الخميس، أغسطس 16، 2007

DSL

مندوب شركة النت جاء أمس للتحصيل ودار بيننا حوار كنت حريص أن يكون طويلا قدر الإمكان لكي أعطله وأضيع وقته بالدرجة الأولى وذلك من أجل إيصال رسالة للشركة أن التعديلات المقترحة سوف تكلفهم مالا كما هو معلوم أن وقت العمالة يساوي فلوس
وثانيا محاولة يائسة للوصول لأي قدر من المعلومات عن تصور للشكل المستقبلي للوضع

بداية كان الوضع أشبه بمظاهرة لوجود عدد كبير من زملائي مشتركين وكانوا متواجدين

كان قبل ذلك ندفع كل شخص في يوم اشتراكه وأخذوا الشهر الماضي تكملة لضبط المواعيد على 15/7 في انتظار التخفيضات
ثم جاءت التخفيضات السالبة كما علمتموها جميعا

طبعا تم تغيير المندوب والمندوب الجديد ينكر أنه تم تحصيل الفترة الزائدة لأجل التخفيضات وإنما لأجل استخدامهم لبرنامج محاسبي جديد ويتطلب ضبط جميع العملاء على يوم 1 أو يوم 15

قلت له كويس جدا انا بقى عايز اكون يوم واحد ومش دافع غير نص شهر لحد أول سبتمبر
قال لي طيب ومن أول سبتمبر ؟

قلت له حاحول على النظام المحدود أو أعمل كانسل للاشتراك
قال لي مش مشكلة الشركات دي مش بيهمها

ذكرت له أمثلة عن شركات غنية وتسعى للمزيد من الربح وحاولت أن اكسر له النقطة دي تماما لعلمي أن الحرب النفسية للهيمنة تبدأ بنشرهم هذه الثقافة عندنا يعني ثقافة إن احنا اللي محتاجين وهم مش محتاجين

قلت له لا سهلة عندي واحد يديني وصلة ب 25 جنيه وأنا اصلا مش محتاج النت وممكن أقعد من غيره شهور
:(
اكدت له برضه على إني مش لوحدي وإن فيه ناس كثير واخدة نفس القرار وإن الشركات لازم تعرف إن النظام كدة مش حينفع

برضه عرفته إن 95 جنيه كثير علي جدا وعلى استخدامي وأنا اشتركت أساسا وتركت الوصلة طمعا في التخفيضات المرتقبة

قال لي حول على النظام المحدود وتشحن بكروت لما يخلص الاتنين جيجا

قلت له وماألاقيش كروت والكروت تشح وكدة وتقول لي ارفع اشتراكك وسألته سؤال لم يستطع الإجابة هل لو شحنت كارت وما خلصتهوش الرصيد يترحل وبعد إلحاح أفاد أنه لن يرحل وبتبدأ الشهر الجديد بالاتنين جيجا الجداد

قلت له طيب أنا حادفع نص شهر لغاية أول سبتمبر

قال لي إني لازم أحدد من دلوقت نظامي الجديد إزاي وإن لو حولت للنظام المحدود مش حينفع ارجعه تاني يا إما اشترك بخط تليفون تاني

قلت له يا أخي ده اللي بيغير دينه عايزين تخلوه عادي يغير ويرجع كذا مرة وانا مش حاعرف أغير نظام اشتراكي أفهم من كدة انك بتحاول تبعد الناس عن النظام المحدود!!!
قال لي اصلها صعبة وعايزة إجراءات وأنا مش باحاول أوجهك لنظام معين

قلت لا حول ولا قوة إلا بالله دي إعدادات في الحساب على الكمبيوتر انت قاعد في وسط مجموعة متخصصين على أي حال يبقى الحال ساعتها إني ألغي اشتراكي واشتغل بوصلة

قال لي مش مشكلة قلت له بس ساعتها مش حاكون لوحدي دي مجموعات كبيرة حتاخذ نفس الإجراء

طبعا كان فيه محاور بنلف وندور حواليها زي إنهم مراعيين كل الناس اللي احتياجاتها عالية واللي احتياجاتها عكس عالية

ومن ناحيتي إننا اقوياء ومش حنموت من غير نت وإن الوصلات اللي هم عايزين يحاربوها حتزيد وإني وغيري على استعداد لإلغاء الاشتراكات (ومش حاتكلم عن مستوى الخدمة)

ومن ناحيتي برضه إن أنا مش متحامل عليه شخصيا وإني غرضي إن هذا الكلام يوصل للشركة وإني طولت عليه قول طول وكدة

وهو قال إن ناس كثير بتقول نفس الكلام وإنه بيوصل للشركات

ومن ناحيتي برضه كنت حريص ألا أدفع أكثر من أول سبتمبر وقد كان

واتفقت معه على أن يكون اشتراكي من أول الشهر محدود

انتهى الحوار مختصرا والمقصد هو الإزعاج قدر الإمكان لوصول الرسالة أن هذه التعديلات لم تدرس أحوال المستهلكين ولا تأخذها في الاعتبار .


وجاري الآن مراقبة حجم البيانات التي أستهلكها لحساب المتوسط الشهري لاستخدامي المنزلي الذي هو عبارة عن تصفح عادي ونادرا ما أقوم بعمل دونلود والمتوسط الآن 10 ميجا في الساعة يبدو إن الاتنين جيجا حيكفوا

وسوف اقوم بإيقاف عرض الصور وأيضا أستخدم
Adblock extension for firefox
لمنع ملفات الصوت التي في الخلفية وأعتقد ممكن يفيض عندي رصيد من الاتنين جيجا لو حد عايزهم
ويعيش التقشف

هناك 19 تعليقًا:

عازف الناى يقول...

يعنى انت بدأت مرحله شد الحزام
على العموم احنا هنبداء نقلل من الصور جدا
ويجب ان نساعد بعضنا البعض للحيلوله دون الوصول الى حاجز ال 2 جيجا المقدسين
وانت خير من يقوم بعمليه الارشاد التى سبق ونشرتها سابقا
ولو زاد منك كام ميجا فكه ابعتهم فى ساندويتش من النوع الالى علشان عيش التموين الاسمر فيه قضيه
بس الخوف من المزعجه بتاعه
نأسف لقد نفذ رصيدكم

ma 3lina يقول...

اتنين جيجا في الشهر يعني لازم نعمل كونترول على التحميل بحيث غنه ما يعديش 70 ميجا في اليوم

من يوم 5 في هذا الشهر وأنا براقب التحميل عندي على جهاز المكتب اللي بيفضل مفتوح من الساعة 9 إلى الساعة 5 تقريبا يوميا . يعني سبع ساعات

متوسط التحميل في السبع ساعات دول هو 90 ميجا يوميا .. مع وجود الصور وتحميل عادي لبعض أفلام اليويتيوب أو البرامج اللي محتاجها أو أكواد برمجة

يعني كده مش حيفيض ابدا


:(

ممكن آخد اللي حيتبقى

عدى النهار يقول...

البيع والشراء وإخضاع الزبون لإرادة البائع "الشركات" فيه كلام كتير جداً

بس إنت ماشاء الله عليك واضح إنك تعرف تلاعب العالم دى صح
(:

دكتور حر يقول...

سلاماتي
يا باشمهندس عصفور

انا صراحة كان نفسي افهم اكتر ازاي نتعامل مع الموضوع الجديد بتاع النت ده
فياريت تشرح فيه شويه

الأمر الثاني يل ؤيت حضرتك تبعتلي اللينكات اللي متعلقه بموضوع التدوين اللي قلتلي عليها

ولكم كل الود

مشروع انسان يقول...

ازيك يا بشمهندس
ايه الاعلان اللى عن الدروس الشرعية دى مش قلنا مفيش اعلانات
ططططططططططططططيييييب
خلينا انا الصغير واعديها مش مشكلة :)
معلش انا مشغول شوية بس هتابع معاكم
وجزاكم الله خيرا

AliMorning يقول...

هذه اضافة للفايرفوكس تحجب الفلاشات في المواقع, وفقط تشغل الفلاش اللي انت تريده

http://flashblock.mozdev.org/installation1.html

http://downloads.mozdev.org/flashblock/flashblock-1.5.4.1.xpi

محمد عبد الرحمن يقول...

السلام عليكم
تماما معك ياأخى لابدمن مواجهة الاستغلال بالإستغناء او التلويح به فهوسلاح ممتاز وفعال كما فى مسألة المحمول وإلى حين أن تثمر الحملة لنتقشف جميعا عملا بنصيحتك هنا وفى تدوينة عن التدوين
دمت أخى فى خير وعافية
سؤال سريع ما مدى شرعية الوصلات

Unknown يقول...

طب ايه الداعي للتغير من أصله خليك علي النظام الحالي ويبقي الوضع علي ما هو عليه ؟!!

لحظة يقول...

مش هن رجعوا قالوا ان العقود القديمة هتفضل زي ما هية للي عايز؟ يعني هنفضل ب 95 جنيه في الشهر لسرعة 256 ومفتوح على طول؟
وان التخفيض للي عايز عقود جديدة
نورونا الله يخليكم

لحظة يقول...

وبعدين لو حتى كده بس قفلوا التحميل ب 2 جيجا
تحميل يعني اعمل داون لوود
والا داخل فيه الصور والصوت اللي بتظهر عادي اثناء التصفح؟
يعني مش هاقدر اسمع محاضرة او اشوف حاجة اون لاين منغير ما اعمل لها دونلوود الا في حدود ال 2 جيجا؟
وده بقى داخل فيه عمل مجرد سيف للصفحة او للصورة
؟ مش فاهمه

أمــانــى يقول...

والله يا أســـتاذنا مش عارفه اقول ايه غير حســــــــبنا الله ونعم الوكـــيل
انا لسه ما اشتراكتش بس عايزة ليها حسبة علشان اشوف اشتراك ايه الافضل لان كده شكلها العملية هتبوظ خااااالص وربنا يسترها معانا
ماكنتش متخليه انهم بيكرهوا الشعب كده حســـــــــبنا الله ونعم الوكـــــــيل

زحل الفلكي يقول...

شغالة الواسطة 100 فل
بلا نظام محدود بلا وجع دماغ ولو اجبرونا على المحدود يبقا بلاها نت خالص

:)

اسف اني مش برد في مواضيع حضرتك بسبب ظروف صعبة هذه الفتره ولكني متابع جيد للمدونة

تحياتي

mohand يقول...

السلام عليكم

اجمل ما فيك
تأقلمك مع المصائب

ربنا يزيدك حكمه

واحنا مش ضعاف


كان فيه فيلم كارتون اسمه حياة حشرة

كان بيتكلم عن النمل والجراد
في الاخر النمله عرفت انها قويه وقالت بالحرف
احنا مش خدامين عند الجراد
انتوا اللي محتاجينلنا

وانا بقولك
هما اللي محتجين لنا


تحياتي

الطائر الحزين يقول...

انا فى مع الوصلة لو كانت وحلة

اقصد لو كانت وحشة

تحياتى

شباب روش طحن يقول...

أنا مريح دماغي وقاعد في مقاهي الإنترنت المنتشره ولله الحمد بكثره

Jana يقول...

السلام عليكم
اسمحلى استغل خبرة حضرتك..واسأل سؤال
هو انا لو متعودة ادخل على مدونات معينة وكان فيها الميوزيك والصور والحاجات دى
مش انا اول مرة دخلتها اتحملت عندى بالفعل
وبعد كده مهما دخلتها تانى مش حتاخد نفس المساحة فى التلويد
الكلام ده سمعته مرة
وعايزة اعرف صح ولا غلط؟؟
سؤال تانى ..
مفهمتش رد حضرتك على تعليقى فى تدوينة التمر باللبن
ما المقصود بجملة (هذه عبارتك) شكرا مسبقا على اجابة السؤالين
تحياتى

بنت القمر يقول...

السلام عليكم نفس لسئله اختى لحظه الله يخليك

كدا وبتاع يقول...

مممممم انا سمعت ان الاتنين جيجا دول مش تابعين للتصفح ... بس طبعا الموضوع داخل فى البروتوكولات وحوارات النت وقعدت اتناقش مع واحد فى القصة واتضح انها مش هتنفع يفصلوا الدونلود عن التصفح لانه نفس البروتوكول اصلا فى الاخر !

بجد احنا قريب هيبيعونا فى مزاد علني

لازم نعمل حاجة

Islamist Bloke يقول...

هو فيه برامج بتراقب السرعة وكمية الحاجات المتحملة على الجهاز؟

عشنا وشوفنا

حتى النت هيعدوه علينا

حسبي الله ونعم الوكيل

لو فيه برامج زي دي ابقى قوللى يا عم عصفور

بحبك

والسلام