدي بدائل ومن ثم يشتغل حانوتي

خالد
كنت فين ياض

د فضفضة
دايما تيجي متأخرة
احنا بتقفل البوست أهو عشان الجديد
وفين شجرة العائلة

loumi يقول...

عصفور المدينه
فكرتنى بحكايه
واحد عربى وهو ماشى فى شوارع لندن
جيه يولع سيجارة ما لقاش معاه كبريت
راح وقف واحد انجليزى وسأله معاك كبريت رد عليه وقاله ايوة
وسابه ومشى
العربى جرى وراه وقاله طيب ما ولعتليش ليه؟
قاله انت سألتنى اذا كان معايا كبريت وانا رديت
بس انت ما طلبتش منى اولعلك
قالله ما انا عارف
و هذه كانت بدايه عيله ماانا عارف فى بلاد الانجليز
يا ريت بجد اللى يعرف يقول واللى ما يعرفش برضه يقول
مش حرام والله
تحياتى

أسوور يقول...

أستاذى العزيز
ممش عارفة انا فهمتك غلط ولا صح بتعليقك الصغير
انا لااعتقد ان الحديث عن العلاقات فيه شىء يحتاج لرقابة الا اذا كنا بنتكلم عن علاقات غير شرعية
لا حياء فى الدين
الجهل مالى المجتمع والزواج ينهار وانت بتقول رقابة؟؟
مش فاهمة .. هو حرام ولا عيب ولا غلط الكلام عن ابسط حقوق الإنسان
الجنس لا يحتاج لرقابة يا سيدى منك .. كل ما يحتاجه اطار شرعى واجتماعى وقانونى يسمى الزواج
تحياتى

رينـــــــــــا يقول...

انا دايما اقول لا اعلم ومش عارفه
بس نفسى اتعلم :D:D:D

سجدة يقول...

المفروض يكون فى ثقافة لاأعلم وتنتشر
واللى ميعرفش ميتكسفش انه يقول ميعرفش
كلنا محتاجين نتعلم الحتة كويس
بدل التعليم الكوسة اللى شربناه واحنا صغيرين

نسرين - أمة الله يقول...

السلام عليكم
والله انا اعرف حاجه مش عارفه اذا كانت من حاجات مانا عارف ولا لا
بتقول من قال الله اعلم فقد افتى
بس انا عارفه ان عم عارف مش حيعرف يعرف حاجه زى كده ويقتنع بيها
ده انا مره كنت فى ام الدنيا حبيبتى مصر وكنت بسأل عن شارع قام استاذ عارف ودلينى على طريق والف يمين والف شمال وكده يعنى وفى الاخر رجعت كما كنت مع انه لو قال مش عارف كان يمكن الاقى حد عارف
ان فكرتنى باعلان ابو العريف بتاع محو الاميه

غير معرف يقول...

أخى الفاضل الكريم : عصفور المدينة
السلام عليكم ورحمة الله وبركاته

أشكرلك كلماتك الطيبة ومشاعرك النبيلة
أخى: أنا من يتشرف بتواجده بمدونتك القيمة
وبين كلماتك الراقية

بارك الله فيك وأعزك

أخوك
محمد

BinO يقول...

كلام طيب جداً وحله يأتي في كلمة واحدة
أبتدت بها عقيدتنا
"أقرأ" و كفي

مهندس مسلم يقول...

نتاج طبيعي لثقافة التجهيل التي يعيشها شعب مصر

السؤال :
هل ستربي اولادك على قولة لا اعلم؟

يا ريت كلنا نعمل كده ويبقى الامل في الجيل اللي جي