الاثنين، أغسطس 20، 2007

ولاد الحلال



اليوم الأحد بعد صلاة المغرب مشكلة بالكهرباء كالعادة واليوم قررت مستعينا بالله إني أحلها حل جذري (لأ ويوم الأحد اللي هو أجازة القوم عندنا)
نزلت أدور على كهربائي (واللي يسأل ما يتوهش) لقيت كهربائي بس لقيته نايم تحامل على نفسه جدا وجه معايا
لغى "المنصهر" القديم وهو اللي كان كل شوية يسخن ونغير له سلك - أعوذ بالله منه وأصبحت الشقة شغالة على الأوتوماتيك الداخلي فقط

قلت له هل نركب أوتوماتيك خارجي؟ قال لا داعي تناقشت معه في خطورة ذلك
قال على مسئوليتي ولا يوجد أي مشاكل
وبعدين اليوم الأحد المحلات مغلقة حاسبته وانصرف مشكورا !!!

بعد صلاة العشاء وجدته يطرق الباب قال إن ضميره أنبه وإن الوضع كده كان خطيرا (وأنا كنت أعلم) وإنه حاول أن ينام فلم يستطع وقال إنني لم أبخل عليه بمال فكيف هو يبخل علي بالعمل وإنه اشترى أوتوماتيك (اليوم الأحد) وأتى لتركيبه والتركيب أيضا كان شبه مؤقت.

لقد أصبحنا نفتقد هذا الموقف كثيرا أن يقف إنسان ويقول أصحح خطئي أو أتوب عن ذنبي بأداء حقوق أصحاب الحقوق
تذكرت مع هذا الحدث أحد الناس كان عليه مال لي وجحده ومرت ست سنوات ووجدته في يوم يصلي الفجر معي ويقول إنه ندم ورد علي مالي لكن هذا الموقف ليس قاعدة بل هو الاستثناء
كم مرة توقعنا أن يعود المخطيء لإصلاح خطئه أو التوبة بإرجاع حقوق الناس ولم يأت ذلك اليوم إلا قليلا

(اللهم بلغنا رمضان واجعلنا مهيئين لاستقباله والإحسان فيه)
أدركت حينها أنها دعوة أمي واتصلت بها لأبهجها

تدوينة مرتبطة : أبي وأنا وأصحاب المهن
يلاحظ :أن الصور حجمها مخفض لزوم شد الأحزمة

هناك 43 تعليقًا:

mohand يقول...

السلام عليكم

بس هل الانسان بيستفيد

يعني لو مكنتش انت كويس
وشايفك راجل بتاع ربنا وبتديله فلوسه حقه
كان ضميره مش هينقح عليه

يعني مش مفروض مع الكل؟


بس احييك علي الموضوع والله

maro يقول...

هو احنا و صلنا لكده خلاص بئينا بندور ع اللى بيخطىء و بيجى يصحح خطاه
ع العموم ع رئيك هو فعلا مشكور انه ع الاقل حس بغلطه و مش كبر دماغه
اتمنى قبل اما نوصل للغلط ده نكون صاحيين من الاول
و ع العموم الف شكرا له لانه مش تسبب انه الكهربا تيجى عاليه عندنا تؤدى و لاقدر الله الى تلف الكمبيوتر و يرحمنا من كتاباتك

david santos يقول...

تهاني لعملكم وجيدة الأسبوع

جمعاوى روش طحن يقول...

طيب الحمد لله

إنها جت لحد كده

بيدو يقول...

معنى كده ان لو حد ميقدرش يدفعلو فلوس كتير ضميره هيرتاح وينام ويسيبه يولع
ربنا يستر

Future_Preacher يقول...

سبحان الله
و الله أكيد ربنا بيحب حضرتك
و أكيد برضه العامل ده لازال عنده بقايا ضمير في زمن الضمير فيه الله يرحمه و يبشبش الطوبة اللي تحت راسه

و الله يا بشمهندس ورد علينا من ده
كتير لكن كويس ان ربنا سترها معاك و الراجل صلح اللي عمله
تصور حضرتك أحيانا بقول لابي و امي -من كتر مادقنا من ده كتير قوي - بقولوهم دا انتوا حتلموا لمّ يوم القيامة لما ربنا حيرد المظالم لعبيده
من كتر ما اتسرقنا من اصحاب المهن دول رغم انهم واخدين حقهم و زيادة الضعف و بيتعاملوا احسن معاملة و ربنا شاهد علي ده

تصدق والله فرحت قوي بعمو الكهربائي ده و مش مصدقة انه جاي يلبس نفسه تهمة و يصلح البلاوي اللي عملها كنت مفكرة انه خلاص مفيش ذرة احتمال ان حد عنده ضمير شغال و ممكن يأنب صاحبه

أكيد ده بركة دعاء الوالدة فعلا ربنا يبارك لحضرتك فيها و يلطف بعباده و يسترها معانا

مؤمنه يقول...

السلام عليكم ورحمة الله وبركاته
اللهم اهدنا جميعا قال الله عز وجل (ويريد الله ان يخفف عنكم وخلق الانسان ضعيفا) صدق الله العظيم
والسلام عليكم ورحمة الله وبركاته

طال الليل يقول...

الحمد لله
هكذا يثبت الكهربائى أن الخير موجود وأن الطيبين بخير وكثير ما هم حتى ولو كثر الخبث
الحق أنى خشيت خشية مضاعفة عليكم من الخطر وعليه من عاقبة الغش والتدليس لكن الحمد لله سلمتما كلاكما
ربى لك الحمد

أفكار مسلم يقول...

السلام عليكم
بلله لوأن25 بالميه من الناس قلوبهم
طاهره ونقيه مثل حضرتك والاخوه الافاضل
اكيد كان حالنا تغير كثيرا على العموم هل تعرف الكهربائ سابقاً ؟ إذا كانت الاجابه بلا فمن خبراتى العديده فى التعامل مع العمال أقول لكم انه بنسبه تقل يسيرا عن المئه بالمئه ان الكهربائى رجع البيت وجد مفتاح زياده رجع ركبه لحضرتك لربط
الشغل لغاية لما الناس تفتح وتجيبه
يكمل وانه كان مخطىء اسف انه قالك كله تمام وقفل على نفسه باب الرزق

لا أجزم بأن هذا الكهربائى فعل ذلك
الله أعلم بما فى الصدور
ولكن نسبه من يفعل ذلك كبيره جدا
لذلك أرجوا من الاخوه الكرام التأنى
فى الحكم على تصرفات الناس
وبلاش طيبه وثقه بدون مقومات جاده
حقيقيه لأن عواقبها وخيمه وأرجو ان
تصدقونى لانى اتمنى لكم ونفسى الخير من الله
وأدعوه سبحانه يهدينى وإياكم
والسلام عليكم

DR_SAMBO يقول...

هو غلطان بس ضميره صحا
بس كويس لأن في كتير الضمير مات عندهم أو مفيش من أصلا
أعتبرني صاحب جديد

الطائر الحزين يقول...

ربنا يوقف لك ولاد الحلال

AmatoALLAH يقول...

السلام عليكم ورحمة الله وبركاته
عسى الله أن يغفر للكهربائي ولنا ويرزقنا الإخلاص في القول والعمل
المشكلة إنه أكيد عارف إن الله سبحانه وتعالى لايقبل التوبة المتعلقة بحق من حقوق العباد إلا برد الحق كشرط رابع لقبول التوبة
وبعدين حضرتك حقك مضمون عند من لاتضيع عنده المظالم يوم القيامة من حسناته
واضح إن الراجل حسبها صح .. أخيراً ياراب يصلح ضمائر كل العباد وتكون الاخلق الحسنى هى السائدة في التعامل بين البشر اللهم آمين

المهـ إلي الله ـاجر يقول...

ده علشان انت رجل طيب يا بشمهندس فعلشان كده ربنا سخر لك من يطيب نفسه لك


ولا شك أن في هذا الامر لفتة اخري ليس فقط تركيزنا النظر علي موقف الكهربائي ولكن للنظر لموقفك .. فلقد تعاملت معه بحسن خلقك المعروف واسديت له اجره الكامل فبذلك أؤثقته ببرك وحسن خلقك فأحييت بداخله شيء اوشك علي الموت فبارك الله فيك

أحمد الدرعه يقول...

ياه موقف غريب والله ان لسه في ناس زي دي :)


انا لسه حالا كنت باتكلم مع واحد صاحبي علي مواضيع العمال والصنايعيه بس في ناحيه تانيه سلبية وهي
مسألة افتقاد الامانه في الشغل وانه يبقي (قلبه ع الحاجه) اللي بيعملها
مثلا يا سيدي لسه امبارح زارعين نخل أو بمعني أدق ناقلين نخل جديد أمام بيتنا وبعد ما خلصوا تلاقي منظر عجيب من اكوام الرمل والتراب والطوب مكانه عمليه تثبيت النخل ولا واحد فيهم فكر انه ينظف ولو قليلا مكان عمله , مساله تقفيل الشغل أو بالفرنكوا اراب تفنيش الشغل والحس الجمالي ضايعه تماما

Mohamed A. Ghaffar يقول...

حقاً انا سعيد رغم انى غير قادر على تصديق وجوده فى حياتنا

ولولا انك رويتها ما صدقتها

اليعقوبي يقول...

شئ صعب علي الانسان انه يرجع ويقول انه خطا او اخطاغ في حق شخص
بس فعلا الاصل ان ربك يااستاذنا بيسلط ابدان علي ابدان
يعني واحد ابن حلال زي حضرتك تعامل مع الراجل بادب واغدق عليه فتجده ضميره انبه ورجع يصلح الغلط
وده دليل علي ان الادب افضل مليون مرة من الزعيق والعنف والمعاملة السيئة مع الصنيعية
احرج الانسان مع اخلاقه تظهر اخلاقه
والسلام ياستاذي

سكتم بكتم يقول...

روح يابني ربنا يوقفلك و لاد الحلال ويسلكلك طريقك

أكيد هي دي دعوة الحاجة ليك

لأن هي دي بردك دعوة الحاجة عندي

مجهول يقول...

الحمد لله
العامل ده طلع عنده ضمير صاحي ولو قليلا بس قدر يغلب ضعفه ويفوق في الوقت المناسب

ياه
لو كل انسان عمل المطلوب منه بضمير

احييك علي سردك البسيط
وفكرته القيمة

محمود الدوح يقول...

الناس دلوقت بتقول
الاعتراف بالحق رذيلة
لازم يبقى فى وقفة مع الناس دى

نسرين - أمة الله يقول...

السلام عليكم
استاذنا عصفور المدينه انت فعلا ممكن تكون شويه ريحتنى نفسيا انا كتبت موضوع لسه منشرتهوش بس كان محسسنى بقله الامان وان الواحد مش عارف يثق فى مين
انا متشكره ليك بجد
ربنا يوقفلك ولاد الحلال ويجازيك خير

Maha يقول...

بسم الله

السلام عليكم

فعلا سبحان الله .. هذه الأمور أصبحت نادرا هذه الأيام ..
الضمير المتيقظ
والاعتراف بالخطأ
وتصحيح هذا الخطأ

طبعا أساس كل هذه الأمور تبدأ من التربية .. التربية لم تعد تربية صحيحة في مجتمعنا للأسف .. لذا ترى حولنا كل هذه ال.. ماذا أقول!

اصرار أمل يقول...

سبحان الله ...
عجبا لزمن أصبحت الأمانة فيه من العجاائب !!!!!!!!

hend يقول...

جزاك الله خيرا على ما فعلته

حـنــين يقول...

قلب لغــزة
هل تعرفون، ماذا يعني مدينة بلا كهرباء؟
غـزة منذ يومين بلا كهرباء
مستشفياتها، منازلها، مؤسساتها التعليمية والصناعية، متاجرها، شوارعها
غزة الجائعة تختنق في الظلام
أدعو الجميع
بوقفة أحتجاجية
بتعتيم المدونات ليوم واحد
الخميس
وعلى كل من يعرف اللغات الأجنبية
الإنجليزية والفرنسية والأسبانية والألمانية... وغيرها
رجاء ترجمة هذه الدعوات وإيصالها للمدونين الأوربيين
مع أرسال نسخة للأخرين لتوزيعها
ربما أستطعنا توصيل صوتنا لمن يشاركنا الحب والغضب في اوروبا

Jana يقول...

باشمهندس
هذا نتيجة دعاء الحاجة ربنا يحفظها...وصلاة الفجر فى وقتها
قرأت التدوينة الاخرى
اكثر من رائعة
وتذكرنى بزوجى ..حيث دائما ما يضع يديه فى وسطه هو ايضا...حين يفكر فى اختراع جديد او فكرة جهنمية لتصليح اى شىء فى المنزل
واصبح انا وقتها (بلية) خاصة وقد تعلمت الفرق الان بين المفك الصليبة والمفك العادة

لى اقتراح بأن تضع لانسز بدلا من النضارة
فى مثل هذه المواقف

تحياتى

حراس الحقيقة يقول...

سبحان الله .... الضمير مش محتاج فقر ولا غنى ولا تعليم ولا جهل
يعنى مفيش حجه للغلط

أمــانــى يقول...

اســتاذنا
هو فعلا ممكن يكون فى حد يعترف بالخطا دلوقتى بيتهألى صعب ومش كتير ولو حد اعترف هيلاقى اللى يرحب بأعترافه ويرحمه ولا هيستغل اعترافه
جزاك الله خــيرآ وربنا يخلى الوالدة ويديها الصــحة ياااااااااااارب آمــــــــــــــين
واوعى تنسى حضرتك ان ربنا اكيد هيعينك لان حضرتك بسم الله مشاء الله شوف بقى بتعلم كام واحد دلوقتى
تحــياتى لحضــرتك

عصفور المدينة يقول...

وعليكم جميعا السلام ورحمة الله وبركاته

mohand

سبحان الله إنها صحوة القلب مهما كان السبب الرجل في المرة الثانية كان مختلف تماما عن الأولى
maro

طبعا أخي مارو أصبح عملة نادرة
ضحكت جدا عندما قرأت هذه العبارة في تعليقك وحسن ظني بيقول إنها غلطة
و يرحمنا من كتاباتك
والمقصود يحرمنا
بس جت ع الجق
:)

david santos

THANKS

جمعاوى روش طحن

الحمد لله على كل حال

بيدو

سبحان الله ممكن ولكنه دورنا في حسن التعامل

Future_Preacher

داعية المستقبل
أسأل الله حبه وحب من يحبه
الراجل واضح عليه أنه من المصلين وذكر في كلامه أنه مواظب على صلاة الفجر
سبحان الله يا أخناه اي واحد يعالج هذه الأمور يرى العجب ويبقى شايف الغش ومش قادر يقول له انت كذاب
التدوينة والله كان عنوانها
يوقف لك ولاد الحلال
وبعدين اختصرت لأن دي دعوة الوالدة

مؤمنه

اللهم آمين وفعلا كلنا لنا لحظات ضعف

طال الليل

جزاك الله خيرا
فعلا عاقبة الغش تكون مضاعفة وربما تتعدى قيمة ما أهدره من مال

أفكار مسلم

كلامك صح ولكن أنا لست الخب ولا الخب يخدعني إن شاء الله وأنا فوتها أول مرة بمزاجي عشان أعدي اليوم ولكن الله أخذ بناصيته وقد عاد لابس نظارة وجايب عدة ولابس ملابس الخروج يعني فيه قرائن إنه ضميره صحي
وبعدين انت ماقريتش
لماذا عصفور المدينة
أنا عصفور بن بلد ولكن ساعات بيكون مش قدامك غير حل واحد
والراجل الشهادة لله لم يأخذ قرشا زيادة على ثمن المفتاح وسألت عنه بل وصلح لي أشياء أخرى لم يأخذ مقابل بتبان يا استاذنا

DR_SAMBO

وما أكثر الناس ولو حرصت

الطائر الحزين

دعوة والدتي
AmatoALLAH

نعم أختاه وهو ما أردت أن أنوه عليه مع اقتراب رمضان التوبة والبرؤ من حقوق العباد

المهـ إلي الله ـاجر

أحسن الله إليك على حسن ظنك الدائم
فيه ناس لا يؤثر فيهم المعروف إلا جشعا

أحمد الدرعه

انت عارف يا احمد لازم يبقى فيه خير
لكن الغالبية انت عارف رأيي

Mohamed A. Ghaffar

والله حصلت بالحرف يا أستاذ محمد
ومنورنا بابتسامتك

اليعقوبي

فعلا الإحسان نوع من التسليط
زي ما قال أخونا المهاجر
أنا عاملته كويس فعلا وأعطيته زيادة


سكتم بكتم

والله يادكترة هو ده كان العنوان وهي دي دعوة الوالدة
أما دعوة والدة الوالدة فشيء تاني خالص
حاقوله بعدين

مجهول

جزاك الله خيرا
وفعلا الحمد لله ونفسنا الناس كلها ضميرها يصحى

محمود الدوح

فعلا كثير زي ما انت بتقول
بس الخير موجود

نسرين - أمة الله

ربنا يوقفلك ولاد الحلال ويجازيك خير
وما تحزنيش ولا تكتئبي الخير موجود


Maha


الضمير المتيقظ
والاعتراف بالخطأ
وتصحيح هذا الخطأ

بل يا ابنتي
وقبلهم حب الإتقان
اصرار أمل

نعم يا استاذة هو ذلك الزمن أصبح يشار للأمين ويحكى عنه

hend

جزانا وإياك ومشرفانا

حـنــين

والله يا أختي أنا أعرف قيمة الكهرباء وسوف أشارك

Jana

نعم أستاذة هذا دعاء الوالدة
سلامي إلى الأستاذ كثيرا أنا أحب هذا النوع من الرجال جدا

حراس الحقيقة

هو نور الله يقذفه في قلبه العبد
ولمة الملك يدعو الإنسان للخير
ولكن أيضا يوجد أغنياء يغشون ويسرقون ويطمعون

أماني

فعلللللللللللللللا
انت حطيت إيدك على مشكلة كبيرة المفروض اللي يغلط ويعترف بغلطه يلاقي تشجيع وده عنصر هام أدى لاختفاء هذا الخلق إن الناس بقت شرسة

مصراوي أوي يقول...

فعلا بقت الاستثناء مش القاعدة بتفق معاك

بس تحدث عن الخير ينتشر واجمل ما فيها ان حضرتك تحكي عنها لانها ممكن تمس واحد فعلا مقصر سواء في شغله او عليه فلوس لحد او..أو...

بس ليه حضرتك تعلم ان هناك خطورة وسيبت الامر ببساطة كده؟؟؟هل ثقة فيه؟؟

بالله المستعان يقول...

ربنا يجريه خير عن موقفة
ما شاء الله عليه

بوست متميز كعادتك
تناقش امور حية

عصفور اسكندرية ( المواطن المطحون ) يقول...

يا ربي
انتوا لسه شغالين بالمنصهر ابو سلكه نحاس

ولما تركب اتوماتيك يبقي داخلي

معلش يا استاذنا الفاضل العيب عندك من الاول
مفروض تعمل ريسيكل للكهرباء اول باول

والحمد لله ان الراجل ضميره صحي
اما حكايه ان دي خطر ولا لأ فعادي
مش خطر خالص بالنسبه للي احنا فيه من فوضي كهربائيه في البلد
من اسلاك بايظه واعمده مطفيه

bastokka طهقانة يقول...

ربنا يكتر من امثاله و يشفي الضماير المريضة

anwar يقول...

فعلا أولاد الحلال لم يموتوا..!!!
لكن علينا نكثرهم بالكلمات الطيبة الشاكرة....
ومدونتك هذه تزيدهم إن شاء الله
مدونتك جميلة وسأحرص على زيارتها باستمرار بإذن الله
أخوك
د.أنور الشلتوني

FadFadA يقول...

السلام عليكم
ورد عن السلف : " المؤمن يحاسب نفسه، ماذا أردت بأكلتي ، ماذا أردت بشربتي ، ماذا أردت بأكلتي ، ماذا أردت بنومتي ، والفاجر يمضي قدما لا يعاتب نفسه
جزاكم الله خيرا

عازف الناى يقول...

بما انك قرينى فى السن
اكيد مر عليك بيت الشعر
لا تقولن اذا لم ترد ان
تتم الامر فى شىء نعم
---
فجميل قول نعم من بعد لا
وقبيح قول لا من بعد نعم
========

عازف الناى يقول...

ملحوظه
ايه السنه اللى نقصت فى سنك دى ؟؟
كنت حاسب غلط ؟؟
ولا تهرب ضريبى ؟؟

eldoctor يقول...

المال الحلال لا يضيع

عصفور المدينة يقول...


مصراوي أوي

فعل أخي ماجد التحدث ونشر المحاسن يزيدها والتشجيع
والمطلوب أن نتحدث أحيانا عن الإيجابيات
:)

بالله المستعان

جزاك الله خيرا وأنتم جميعا تناقشون مواضيع حية وربنا يصلح الأحوال إن شاء الله

عصفور اسكندرية ( المواطن المطحون )

لا خطر طبعا وخاصة في حالة زيادة الحمل
وقد حدثت حوادث بمثل هذا السبب
واحنا لسة شغالين بالمنصهر بس سوف يتم التعديل إن شاء الله بس لما نقبض

bastokka طهقانة


ربنا يكتر من امثاله و يشفي الضماير المريضة
وربنا يهدي العاصين والظالمين لغيرهم برد المظالم


anwar


فعلا أولاد الحلال لم يموتوا..!!!
شرفتني أخي الحبيب الغالي د أنور والله سعدت جدا بتعليقك ولقد أنار قلبي برؤيته

FadFadA

استغرب فعلا كيف يعيش من يأكل أموال الناس بالباطل
ولا يحاسب نفسه

عازف الناى

طبعا أخي مر علي وأنت ذاكرة ذلك الزمن
ولكن الناس يستكبرون التراجع لأنهم يكونون متعمدين مصرين

عازف الناى

غلطة اليوم مكان الشهر
وبعدين انت عارف
ما بتفرقش السنة لو عشر سنين كانت تفرق
ألا ليت

eldoctor


المال الحلال لا يضيع
جزاك الله خيرا ولكنه يضيع أحيانا في الدنيا
وعند الله تجتمع الخصوم

قلب أبيــض يقول...

السلام عليكم استاذنا
فى البداية
ياريت كل واحد يانبة ضميرة زى صاحبنا يرجع ويصلح اللى عملة
ولو دا حصل
مصر كلها اكيد هتبقى بخير
بس فين يا عم الحاج
احنا فى مصر
انا بصراحة مش عارف اعلق
بس يارب حضرتك تكون فاهمنى
جزيت خيرا استاذنا

BinO يقول...

السلام عليكم ورحمة الله وبركاته
أعرف أن مقصر
ثيابي يعني
:)
وعذرة حقاً
أخي في الله
معذرة
أتمني ان تكون بخير حال
وأتمني لك طيب العيش
-----------------------------
أقسم بالله أني كتبت تدوينتي الأخيرة قبل أن أقرأ تدوينتك
:)
وبعدين دخلت لاقيتك كاتب نفس الكلام
:)
بس والله لسه فيه أمل

كرم مسلم يقول...

السلام عليكم

مشكلة كبيرة قل من يعود فيها اللى الصواب

(اللهم بلغنا رمضان واجعلنا مهيئين لاستقباله والإحسان فيه)
آمين
آمين
آمين

sa7arkash يقول...

ايه ده

هو لسه فيه كده؟؟؟

انت متاكد انك كنت صاحى مش نايم...هه
والله انا حاسسه انك بتتكلم عن المستحيل

وخاصة بكل اسف فى فئة الحرفيين....وان كان الضمير مات عند الكبير قبل الصغير

طبعا مش الكبير فى السن

عصفور المدينة يقول...


قلب أبيــض

وعليكم السلام ورحمة الله منورنا
إيه اللي حصل في مدونتك
أنا فاهم طبعا انك عايز تقول إن دي حالة شاذة ومش في مصر بس وفي الهند كمان


BinO

نعم بينو فيه أمل
من قال هلك الناس فهو أهلكهم
ومش أول مرة توافق بيننا

كرم مسلم

وعليكم السلام
أردت بدعائي اللهم بلغنا رمضان أن أنبه أن التوبة واجبة من حقوق العباد

sa7arkash

أيوة فيه بس نادر جدا
صاحي والله هو فيه حد نايم بيصور
ودورنا ان احنا نصحصح الناس